GENESA 15
15
Ta ntwanano wa Yehovha na Abrama.
1Endzhaku ka timhaka teto, rito ra Yehovha ri fika eka Abrama enorhweni, ri ku: “Abrama, u nga chavi. Ndzi xitlhangu xa wena ni hakelo ya wena leyikulu.”
2Abrama a ku: “Hosi Yehovha, u ta ndzi nyika yini-ke? Ndza tifambela ndzi nga ri na vana, ni mudyandzhaka wa yindlu yanga, hi loyi Eliezere wa Damaska.” 3Abrama a engeta a ku: “Waswivo, a ku ndzi nyikanga n'wana, kutani vona, loyi a nga ta dya ndzhaka ya mina i nandza la nga tswariwa endlwini.”
4Kavaloko rito ra Yehovha ri fika eka yena, ri ku: “Yeloyi a nga ka a nga dyi ndzhaka ya wena, kambe ku ta dya loyi a nga ta huma emarhumbyini ya wena.” 5Kutani a n'wi humesela ehandle, a ku: “Languta tilo u hlaya tinyeleti loko u nga swi kota.” A engeta a ku: “Vatukulu va wena va ta kotisa sweswo.”
6Abrama a pfumela eka Yehovha, Yehovha a n'wi hlayela kona ku lulama.
7Yehovha a engeta, a ku: “Hi mina Yehovha, la nga ku humesa eUru wa Kalediya, ku ta ku nyika tiko leri, u ri fuma.”
8Kutani a ku: “Ndzi ta swi tivisisa ku yini leswaku ndzi ta ri fuma?”
9Kutani Yehovha a ku: “Ndzi tisele thokazi ra malembe manharhu, ni mbuti ya malembe manharhu, ni khuna ra malembe manharhu, ni tuva, ni gugurhwana.” 10Kutani a n'wi tisela swilo leswo, a swi avanyisa hi le xikarhi, a swi xaxameta swi lavana; ntsena a nga avanyisangi tinyanyana. 11Kutani makoti ma ta wela etinyameni, kambe Abrama a ma swukuta.
12Kavaloko dyambu ri lava ku pela, vurhongo lebyikulu byi khoma Abrama, kutani maswivo, nchavo wa munyama lowukulu wu n'wi khoma. 13Kutani a ku eka Abrama: “U tivisisa swinene leswaku vatukulu va wena va ta luvela etikweni leri nga ka ri nga vi ra vona, va ta va makhumbi ya kona, va ta tsongahatiwa hi malembe ya mune wa madzana. 14Kambe ndzi ta avanyisa tiko leri va nga ta fumiwa hi rona, kutani ndzhaku va ta huma kona va fuwe ngopfu. 15Loko u ri wena, u ta tifambela hi ku rhula eka vatata wa wena, u ta yimberiwa u dyuhele swinene. 16Kambe erixakeni ra vumune, va ta vuya halenu, hikuva ku homboloka ka Vaamori a ku si tala hi ku ringana.”
17Kuteloko dyambu ri perile, ku wa munyama; kutani maswivo, khele leri pfurhaka, ni swisa leswi pfurhaka swi hundza exikarhi ka swilo leswi avanyisiweke. 18Hi siku rolero, Yehovha a tiyisa ntwanano na Abrama, a ku: “Ndzi nyikile tiko leri eka vatukulu va wena, ku suka enambyeni wa Egipta, ku fikela enambyeni lowukulu, wu nga nambu wa Yufrata, 19tiko ra Vakeni, ni ra Vakenizi, ni ra Vakadimoni, 20ni ra Vahiti, ni ra Vaperesi, ni ra Varefayimi, 21ni ra Vaamori, ni ra Vakanana, ni ra Vagirigaxi, ni ra Vayebusi.”
હાલમાં પસંદ કરેલ:
GENESA 15: TSO29
Highlight
શેર કરો
નકલ કરો
Want to have your highlights saved across all your devices? Sign up or sign in
Bible in Xitsonga 1929/2012 © Bible Society of South Africa 2012. Digital Version © Bible Society of South Africa 2012. All rights reserved. www.biblesa.co.za.