Luk 19

Jesus Sakius ele dilah kaya

1Amu Jesus Nug Jeriko ooppa noa, aab ooppa ugekke, 2danab laa appa dayom, nug onig amu Sakius. Nug am danab takis aotteb dilag ikki laa. Danab amu nug enub okkai ele. 3Amu nug Jesus Nug am danab attemunab antta dookkunu oo dayom, amge danab ah kuɗum Jesus qehakkeg, Sakius nug ele am danab tutu amunu, nug Jesus anidkkunu elele iitta. 4Elele iitta daya, Jesus Nug ib amuppa uɗitte doyom amunu, nug qaiqaɗ anuqa ukka, Jesus anidkkunu ha, ad sikamo fig laa teum.

5Amu haen Jesus Nug ukka ukka, Sakius dayomppa ta, ⌊baeg ya dayaya amu,⌋ Nug ameg huma attan neekka, nug amegppa aum. “Sakius na paha ne! Gemu da na lautppa daakkul,” awa aum. 6Nug anam aum amunu, Sakius nug paha honap na, oo gamag ahak ele Nug ele laippu dayaknu ooppa eleleib doya, Jesus omale nug laugppa gopiɗ. 7Am Jesus Nug Sakius laugppa goya daaeheh, danab oh ag amu anidna, ag akka naittuɗ mattin Jesusnu appig. “Nug ukka, hipunin danab umu laugppa ɗo danab daakkunu teum,” aon appig. 8Aria Sakius aha hibaitta, Jesus amegppa aum. “Naɗi, gemu da dahil keeke oh gamagppanab oppaten, laih awe, daɗek danab madakkul. Amu da danab laa hambuppuitten, nuhig keeke yab aomi dayeb amu, da yab awak amu qaɗeppa ewam amubia laa ele nug medakkul,” awa aum. 9Anam a, Jesus Nug Sakius amegppa aum. “Gemu Kayak Nug na, nahipad ele eɗua diiattom. Aɗinu? Na am Abraham bekka genab,” awa aum. 10Anam ana, Nug nai tuɗitta aum. “Danab Bekkalag da amu, da danab ag padal meppig daatteb ele, da ag eɗuen diiadkkulnu uɗimi,” awa aum.

Maɗi nid 10 ag men doɗo tuɗidkkulagnu aoppig

11Jesus Nug Sakius laugppa dayaya, nai amu mattie doyeg, Nug Jerusalem guguitta dayom amunu, danab ah ag, “Kayaknu ɗo maɗoɗ am geha iikku miag atikku,” dabmenan dooppig amunu, ag anam dabmemananu, Jesus Nug nai tuɗitta, keeke danab ag dootteb ii dootteb ele ouaqata ippuanatta inam mattiom. 12Nug mattia aum. “Anuqak danab laa nug aha, wan laappa uma ukkeb, appa ag nug nuhig wanppanu king daakkunu ehah medappeg, dimppa amu nug eɗua uɗia, king daakkunu dabmeum. 13Nug anam dabmaama, aria nug nuhikkud maɗi nid eblaih tanig ele onilagppa ewowa, nug men doɗo onig mina laippu anen anen pania madatta amelagppa aum. ‘Ag imu tuɗidna, qagmebeppeg, da eɗue uɗippi meɗappeg aokkul,’ awa aum.

14Amge nug wanebppan danab ⌊laa⌋ ag nuhignu nau ninig ele dooppig amunu nug ukke, am danab amu ag heeg, ag oolagppan danab laa ag nug dim lamidnana ag inam appig. ‘Ig danab imu nug ihinig king daakkunu ig oonig ii daatte,’ aon appig. 15Ag anam appig, amge wan laappa ag nug king daakkunu ehah mettaeg, dimppa nug eɗua uɗia, nug maɗi nid anukka nug men doɗo mattom ele onilagppa e, ag oh anen anen men doɗo amu tuɗidna tuɗittak gane aoppig amu nug dookkun aum. 16E dona amu danab laa ba nug aum. ‘Naɗi, da mina laippu nahip imu bau laa tuɗitte qagmein, tuɗittak 10 aomi,’ awa a, king nug amegppa aum. 17‘Na maɗi nid ena, na uɗat enanag heme, na keeke nakoknab oo metta ii uuak kobolppa dabmettan autna aome amunu, gemu da na aab okkai 10 gumadkkutnu ɠagattag medattem,’ awa aum. 18Aria, laa dim ba aum. ‘Naɗi, da mina laippu nahip imu bau laa tuɗitte qagmein, tuɗittak mina tanig ele aomi,’ awa a, king nug amegppa aum. 19‘Da na aab okkai tanig ele gumadkkutnu ɠagattag medattem,’ awa aum. 20Amu maɗi nid laa nug uɗia aum. ‘Naɗi, nahip mina laippu ina daatte. Da lamen qatti laa ooppa iten mei dayom. 21Aɗinu? Da na anidttem, na danab ɠagattag. Danab laa nug keeke me daatte amu na aona, danab laa ee ebatte amu, na amunu meu ele aottem. Amunu da nahipnu baɗami,’ awa aum. 22A amu king nug nid amu amegppa aum. ‘Na maɗi nid nau, bodoettaknab. Da na nakka nahip nai amuppa na epeɗidkkul. Amu genabnabte da am danab ɠagattag daayi, na doome? Amu genabnabte keeke danab laala meeg, da aottem amu danab laala ee eppaeg, da meu aottem, da anam heiyi doomete? 23Anam genab daalo amu, haen da eɗue uɗien, da men doɗo dahil, tuɗittak baula, intres atteb, da amu ele aolomnu, na diig aɗinu intres tuɗittaknu dahil men doɗo benk danab ii mattalom?’ awa aum.

24Nug anam ana amu nug danab guguittak hippaidna daaegeg amelagppa aum. ‘Ag nug eppegppa mina laippu daatte amu aɗidna aon, danab laa mina 10 ele metteg!’ awa aum. 25Nug anam a amu ag appig. ‘Naɗi nug am mina 10 awa aɗate. Diig aɗinu nug laa ele aokku?’ aon appig. 26Anam aeg nug aum. ‘Da ag amelagppa attem, danab nug keeke awa, pehettak uɗat medatte amu, nug baula ele aokku, amge danab laa nug keeke nakok tatam awom aakkuib aɗeb amu, Kayak nug nuhig keeke awom amu eɗua aɗidkku,’ awa aum. 27King nug anam ana, nug nai tuɗitta aum. ‘Aria laa ag da kekeɗ meɗan, da ahilag king daakkulnu uuppig amu, ag diin, da noolppa ippa dona, aqappeg mauheg!’ awa aum.” Jesus anam aum.

Jesus king bia Jerusalem teum

28Amu Jesus Nug nai amu mattia malowa, Nug aha anuqa, Jerusalem ukkaknu ib awa ukkom. 29Nug ukka, aab aɗit Betpasi, Betani ele, Olipnu Qaukoppa daapiɗ, Nug aab aɗit amuppa tekkunu taata, appa nug he, nuhikuɗ ippunittak awak danab aɗit laa matte gokkulahnu a daaeheh, Nug amelahppa aum. 30“Aa goya, aab nakok miag amuppa teya, appa aab daugppa donki nag laa ⌊nakok okkai meum⌋ qakkak daatte ana anidkkulah. Donki amuam bau, danab laa nug attan dayaya ii oiyom. Aa anidya, aa uhuqya aoya uɗieɗ! 31Aa anam hebepeɗ, danab laa, ‘Aɗinu aa donki amu uhuqttep?’ awa oɗ mateb amu, aa inam aiɗ! ‘Naɗi Nug nuhignu uɗat ele.’ Aa anam aiɗ!” awa aum.

32Jesus Nug danab aɗit otiatom ele amu aa goya, keeke oh aa amelahppa aum, Nug oɗe bianab amu anidpiɗ. 33Anidya, aa donki nag ⌊nakok okkai meum⌋ qakkak daye, ag muɗi amu uhuqeheh, donki mamelag ag aa oɗ matan appig. “Aɗinu aa donki nag ⌊nakok okkai meum⌋ amu uhuqttep?” aon appig. 34Aon aeg amu aa apiɗ. “Naɗi Nug nuhignu uɗatab ele,” aoya apiɗ. 35Aria aa donki nag ⌊nakok okkai meum⌋ amu aoya, Jesus gumidya ukkaeh, ag lamen ulahnu ahilag aon, donki gomeppa duqona, ag Jesus ehanitteg, Nug donki nag ⌊nakok okkai meum amu⌋ attan ta dayom. 36Am Jesus Nug donki attan ugekke, danab ah ag lamen ulahnu ahilkad ibppa duqadppig.

37Aria Jesus Nug ukka, ib laih Olipnu Qauko amu eɗitta no, appa nuhikkud ippunittak awak danab kuɗum laa ele ag oh nuhignu gamalag ahom. Aɗinu? Nug kobol danab hekkunu elele iitta kuɗum he anidppig amunu, ag baalag okkaippa enan Kayak binag humappig. 38Ag Kayak binag human, baalag okkai enan appig. “King nug Naɗi onigppa uɗitte amu, ig Naɗi Nug itidkkunu oonig daatte. Nuhigppa Kayak Nug ig danab, ihinignu oo ena daatte. Ig Kayak Ebehi Ele, Nug binag attannab humatu.” 39Ag anam heegeg, Juda dilag ɗo gumak danab-Parasia ag danab ah kuɗum amu oolagppa daanna, ag Jesus amegppa appig. “Ippunittak danab, na nahipad ippunittak awak danab daulag batappe, ag toetteg!” aon appig. 40Aon aeg amu Jesus Nug ag anam appig amunu amelagppa aum. “Da ag amelagppa attem, imu ag oɗelag qamutppeg amu, men ag ekkulag,” awa aum.

41Jesus anam ana Nug ukka, Jerusalem guguitta wana, Nug aab okkai amu antta, ameg leb ne, 42Nug aum. “O gadon, ag maɗoɗ daaglagnu ib ii dootteb. Uug awak haen ahilag am miagnab, amge ag attemun maɗoɗ daaglagnu ib amu anidlob, ag uug amu ii anidlob, amge ib amuam ag amelagppa lokkumak daatte. 43Amunu ag doyeg! Geha dimppa haen amu uɗieb, ahilag kekeɗ ag aqaglagnu uɗin talilidna, wan buuppeg teeb, ag aben ohppa ag oo mattan autnanab aona, 44geha ag ag Juda, ag buɗulkad ele tappaladna oɗoɗadna autna aoglag. Aab okkainu aɗ, lag ele menppa heppig amu kekeɗ ag loppaɗppeg, men laa nug laa qaɗeppa iinab daama. Kayak Nug ag Juda ehanadkkunu heum, amge ag amu ii dabmeppig amunu, kekeɗ ahilagnu ag anam hekkulag,” awa aum.

Jesus Nug laa Kayaknu mettid lag ooppanu lamattom

45Amu Jesus Nug Kayaknu mettid lag nuhig tomppan keeke oh ele ooppa noa, nug danab appa mana mettaknu keeke dadennu maadppig amu, Nug digma ag lamattom. 46Nug amelagppa inam aum. “Kayak naippa yaak inam daatte. ‘Danab ag da laul am danab ah dilag unuqiɗak lag dooglag,’ amge ag heeg, nug yab danab naunab dilag lokkumak aben bia daatte,” awa aum.

47Nug anam hewowa amu Nug deɗ oh Kayaknu mettid lag ooppa noa, danab ah Kayak nai ippuanattom. Nug anam heehe amu, mana mettak danab okkai amu ɗo mehuqak danab am danab ah gumattak ikki ele ag ahan, Nug qeppeg mauhkkunu ib madippig. 48Amge danab ah oh ag nuhig nai dooglagnu wagai mena heppig amunu, ikki danab ag Nug qeppeg mauhkkunu ib laa ii anidppig.

હાલમાં પસંદ કરેલ:

Luk 19: NB

Highlight

શેર કરો

નકલ કરો