Mk 15

Yesũ e Mbee wa Vilato

(Mat 27.1-2,11-14; Lk 23.1-5; Yoa 18.28-38)

1Kwakya kĩoko tene, athembi anene nĩmoombanie o kwa mĩtũkĩ na atumĩa, vamwe na amanyĩsya ma Mĩao na andũ ala angĩ ma nzama onthe, nĩ kana masũanĩe vamwe. Nĩmamwovie Yesũ moko mamũtwaa na mamũnengane kwa Vilato. 2Vilato nĩwamũkũlilye Yesũ atĩĩ, “We nue Mũsumbĩ wa Ayuti?” Yesũ amũsũngĩa, “We nĩwaneena.”

3Athembi anene nĩmamũsikatie Yesũ maũndũnĩ maingĩ, 4na kwoou Vilato amũkũlya ĩngĩ, “We ndwĩ na ũndũ ũsũngĩa? Kweew'a maũndũ ala meũkũsikata namo ũndũ maingĩvĩte!”

5Ĩndĩ Yesũ ndaasũngĩa ũndũ o na ũmwe, na kwa kĩtumi kĩu Vilato aseng'a.

Yesũ Aitw'ĩĩwa Kũawa

(Mat 27.15-26; Lk 23.13-25; Yoa 18.39—19.16)

6Kĩla ĩvinda ya Mboka ya Vasaka, Vilato nĩwathaĩasya andũ mwovwa ũmwe o ũla meetya. 7Ĩvinda yĩu vaĩ mũndũ ũmwe weetawa Valava, woovetwe vamwe na ing'endilĩ ingĩ moaĩte andũ ĩvinda kwaĩ ithokoo. 8Ĩkomano nĩyookie na yamũkũlya Vilato eke o ũndũ wakothaa kwĩka, 9nake ayĩkũlya atĩĩ, “Nĩmũkwenda nĩmũthaĩsye Mũsumbĩ wa Ayuti?” 10Ameie ũu nũndũ nĩweesĩ nesa kana athembi anene mamũnenganĩte Yesũ kwake nũndũ wa kĩwĩu.

11Ĩndĩ athembi anene mathing'ĩĩsya ĩkomano yĩkũlye Vilato ayĩthaisye Valava vandũ va Yesũ. 12Vilato nĩwaneenie na ĩkomano ĩngĩ ayĩkũlya atĩĩ, “Mwĩenda nĩkane ata na ũla mũndũ mũkwĩta Mũsumbĩ wa Ayuti?”

13Ĩkomano nĩyalonzanilye yasya, “Mwambe!”

14Vilato ayĩkũlya atĩĩ, “Nĩkĩ, ekĩte ĩvĩtyo yaũ?” Ĩndĩ malonzanĩĩlya mũno mayasya, “Mwambe!”

15Vilato nĩwendie kwendeesya ĩkomano, na kwoou ayĩthaĩsya Valava, na ĩndĩ amũnengane Yesũ akũnwe ivoko na kwambwa ngelany'onĩ.

Asikalĩ Maimũvũthĩĩsya Yesũ

(Mat 27.27-31; Yoa 19.2-3)

16Asikalĩ nĩmamũtwaie Yesũ na mamũlikya nyũmbanĩ nene ya ngavana, na meeta nguthu yonthe ya asikalĩ. 17Nĩmamwĩkĩie ngũa ndune, na mamwĩkĩa ngovia maseũvĩtye na tũũvonge twĩ mĩw'a. Nĩvo ĩndĩ mambĩĩie kũmũkethya na kĩvũthya maimwĩa atĩĩ, 18“Ũvoo waku Mũsumbĩ wa Ayuti!” 19Nĩmamũkũnie mũtwe na ndata na mamũtw'ĩlanga mata, na matulya ndu mbee wake ta meũmũthaitha. 20Mamina kũmũthekeea, nĩmamumisye ĩla ngũa ndune na mamwĩkĩa ngũa ila syake. Nĩvo ĩndĩ mamumaalilye na mamũtwaa makamwambe.

Yesũ Ayambwa Ngelany'onĩ

(Mat 27.32-44; Lk 23.26-43; Yoa 19.17-27)

21 # Alo 16.13 Me nzĩanĩ nĩmakomanie na mũndũ ũmwe kuma Kũlene weetawa Simioni, ĩthe wa Alekisanda na Lũvũsi, aumĩte ndũanĩ okĩte Yelũsalemu. Asikalĩ nĩmamũkuĩthisye ngelany'o ya Yesũ. 22Nĩvo ĩndĩ mamũtwaie Yesũ vandũ vetawa Ngolongotha, ĩla ũalyũlo wayo nĩ, “Vandũ va kĩng'ala.” 23Me vau nĩmamũnengie ndivai ĩvulanĩtw'e na ndawa yĩtawa manemane, ĩndĩ alea kũnyw'a. 24#Sav 22.18 Asikalĩ nĩmamwambie ngelany'onĩ na maana ngũa syake kwa kũkũna kula, nĩ kana mamanye ngũa ĩla mũndũ ũkwosa. 25Mamwambie Yesũ ta saa itatũ sya kwakya. 26Vau ngelany'onĩ ĩũlũ vaĩ maandĩko mawetete ũndũ ũla Yesũ wasikatĩĩtwe: “MŨSUMBĨ WA AYUTI.” 27O ta ũu asikalĩ nĩmambie ing'endilĩ ilĩ vamwe na Yesũ; kĩmwe ngalĩko ya kw'oko kwake kwa aũme, na kĩla kĩngĩ ngalĩko ya kw'oko kwake kwa aka. [ 28#Ĩsa 53.12 Kwa nzĩa ĩsu Maandĩko Matheu nĩmeanĩie ala maĩtye, “Nĩwoosiwe kwĩthĩwa mũvĩtany'a.”]#15.28 Maandĩko amwe ma tene ma Ndeto ya Ngai nĩmatiĩte mũsoa ũũ.

29 # Sav 22.7; Sav 109.25; Mk 14.58; Yoa 2.19 Andũ ala mavĩtĩlaa vau nĩmathingithangasya mĩtwe yoo na kũtavya Yesũ syuo nthũku maimwĩa atĩĩ, “Ĩĩ! Ũnaasya nũtonya kwananga Ĩkalũ na ũiyaka ĩngĩ na mĩthenya ĩtatũ! 30Ĩtangĩĩe yu na ũitheea wume vau ngelany'onĩ!”

31O ta ũu athembi anene na amanyĩsya ma Mĩao nĩmamũthekeeie Yesũ. Nĩmeeanaa atĩĩ, “Nĩwatangĩĩie andũ angĩ, ĩndĩ ndatonya kwĩtangĩĩa we mwene! 32Nengĩ newe Klĩsto, Mũsumbĩ wa Ĩsilaeli! Ndathee yu kuma ngelany'onĩ twone na nĩtũũmwĩtĩkĩla.” Ing'endilĩ ila syambĩtwe vamwe na Yesũ o nasyo nĩsyamũtavasya syuo nthũku.

Kĩkw'ũ kya Yesũ

(Mat 27.45-56; Lk 23.44-49; Yoa 19.28-30)

33Kuma saa sita sya mũthenya kũvika saa kenda, nthĩ ĩsu yonthe nĩyameisye kĩvindu. 34#Sav 22.1 Saa kenda syavika, Yesũ nĩwakayie na wasya mũnene asya atĩĩ, “Eloi, Eloi, lama savakathani?” Ũalyũlo wayo nĩ, “Ngai wakwa, Ngai wakwa, ũndekee kĩ?”

35Andũ amwe maũngyĩ vau vakuvĩ meew'a ũu nĩmaisye atĩĩ, “Kweethukĩĩsyei, eĩta Eliya!” 36#Sav 69.21 Ũmwe woo nĩwasembie ainda kasivonzi ndivainĩ ngaatu na akatonyeesya mũtĩnĩ, amũnengeleelya Yesũ aviviite na asya atĩĩ, “Tweteelei twone kana Eliya nũkũka amumye ngelany'onĩ.”

37Yesũ nĩwakayie na wasya mũnene na akw'a. 38#Kuma 26.31-33 Kavindanĩ o kau kĩtambaa kĩla kyatilanĩtye Ĩkalũ nĩkyatembũkanĩle katĩ kuma ĩũlũ kũvika nthĩ. 39Mũnene wa asikalĩ ĩana ũla waũngeme vau aimũsunga Yesũ, oona ũndũ wakw'a nĩwaisye atĩĩ, “Kwa w'o mũndũ ũũ eĩ Mwana wa Ngai.”

40 # Lk 8.2-3 O ta ũu vaĩ aka amwe masyaĩĩsye me kũasa, namo maĩ Meli Makitalene, Salome na Meli inyia wa Yose na Yakovo ũla mũnini. 41Aka asu maĩ aatĩĩi ma Yesũ, na nĩmamũtethasya yĩla waĩ Kalilii. Vau vaĩ aka angĩ ala mookanĩtye na Yesũ Yelũsalemu.

Kũthikwa kwa Yesũ

(Mat 27.57-61; Lk 23.50-56; Yoa 19.38-42)

42Syũa yĩtanathũa nĩ kana mũthenya wa Savato wambĩĩe, na Ayuti o maendee na kũwĩyũmbanĩsya, 43Yosevu kuma Alimathea nĩwaendie e na ũkũmbaũ vala ve Vilato, na amũkũlya amwĩtĩkĩlye athi akavete mwĩĩ wa Yesũ. Yosevu aĩ ũmwe wa atumĩa ma nzama ya Ayuti na wanengetwe ndaĩa mũno. O ta ũu nĩweeteelete kũka kwa ũsumbĩ wa Ngai. 44Vilato nĩwaseng'ie eew'a kana Yesũ nĩwakw'a mĩtũkĩ o ĩsu, na eeta ũla mũnene wa asikalĩ ĩana amũkũlya kana nĩw'o Yesũ nũkwie. 45Amina kũĩkĩĩthw'a nĩ mũnene ũsu wa asikalĩ, nĩwamwĩtĩkĩlilye Yosevu athi akavete mwĩĩ wa Yesũ. 46Yosevu nĩwathooie suka ĩtumĩtwe na ndii nzeo ndũmu, na athi atheesya mwĩĩ wa Yesũ kuma ngelany'onĩ. Nĩwaũlingile na suka ĩsu na aũthika mbũanĩ yasĩtwe ĩvianĩ. Nĩvo ĩndĩ wavingilitilye ĩvia ĩnene, akunĩka mũomo wa mbũa ĩsu nayo. 47Meli Makitalene na Meli inyia wa Yose nĩmasyaĩĩsye na moona vala mwĩĩ wa Yesũ wathikwa.

נבחרו כעת:

Mk 15: KAMBA

הדגשה

שתף

העתק