MIMBOONE MINLÔMAN 8

Ekpweʼele ya atataʼa

(Mm 11:19-21; Fil 1:12-14; Yoa 6:70)

1Saül a mbe ngame ya bôt be nga kañese awu Etienne. Melu mete ékpweʼele é nga ngetane keké ya Yérusalém, angôndô ékpweʼele. O vaa ve minlôman, bôte bese be nga tup a mialane mefôla ya Yudé a Samari. 2E bôte ba buni, be nga jam Etienne abeñ. 3Saül kʼa kele a ndaman keké. A nga ke a nyiine menda menda a bi befam a binga, a fiti be nda mimbôk. 4Wôna bôt be nga tup a mialane minlame minlam. Be nga ke li a li, a kate Mbamba Foé ya ajô Zambe.

Filipe, nkatefoé ya Samari; Simon mboo Majik

(Yoa 4:1-42; Mm 1:8)

5Avale te Filipe, nye, a nga ke tisone Samari. A nga kañete Krist. 6Bizuʼu bi bôt, tyiñe jia, be nga buni mejô me Filipe, amu be nga wôʼô bitua bi mam a nga bo, a yene fe bie a mis. 7Nalé fe na, mimbia minsisim abui mi nga kobô a beta metyiñ, a miñyeyem, mimbôbôk, be nga bo mvoʼé . 8Beta mevak me nga jaé tison éte.

9Môt éziñ a mbe tisone valé a too jôé na Simon. A mbe a boʼo majik. Bôte ya Samari be nga kame nye. A mbe a kômbôʼô liti e mise me bôte na, a mbe beta môt ya semé. 10A bôte bese, ataté ba be ne tyôtyoé, a kui ba be ne menen, be nga ke be nye. A be nga jô na: Ngule Zambe é ne be môte nyô, e ngul é ne foʼo medañe. 11A nge be nga tôñe nye nalé, foʼo vʼamu aso ayap, a nga bo na bôt be kame nye a zene ya mengañe mé. 12Ve éyoñe be nga buni Mbamba Foé, Filipe a nga kañete be ajô éjôé Zambe a éjôé Yésus Krist, be nga duuban, befam a binga. 13Simon émien a nga suʼulan bo mbuni. A nga duubane fe a kabetane Filipe. Eyoñ a nga yene bitua bi mam bi nga boban, émien a nga bo feʼe ne vema. 14Eyoñe minlôman mi nga to Yérusalém, mi nga wôʼô na, mejô me Zambe me yeneya éto e minleme mi bôte bese ya Samari, be nga lôme Pierre ba Yôanes. 15Eyoñe be suaneya Samari, be nga bo meyeʼelane na, bôte ya Samari be nyoñe Mfufube Nsisim. 16Amu éyoñe te Mfufube Nsisim a ngenane te tabe e be môte wua ya be be. Be nga nyoñe ve nduan a jôé Yésus Krist, Nti. 17Ajô te Pierre baa Yôanes be nga beté be mo, a bôte ya Samari be nga nyoñe Mfufube Nsisim. 18Ve éyoñe Simon a nga yene na Mfufube Nsisim a nga vebane be bôt a zene ya mbetane mo, a nga kaʼa minlômane moné a jô be na: 19Vaʼane fe ma ngule nyô, nde bôte ma fe ma ye beté mo, ba ye nyoñe Mfufube Nsisim. 20Ane Pierre a nga yaa nye, a jô na! Moné wôé a womien bi jañek, amu wo te buni na, ba kuse mveane zesé Zambe a moné. 21O nji bi ngap, nge jôm éziñe ya mame ma bobane ma, amu nleme wôé, ô nji bo zôsôô e mise me Zambe. 22Kôñelaʼan mfaʼa ya mbia nleme wôé, a yeʼelane Nti, ndôʼôtô na, mbia ôsimesan a nga kui e be wo, a ye jamban. 23Ma yene na, ôlune ziñ a mengataʼa ya abé bi bili wo. 24Ane Simon a nga yalane na: Miabebien yeʼelane Nti ajô dam, ane jame da ya mame mia te kobô ma, da ye bo te kui e be ma.

25Pierre baa Yôanes, éyoñe be maneya bo bengaa, ya afôla te, a kate mbamba Foé Nti, be nga bulane Yérusalém. Be nga kate Mbamba Foé minlam abui ya Samari.

Filipe a miaʼa ya Etiôpi

26Engele Nti a nga jô Filipe na: Wo ye ke mfaʼa jôbe da tôô, e zene ja ke mfaʼa ya Yérusalém a kui Gaza, e nkôte si. 27Ane Filipe a nga ke, teke yange, éyoñe miaʼa ya Etiôpi, beta mbo ésaé Kañdase, njôô bôta minga, a ngovina ôsu ya akume dé nye a mbe Yérusalém, 28a nga bulane jale dé a too vagoñe wé a lañe nkulu mejô Ezayi 29Nsisim a nga jô Filipe na: Kele ôsu a koone éjakas. 30Ane Filip a nga ke mbi a wôʼô ane miak ô nga lañe kalate nkulu mejô Ezayi a jô nye na: Ye wo tuʼa foʼo wôʼô mejô wo lañ? 31Ane miak ô nga yalan a jô nye na: Me ne ngule ya tuʼa wôʼô aya, teke môt a faé ma éfufup? Ane a nga loone Filipe, a bet, a ke tabe fefele jé. 32Mana me ne mejô ya kalate Zambe a nga bo a lañek:

aval ane ngal ntômba

ba kee nye e vôm a ye tyiʼiban,

a ane mone ntômba a ne mvuk

e mo ya nyô a tyeñe nye mimvot,

avale te a nji kui anyu dé.

33Ôsame wé été

ajô dé e nga tyiʼiban ékotekot,

Za ya miaé wé a ye kañete ajô dé.

Amu be nga vaa ényiñe jé si nyô.

34Ane miak ô nga jô Filipe na: Ma yeʼelane wo, kate ma, za a ne mejô nkulu mejô a kobô ma, ye émien, ye môte mfe? 35Ane Filipe a nga taté nkobô a mejô mete, me soʼo vôm a nga bo a lañek, a kate nye Mbamba Foé ajô Yésus. 36E dulu dap e zañ, be nga yene mendim. Ane miak ô nga jô Filipe na: Mendime ma, jé ja kamane ma na me duuban? 37Filipe nye na: Nge wo buni a nleme wôé ôse, nalé a ne boban. Miak ô nga yalane na: Ma buni na Yésus Krist a ne mone Zambe. 38Nde a bendé na be telé ékalik. Ane bebaa be nga sise mendim été. Ane Filipe a nga du nye. 39Eyoñ be nga kôlô mendim été, ane Nsisime Nti ô nga nyoñe Filipe a kee nye, miak te fe yene nye. Ve a nga ke zene jé a mevak. 40Filipe a nga teme na a nto Azôt. A nga ke ôsu a kate Mbamba Foé e bitisone bise a nga lôt, akekui éyoñ a nga suane Sézaré.

હાલમાં પસંદ કરેલ:

MIMBOONE MINLÔMAN 8: BULU09

Highlight

શેર કરો

નકલ કરો