APOSTELNYU THO 16
16
Timothi Le Paul Lope Sila Au Zen Kegun
1Tsüselo a-le Derbe lo Lustra hvu nyu gun ntsin; hire, senthyükelonyu a-zan le Timothi tse kethyü nme le tsünyu bin; a-le Judanyu tenunyu tenyenlo kelanyu nme nyu; ai a-pvü we Grik nyu. 2Timothi tsügü tsü le Lustra lo Ikonia nyu kebin npvünyu ju le a-zo ngwasa kehünyu nme. 3Lo Paul le a-zen hü nyülo; lo tsükipon keyhun Judanyu dan genyu a-le Timothi girü. Kechamvule anyugun aphu a-pvü le Griknyu tsekethyü sha kü kebin genyu. 4Lo au le rünyi nyu gunkeryü ka Jerusalem nyu kebin apostel nyu lo kehun pelü dan le anyugun no zen hülo tse keshü dan jo tsü pe anyugun ka zoshü. 5Tson-o kehun dan le anyugun ketenyen nkolo njüo khenyütsen mele anyugun sin gwen gwen tselo la.
Paul Le Tsemin Ki Thakehyu
6Tsüsika Kenshün Kapu le au no Asia nyu jo gü sen-o zomvu kela genyu, au le Frugia lo Galatia kazü pvüthü gunzhü. 7Tson-o Musia mhundyü ki gun kezhü ka au le Bithumia nyu gun nyü bin. 8Ai Jisu Kapu gü le au no gun mvula; tson-o au le Musia nrhi sen tse Troa nyunshye la. 9Lo tsükatsü khejenyu Paul le tsemin ki tha nme hyu; lo tsügü tsü le Makedonia nyu nme le a-hi tenge tseo, “Makedonia nyu gunryüo agun keche shü lo!” tsonshü. 10Tsügenyu Paul le tsü hyushü ntsin, Sunggigü le ano Makedonia nyu ka jolokegwa gü pe me senthyüshülo tseo ako bin nyo, tsekethyü rüchünlo njüo a-le tsü nyu kegun rhilo.
Ludia Le A-nyunkelu Kelo
11Tsügenyu a-le Troa nyu tsonchü nzhü sen tse Samothra nyu gunlo njüo tsüsinyü Neapoli nyu. 12Lo tsünyu tsü gungü Romnyu le rünyi thyükelo Makedonia nyu rünyi kegwagü Filipi tilo. Tson-o a-le jon keshanyu rünyi tsünyu tsü binlo. 13Lo tsükatsü Sabbath jon nyü a-le chwida ngwen ki chwigü, züri se nme ka kehi kethyü rüchün-o gungü tsünyu kebin ka tenunyu dan me tsünyu ryü kelo dan zen kenthon. 14Lo a-zan le Ludia tsekethyü Thiatira nyu phi kemeren jwen kehü, Sunggigü rüshvu kehünyu nme le a-khwen nyü bin. Npugü le tenunyu tsügi nyun thyükeyhun sashü njüo a-no Paul le jozo keshü dan tsü nyü kegwa thyü külo. 15Tson-o a-ko lo a-kaminyu aphu anyugun baptaiz thyülola ntsin a-le a-ko tenge tseo, “Hale ano Npugü ketenyen nyu letse yatselo aka nyu ryüo tsünyu binlo ta,” tson-o a-le a-hoshü mvu ketsin thyülo la.
Filipi Nyu Dokethyü
16Tsüsika agun le kehikethyü bin nyu gunkezhü ka temvunyu kapu zen kehü lünyu nme le ryüo a zen ketenolo; a-le a-temvu genyu a-npunyu no chwisa lohü. 17Tenunyu tsügi le Paul lo agun sithen nra sen-o, “Temi hidan hile aphuso keda ketsingü Sunggigü gonyu dan le, hidan hile kenikelo tsongü zope hagun hi kehünyu dan le!” tson zoshü. Tson-o a-le jon kethon ki-e tsühontse hü tinla. 18Ai Paul le a-le a-kevü sarilo kela genyu rani gü tsügi kapugü ka, “Ale Jisu Khrista zan sen-o nno a-ge chwiryüla lotse zoshü le,” tsonshü ntsin a-le tsü gwünkho ka tinchwila.
19Ai a-npunyu le a-ge a-kechwi ndikela shalo njüo anyugun le Paul lo Sila au tenlo njüo au nrhisü zen-o hakethyü bin nyu kedanyu dan mhundyü ka gunla. 20Lo anyugun le au zen-o Jokera kehünyu mhundyü nyu gunlo ntsin anyugun le, 21“Temi hihvu hile Judanyu le, lo au le ngun Romnyu no tejvü kemvu thyü lo zenlo tseo tsü pe me senthyüo rünyi gwün kevü sarilo laso.” 22Tsontsin temi dan le aphu kengüo au ge anyugun kenyümvu lola.
Lo Jokera kehünyu dan le au ge au phinya yhola njüo thün pe au vülo tse hukum khishüla. 23Tson-o anyugun le au vü salao au zen gü doka nyu khinlao doka kekhwenyu no au khwen petsü sa binlo tse zoshü la. 24Lo a-le ahza tsühontse kethyü hyulo njüo au zen gü doka kaqünki khinla, tson-o sen pha kekhin pe au pha khenla.
25Ai khejenyu tsangluka Paul lo Sila au le kehi thyü lo lüthyü tseo Sunggigü shwenshü, lo tsükatsü donyu dan le au khwen nyü bin. 26Lo tsükatsü kazü nni pe ketetsin thyü gunryüla, tson-o doka tsü sükenun pe ketetsin thyüla. Tsontsin doka kakhin aphu kenihela; lo tsünyu kebin nyu aphu anyugun kephin le shwe küla. 27Tsontsin doka kekhwen kedagü le chonsoryüo doka kakhin kenihe kenjü hyulo njüo, do dan tsüle tinla so tsekethyü rüchün-o a-npvü a-zhethon süthope a-dushvula titse sola. 28Ai Paul le nra a-yhenthyüo, “Nle n npvü ndushvula nya chi, agun aphu hinyu bin kü bin zun le,” tsonshü.
29Tsontsin doka kekhwen gü le nton gungü mah khilo njüo nshvu pe dündün tse Paul lo Sila au mhundyü nyu nkhüntsü gü zhülo la. 30Tson-o a-le au zen chwiryüo, “Keda hvu, kenilo nrün genyu ano nyuthyülo mvulo shvula?” tson.
31Tsontsin au le, “Npugü Jisu tenyenlo, tsonlo yatselo nko, lo nkaminyue sin-o kenilo ti.” Tson-o au le Npugü jo lope a-ka, lo a-ka nyu kebin nyu aphu ka zoshü. 32Lo tsüsika tsüje tegikevüja tsügü ka a-le au zen gü au kevüshvu tsü sü küla. 33Tson-o anyugun nyu kerhün thyü a-nyu kaminyu aphu Jisu zan nyu baptaiz thyü kü lola. 34Tsontsin a-le au zen gungü ketyüketsü pe au tsüo a-nyu kaminyu aphu zen-o Sunggigü tenyenlo njüo anyugun shekerhün thyü tinla.
35Lo tsangbenlo ntsin Jokera kehünyu dan le rikhunyu nishüo, “Temi tsühvu tsü no tinla lo!” tsekethyü zola lotse kethyü zoshü.
36Tsontsin doka kekhwen kedagü le Paul ka, “Jokerashü kehü dan le hai no tinla lotse kethyü jo le gunryü bin nle; lo tsügenyu hai le chwio hai nyun bwen nyetse gunlo nye.”
37Ai Paul le tsüdan ka, “Anyugun le ajokera mvuo, ale Romnyue, süda dan nyu avüo akhipe doka nyu shülao; ntsoka kebuo ahoshü nila titse hü nle? Tson loho le; anyugun no anyugun npvü gunryüo ahoshülo.”
38Tsontsin rikhunyu dan le jo tsü sen gü jokerashü kehü dan ka zoshü; lo tsüdan le au le Romnyu tsekethyü shalo ntsin nshvu sa lola. 39Tson-o anyugun le ryüo au ka anyugun shwikenjün hi sola. Tson-o anyugun le au zen-o kamhun ki chwio au no anyugun rünyi nken tinla lotse hi tenge tse sola. 40Tsüselo au le doka nyu chwilo njüo Ludia ka nyu yüo au pvünyu ju hyulo ntsin anyugun nyun thyü kepeche sashüo tsünyu tinla.
נבחרו כעת:
APOSTELNYU THO 16: REGSBSI
הדגשה
שתף
העתק
רוצים לשמור את ההדגשות שלכם בכל המכשירים שלכם? הירשמו או היכנסו
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.