APOSTELNYU THO 18
18
Korint Nyu Paul Tho
1Tsüsika Paul le Athen nyu Korint ki gunryü. 2Lo tsükatsü a-le Judanyu a-zan le Aquila tsekethyü Pontu nyu yhun sokeryü nyu nme le tsü nyu bin-o hyulo. Klaudia le Judanyu aphu no Rom nyu tinla lo tsekethyü genyu temi tsügütsü le a-nu Priskila zen-o tsü mhundyü kheka Itali nyu gunryü bin; lo a-le au ka nyu gü. 3Lo au le phika kethyü nyu, lo Paul ko tsühontse kethyü nyu genyu a-le au zen bin-o anyugun kengüo tha thyü. 4Lo tsükatsü a-le Sabbath tsenyü sinagog ka nyu anyugun nthon-o Judanyu lo Griknyu thukeyhun sashü.
5Tsüselo Sila lo Timothi au le Makedonia nyu nshyekeryü ka, tsükatsü Paul le Jisu le Khrista gü tsekethyü pe Judanyu mhundyü ka zoshwi shü 6Ai anyugun le tsü shwinyü mvuo nkhin sola ntsin, a-le a-phi kesun-o anyugun ka, “Hagun zi no hagun npvü hagun pe ge gunryülo, awe le nshün le; lo nthu gerho nyu ale Juda kemvunyu ki gunla tiso.” 7Tson-o a-le tsünyu chwilo njüo Tita Justa tsekethyü Sunggigü rüshvu kehünyu nme ka nyu yüla; lo tsügü ka tsüle sinagog ka khoka bin hü. 8Lo sinagog ka tsügü ketsen kehü gü Krispa le a-nyu kaminyu aphu zen-o Npugü tenyenlo la; lo tsüntimvu Korintnyu kechon ki-e jo tsügü shao tenyenlo njüo baptaiz thyülo.
9Tsükatsü khejeme Npugü le a-npvü gunryüo Paul teshao, 10“Nle nshvu nya nye; lo jozo binlo, lo nma tse bin tinla nya. Kechamvule ale nzen hünyo, lo temi nme-e nbonshvula loho. 11Lo tsüntimvule rünyi hinyu atemi thyünrün le kechon le kebin genyu.” Lo a-le tsünyu chenme-o shye tsero Sunggigü jo sen-o me senthyüo anyugun zenbin hü.
12Ai tsükatsü Galio le Akaya kazü nyu ahng thyülo ntsin Judanyu le kengüo nyun me thyülo njüo Paul shwirüchün-o a-tenzen-o jokera kehü bin mhundyü nyu gunlo-o, 13“Temi higü hile me thukeyhun pe meno njvü kemvu tedo keshün nme sen-o Sunggigü rüshvu tinlaso!”
14Tson-o Paul le jozo titse so ntsin Galio le Judanyu dan ka, 15“Jo kekenyon higü hile njükemvu nmvue serikemvu jo nme yatselo, hire, Judanyu dan, ale petsü sao hagun khwenyü shü kethyüi gwünkho; ai jo dan me genyu nmvue zan dan me genyu kenyi kethyü nme yatselo, hagun npvü hagun dan nyu keralo nye, ale jo tsühontse kethyü tsü kera kethyü le akendo mvu!” 16Tson-o a-le jokerabin nyu tsü anyugun hüla. 17Tsontsin anyugun aphu gungü sinagog kanyu keda thyü kehü gü Sosthene nrhisülo-o jokera kehü bin mhundyü nyu a-vü sala. Ai Galio le tsü nme-e rüchün pe a-nyun nkhi-e mvula.
Paul Le Antiok Nyu Nigunryü Kela
18Tsükatsü Paul le kethonki tsünyu bin tse njüo a-pvünyu ju zen kekho la, tson-o tsünyu Aquila lo Priskila au zen-o run nyu küo Siria nyu gunla. Lo a-le a-jo nme genyu himhundyü a-npvü Kenkrea nyu a-pe thula. 19Tson-o anyugun le Efesa nyu gunryükelo ka a-le au khipe tsünyu shüla. Ai a-we sinagog ka nyu yügü Judanyu zenkenthon. 20Lo anyugun le a-no anyugun zen bin sinshülo tse zo ntsin, a-le nmvula. 21Tson-o a-le anyugun zen kekho lati sele tseo, “Sunggigü kendo yatselo, ale hagun ka nigunryü ti,” tson-o Efesa nyu run ge külo-o tinla.
22Tson-o a-le Kaisaria nyu chwilo ntsin a-le chwigü kehun nyu kelushü njüo Antiok nyu nshyela. 23Lo jon keshanyu tsünyubin tseo a-le Galatia kazü lo Frugia pvüthü sen-o senthyükelonyu aphu nyun thyü kepeche gunla.
Apola lo Paul Au Le Efesa Nyu Jolokegwa Pe Me Senkethyü
24Tsükatsü Alekandria nyu yhun sokeryü nyu a-zan le Apola letse kethyü jozo kesha lo ketsinlesü swü sa kethyü Judanyu nme le Efesa nyu gunryü. 25Temi tsügü le himhundyü ki Npugü le me senkethyü jo shalo, lo a-le Johan baptism nti shao a-nyun ketsin thyü lo a-yhen thyüo jozo lo Jisu rüla zope me hi; lo sinagog ka nyue peche sao me senthyü. 26Ai Priskila lo Aquila au le a-jo shashüo a-zen-o au ki ryülo, tson-o au le Sunggigü rüla zo tsentsü sin pe a-hishü. 27Tsüsika a-le Akaya kazü nyu gun nyülo ntsin, a-pvünyu ju le a-nyun thyü peche nishüo senthyükelonyu dan no a-zenlo lotse kethyü lesü thu pe a-tsü sinshü. Lo a-le tsünyu ryülo ntsin a-le Sunggigü shwikenjün genyu tenyen kelonyu ge thakegwa kechon ki thyüshü. 28Kechamvule a-le süda mhundyü nyu a-jo kvu sao Jisu le Khrista gü le tsekethyü ketsinlesü nyu pe Judanyu dan jo gwün kemhenla.
נבחרו כעת:
APOSTELNYU THO 18: REGSBSI
הדגשה
שתף
העתק
רוצים לשמור את ההדגשות שלכם בכל המכשירים שלכם? הירשמו או היכנסו
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.