GENESA 14
14
Ta Abrama loko a hlula tihosi.
1Enkarhini wa Amirafele, hosi ya Xinara, na Ariyoko, hosi ya Elasara, na Kedoro-Lawomere, hosi ya Elamu, na Tidala, hosi ya va Goyimi, 2va pfukela ku lwa na Bera, hosi ya Sodoma, na Birixa, hosi ya Gomora, na Xinabu, hosi ya Adama, na Xemebere, hosi ya Seboyimi, ni hosi ya Bela (wu nga Sowara). 3Hinkwavo lavo va hlangana erivaleni ra Sidimi (ri nga Lwandle-ra-ku-fa). 4A va fumiwile hi Kedoro-Lawomere hi malembe ya khume na mambirhi, kutani hi lembe ra khume na manharhu va sungula ku tiarisa. 5Kutani hi lembe ra khume na mune, ku ta Kedoro-Lawomere, ni tihosi leti ngi ti ri na yena, va hlula Varefayimi eAxiteroti-Karnayimi, ni va Zuzimi eHamu, ni va Emimi eXave-Kiriyatayimi, 6ni Vahori entshaveni ya vona ya Seyira, ku ya fika eEliparani, emaaveni ya mananga. 7Kutani va tlhela va ta exihlobyeni xa Eni-Mixipati, a nga Kadexe, va hlula tiko hinkwaro ra Vaamaleke, na vona Vaamori lava akeke eHasasoni-Tamara.
8Kutani hosi ya Sodoma, ni hosi ya Gomora, ni hosi ya Adama, ni hosi ya Seboyimi, ni hosi ya Bela (a nga Sowara), ti huma ti ya hlangana ku lwa na vona erivaleni ra Sidimi, 9vona va nga Kedoro-Lawomere, hosi ya Elamu, na Tidala, hosi ya va Goyimi, na Amirafele hosi ya Xinara, na Ariyoko, hosi ya Elasara: ti ri tihosi ta mune leti lwaka ni tihosi ta ntlhanu. 10Kasi rivala ra Sidimi a ri tele swihlovo swa nhlaka; kutani tihosi ta Sodoma na Gomora ti tsutsuma, ti wela kona, kambe leti poneke ti tsutsumela entshaveni. 11Kutani va teka vukosi hinkwabyo bya Sodoma, ni bya Gomora, ni swakudya hinkwaswo swa kona, va famba naswo. 12Va teka na yena Lota, n'wana wa makwa Abrama, ni swa yena hinkwaswo, hikuva a akile Sodoma.
13Kutani un'wanyana wa vatsutsumi a ta ambela Abrama wa Muheveru, loyi i ngi a tshame mikuhlwini ya Mamre, wa Muamori, makwa Exikolo ni wa Anere, hikuva a va ri vanakulobye va Abrama. 14Kuteloko Abrama a twa leswaku n'wana wa yena u khomiwile, a hlengeleta vanhu va yena va tinhenha, va nga va tswariwa endlwini, va ri 318, kutani a landzelela tihosi ku fika eDani. 15Kutani a pambula malandza ya yena ku ya lwa na tona nivusiku, a ti hlula, a ti tsutsumisa ku fikela eHoba, eximatsini xa Damaska. 16Kutani a vuyisa swifuwo hinkwaswo; a vuyisa na Lota makwavo, ni swa yena, ni vavasati ni tiko.
17Kambe hosi ya Sodoma yi suka ku ya hlangana na Abrama loko a vuya eku hluleni ka Kedoro-Lawomere, ni tihosi leti ngi ti ri na yena erivaleni ra Xave, ri nga rivala ra Hosi.
Ta Melkisedeke.
18Kutani Melkisedeke, hosi ya Salema, a ta ni vuswa ni vhinyo; a a ri muprista wa Xikwembu xa le henhlahenhla. 19Kutani a katekisa Abrama, a ku: “A ku katekisiwe Abrama hi Xikwembu xa le henhlahenhla, n'wini wa tilo ni misava; 20a ku katekisiwe Xikwembu xa le henhlahenhla lexi nyiketeke valala va wena evokweni ra wena.” Kutani Abrama a n'wi pambulela ku avanyisa ka khume ka hinkwaswo.
21Kutani hosi ya Sodoma yi byela Abrama, yi ku: “Ndzi nyike tinhloko, wena u teka vukosi.”
22Kambe Abrama a hlamula hosi ya Sodoma, a ku: “Ndzi tlakuse voko eka Yehovha, Xikwembu xa le henhlahenhla, n'wini wa tilo ni misava, ndzi ri: 23Hambi ma ri marinya ku fika eka ringole ra ntanghu, ndzi nga ka ndzi nga teki nchumu xa leswi nga swa wena! U nga tivula, u ku: ‘Mina, ndzi fuwisile Abrama!’ 24A ndzi tilaveli nchumu, loko ti nga ri timbuva ta majaha, ni swo pambulela lava nga famba na mina, va nga Anere, na Exikolo, na Mamre; vona va ta teka ku pambuleriwa ka vona.”
હાલમાં પસંદ કરેલ:
GENESA 14: TSO29
Highlight
શેર કરો
નકલ કરો
Want to have your highlights saved across all your devices? Sign up or sign in
Bible in Xitsonga 1929/2012 © Bible Society of South Africa 2012. Digital Version © Bible Society of South Africa 2012. All rights reserved. www.biblesa.co.za.