Zɛnɛse 33
33
Zeeka da Isɔɔ dí díloai kpɛ̂tɛ
1Nya ƃe Zeeka è mu sìɣe é Isɔɔ káa pâi núu ŋuŋ náaŋ (400) kɛ́ ƃò ma. Nya ƃe Zeeka è nîa-pɛlɛɛi ŋá kɔ̀lɛ Liɛ da Leesɛ é pɛ́lɛ díyee-mu-nɛyaa feerɛi dîa. 2È ǹyée mu-nɛyâai tɔ̂ɔ tuɛ-pere da dílônii, é Liɛ da ǹônii lɛɛ nàa pôlu, Leesɛ da Zosɛ dí lɛ́ɛ gbɛɛ ŋá. 3È tɛ̀ɛ dîa é lí é pɛ́lɛ ǹɔii ma ǹîa kɔ́ mu gîei lɔ́ɔlu mɛi feerɛ é lɛ́ɛ la zu é seri mà. 4Nya ƃe Isɔɔ è lì ǹá koyânii a kîrɛ. È kpùlɔŋ mà, é ɣíri gɔŋ mâ, é ǹá-gbɔ see mà, dí wɔ́lɔ. 5Tãi Isɔɔ è ŋuŋ mu sìɣe la é nɛyâai káa da nîa-pɛlɛɛi, è mò ǹyɛɛi, “Gbɛ̂ɛ-ni ƃe ŋí ka dîa-ni ka pâi?”
Zeeka ǹyɛɛ mai, “Ǹîa-pɛlɛɛi nyii-ŋai Ɣâla è dítɛ̀ɛ íyee-mu-nuui pɔ́ ŋɔƃɛlɛ-seei sui.” 6Nya ƃe ǹyée-mu-nɛyãai da dínîa-pɛlɛɛi dí lɛ̀ɣɛ a Isɔɔ dí pɛ́lɛ gɔ́ɔ mu. 7Liɛ ǹyaa máŋ da ŋɔnîa-pɛlɛɛi dí lɛ̀ɣɛ la dí pɛ́lɛ gɔ́ɔ mu. Naa pôlu mâ Zosɛ da Leesɛ dí lɛ̀ɣɛ mà máŋ dí pɛ́lɛ gɔ́ɔ mu.
8Isɔɔ è mò ǹyɛɛi, “Ǹúu kpɔŋ ŋí kélee ŋa díkâai, dípa mɛni ŋuŋ ƃa lé?”
Zeeka è zu tòo ǹyɛɛi, “A gɛɛ ŋá ílii láa ƃíai a ŋánuu-namui.”
9Kɛ́lɛ Isɔɔ è mò ma ǹyɛɛi, “Ńêɣe, sɛŋ támaa káa ńyêei. Ísãâi dí lɛ́ɛ naa.”
10Kɛ́lɛ Zeeka è mò ǹyɛɛi, “Kpaa, à kɛ̀ ílii lâai ḿaa mɛni ma, gɛ̀ ní kpera yɛ̂ íyee sée ŋásama-sãai ŋí mu. Kpɛ́ni fêi, tɔ̃yâ ma, íŋɛi káa mî káa nɔ́ yɛ̂ɛ núu a Ɣâla ŋɛ́i kàa, a berei í íyee sèe la ḿû a lii-laai. 11Kpera yɛ̂, íyee sée ŋásama-sãai mu nyii-ŋai ŋa pá la ípɔi, kpɛ́ni fêi, Ɣâla a ƃɛlɛ-see kɛ́ mî, kpɛ́ni fêi, ŋɔ́nɔ sɛŋ támaa káa ńyêei.” Nya ƃe è lɛ̀ɛ lônoi bɔ́ é ǹyée sée zãâi mu.
12Nya ƃe Isɔɔ è mò ǹyɛɛi, “Kwaa lí. Ǹyaŋ ŋa pâi liî kátuɛ.”
13Kɛ́lɛ Zeeka è mò ma ǹyɛɛi, “Ŋánuu-namui í gɔ́lɔŋ a gɛɛ nîa-pɛlɛɛi fíi aâ kpɛɛ, fɛ̂ɛ ŋɔ́nɔ ŋá kpáaŋ mála-ŋai da niŋa-ŋai mɛni ma nyii-ŋai díkaa a kɔ̃ɔ-leei. Da sìa a dîa a ɣele tɔnɔ kpîŋ díkelee da pâi saâi. 14Tɔɔ ŋánuu-namui, é lí tuɛ, ńyãai a íyee-mu-nuui ŋá lɛ́ɛ pôlu. Ŋa pâi siâi yɛ̂ɛ berei daa-tulɛ-ŋai da nîa-pɛlɛɛi da siâi lai é lɛ́ɛ la zu ŋá seri ŋánuu-namui mâ Idɔŋ.”
15Mɛni ma Isɔɔ è mò ǹyɛɛi, “Tɔɔ ŋá ŋánûai da lɛɛ ƃɛ́ íyêei.”
Kɛ́lɛ Zeeka è mò ma ǹyɛɛi, “Lé mɛni ma? Tɔɔ ŋá ŋánuu-namui líi láa.” 16Nya ƃe Isɔɔ è lène pôlu a ŋ̀ele tɔnɔi tí é lí Idɔŋ. 17Kɛ́lɛ Zeeka è lì Sukɔ é pɛ́rɛ tɔ́ naa, é ƃûu-ŋa tɔɔ naa ŋɔtaa-tulɛ-ŋai mɛni ma. Mɛni ma è naa sèe a Sukɔ (zu-kulai ƃa ƃûu).
18Nya ƃe Zeeka è kùla Mɛsopotamia é pá Sɛkɛŋ ŋɔtaai su a gɔlɔi ponoɔɔ, ƃɛ́i naa káa Keena lɔii sui, é ŋɔƃûui pú daai kɔlɛ. 19Ǹɔii kpuai è ŋɔsua kɔlɔ seɣe pɛrɛi tɔ̂ɔ mai, è ǹya Sɛkɛŋ ǹâŋ Amɔ ǹônii-sinaai yêei a káne kpua-kpua ŋuŋ tɔnɔ (100). 20È Ɣâla-teƃele tɔ̀ɔ naa é ǹáa sée a Ɛloi, Eezuɛ Ŋɔɣâla.
હાલમાં પસંદ કરેલ:
Zɛnɛse 33: KWB
Highlight
શેર કરો
નકલ કરો
Want to have your highlights saved across all your devices? Sign up or sign in
© 2012 Bible Society in Liberia