MIMBOONE MINLÔMAN 21

Mbulan e Yérusalém

(Mm 20:36-38; Mm 8:5,40; 20:22-24)

1Eyoñe bia be be bi nga kandan ane bi nga bete sitima a ke foʼo ve Kôs. Tyé kpwaa, bi nga ke Rôdes. A kôlôya valé, ane bi nga tôlane Patara. 2E Patara, bi nga kooé sitima a kele Fénésie. Ane bi nga bet, a ke mañe yôp. 3Bi nga kui bebé Sipre. Ane bi nga saʼale a ke mbo ngale ya ékôte mañ, a kee dulu dangane ôsu mfaʼa ya Siri a ke Tir, vôme sitima a nga yiane kaʼa mimbeʼe. 4Ane bi nga bômbô valé melu zamgbwa. Nalé a too, amu bi nga yene bebuni . Mfufube Nsisim a nga tindi be be kobô Paul na, a bo te ke e Yérusalém. 5Eyoñe ntabane ya valé ô nga kpwaan, bi nga kôlô:binga, a bongô, be nga ke litane bia; éyoñe be maneya lôte tison ése, bi nga kute meboñe si éwome mañ a bo meyeʼelan. 6Eyoñe bi maneya yaʼane be, bi nga bete sitima, be ke be nga bulan. 7Bi nga ke ôsu a sondô dulu dangan nkôlane ya Tir, a kui Ptôlémayis. Wôna, éyoñe bi maneya batane bobejañ, bia be be bi nga tabe ngume môs .

8Tyé kpwaa, bi nga kôlô a ke Sézaré. Vôm ate bi nga bi éyoñe ya ke nda Filipe, nkatefoé wua ya bôte zamgbwa. Ane bi nga tabe nda jé. 9A nga bili bindune bengon binyin bi nga bo bi kuluʼu mejô. 10Wôna, bi too nda jé melu abui, ane nkulu mejô ya Yudé a nga suan a too jôé na Agabus. 11A nga zu yene bia. A nga nyoñe kandé Paul, a tiñeti mo a mebo mé a jô na. Mfufube Nsisim a jô na, môt a nee kandé nyô, e ne Beyude ba ye kaʼa nye ana, a kee nye mo meyoñe bikuu. 12Eyoñe bi maneya wôʼô mejô mete, ane bia be bobejañ bi nga yeʼelane Paul na, a bo te ke Yérusalém. 13Ane a nga yalane bia na: Zʼajôô nde mia yii de, a ve me nlem atek? Me ne nkôman, saa ve nkaʼane ngataʼa étam, ve jaʼane awu e Yérusalém amu jôé Nti Yésus. 14Amu a nji kômbô wôʼô bia, nde bi nga jôʼé a jô na, nkômbane Zambe ô bobaʼan. 15Eyoñe bone melu mete me nga man, bi mane fe kômesan, ane bi nga bet a ke Yérusalém. 16Beyéʼé ya Sézaré be nga zu e nsamba wongan, be nga ke tooé bia e nda be Mnason ya Sipre, ñyeʼé aso ayap.

17Eyoñe bi nga kui Yérusalém, bobejañ be nga nyoñe bia abui mevak été. 18Tyé kpwaa, Paul a nga ke e nda be Yakob bia be nye. Vôm ate fe bemvendé bese be nga too. 19Eyoñ a maneya batane be, ane a nga kañete be mame mese Zambe a nga bo ézezañe bikul. 20Bôte be nga wôʼô nkobô Paul be nga ve Zambe duma, a jô nye na: A mojañ, ô ne yen abui betoyini be bôt ba buni be ne Beyude. Bese ba ve ngule ya baʼale metiñ. 21Ve da, be wôʼôtaneya menyiñ abui ajô dôé. Nyeʼelane wôé ô ne tindi Beyude bese baa be bikul be too na, be liʼi Môze. E too ve ane wo kômbô jô be na, be bo te tyiʼi bone babe metye, a bo te beta baʼale metiñ. 22Bi bo aya, amu teke selan, ba ye foʼo wôʼôtane na ô ne va. 23Boʼo ñhe avale bia ye jô wo. Bi bili bôte benyine va, be nga bo ngakaʼa. 24Nyoñe be, ô bo ntunan, mia be be fufulu. Be ne fe tyeñebane minlô. Bôte bese ba ye yeme na menyiñe ba wôk a ajô dôé me nji bo été. Ve na, wo fe wo jalé metiñ. 25Ve mfaʼa bikul bi buniya, bi nga sili be mintyiʼane miangan, e ne na be tyi betit be nga vebane be bezambe ya bikuu, metyi ya betit ba wu abuk, a mboone mbia be mam. 26Tyé kpwaa, Paul a nga nyoñe bôte bete benyin a taté ntunane baa be be éyoñe jia. Ane a nga ke nda Zambe a kate be éyoñe melu ya ntunane ma ye man. A na, mveane wo ye veban asu môt ase ya be be.

Ba bi Paul e nda Zambe

(Mm 20:23; 24:5-19; Rm 15:30-31; 1 Tes 2:15-16)

27Melu zamgbwale me nto bebé ya man, ane Beyude ya Azi be nga yemelane nye e nda Zambe, be nga tindi ékôane bôt ése é bi nye. 28Be nga yôtane be jôʼô na: A mvôʼô Israél, zaʼa vôʼôlan, e nye le, e môt a wosan ayoñe dangan a metiñe me Môze, a e vôme nyô, a ñyeʼelan a yeʼele bôte vôm ase, a e be bôte bese. A keya fe kee Begrék e nda Zambe, a ndamane étyi ya mfufube vôme wu. 29Valé be yeneya Trôfime môte ya Eféze, baa nye e tison, be buniʼi na Paul a nyiñeliya nye e nda Zambe. 30Ane tison ése é nga ngômelan, a bôte bese be nga zu ndulu. Ane be nga bi Paul a kuli nye atane ya nda Zambe, a mane fete mimbé mise. 31Eyoñe be nga zu kate évete bezimbi na, Yérusalém ase a nga ngômelan, be nga jeñe zeneya wôé Paul. Be nga kate nye na: Mvoʼé é nji bo tison. Lubulubu a ntoo vôm ase. 32Ane a nga sulane bezimbi a bivete biap été été, a ke vôme ntañete ô mbe. Eyoñe bôt be nga yene bivete bezimbi a nsamba wop, ane be nga jôʼé Paul ébôm. 33Ane évete bezimbi é nga ke Paul bebé a bi nye, a ve tyiñe na, be kaʼa nye a ngôkop ébaé. A nga kômbô yem, Paul a ne za, a a nga bo jé. 34Ve ékôane bôt é nga bo zôʼé. Môt ase ve kobô avale dé, teke ngume tyiñ a nyô mbok. Teke ngum éfufub éziñ évete bezimbi é mbe ngule ya bi ajô te. Ane a nga ve tyiñe na, be kee Paul nda mimbôk. 35Eyoñe Paul a nga ye bete ôbet wo ke nda , ane bezimbi be nga jibi beʼe nye yôp, amu mbia évô a njete bôt. 36Amu be nga tôñe be mvus ba zu ba yôtane na: A yian awu.

Paul a kobô bôte ya Yérusalém

(Mt 10:19-20; Mm 9:1-30; 26:9-21)

37Eyoñe be nga kômbô ke nyiñeli nye nda mimbôk été, Paul a nga sili évete bezimbi na: Ye me ne ngule ya jô wo éfia éziñ? A nga yalan a sili nye na: Ye wo yeme kobô Grék?

38Ye sa wo ô ne môte yʼEjipte a nga sômôlô a kee bôte mintete minyin be beʼe atyeñ e nkôte si?#21:38 Ngame Befarizieñ é nga ben éjôé ya Rôme a mbe be mbe nkômesane ya wosan be beʼe atyeñ, be loʼon atyeñe te na besikari; Bôte be nga beʼe atyeñe teke jôé na Besikére. 39Paul nye na: Ye ma nga? Me ne mone Beyude ya Tarse, afôla ya Silisi, bialébialé ya tison é ne te duma tyôtyoé. Ma yeʼelane wo na, vaʼa me ngule ya kobô bôt. 40Eyoñ a veya nye ngul, ane a nga sili, Paul a nga tebe tetele a febe bôte wo. Ane be nga ku ne kubuk. Ane Paul a nga kobô be nkobô Beyude a jô na:

હાલમાં પસંદ કરેલ:

MIMBOONE MINLÔMAN 21: BULU09

Highlight

શેર કરો

નકલ કરો