APOSTELNYU THO 17
17
Thesalonia Nyu Kevü Soryükela
1Tsüsika au le Amfipoli lo Apolonia pvüthü gungü Thesalonia nyu gunryülo, lo tsünyu tsü Judanyu sinagog ka nme le bin. 2Lo Paul le a-jvü thyü kehü hontse a-le Sabbath gwünshen ge ketsin lesü nyu anyugun senthyü. 3A-le Khrista gü le kenjünthyü salo njüo kesinyu dan nyu rhünni solo mvulo keshvu zo tsentsü pe anyugun hishü. Tsüntimvule a-le, “Jisu, ale a-rüla zo pe senthyü kebin gü hile Khrista güle,” tson zo sinshü. 4Tsonshü ntsin anyugun dan nyu peha lo Griknyu kenshün nyu kechon, lo tenunyu sharhinyu kechon le Paul lo Sila au kipon la.
5Ai Judanyu dan me we anyugun yhüthyüo temi dan nyu serikemvu ketsin nyu zen ryüo temi kechon ko kequenlo njüo rünyi gwünkevü shü; tson-o anyugun le gü Jason ka rün-o au ten zen-o me sokedanyu mhundyü nyu gun ti tsekethyü rhi sola. 6Tson-o anyugun le gungü Jason ka nyu au hyulo mvula ntsin, anyugun le Jason lo ketenyen nyu peha nrhisü zen-o rünyi nyu keda thyü kehünyu mhundyü nyu gungü nra sen-o, “Temi kazü thyü kekhen kehü hvule hinyu gunryüo, Jason le au nsinlo. 7Lo anyugun hidan hi aphu a-zan le Jisu letse kethyü keda kecha nme le hü letse kethyü zo-o Kaisar le johokeshü zen hümvu,” tson zoshü. 8Jo tsüdan tsü shalo njüo temi dan-e lo rünyi nyu kedanyu dan-e tse anyugun nyun keyhunkerun sola. 9Ai Jason-e lo kechanyue tse anyugun sunka tha pe shülao jamin nyu anyugun hoshüla.
Berea Nyu Apostel Tho
10Tsüsika ketenyen nyu dan le cho-o Paul lo Sila au nipe Berea nyu shüla; tson-o au le tsünyu gun kelo ka Judanyu sinagog ka nyu yü. 11Temi tsüdan le Thesalonia nyu kebin nyu nyeki anyugun nyun njü kvu; kechamvule khenyütsen ketsinlesü jo tsüle a-zü le mvuyo tsekethyü rüchün-o anyugun nyun ketsin thyüo jo tsüdan zen kelo genyu. 12Tsügenyu anyugun dan nyu temi kechon, Griknyu tenunyu sharhi ju lo pechenyue sin-o temi kechon le tenyenlo. 13Ai Thesalonia nyu Judanyu dan le Paul le Berea nyu jolokegwa zope me hi keshü shalo njüo anyugun le tsünyu ko ryüo kerika hontse temi dan thyü kekhen shü lo anyugun nyun thyü nshvu shü. 14Tsonshü ntsin ketenyen nyu dan le kenyun khi-o Paul nipe a-no züda se kipon gunla lotse zoshü la; ai Sila lo Timothi au we tsünyu bin tinla. 15Ai Paul shwenshwi zen kegun nyu dan le a-zen gü Athen tishü, tsüsika Sila lo Timothi au no nshwe gunryülo tsekethyü Paul ka jo hyulo njüo anyugun le rani gunla.
Paul Le Athen Nyu Kebin
16Tsüsika Paul le Athen nyu au khwen kebin ka rünyi tsünyu teromen thyü pe sü kenjü Paul le tsü hyulo njüo a-nyun kenjün thyü lola. 17Tson-o a-le khenyütsen sinagog ka nyu lo gungü tsünyu rüshvu kebin dan-e lo hakethyü bin nyu temi teno kelonyu zen kenthon sola. 18Lo thakesha Epikuri lo Stoik tsekethyü temi danhvu dan nyu peha le a-zen kenyi sola. Peha le a-ka, “Jokhin gü hile nyu zonyü bin nla?”
Lo kechanyu we a-le me senkethyü genyu a-ka, “A-le shakemvu tero dan me zope me senkethyünyu nme hile la,” tsonshü. Anyugun le hi zoshü kechamvule Paul lo Jisu lo rhünni keso rüla pe senthyü kethyü genyu. 19Tson-o anyugun le a-nrhisü zen-o Areaopaga tsekethyü bin nme ka gü, “Nle jokeshün zope senthyü kehü hile nyu yo tsekethyü zope agun hishü timon? 20Nle jokeshün dan me sen ryüo agun no shalo; tsügenyu jo hile jo nyu tse kethyü yo agun le shalo nyü bin nyo.” 21(Athen nyu aphu lo tesin le ryüo tsünyu yhun tinkela nyue sin tseo, thame thyümvu tse tha keshün nme kezo khwen tsünyü bin-o a-gwünkho nkela latse kehü ale akon zoshü tile.)
22Tsükatsü Paul le Areaopaga chvü nyu solo njüo, “Hire, Athen nyu dan, ale tha kehyu aphu ge shakelo le hagun le tsenyü tsenyü thyü petsü sa kehü dan me le. 23Ale ntsü kegun ka hagun le tha rüshvu kehü dan nri kegun ka, kershvubin nme ge, ‘Shakemvu Tero Nme genyu,’ tsonkethyü zan nme-e thu sin pe bin njüo hyulo. Kha, hagun le shamvuo rüshvu kehü gü tsü ale tsin pe hagun hishü tile. 24Kazü lo tsünyu kehü aphu thyükeshü Sunggigü, a-le tsang lo kazü hvu so Npugü genyu temi ben lope kethyü kershvuka nyu bin hü mvu. 25Lo a-le tha nme rhodyü kebin hontse meno me ben pe a-leyi-e hümvu; kechamvule a-le a-npvü kerhünron lo kehen aphu khipe temi lihigüe tsüshü kehü genyu. 26A-le nchwe nyu ngun no yhun nrün gwünkho lo bin nrün bin aphu rhishü njüo kazü aphu nyu binlo lotseo temi nme ge temi keyhun aphu thyüshü. 27Lo ngun no Sunggigü füo kese gun yatselo a-hyulo ti, tsekethyü rüchün, ai a-le ngun lihigüe zen-o nithen hümvu, 28kechamvule nle a-genyu rhün lo nnun lo yhun kehü genyu, lü kethunyu peha le,
‘Nle a-ge yhun soryü,’ tsonkethyü zo njü hü. Lo hagun dan nyu lüthu kehünyu peha le,
‘Ngun ko A-nyenyu dan,’ tsonkethyü thu njü. 29Lo nle tsügenyu Sunggigü ge yhun soryü yatselo, nle Sunggigü lope temi thakesha temi do pe thyükelo suna nmvue raka nmvue tsomen kezü dan hontse letse kethyü rüchün hü zümvu. 30Sunggigü le temi thasha kemvu gwünkho ka we hyu-e hyukemvu hontseo khela so; ai ntsoka we a-le temi aphu no lihiki hüe a-nyunkelulo lotse zoshü laso. 31Tson-o a-le nchwenyu kejü sen hü kela nme no a-kezü nyu kazü gü zen-o jokera titse kethyü khenyü me jon kejü to sen bin laso. Tsügenyu a-le kesinyu dan nyu a-thyü nrhün pe temi aphu hi tsentsü shü laso,” tsonshü.
32Lo anyugun le kesinyu le rhünni keso rüla shashü ntsin peha le a-shwinyü sola; ai peha we, “Agun le jo hidan rüla khenyü me nka nyü nishü ti,” tson. 33Tson-o Paul le anyugun dan nyu tinla. 34Ai temi peha le a-zen hüo tenyenlo. Lo tsüdan nyu Areaopega Dionisius, lo Damari tsekethyü tenunyu nme, lo kechanyu dan me-e anyugun zen sin hü.
נבחרו כעת:
APOSTELNYU THO 17: REGSBSI
הדגשה
שתף
העתק
רוצים לשמור את ההדגשות שלכם בכל המכשירים שלכם? הירשמו או היכנסו
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.