Zɛnɛse 35
35
Ɣâla è lûwa làa Zeeka ma Bɛtɛ
1Ɣâla è mò Zeeka ma ǹyɛɛi, “Ímu siɣe í lí Bɛtɛ í sée naa í Ɣâla-teƃele tɔɔ naa Ŋ̀âlai mî nyii kùla íŋɛi tãi í pù la í kúla ílîa Isɔɔ yêei.”
2Nya ƃe Zeeka è mò ŋɔpɛ́rɛi mu-ƃelai dîa da diai kélee kɛ̀ gɔlɛ ǹyɛɛi, “Ka ŋɔ̃ya-ɣala-ŋai píli ká kákpîŋ maa wáa, ká káseɣe-ŋai maa fáleŋ. 3Kwa pâi kulâi ƃɛ́ kú lí Bɛtɛ kú sée naa. Ŋa pâi Ɣâla-teƃele tɔɔ̂i naa Ŋ̀âlai mî nyii ŋ́oo su tòo a tãi ŋá kɛ̀ la mɛni-kpɔlu sui, da nyii gáa ŋ́gɔlɛ ƃɛ́i kélee ŋa lì naai.” 4Nya ƃe dí ŋɔ̃ya-ɣala-ŋai kélee tɛ̀ɛ Zeeka pɔ́ da ŋ̀ôlii-kɔli-ŋai kɛ̀ díwôlii. Zeeka è dílòo ŋ̀úru kɛ́tɛi mu nyii kɛ̀ Sɛkɛŋ kɔlɛ mai.
5Tãi Zeeka-ni dí kɛ̀ liî lai, yao kɛ́tɛ è pà daa-ŋai su-ƃelai kponôi, nyii-ŋai kɛ̀ naa kɔlɛ mai. Ǹyaŋ dífe pɔ̂ri ní Zeeka-ni kpɛ̂i. 6Nya ƃe Zeeka da ŋɔnûai kélee dí pà Luzi nyii da dòli sâa a Bɛtɛi, ƃɛ́i naa káa Keena lɔii sui. 7Naa ƃé è Ɣâla-teƃele tɔ̀ɔ naa, é naa tóli a Bɛtɛ. Kpɛ́ni fêi, naa ƃé Ɣâla è gbîŋ lɛ̀ naa ma tãi è kùla la ǹîa yêei é púi. 8Dibora nyii Lubɛka kùla zui, è sàa dí nòo wúru kɛ́tɛ tɔnɔ mu Bɛtɛ, dí ǹáa sèe a “Wɔ́lɔ Wuru.”
9Tãi Zeeka è kùla la Mɛsopotamiai, Ɣâla è kùla ŋɔ́nɔ ŋ̀ɛ́i é lûwa láa ma. 10Ɣâla è mò ma ǹyɛɛi, “Ílaa ƃa Zeeka. Ílaa fé ŋɔ́nɔ pâi kɛ̂i a Zeeka, kɛ́lɛ ílaa ƃé pâi kɛ̂i nâa a Eezuɛ.” Nya ƃe Zeeka láa è nâa kɛ̀ a Eezuɛ. 11Ɣâla è mò ǹyɛɛi, “Ńyãa ƃa Ŋ̀wála-wâla kélee Ɣalai. Ƃûu ƃó. Ísuui su a pâi kɛ̂tɛi. Da-ni da pâi kɛ̂i a kâloŋ-ŋa. 12Ǹɔii ŋá dɛ̀ɛ Eberaɣɛ̃ɛ da Aise pɔ́i, ŋa pâi dɛ̂ɛi ípɔ, ŋá dɛ́ɛ ísuui pɔ́ nyii-ŋai pâi kɛ̂i ípôlu mai.” 13Nya ƃe Ɣâla è ǹɛɛ ƃɛ́i è lòno naa bɔ́i, é tɛ́ ŋ̀elei su. 14Zeeka è kɔni tɔ̂ɔ ƃɛ́i Ɣâla è lòno naa bɔ́i a gɛɛ é kɛ́ a kili-too-ŋa kɔni. È kpele-sɛŋ sala kùla ma, é wúlɔ pú ma. 15Ƃɛ́i Ɣâla è lòno naa Zeeka pɔi, Zeeka è nàa láa sèe a Bɛtɛ.
Leesɛ è sàa
16Nya ƃe dí kùla Bɛtɛ díkɛ lì Ɛfata. Tãi dí kɛ̀ niî la berei sui, tãi è sèri a gɛɛ Leesɛ maa é fúloŋ. Ǹyaŋ è mɛni-soli kàa. 17Tãi è kɛ̀ mɛni-soli kâai la goi-tee lɔɔi sui, vɛ̃ɛ-lee-zooi è mò mà ǹyɛɛ, “Ífe yào. Ƃa pâi ŋɔ́nɔ surɔ̂ŋ-loo maa sɔlɔ ƃôi.” 18Tãi Leesɛ è kɛ̀ saa yee tɛ̂i lai, è ǹóŋ-kwatarai láa sèe a Bɛŋoni é lɛ́ɛ saâi. Kɛ́lɛ gwâtarai ǹâŋ è ǹáa sèe a Bɛŋsima.
19Tãi Leesɛ è sàa lai, dí nòo Ɛfata perei mâ, ƃɛ́i da nàa tòli nâa a Bɛpeleɣɛ̃ɛ. 20Nya ƃe Zeeka è kɔni tɔ̂ɔ molôŋ mɛi. Gáa sâa a Leesɛ ƃolôŋ mɛi kɔ̂ni. 21Nya ƃe Zeeka è kùla naa é ŋɔƃûui tɔ́ Ee siɣãŋ kɔlɛ mâ.
Zeeka ǹônii-sinaai
(Kɔlɔnikɔ Maa-ŋuŋ 2:1, 2)
22Tãi Zeeka è kɛ̀ la ǹɔii tí sui, Lubiŋ è lɔ̀ a ǹâŋ ŋɔnɛnîi dɔnɔ pɔ̂rɔŋ, nyii da kâa dòli a Bilai. Kɛ́lɛ Zeeka è mɛ̀ni.
Ǹyaŋ Zeeka ǹônii-sinaai dí kɛ̀ puu káo feerɛ. 23Liɛ ǹônii-sinaai ká ŋí. Lubiŋ nyii kɛ̀ a Zeeka ǹóŋ maa-ŋuŋ, Simiɔŋ, Liva, Zuda, Isaka da Zɛbulɔŋ. 24Leesɛ ǹônii-sinaai ká ŋí. Zosɛ da Bɛŋsima. 25Leesɛ yée mu-nɛnii Bila ǹônii-sinaai ká ŋí, Daŋ da Nɛfɛtɛli. 26Liɛ yée mu-nɛnii Zipa ǹônii-sinaai ká ŋí, Gâa da Asɛ. Zeeka ǹônii-sinaai ká ŋí è dímaa sɔlɔ ƃô Mɛsopotamiai.
Aise è sàa
27Nya ƃe Zeeka è pà ǹâŋ pɔ́ naa Mamera, ƃɛ́i da nàa tòli máŋ a Kiria Aba (nyíi da dòli máŋ a Iburɔŋ), ƃɛ́i Eberaɣɛ̃ɛ da Aise dí kɛ̀ naa a ŋɔ̃́ya-ŋai. 28Ǹyaŋ Aise è kɛ̀ a kóraŋ ŋuŋ tɔnɔ pôlu buu lɔ́ɔlu mɛi saaƃa (180). 29Nya ƃe Aise è sàa tãi è pɔ̀lɔ la kpɔ́ a ŋánaai. È nâa lì ŋɔnúu-pɔlɔ-ŋai pɔ́. Ǹônii-sinaai Isɔɔ da Zeeka dí nòo.
હાલમાં પસંદ કરેલ:
Zɛnɛse 35: KWB
Highlight
શેર કરો
નકલ કરો
Want to have your highlights saved across all your devices? Sign up or sign in
© 2012 Bible Society in Liberia