GENESA 16
16
Ta ku velekiwa ka Iximaele.
1Sarayi, nkata Abrama, a nga velekelanga Abrama vana. Kambe a a ri ni khumbi ra Muegipta lo va nge i Hagara. 2Kutani Sarayi a byela Abrama, a ku: “Languta sweswi, Yehovha u ndzi alele ku veleka; wa nga ta eka khumbi ra mina; kumbe ndzi nga kuma vana ha yena.” Abrama a yingisa rito ra Sarayi. 3Kavaloko Sarayi, nkata Abrama, a teka Hagara, wa Muegipta, ri nga khumbi ra yena, a n'wi nyika Abrama, nuna wa yena, leswaku a va nsati wa yena; ku ri loko Abrama a akile khume ra malembe etikweni ra Kanana. 4Kavaloko a ya eka Hagara, kutani yena a tika nyimba. Kuteloko a vona leswaku u xurhe nyimba, a sungula ku sola n'wini wa yena.
5Kutani Sarayi a byela Abrama, a ku: “Ku sandziwa ka mina ku va ehenhla ka wena. Ndzi veke khumbi ranga exifuveni xa wena; kutani, kuteloko a vone leswaku u tikile, a sungula ku ndzi sola. A ku avanyise Xikwembu exikarhi ka mina na wena!”
6Kutani Abrama a byela Sarayi, a ku: “Waswivo, khumbi ra wena ri le vokweni ra wena; endla ha yena hilaha u rhandzaka hakona.” Kutani Sarayi a ri xanisa, kutani ri baleka emahlweni ka yena.
7Ntsumi ya Yehovha yi kuma Hagara a ri ekusuhi ni xihlovo xa mati emananga, kusuhi ni xihlovo xa ndlela ya Xuru; 8yi ku eka yena: “Hagara, khumbi ra Sarayi, u pfa kwihi, kambe u ya kwihi xana?”
Yena a ku: “Ndzi balekile emahlweni ka Sarayi, n'wini wa mina.”
9Kutani ntsumi ya Yehovha yi ku eka yena: “Tlhelela eka n'wini wa wena, u tisola ehansi ka voko ra yena.” 10Ntsumi ya Yehovha yi engeta, yi ku eka yena: “Ndzi ta andzisa ngopfu vatukulu va wena, a va nga hlayiwi hi ku tala ka vona.” 11Ntsumi ya Yehovha yi tlhela yi ku eka yena: “Waswivo, u ni nyimba, kutani u ta veleka n'wana wa wanuna; u ta n'wi thya vito ra Iximaele (Xikwembu xa yingisa), hikuva Yehovha u twile ku vaviseka ka wena. 12Wanuna loyi, u ta va bere leyo kariha; voko rakwe ri ta lwa na hinkwavo, ni voko ra hinkwavo ri ta lwa na yena, kutani u ta aka a xaxamela ni vamakwavo hinkwavo va yena.”
13Kutani a thya Yehovha la vulavuleke na yena vito ra Atta-el-royi (Xikwembu lexi ndzi vonaka), hikuva a a ku: “Kasi xana ndzi vonile kokwala Xikwembu lexi, xi ri karhi xi ndzi vona.” 14Hilaha va nga thya xihlovo lexi vito ra xihlovo xa Berilahayi-Royi (Muhanyi la ndzi vonaka); xihlovo lexi xi le xikarhi ka Kadexe na Berede.
15Kutani Hagara a velekela Abrama n'wana wa wanuna, Abrama a thya n'wana loyi Hagara a n'wi velekeleke yena vito ra Iximaele. 16Abrama a a ri ni malembe ya 86, enkarhini lowu Hagara a velekelaka Abrama Iximaele.
હાલમાં પસંદ કરેલ:
GENESA 16: TSO29
Highlight
શેર કરો
નકલ કરો
Want to have your highlights saved across all your devices? Sign up or sign in
Bible in Xitsonga 1929/2012 © Bible Society of South Africa 2012. Digital Version © Bible Society of South Africa 2012. All rights reserved. www.biblesa.co.za.