مَرکاس 12

بدێن باگپانانی مِسال

(مَتّا 21‏:33‏–46؛ لوکا 20‏:9‏–19)

1ایسّایا، رَندا په دَروَر و مسال وتی هبر گۆن آیان بُنگێج کرت و گوَشتی: ”مردێا انگوری باگے اَڈّ کرت. آییئے چپّ و چاگردا پَلّے بستی، په انگورانی شیرگئے گِرگا کَلّے جتی و په نِگهپانیا بُرجے هم بستی. رَندا باگی په کُننده‌کاری و زمان#12‏:1 کُننده‌کاری و زمان، بزان پئیمانکاری، اِجارئے سرا، ٹێکه. لهتێن باگپانئے دستا دات و وت سپرێا شُت. 2وهدے انگورئے مۆسم بوت، آییا هِزمتکارے باگپانانی کِرّا راه دات که چه باگئے انگوران منی بهرا بیار، 3بله باگپانان اے هِزمتکار گپت و لَٹّ و کُٹّ کرت و گۆن هۆرک و هالیگێن دستان راه دات. 4گڑا هُدابُندا#12‏:4 هُدابند، بزان واجه، واهُند، مالک، ساهِب. دگه هِزمتکارے دێم دات. آیان، اے هم بے‌اِزّت کرت و سر پرۆشت. 5پدا دگه هِزمتکارے رئوانی دات و باگپانان اے جت و کُشت. همے ڈئولا، آییا دگه بازێن هِزمتکارے راه دات، بله باگپانان لهتێن لَٹّ و کُٹّ کرت و لهتێن کُشت. 6نون په راه دئیگا آییئے کِرّا یکّ کَسے پَشت کپتگ‌اَت، آییئے دۆستیگێن مردێن‌چُکّ. گُڈسرا، وتی همے چُکّی رئوان دات، گوَشتی منی چُکّئے اِزّتا کننت. 7بله باگپانان وت‌مان‌وتا گوَشت: ’باگئے میراسدار#12‏:7 میراسدار، بزان میراس بَرۆک، میراسا شریکدار، وارِس. همِش اِنت. بیاێت اِشیا کُشێن و باگ مئے میراسَ بیت.‘ 8گڑا گپت و کُشتِش و جۆنِش چه باگا ڈَنّ دئور دات.“

9ایسّایا جُست کرت: ”نون شمئے هئیالا باگئے هُدابُند چے کنت؟ آ کئیت، باگپانانَ کُشیت و باگا دگه باگپانانی دستا دنت. 10زانا، شما پاکێن کتابئے اے هبر نئوانتگ که گوَشیت:

آ سِنگ که بان‌بَندان # 12‏:10 بان‌بَند هما اِنت که لۆگئے بندگا زانتکار اِنت. رد کرت

هما سِنگ بُنهِشت # 12‏:10 بُنهِشت، بزان لۆگئے ائولی هِشت یا سِنگ. بوت.

11 اے هُداوندئے کار اِنت و

مئے چمّان پُرکَمال اِنت.“ # 12‏:11 زَبور 118‏:22‏–23.

12نون آیان لۆٹت که ایسّایا دَزگیر بکننت، چێا که زانتِش ایسّایا اے مِسال مئے بارئوا داتگ، بله چه مردمان تُرستِش. گڑا ایسّااِش اِشت و شتنت.

مالیاتئے بارئوا

(مَتّا 22‏:15‏–22؛ لوکا 20‏:20‏–26)

13رَندا، آیان لهتێن پَریسی و هیرودی ایسّائے کِرّا رئوان دات که چه آییئے جندئے هبران آییا مان بگیشّێننت. 14نون آتکنت و جُستِش کرت: ”او استاد! ما زانێن که تئو تچک و راستێن مردمے ائے و هچکَسئے نێمگا نگرئے، چێا که سجّهێنان یکّ هِسابا چارئے و هُدائے راهئے سۆجا په راستیَ دئیئے. بارێن، رومئے بادشاه کئیسَرا،#12‏:14 کئیسر رومئے بادشاهانی پِرنام بوتگ، هچّ بادشاهئے جندئے نام نبوتگ. رومئے هر بادشاه کئیسر گوَشگ بوتگ. سُنگ و مالیات دئیگ رئوا اِنت یا نه؟ آییا مالیات بدئیێن یا مدئیێن؟“ 15ایسّایا آیانی اے دوتل و دوپۆستی زانت و گوَشتی: ”چێا منا چَکّاسگا اێت؟ دینارے بیارێت که بچارانی.“ 16آیان دینارے آورت. جُستی کرت: ”اِشیئے سرا کئیی نَکش و نام پِر اِنت؟“ آیان پَسّئو دات: ”کئیسَرئے.“ 17نون ایسّایا گوَشت: ”گڑا کئیسَرئیگا کئیسَرا بدئیێت و هُدائیگا هُدایا.“ چه اے پَسّئوا، آ هئیران و هَبَکَّه منتنت.

آهِرَتئے رۆچ و سانگ و سور

(مَتّا 22‏:22‏–33؛ لوکا 20‏:27‏–40)

18‏-19رندا لهتێن سَدوکی ایسّائے کِرّا آتک. سَدوکیَ نمنّنت که مُردگ پدا زندگَ بنت. جُستِش کرت: ”او استاد! موسّایا په ما نبشتگ: اگن کَسێئے سور کرتگێن براتے بے ائولادا بمریت و جنۆزامی زندگ ببیت، گڑا آییئے برات باید اِنت گۆن آ جنۆزاما سور بکنت تانکه چُکّ و ائولادے په وتی براتا پێدا بکنت.#12‏:18‏–19 موسّائے واز 25‏:5 و رَند. 20هپت برات اَتنت. ائولی براتا جَنے گپت و بے ائولادا مُرت، 21گڑا دومی براتا گۆن آ جنۆزاما سور کرت، بله آ هم بے ائولادا مُرت. سئیمی برات هم، همے ڈئولا. 22هپتێن براتان، کَسّا چُکّ نبوت. سجّهێنان و رند آ جنێن هم مُرت. 23نون آهرتئے رۆچا اے جنێن کجام بْراتئیگَ بیت؟ چێا که هپتێن براتانی جَن بوتگ.“ 24ایسّایا گوَشت: ”شما گُمراه نه‌اێت؟ شما نه چه پاکێن کتابان چیزّے سَرکِچَ ورێت#12‏:24 سَرکِچ وَرگ، بزان سرپد بئیگ، پۆه بئیگ. و نه هُدائے واک و زۆرا سرپدَ بێت. 25مُردگ که جاهَ جننت، نه سورَ کننت و نه سور دئیگَ بنت، آسمانی پرێشتگانی ڈئولا بنت. 26مُردگانی زندگ بئیگ و جاه جنَگئے بارئوا، زانا شما موسّائے کتابا بُن گپتگێن ڈۆلُکئے#12‏:26 ڈۆلُک گیابانی کُنٹگی جرّے. کِسّه نئوانتگ که هُدایا گۆن موسّایا چۆن هبر کرت؟ ’من آن، اِبراهێمئے هُدا و اِساکئے هُدا و آکوبئے هُدا.‘#12‏:26‏ دَررئو 3‏:6. 27بزان آ، مُردگانی هُدا نه‌اِنت، زندگێنانی هُدا اِنت. شما سکّ رَد وارتگ.“

مسترێن پرمان

(مَتّا 22‏:34‏–40؛ لوکا 10‏:25‏–28)

28چه شَریَتئے زانۆگران یکّے آیانی اے هبران گۆش دارگا اَت. آییا دیست که ایسّا شَرّ پَسّئو دئیگا اِنت، نزّیکّا آتک و جُستی کرت: ”شَریَتئے مسترێن پرمان کجام اِنت؟“ 29ایسّایا پَسّئو دات: ”شَریَتئے مسترێن پرمان اِش اِنت: ’او اِسراییل! گۆش دار: مئے هُداوندێن هُدا یکّے. 30وتی هُداوندێن هُدایا چه دلئے جُهلانکیا، و گۆن سجّهێن جان و ساه، گۆن سجّهێن پَهم و پِگر و گۆن سجّهێن وس و واکا دۆست بدار.‘#12‏:30 موسّائے واز 6‏:4 و رَند. 31دومی پرمان اِش اِنت: ’وتی همساهگا وتی جندئے پئیما دۆست بدار.‘#12‏:31 لاویان 19‏:18. چه اے دوێنان، دگه مسترێن پرمان نێست.“ 32گڑا، شَریَتئے زانۆگرا گوَشت: ”او استاد! تئو سکّ شَرّ گوَشت، په راستی که هُدا یکّے و اَبێد چه آییا هُداے نێست. 33هُدایا چه دلئے جُهلانکیا، و گۆن سجّهێن پَهم و پِگر و سَرجمێن وس و واکا دۆست دارگ و همساهگا وتی جندئے پئیما دۆست دارگ چه سجّهێن هئیرات و سۆچَگی کُربانیگان شرتر اِنت.“ 34وهدے ایسّایا دیست که آییا داناێن پَسّئوے دات، گوَشتی: ”تئو چه هُدائے بادشاهیا دور نه‌ائے.“ چه اِد و رَند، هچکَسا دل نکرت که چه ایسّایا جُستے بکنت.

مَسیه کئیی چُکّ اِنت؟

(مَتّا 22‏:41‏–46؛ لوکا 20‏:41‏–44)

35وهدے ایسّا مزنێن پرستشگاها تالیم دئیگا اَت، جُستی کرت: ”شَریَتئے زانۆگر چِه پئیما گوَشنت که مَسیه داوود بادشاهئے چُکّ اِنت؟ 36داوودا وت چه پاکێن روهئے اِلهاما گوَشتگ:

هُداوندا گۆن منی هُداوندا گوَشت

منی راستێن کَشا تان هما وهدا بنند

که من تئیی دژمنان تئیی پادانی چێرا دئورَ دئیان. # 12‏:36 اسلیگێن یونانی نبشتانکَ گوَشیت: ”تئیی پادانی چێرئے تهتُکے بکنان“. # 12‏:36 زَبور 110‏:1.

37اگن داوودئے جند مَسیها وتی هُداوندَ گوَشیت، گڑا آ چۆن داوودئے چُکّ بوتَ کنت؟“ مزنێن مُچّیان په وشّی ایسّائے هبر گۆشَ داشتنت.

ایسّا شَریَتئے زانۆگران پاشکَ کنت

(مَتّا 23‏:1‏–36؛ لوکا 20‏:45‏–47)

38ایسّایا وتی تالیمانی تها گوَشت: ”چه شَریَتئے زانۆگران هُژّار بێت که آیان دْراجێن کباهئے گوَرا کنگ دۆستَ بیت و بازارانی تَرّ و گردئے وهدا مردمانی سلام و دْرۆتئے لۆٹۆک اَنت. 39کَنیسَهانی ائولی رِد، و داوَتانی شَرتِرێن جاگهِش دۆستَ بیت. 40جنۆزامان رَدَ دئینت و پُلنت و په پێش دارگا وتی دْوایان دْراجکَشَّ کننت. اِشان گنترێن سِزا رسیت.“

جنۆزامێئے شُگرانه

(لوکا 21‏:1‏–4)

41ایسّا مزنێن پرستشگاهئے شُگرانهانی پێتیئے#12‏:41 پێتی، بزان سندوک. دێم په دێما نِشتگ‌اَت و هما مردمان چارگا اَت که اے پێتیا زَرِّش مانَ کرت. بازێن زَردارێا باز زَرّ دات. 42گریبێن جنۆزامے آتک و دو پئیسه‌ای#12‏:42 اَسلیگێن یونانی نبشتانکَ گوَشیت: ”دو لِپتُن که یکّ کُدْرَنتِسئے اَرزشی هست“. لِپتُن آ زمانگئے گوَنڈترێن زرّ. پێتیا مان کرت که هِچّئے کارا نئیاتکنت. 43گڑا ایسّایا مُرید وتی کِرّا لۆٹاێنت و گوَشتنت: ”شمارا راستێنَ گوَشان، اے بێوَسێن جنۆزاما چه آ سجّهێنان گێشتر زرّ پێتیا مان کرت. 44چێا که آ دگران چه وتی گێشێن مالا چیزُّکے دات، بله اے جنۆزاما گۆن وتی نێزگاری و گریبیا هرچے که آییا هست‌اَت داتی، بزان وتی سجّهێن رۆزیگ و گُزران.“

נבחרו כעת:

مَرکاس 12: HPKB

הדגשה

שתף

העתק