مَرکاس 13
13
آیۆکێن زمانگئے بارئوا ایسّائے پێشگۆیی
(مَتّا 24:1–14؛ لوکا 21:5–19)
1وهدے ایسّا چه مزنێن پرستشگاها در آیگا اَت، چه مُریدان یکّێا گوَشت: ”او استاد! بچار، چۆنێن شئوکێن سِنگ و ڈۆک اَنت و چۆنێن ڈئولدارێن پرستشگاهے.“ 2ایسّایا گوَشت: ”اے ڈئولدارێن پرستشگاها گندئے؟ اشیئے یکّ سِنگے هم دومی سِنگئے سرا نمانیت، سجّهێن پْرۆشگ و کرۆجگَ#13:2 کرۆجگ، بزان هَرۆجَگ، اَڈّ کرتگێن چیزّێئے پرۆشگ. بنت.“
3وهدے ایسّا مزنێن پرستشگاهئے دێم په دێما زئیتونئے کۆهئے سرا نِشتگ‌اَت، پِتْرُس و آکوب و یوهَنّا و اَنْدْریاس آییئے کِرّا آتکنت و اِهوَتا جُستِش کرت: 4”مارا بگوَش، بارێن اے پرُشت و پرۆش کدێنَ بیت و اِشیئے نزّیکّ بئیگئے نشانی چے اِنت؟“ 5ایسّایا هبر بندات کرت: ”هُژّار بێت، کَسے شمارا گُمراه مکنت. 6بازێنے منی ناما کئیت و گوَشیت: ’من هما آن#13:6 هُدا وتا گۆن موسّایا همے ناما پَجّارێنیت. بچار دَرگوَز 3:14.‘ و بازێنێا گُمراهَ کنت. 7وهدے شما جنْگانی تئوارا اِشکُنێت و جنگانی هال شمارا سرَ بیت، دلا تُرس مئیارێت. اَلَّم اے ڈئولا بیت، بله گۆن اے نشانیانی زاهر بئیگا هلاسیئے وهدَ نئیئیت. 8یکّ کئومے دگه کئومێئے هِلاپا و یکّ مُلکے دگه مُلکێئے هِلاپا پادَ کئیت. بازێن جاگهێا زمین‌چَنڈَ#13:8 زمین‌چَنڈ، بزان زمین‌جُمب، زلزله. بیت و کَهتَ کپیت. اے تهنا چِلّگیئے دردانی بِندات اِنت.
9هُژّار بێت! شمارا هَکدیوانانی#13:9 هَکدیوان، بزان آمیدگِس، دادگاه. دێما پێشَ کننت، کَنیسَهانی تها جننت و په منیگی، هاکم و بادشاهانی دێما اۆشتارێننت. گڑا شمارا شَرّێن مۆهے رسیت که په من گواهی بدئیێت. 10بله پێسرا باید اِنت وشّێن مِستاگئے جار سجّهێن کئومانی کِرّا جنَگ ببیت. 11هروهد که شمارا گرنت و هَکدیوانانَ برنت، چه پێشا پرێشان مبێت که ما چے بگوَشێن. آ وهدا، هر چیزّے که شمارا سۆج دئیگَ بیت، هما هبرا بکنێت. چێا که گوَشۆک شما نه‌اێت، پاکێن روه اِنت. 12برات وتی براتا درۆهیت و کۆشارێنیت و پت وتی چُکّا. چُکّ وتی پت و ماتانی هلاپا پادَ کایَنت و آیانَ کۆشارێننت. 13هرکَس منی نامئئے سئوَبا چه شما نَپرتَ کنت، بله هما که تان آهِرا برداشتَ کنت، آ رَکّیت.
تُرسناکێن وهد و جاور
(مَتّا 24:15–28؛ لوکا 21:20–24)
14وهدے شما آ ’پلیت و بێران کنۆکێن بَژّناکا‘#13:14 ”پلیت و بێران کنۆکێن بَژّناک“ یکّ چیزّے که باید اِنت مزنێن پرستشگاها مئیئیت. هما جاگها گندێت که آییئے جاگه نه‌اِنت،“ – وانۆک سرپد ببیت – ”هما که یَهودیَها اَنت دێم په کۆهان بتچنت. 15آ که لۆگئے سرا اِنت، په چیزّێئے زورگا اێر مکپیت و لۆگئے تها مرئوت و 16آ که ڈگارئے سرا اِنت، وتی کباهئے زورگا لۆگا مرئوت. 17آ رۆچان لاپ‌پُرّێن جنێن و هما که چُکَّ مێچێننت، سکّ بَزّگَ بنت. 18دْوا کنێت که اے چیزّ زمستانا مبیت. 19چێا که آ رۆچان اَنچێن مُسیبتے کئیت که چه بنداتا، چه هما رۆچا که هُدایا جهان اَڈّ کرتگ، تان اے وهدا نئیتکگ و هچبرَ نئیت. 20اگن هُداوندا آ سکّیانی رۆچ کَمتر مکرتێننت، هچّ مردمے نرَکّتگ‌اَت. بله آییا وتی گچێن کرتگێنانی هاترا آ رۆچ کَمتر کرتگ‌اَنت. 21آ وهدا اگن کَسے شمارا بگوَشیت: ’بچار، مَسیه اِش اِنت‘ یا ’بچار، آ اِنت،‘ باور مکنێت. 22چێا که درۆگێن مَسیه و درۆگێن نبی جاهَ جننت و اجبّتێن نشانی و مۆجزه پێشَ دارنت. وتی سجّهێن زۆرا جننت که هُدائے گچێن کرتگێنان هم گُمراه بکننت. 23هُژّار بێت، من شمارا چه پێسرا اے سجّهێن چیزّان هال دئیَگا آن.
ایسّائے پِر تَرّگ
(مَتّا 24:23–44؛ لوکا 21:25–38)
24آ رۆچان، چه اے مُسیبتان و رَند، رۆچ تهارَ بیت، ماهَ ندْرپشیت#13:24 دْرپشگ، بزان شهم جنَگ، جلشکگ. و 25اِستار هم چه آسمانا کپنت و آسمانئے زۆر و واک لَرزێنگَ بنت. 26آ وهدا، مردم انسانئے چُکّا گندنت که گۆن مزنێن واک و توان و شان و شئوکتے جمبرانی تها اِنت و کئیت. 27گڑا پرێشتگان راهَ دنت و چه چارێن نێمگان، بزان چه زمینئے هر کُنڈا تان آسمانئے گُڈّی مرز و سیمسران، وتی گچێن کرتگێن مردمان یکجاهَ کنت.
28نون چه اِنجیرئے درچکا درس و سَبکّ بگرێت. اَنچُش که آییئے ٹال نرمَ بنت و تاکَ تْرُکّنت، شما زانێت که گرماگ نزّیکّ اِنت. 29همے ڈئولا، وهدے شما اے چیزّانَ گندێت، زانێت که منی آیگئے وهد نزّیکّ اِنت، دروازگئے دپا اِنت. 30شمارا راستێنَ گوَشان، تان اے سجّهێن جاوَر#13:30 جاوَر، بزان هالَت. مئیاینت، اے نَسل و پَدرێچ هلاسَ نبیت. 31آسمان و زمین گارَ بنت، بله منی هبر هچبر گارَ نبنت. 32هچکَسَ نزانت که آ رۆچ و آ ساهت کدێنَ رَسیت، نه آسمانئے پرێشتگَ زاننت و نه چُکَّ زانت، بَسّ پتَ زانت. 33هُژّار بێت! هئیالا گوَر کنێت چێا که نزانێت آ وهد و دمان کدێنَ کئیت. 34منی پِر ترّگ همے ڈئولا اِنت که مردے سپرێا برئوت، رُکست کنگئے وهدا هر هِزمتکارئے کار و زِمّهواریا بگیشّێنیت و دروازگپانا هُکم بدنت: ’هُژّار بئے!‘
35گڑا هُژّار بێت، چێا که شما نزانێت که لۆگئے هُدابُند شپئے کجام پاسا کئیتش؛ سرشَپا، شپئے نێما، کرۆس‌بانگا یا بامگواها؟ پمێشکا هُژّار بێت. 36چۆ مبیت که هُدابُند اَناگت بیئیت و بگندیت که شما واب اێت. 37اَنچُش که من شمارا گوَشان، گۆن درُستانَ گوَشان: ’هُژّار بێت!‘“
נבחרו כעת:
مَرکاس 13: HPKB
הדגשה
שתף
העתק
רוצים לשמור את ההדגשות שלכם בכל המכשירים שלכם? הירשמו או היכנסו
© 2016-22 Wycliffe Bible Translators, Inc.
