MIMBOONE MINLÔMAN 20

Paul a beta bulane Masédôan a e Grés

(1 Ko 16:1-7; 2 Ko 7:5; Rm 15:25-27)

1Eyoñ éngengam é nga man, Paul a nga loone beyéʼé a ve be ngule minlem. Ane a nga yaʼane be a ke Masédôan. 2Eyoñ a nga mane lôte mefôla mete a mane fe ve bobenyañe ngule minlem, ane a nga kui Grés, 3vôm ate a nga tabe ngon éla. A nga yiane bete sitima a ke Siri, ve amu Beyude be nga bo ésoʼo ya bo nye abé , nde a nga tyiʼi na a viane tyii Masédôan. 4Bôte be nga to e nsamba wé be mbe na: Sapatrôs, mone Pirus ya Béré, Aristark, baa Sékundus ya Tésalonik, Gayius ya Derbe a Timôté, nalé fe Tisik a Trôfime éfase si ya Azi. 5Nsamba bôt ô nga ke bia ôsu wu ô nga Yange bia Trôas. 6Ve mfaʼa wongan, nkôlane ya Filip, éyoñe melu ya fembé é ne te mvusan me lôteya, bi nga ke koone be Trôas. Valé melu metan me lôteya, bi nga tebe valé ngume sondô.

Njomane ya jô maʼan e Trôas

(Mm 9:36-42; 1 Bb 7:24; 2 Bb 4:32-37)

7E môs ôsu ya sondô, éyoñe bi nga sulan a beʼe fembé, Paul a nga yiane ke tyé, ve a nga kobô bobenyañ ajô Zambe akekui zañ alu. 8Belambe be nji jemban étune nda ya yôp, e vôme bi nga sulan. 9Esoé ndôman, be loʼone je jôé na Etikus, a nga tabe éwome vundi a ke ôyo melom. Ane a nga koo a ku si. Eyoñe be nga ye bete nye si, e kooé na a wuya. 10Ane Paul a nga sise si avôl e vôme a nga bôô, a bi nye a mo mé, a jô bôte na: Te koone woñ, a vee! 11Eyoñ a nga beta bet étune nda ya yôp, ane Paul a nga beʼe fembé a di, ane a nga kee minlañe ôsu a kui tyé. Mvus éte, a nga ke. 12Ve mfaʼa ésoé ndôman, be nga bulane nye a vee. Jame te e nga ve bôte ngule minlem abui.

Paul a ke Milé; Maʼane e be bemvendé ya Eféze

(1 Tes 2:1-12; 1 Pi 5:1-4; Mt 7:15-20; 2 Pi 2:1-3; Tt 1:9-14)

13Ane bi nga tebe ôsu a nyoñe sitima a ke suʼu Asos. Vôm ate bi nga yiane beta nyoñe Paul. Amu nye a nga yiane ke wé, e zene ya sisi, aval ane émien a nga tyik. 14Eyoñ a nga koone bia Asos, bi nga nyoñe nye a ke Mitiléne. 15A kôlôya valé, bi kele éfunga, a kui zia Kiôs; e môse baa, bi nga dañ a ke mfaʼa ya Samôs: tyé kpwaa, bi nga kui Milé. 16Paul a nji kômbô tebe Eféze: amu a zaa jañele éyoñ Azi. A nga bili ôvek ya kui Yérusalém asu ya tabe wé, e môse Pantekôt, nge nalé a ne boban.

17Paul a too Milé, a nga bañete bemvendé ya Eféze. 18Eyoñe be nga sulane vôm a nga too, ane a nga kobô be a jô na: Mia yeme nnôme fulu wom e zañe jenan, ataté môse me nga suane be mia Azi. 19Me nga bo Nti ésaé a éjoté nyôl ése, a miliʼi mis. Me mbe mbômaʼane a meveʼele , amu mbia bimoʼo Beyude. 20Me nji biasé jam éziñe ya mam mi nga yiane yene mfi. Ve me nga kate mbamba Foé a yeʼele mia vôme bôt be too, jaʼane mia mia. 21Foé jam é nga loone Beyude a Begrék na be koñelane be Zambe a buni Nti Yésus.

22Eyoñe ji ma, mbôʼô Nsisim, me tele zene ya ke Yérusalém. Me ne te yeme jam da yañge ma wé. 23Ve jaʼane aya, nge aya, Nsisim a kate me de tison ése na bengôkop a mintaé ya nlem bia yange ma wé. 24Mfaʼa wom, me nji yen ényiñe jame beta tañ. Jame ma sôñ e ne ve na, me sondô mmatane mbil a ésaé Nti Yésus a nga ve ma me bo. E ne na me kate Mbamba Foé ya mvame Zambe. 25Ataté éyoñe ji, mia ye bo te fe beta yen asu dam, mia bese, mbe bete me nga kate Foé ya Ejôé. 26Me ne nguleya kobô tyiñe yôp e môse wuna na, me ne teke bijô ajô ya metyi menane mia bese. 27Me nji ke veʼele bo éles mfaʼa ya mone jam éziñ. Ve na, e feʼe Zambe ése, nje me nga kate mia. 28Baʼalane miabebien, a ngumba mbam, ñwô ôte Mfufube Nsisim a nga telé mia bebaʼale. Boʼone bebaʼale mintômba ya Keké, nje éte a nga nyoñ a metyi mé. 29Ma yeme na, mvuse ya akôlô dam, mbia beze ba ye zu e zañe jenan, mbe ba ye bo te nyii mbam. 30E zañe jenan, bôt ba kobô bifia ya nzametaʼane ba ye yené a dutu beyéʼé be tôñe be. 31Ajô te mombaʼan, te vuane na alu a môs , nté mimbu mila, a miliʼi mis, me nji jôʼé lebe môt ase ya be mia. 32Nde den, ma kee mia e mo me Zambe a Mbamba Foé ya mvame jé, nye a bili ngule ya lôñ a ve ba bese be ne émbé ngap.

33Me nji nyamete argent, or, nge ngômesane éziñe ya be môt. 34Miabebien mia tuʼa yeme na bisaé ya mo mam, bi nga bo na me jalé minkômbane miam, a mi bôt be nga wulu nsamba wom. 35Me nga liti mia éyoñ ése na, njibane njuk avale te ñwô wo bo na, mintetek mi yene mvolan a simesane mejô me Nti Yésus émien a nga kobô na: Mvean wo dañ ébotan a dañe nyoñan. 36Eyoñ a nga mane kobô mejô mete, ane a nga kute meboñe si baa be be a yeʼelan. 37Bôte bese be nga kutane miñyôn a wubane Paul tyiñ . 38Ôlune wop ô nga dañ abui amu a nga jô be na, ba ye bo te beta yene nye asu. Ane be nga ke litane nye sitima.

હાલમાં પસંદ કરેલ:

MIMBOONE MINLÔMAN 20: BULU09

Highlight

શેર કરો

નકલ કરો