APOSTELNYU THO 15
15
Jerusalem Nyu Kehun Pelü dan Kehun
1Tsüsika Judia nyu kebin temi dan me le nshyeryüo Antiok nyu kebin npvünyu ju senthyüo, “Mosa jvü hontse hagun ko hagun girü kemvu we kenikeloi ndi,” tson sola. 2Tsügenyu Paul lo Barnaba au le tsüdan zen kenyio anyugun jo kerhün khemvula ntsin Paul lo Barnaba au no temi peha zen nilo njüo Jerusalem nyu nsin gü apostelnyu lo kehun pelü dan ka tsü rüla ketsolo tseo kenthonlo.
3Tson-o kehun le anyugun zen gungü tsonki shü njüo, anyugun le Fonikia lo Samaria pvüthü sen-o Juda kemvunyu le nyunkelu kelo rüla pe meka zoshü; tson-o anyugun genyu ketenyen nyu aphu no sherhün salo. 4Tson-o anyugun le Jerusalem nyu gunlo ntsin kehun gü lo apostelnyu dan lo kehun pelü dan le anyugun zenlo. Tsontsin anyugun le Sunggigü le anyugun zen hüo tha lihi thyükelo aphu pe zoshü. 5Ai tenyenkelo Farisinyu dan nyu peha le, “Juda kemvunyue no anyugun girü lo anyugun ko no Mosa jvü zenlo tse zo kethyüi le!” tson sola.
6Tsüselo apostelnyu lo kehun pelü dan le gungü kequenlo njüo tsürüla kenthon. 7Tson-o anyugun le kenthon salo ntsin, Pitor le anyugun ka, “Hire, apvünyu ju, hagun ko sha bin ti, Sunggigü le amün nyu Juda kemvunyue no jolokegwa gü shalo njüo tenyenlo nrün genyu hagun dan nyu nduka nyu akejülo laso. 8Lo me nyun-e sha kehügü Sunggigü le age thyükeshü hontse Kenshün Kapu khipe anyugun tson tsinshü laso. 9Tson-o A-le ketenyen sen-o anyugun nyun thyü nshün shüo tsüdan lo ngun tse thyü pe kekho mvu laso. 10Kha, tson yatselo hagun le ngun-e lo ngun pvünyu dan ko tse pvülo ho kela gü gunda kekhen pe senthyükelonyu gunda ka shüo nyuthyüo Sunggigü kenyükemvu thyü ti ola? 11Tsonkethyü gü mvule ngun-e tsüdan hontse Npugü Jisu le shwikenjün genyu kenikelo hyulo titse kethyü tenyen bin nyo.”
12Tsontsin temi tsüdan le nyü tseo, Sunggigü le Paul lo Barnaba au zen hüo Juda kemvunyu dan nyu tha zansü lo ndun tho thyükeshü au le sogü tsü rüla zokeshü khwen nyü bin. 13Lo au le zothüshü ntsin James le niso gü, 14“Hire, apvünyu ju, hagun ko akhwen nyülo! Sunggigü le a-npvü Juda kemvunyu dan nyu temi dan me kope A-zan shwenshü ti tseo anyugun ka gunri kethyü rüla Simon le zoshü so. 15Lo sidyükeshanyu dan le kezoe tsü zen-o kerhün, lo tsü rüla le,
16‘Hidan sika ale niryüo David then
nrho kela gü thyüni ti.
Lo ale a-ketun kenren thyünilo njüo,
tunso nipe shü loti.
17Kechamvule temi kecha le bin sin
kethyü dan genyu,
lo Juda kemvunyu azan kolo kelanyu aphu no
Npugü fülo nrün genyu.
18Kazü thyülo nyekanyu tha tsüdan
thyü pe me tesha keshü,
Npugü le tsühontse zohü nyo,’
tsonkethyü thu njü.
19“Tsügenyu akerüchün le, ngun le temi Juda kemvunyu dan nyu rani sen-o Sunggigü ki ryü kelanyu dan kevü nyalo tsekethyü. 20Lo tsonkethyü gü mvule ngun temi tsüdan no teromen kezü genyu nshünmvu kela nyu, lo keyüla kethyü nyu, lo nyukhu kecheshvu ketyü nyu, lo tezi ketyü nyu anyugun kekhenilo lotse kethyü thu pe anyugun ka keshü le gwa ti ado tse rüchün bin nyo. 21Tsügü tsü le nduka nyu rünyi aphu nyu Sabbath tsenyü sinagog ka nyu Mosa jvü gü tsü swüo zope me senthyü tin kela si genyu,” tsonshü.
Kehun Pelü dan Le Kenthon Penkelo
22Tsontsin apostelnyu dan lo kehun ketsen kehü nyu dan lo kehun kebin nyu aphu sin tseo jo tsüle anyugun kenyü kü lola njüo anyugun dan nyu temi kejü pe Paul lo Barnaba au sinshü njüo nipe Antiok nyu shü titse zoshü; lo anyugun le ketenyen dan nyu Barsaba letse lo Juda letse kehügü lo Sila au kejülo. 23Tson-o anyugun le lesü thu pe tsühvu ben nyu shü; lo lesü tsünyu: “Apostel nyu, lo kehun ketsen kehünyu, lo npvünyu dan le, hagun Juda kemvunyu Antiok, lo Siria, lo Kilikia rünyi dan ka kebin nyu dan npvünyu ju kelushü. 24Agun dan nyu agun ketsomvu tseo temi peha le hagun ka gunryüo jo peha pe hagun nyun thyü nshvushüo hagun no hagun nyun keyhunkerun bin laso; tsekethyü shalo. 25Tsügenyu agun le kejorhün-o temi hihvu nipe ngun pvünyu hvu: 26Barnaba lo Paul, Npugü Jisu Khrista zan genyu au phou-e tepen hü kemvu hvu no zen-o hagun ki gunlo tsekethyü le agun kendo kü. 27Tson-o agun le Juda lo Sila au nishü le nye. Lo au le au mün-e pe agun joe zosin pe hagun hishü tile. 28Tsügenyu Kenshün Kapu güe lo agun ko tse hagun no tha lope thamen kezü rüshvu kela lo tezi ketyü nyu, lo nyukhu kecheshvu ketyü nyu, lo keyüla kethyü nyu tsü, hagun kekhelo mvulo shvu tsekethyü nyeki hagun no tha thyü kerü kecha thyülo tse kethyü tsüle agun kendo mvu. 29Hagun le jo tsüdan tsü zen binlo yatselo gwati. Hagun kegwagü thyü binlo,” tsonshü.
30Tson-o anyugun le kekho-o Antiok nyu nshye; tson-o kehun gü ko kequenlo njüo lesü gü khipe anyugun tsüshü. 31Lo anyugun le lesü tsügü swüo anyugun nyun thyü kepeche keshü jo gü genyu anyugun sherhün sala. 32Lo Juda lo Sila au ko au npvü sidyükeshanyu thyüo jo kechon zope npvünyu ju senthyü shü. 33Tson-o au le jon keshanyu tsünyu bin-o npvünyu ju zen kengü gwa hü tseo anyugun kekhoni la njüo au nikeshü dan ki nigunla. 34Ai Sila we tsünyu bin tinla.
35Lo Paul lo Barnaba au ko Antiok nyu bin tinla, lo tsünyu me kechanyu kechon zen sin-o Npugü jo zope mehi lo me senthyü bin tinla.
Paul Lo Barnaba Au Khikho Kecha Thyükelo
36Lo Jon keshanyu sika Paul le Barnaba ka, “Je, nnyi kengüo nduka jolokegwa zope me senthyü kenjü rünyi dan ki nigungü npvünyu ju le dihontse bin yo le nrishü tile je.” 37Tsontsin Baranaba le Johan Mark, tsekethyü pe au sin-o gun nyü so. 38Ai Paul we Johan Pamfulia nyu au khelao rani kelagü no au zenni kethyü tsüle gwa ado tse mvula. 39Tson-o au tsügü genyu kenyi sa lao au kekhola; lo Barnaba le Mark zen-o run nyu Kupra ki gunla. 40Ai Paul we Sila kejülo njüo au pvünyu ju no au khipe Npugü le shwikenjün nyu shüo gunla. 41Tson-o a-le Siria lo Kilikia pvüthü sen tse gungü kehun dan senthyü kegwa thyüshü.
נבחרו כעת:
APOSTELNYU THO 15: REGSBSI
הדגשה
שתף
העתק
רוצים לשמור את ההדגשות שלכם בכל המכשירים שלכם? הירשמו או היכנסו
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.