Luk 18

Ah qab epeɗiak danab ele dilah kaya

1Amu Jesus Nug keeke danab ag dootteb ii dootteb ele ouaqata ippuanatta, ag haen oh unuqidkkulagnu, ag bahilag yaamanu ele amelagppa aum. 2Amu Nug inam aum. “Amu aab laappa epeɗiak danab laa nug Kayaknu ebehi oh bodoetta le ii me, danab dilagnu ele dab-ii-madatta dayom. 3Am ah qab laa aab amuppa ele dayom, nug haen oh uɗia, epeɗiak danab amegppa aum. ‘Kekeɗ dahil nug da hippel qagatte amunu, na da ehaniɗna, uug dahil babaitte!’ awa aum.

4Ah amu nug anam heehe, epeɗiak danab nug laa ehanidkkunu amu, kobol amu nug beɗuppa ii daattom, amge dimppa nug ooppa aum. ‘Da Kayaknu ebehil oh bodoetta le ii me, danab dilagnu ele am da dab-ii-mettem, 5amge ah qab imu nug da duttuniɗa heehe, da beɗul bahi yaatte amunu, da nuhig nai amu da bappaidkkul. Iitta dayeb amu, nug eɗuawa uɗieb, da oolppa nokuhkuh okkai qekku amunu, nuhig nai amu bappaidppi, uua gokku,’ awa aum.” Jesus Nug keeke danab ag dootteb ii dootteb ele ouaqata ippuanatta nai amu mattiom.

6Aria, Naɗi Nug nai amu mattia mala, Nug nai tuɗitta aum. “Ag epeɗiak danab nau amu nuhig nai imu doyeg! 7Nug ah amu ehanidkkunu aum amu, Kayak Nug danab ah nuhikkud, Nug ag tituanattom ele amu, ag hanhan tuqan amun ele deɗ oh unuqidppeppeg amu, Kayak Nug ag iite ehanadma? Nug ag baubau oɗmak haknu amelag maama, paha ii ehanadma? Anam iitta. 8Da ag amelagppa attem. Nug am paha ag ehanadkku. Amge Danab Bekkalag da, da eɗue uɗien, haen amuppa geha da wan danab ah ag ooppa genab doyak ele anadkkulte, o iittate?” awa aum.

9Am Jesus Nug danab laala ag akka ahilagnuib, “Igib genab tutukku hak danab,” anana, ag danab laa dilagnu, “Ag nau, hipunin ele,” aon appig ele amu, Jesus Nug ag amelagppa keeke danab ag dootteb ii dootteb ele ouaqata ippuanatta nai imu mattiom. 10Nug aum. “Danab aɗit laa aa unuqidkkulahnu Kayaknu mettid lag ooppa teya daapiɗ. Laa amu ɗo gumak danab-Parasia. Laa amu takis awak danab. 11Amu ɗo gumak danab-Parasia nug hibaitta, attan neekka dayaya, nukka nuhignu unuqitta aum. ‘Kayak, da am danab laala oh bia iitta. Ag am yab danab, eheɗ hak danab, am ewau pakkua gappai hak danab ele. Da am anam iitta, takis awak danab imu hette bia ele iitta amunu, da na amenppa, “Ena heme,” attem. 12Am da haen oh mettid laippu ooppa deɗ aɗit ee ohnu kud mein dayeye, amu da keeke aottem oh amu oppati, ameg eblaih tanig ele neeg, amu da na ameg laippu medattem,’ awa aum.

13Nug anam aum, amge takis awak danab nug piɗe dayaya, dup noa, hab attan ii neekkom. Iitta. Nug eheɗnab doyom amunu, nug eppegppa momo qeutata, nug aum. ‘Kayak, da am hipunin danab amunu, na dahilnu oot gai-iitta doon oot meɗan ehaniɗkkutnu oɗ medattem,’ awa aum.” 14Jesus Nug nai amu mattiowa, Nug baula amelagppa aum. “Da ag amelagppa attem, Kayak he, takis awak danab nug genab tutukku hak danab daye, eɗua laugppa ukkom, amge danab laa nug am anam iitta. Amunu laa nug onig humatte amu, Kayak Nug heeb danab amu nug onig nekku, amge danab nug onig qe nette amu, Kayak Nug danab amu nug onig humakku,” awa aum.

Jesus nid naunau itittak ena mattom

15Amu danab ah ag nid yuɗ diiadna, Jesus Nug eppeg qaɗelagppa ma, itittak ena madakkunu gumidna goppig, amge haen ippunittak awak danab ag amu anidna, ag laa nid yuɗ diin goppig ele nakok aladppig. 16Ag nakok aladppig, amge Jesus Nug nid naunau onilagppa e gumidna doeg, Nug nuhikkud ippunittak awak danab amelagppa aum. “Danab ag nid naunau bia daatteb, ag am Kayaknu ɗo maɗoɗ ooppa daatteb amunu, ag nid naunau uuadppeg, dahilppa doig! Ag ahilag ib aib oo neppig,” awa aum. 17Anam ana, Nug amelagppa aum. “Da genab ag amelagppa attem. Danab nug Kayaknu ɗo maɗoɗ nid nakok aotte amubia ii aokku amu, nug Kayaknu ɗo maɗoɗ ooppa iinab noma,” awa aum.

Ikki danab laa keeke kuɗum ele

18Aria, Juda dilag ikki laa nug Jesus inam oɗ mettom. “Ippunittak danab ena, da attem heina da bauklel hanhannu aokkul?” awa aum. 19Nug anam a, Jesus Nug eɗua amegppa aum. “Kayak Nug nukka am ena amunu na dahilnu, ‘Danab ena,’ ame amu, na nai amu tatam dabmewonate ame o iitta na hamute ame? 20Amge nahip oɗmaknu amu, na ɗo oh doottem. Na ewau aib pakkuna gappai heme. Na danab aib qeppe mauhom. Na yabhok aib heme. Na hettoɗiakppa, aben laa oh eleppa, na layapnu nai hambuppuak aib mattime. Na mamen, anin ele binalah mate!” awa aum. 21Jesus Nug anam a amu Juda dilag ikki danab amu nug aum. “Da nid nakokppanu ɗo amu dim lamitti uɗie, gemu ele anamib hettem,” awa aum. 22Nug anam a, Jesus Nug nai amu doya, amegppa aum. “Keeke laippu amuppaib na elele iitta. Na gona, na enun oh meppe, danab laala ag daden meppeg, na men doɗo amu oh aon, daɗek danab mattona, na hab attan enun okkai ele daakkut. Na anam hewona, na eɗun dona, da dim lamiɗe!” awa aum. 23Nug anam a amu, ikki danab nug nai anam doya, nug oo uugnab dayom. Aɗinu? Nug enub kuɗum ele. 24Amu Jesus Nug danab amu nug ooppa uug doyom antta, Nug aum. “Danab ag enulag kuɗum ele amu, ag Kayaknu ɗo maɗoɗ ooppa noaknu am uug okkai ele. 25Ge, doɗ kamel nug koitaknu tutui giɗoppa noa laih gokkunu am uug ele, amge danab enub kuɗum ele, nug Kayaknu ɗo maɗoɗ ooppa nokkunu, amuam uug okkainab ele,” awa aum.

26Am danab ag nai amu dooppig ele ag appig. “Anam dayeb amu, aun nug padal memanu ehanittak aokkunu elele?” aon appig. 27Aeg amu Jesus Nug aum. “Keeke danab ag akka hekkulagnu elele iitta daatteb amu, Kayak Nug hekkunu elele,” awa aum. 28A amu Pita nug aum. “Antte, ig ihinig keeke oh uuta, na dim lamidttem,” awa aum. 29Anam a, Jesus Nug ag amelagppa aum. “Da genab ag amelagppa attem. Danab aun nug Kayaknu ɗo maɗoɗnu ha amu nug laug, nug awakkud, amakkud, nug anig mameg, nug bekkod, aɗekkud ele uuatta, da dim lamiɗtte amu, nug geha haen imuppa hamu ii daama. Iitta. 30Nug wannu haen imuppa keeke uua oiyom, nug amunu nob huana eɗattak awa, amu butti aɗi haen amu uɗieb, nug bauklel hanhannu ele aokku,” awa aum.

Jesus mauhowa eɗua hippaidkkunu baula aum

31Amu Jesus Nug nuhikkud ippunittak awak danab 12 diia piɗe bia wana, amelagppa aum. “Doyeg, ig gemu iikku Jerusalem gottem. Kayaknu propet ag anukka Danab Bekkalag da, dahilnu Kayak aum oɗe madippig amu, nai amu gemu meu okku. 32Ag geha da aiɗna, iitta aɗi eppelagppa meiɗppeg, ag aon aon iuna, guhuɗilna amu hunu iuglag. 33Amu ag da bu qaun eleppa eheɗ mataɗilna, ag iuppeg mauhkkul, amge deɗ ewamppa da eɗuen hippaidkkul,” awa aum. 34Jesus Nug nai amu mattiom, amge ippunittak awak danab ag oolag ii maittom. Nai amu, diig nuhig amu ag oolagppa lokkumak dayom amunu, ag Nug nai aum amu, ag meu nuhig pehettak ii dooppig.

Jesus ameg gaɗuak laa babaittom

35Aria Jesus Nug ukka, Jeriko guguittette, danab laa ameg gaɗuak ele nug ib daugppa dayaya, danab ah men doɗo mettaglagnu ewa unuqattatta dayom. 36Am nug anam haaha dayaya, haen nug danab ah kuɗum ag uɗin ukkaegeg doyatta, nug danab laala oɗ matta aum. “Umu ag aɗi diignu anam hetteb?” awa aum. 37A amu ag nug amegppa appig. “Jesus, Nasaret ted, Nug uɗitte,” aon appig. 38Ag aeg, nug doya, ewa aum. “Jesus, Dawit Bekka, na dahilnu oot gai-iitta doon oot meɗan ehaniɗe!” anana eum. 39Am danab ameg laa anuqna goppig ele ag nug aidna appig. “Na oɗen qamute!” aon appig, amge nug nai amu ii dabmetta, baula huanaknab ewa aum. “Dawit Bekka, na dahilnu oot gai-iitta doon oot meɗan ehaniɗe!” awa aum. 40Nug anam ewe, Jesus Nug doya, Nug baeg ya hibaitta dayaya, danab ah amelagppa aum. “Ag nug aon, da gumiɗna doig!” awa aum. Nug anam a amu ag nug aon, Jesus gumidna doeg Jesus nug oɗ mettom. 41“Da nahipnu aɗi hekkulnu oot daatte?” awa aum. Awa a amu nug aum. “Naɗi, da neegkkulnu ool daatte,” awa aum. 42Amu Jesus Nug amegppa aum. “Na amen eɗua oppateb, amahlak antte! Na dahilnu ootppa genab doome amunu, na ena daattem,” awa aum. 43Anam aawo, geha aakkunab danab amu ameg obate, neekka aha, ibppa Jesus dim lamittatta, Kayak binag meum. Haen danab ah ag amu anidna, ag ele Kayak binag meppig.

હાલમાં પસંદ કરેલ:

Luk 18: NB

Highlight

શેર કરો

નકલ કરો