MIMBOONE MINLÔMAN 9

Ndôbaʼane Nti baa Saül e zene Damas

(Mm 22:3-16; 26:9-20; Ga 1:11-16)

1Saül ve ke ôsu, te vôʼôbô ajô bisisia a ñwôane beyéʼé be Nti. 2Ane a nga ke sili Ntuni nnen a ve nye bekalate ya ke meba me Zambe ya Damas. Ôsimesane wé ô too na, nge a yene bôt, befam nge binga ba buni, a kele be nkaʼane mengataʼa Yérusalém.

3A ngenan a kele zen , bebé ya kui Damas, ateme na beta éfufup, a soʼo yôp, a nga bômane nye a minkôkô mié. 4Ane a nga ku si a wôʼô tyiñ é jôʼô nye na: A Saül, a Saül, amu jé wo kpweʼele ma? A nga yalane na: 5A Nti, ô ne za nye ma kpweʼele? Nti na: Me ne Yésus, ma wo kpweʼele. 6Kôlôʼô si ô ke tison, e wé nye ba ye liti wo jame wo yiane bo. 7E bôt baa be nye be nga too nsamba, be nga too feʼe ne vema. Be nga wôʼô tyiñ , ve te yene môt. 8Saül a nga kôlô si. Akôsa bo mis me mbe nye nkuan, ve a nji fe beta yen. E bôte baa be nye be mbe nsamba be nga ke be bili nye wo a kui Damas. 9Valé a nga bômbô melu mela te yen, jaʼane di nge nyu. 10Nyéʼé wua a mbe jôé na Ananias, a nga to Damas. Nti a nga loone nye biyeyem été a jô nye na: Ananias, nye ke ve yebe na, ma nyô a Nti. 11Ane Nti a nga jô nye na: Wo ye ke njoñ ba loone na Tetele njoñ, ô sili môte ya Tarse a ne jôé na Saül, e nda be Yudas. A ne été, a boʼo meyeʼelan. 12A yeneya môt a nyiʼin a betéʼé nye mo na a beta yen. 13Ananias a nga yalane na: A Nti, me wôʼôya bôt abui be kobôʼô ajô môt ate, be simesaʼan abé ese a nga bo mimfufube miôé e Yérusalém. 14A ngenan a bili ntute ngul a nga nyoñe be betuni benen benen, mfaʼa ya kaʼa ba bese ba loone jôé dôé. 15Ve Nti a nga jô nye na: Kelek, amu môt ate a ne ékpwelé me tobeya mfaʼa ya miase jôé dam e be meyoñe bikuu, bejôô bôt a mvôʼô Israél. 16Mamien ma ye tyeñele nye mam mese a ye jibi amu jôé dam. 17Ane Ananias a nga ke a nyiine nda été, a beté nye mo a jô na: A Mojañ, Saül, Nti nye a te lôme ma, e Yésus a nga yené e be wo zene yôbe ya dulu dôé, nde wo ye beta yen a jaé ne lut a Mfufube Nsisim. 18Biôm, ane ndalebôbôp, bi nga kôlô nye mis a ku si été été, ane a nga beta yen. Nde ñhe a nga duuban. 19Eyoñe be nga ve nye bidi, ane a nga beta nyoñe ngu.

Saül a taté ésaé ya kañete Krist

(2 Ko 11:32-33; Ga 1:18-24; Mm 22:17-21)

Ane a nga tabe abe melu baa be beyéʼé ya Damas. 20A, teke yange, a nga taté kañete e meba me Zambe été na: Yésus a ne mone Zambe. 21Bôte bese be nga wôʼô nye be nga semé, a jô na: Ye saa nye a nga wosane bôte bese be nga loone jôé dina e Yérusalém? Ye mia jô na a nji vañe zu bole bôte na a kee be nkaʼane be betuni benen? 22Ve Saül a nga ke ôsu a bôôé bôte minleme si, a a nga jañele Beyude ya Damas fek, a tuʼa liti be ndeme na Yésus a mbe foʼo Mesie.

23Eyoñ é lôteya ôbe ayap, ane Beyude be nga kui tyiñe ya bo na a wôéban. 24Ve Paul a nga yeme nkuane tyiñe yʼémoʼo jap. Amu be nga kui vôme ya baʼale mimbé ya tison alu baa môse na be wôé nye. 25Vʼalu éziñ, beyéʼé bé be nga suu nye si e tetele beta mfine ya nkaʼalé a too e mone nkoé été. 26Eyoñ a nga kui Yérusalém, Saül a nga veʼele jeñe na, beyéʼé be tabe nye ndi; ve bese be nga ko nye woñ, teke ngule ya buni na a mbe foʼo ñyeʼé. 27Ane Barnabas a nga nyoñe nye e nsamba wé, a liti nye minlôman. A nga kañete be ane a nga yene Nti e zene ya Damas, a aval a nga kobô nye. A nga kañete fe be avale Saül émien a nga kañete jôé Yésus a ngul ése. 28Ataté éyoñe te, Saül a nga fubu nsamba wop, meke a meso ya Yérusalém, be kobôʼô a ngule minlem a jôé Nti. 29Be nga laan, baa be Behéléniste a sañetan. Ve mfaʼa wop, be jeñe mezene ya wôé be. 30Eyoñe bobenyañ be nga wôʼô nalé, be nga ke litane be e Sézaré, e wé, be nga bo na be ke Tarse. 31Keké é nga nyiñ évôvoé été e mefôla mese ya Yudé, Galilé a Samari. E nga wôn, a wulu a woñ mfaʼa Nti a, amu mvolane Mfufube Nsisim, é nga yaé.

Pierre a saé Enée a wômôlô fe Tabita

(1 Bb 17:17-24; 2 Bb 4:18-37)

32Amu e nga bo e kui éyoñ ése na, Pierre a ke a wulu. A bo a kele be bebuni ya Lida. 33Ane a nga yene môt a too jôé na Enée, e Lida wé, a mbôô e ntuʼu énoñ, tañe mimbu muam; a nga to ñyeyem. 34Pierre a nga jô nye na: A Enée, Yésus Krist a saé wo, kôlôʼô si a kôme énoñe jôé womien. Eté été, a nga kôlô si. 35Eyoñe be nga yene nye, bôte bese ya Lida a njeʼese ya Saroñ be nga meme Nti.

36Minga éziñ a mbe Yopé a too ñyeʼé; a mbe jôé na Tabita, nge na Dorkas#9:36Tabita nloone Beyude; Dorkas, nloone Begrék; atinane ke na Nkok (tit). A mbe kum mfaʼa ya mbamba mimboon a mimvolan a nga bo a volôʼô bôt. 37Melu mete, a nga kon a wu; éyoñe be nga mane woʼo nye mendim, be nga bôôé nye étune nda ya yôp. 38Mbôle Lida a nga too bebé a Yopé, beyéʼé be nga wôʼôtane na, Pierre a mbe wé, ane be nga lôme bôte bebaé na be ke loone nye, a jô nye na: Tôñe bia, te yange. 39Teke yange, Pierre a nga ke baa be be. Eyoñ a nga kui, be kele nye étune nda ya yôp. Minkuse mise mi nga yône nye mis, mi litiʼi nye biyé, a belenekôt a nga bo a jaléʼé be éyoñ a nga vee. 40Ane Pierre a nga kuli bôte bese atan. Ane a nga kute meboñe si a yeʼelan; ane a nga kôñelan asu mfaʼa mbim ô nga bôô, a jô na: A Tabita kôlôʼô si! Ane a nga kui mis a yene Pierre. Ane a nga nyokan a tabe tôtoo. 41Be nga bi nye wo, a telé nye tetele a beta loone bebuni a minkus, a liti be nye a ntoo vevee. 42Bôte bese ya Yopé be nga yem ajô te, a abui bôt e nga buni Nti. 43Pierre a nga tabe ôbe ayap e Yopé, e nda Simon a nga bo a kôme bikôp.

હાલમાં પસંદ કરેલ:

MIMBOONE MINLÔMAN 9: BULU09

Highlight

શેર કરો

નકલ કરો