लूका 9

बाह्र चेलनके पठाइ

(मत्ती. 10:5-15; मर्क. 6:7-13)

1तओ येशू बाह्र चेलनके बुलाएके, बिनके सब भुत और बिमारी अच्छो करन बारो महान शक्ति और अधिकार दइ। 2येशू बिनके परमेश्वरको राज्यको परचार करन और बिमारीनके अच्छो करन पठाइ। 3येशू बिनसे कही, “तुम अपन यात्रामे अपने सँग कुछ मत् लियओ, नए लठ्ठी, नए झोरा, नए रोटी, नए पैसा, नए दुई जोड कुर्ता। 4जौन घरके आदमी तुमके स्वागत करंगे, बो गाउँसे बिदा नाए होनतक बहे घरमे बैठियओ। 5जहाँ तुमर स्वागत नाए करंगे या तुमर बात सुननके इन्कार करंगे कहेसे, हुवाँसे निक्रत पेती तुम अपन पौलीको धुधर फिर झारदियओ। अइसे करनको मतलब, बो सहरके मनैके परमेश्वर सजाय देबैगो कहिके जनात हए।” 6तओ बे हुवाँसे बिदा भए, और अच्छो समाचार परचार करत और सब ठाउँमे रोगीनके अच्छो करत गाउँ-गाउँ गए।

राजा हेरोद घबणीयाइगओ

7जे सब घटनाके बारेमे सुनके सासक, राजा हेरोद घबणीयाइगओ। काहेकी बप्तिस्मा देन बारो यूहन्ना, मरके जिन्दा उठो हए कहिके, कोइ-कोइ कहात रहएं। 8और कोइ कहात रहएं, “एलिया दिखाइ पणो हए,” और औ जनै मैसे कहात रहएं, “पहिलेको अगमबक्ता मैसे एक जनै मरके जिन्दा उठो हए।” 9तओ राजा हेरोद कही, “बप्तिस्मा देन बारो यूहन्नाको मुण मए काटन लगाओ, पर जा कौन हए जौनक बारेमे मए अइसो बात सुनत हओं?” तओ बो बोके भेँटन इच्छा करी।

येशू पाँच हजारके खबाइ

(मत्ती. 14:13-21; मर्क. 6:30-44; यूह. 6:5-13)

10जब बे चुनेभए चेला, जौननके येशू पठाइ रहए, बे लौटके आए, और बे जो-जो करी रहएं और सिखाइ रहएं सब येशूके बताए दइं। तओ येशू बिनके सँगए लैके बेथसेदा कहान बारो बजारमे अलग लैके गओ। 11तओ जा पता पाएके भिडके आदमी येशूके पिच्छु लागी। बा बिनके स्वागत करी, और परमेश्वरके राज्यके बारेमे सुनाइ, और जौन-जौनके अच्छो होन जरुरी रहए, बिनके बा अच्छो करी। 12जब दिन बुणनलागो, और बाह्र जनै चेला आएके येशूसे कहीं, “भिडके बिदा करदेओ, और बे जाएके आसपिसके गाउँ-गाउँमे रात बैठनको और भोजनको ब्यवस्था करएं, काहेकी हियाँ हम जंगली इलाकामे हएं।”

13तओ येशू बिनसे कही, “तुमहीं बिनके कुछ खानके देओ।” तओ बे कहीं, “हमर सँग पाँच रोटी और दुई मछ्री इकल्लो हए, का हम जाएके बे सब आदमीके ताहीं खानु किनएं?” 14बे लगभग पाँच हजार लोग रहएं। तओ येशू अपन चेलनसे कही, “बिनके पचास-पचासको समुहसे बैठबाबओ।” 15बे अइसियए करी, और सबके बैठाइं। 16तओ येशू पाँच रोटी और दुई मछ्री लैके स्वर्ग घेन देखके धन्यबाद दइ, और तोडके आदमीके बाँटनके चेलासे कही। 17और सब खाएके अघाइ गए, और चेला उबरो खुद्रा-खुद्री बाह्र डलैया उठाइं।

पत्रुसको स्वीकार

(मत्ती. 16:13-19; मर्क. 8:27-29)

18एकदाओं येशू इकल्लो परमेश्वरसे प्राथना करत रहए, चेला येशूके सँग रहएं। तओ येशू बिनसे पुछी, “आदमी मेरे बारेमे का कहात हएं, कि मए कौन हओं?”

19चेला कहीं, “कोइ बप्तिस्मा देन बारो यूहन्ना कहात हएं, कोइ परमेश्वरको अगमबक्ता एलिया कहात हएं। और कोइ परमेश्वरको अगमबक्ता मैसे पहिलेको कोइ एक जनै फिरसे उठो हए कहिके कहात हएं।”

20येशू बिनसे कही, “तओ तुम का कहात हओ, कि मए कौन हओं?” तओ पत्रुस जबाफ दइके बासे कही, “तुम परमेश्वरके तरफसे पठाए भए ख्रीष्ट हओ!”

21तओ येशू बिनके आज्ञा दइ, और सँगए चेतावनी फिर दइ, कि चेला जा बात कोइके नाए बतामएं।

येशू अपने मृत्युके बारेमे बताइ

22तओ येशू कही, “मए, आदमीको लौंणाके बेढम दुख उठान पणैगो, और येशू यहूदी अगुवनको समुहसे, मुखिया यहूदी पुजारी और मोशाको नियम कानुन सिखान बारेनसे इन्कार करोजामंगो और मारो जामंगो और फिर तिसरो दिनमे मरो मैसे जिन्दा हुइके उठंगो।”

येशूक पच्छु लागनको मतलब

23तओ येशू सब जनैसे कही, “अगर तुम मिर सँग आन चाँहत हओ कहेसे, तुमके अपनए-अपनएके अस्वीकार करन पणैगो। तुमके मिर ताहीं रोजदिन दुख सहन पणैगो। हियाँ तक, कि मरनके ताहीं तयार फिर रहान पणैगो। तओ तुम मिर चेला बननके ताहीं मिर सँग आए पाबैगे। 24काहेकी जौन अपन जेहान बचाबैगो, बो मोके गुमाए देहए, और अपन जेहान मिर ताहीं गुमान बारो अपनएके बचाएलेहए 25काहेकी अगर कोइ मनै संसारके सब चीज पाएके धनी बन्जएहए। पर बो परमेश्वरके सँग सदाकालको जीबनको मौका गुमाए देहए कहेसे बोके का फाइदा हुइहए? कुछु फिर नाए 26पर कोइ मोसे और मिर बचनसे शर्माबैगो कहेसे, मए, आदमीको लौंणा फिर अपनो महिमामे, और पिताको और परमेश्वरको पबित्र स्वर्गदूतको महिमामे आत बोकेसँग शर्मामंगो। 27तओ नेहात्तओ मए तुमसे कहात हओं, हियाँ ठाणन बारे कोइ-कोइ हएं, बे परमेश्वरको राज्यके अपना मरनसे अग्गु शक्तिके सँग आत देखंगे।”

येशूको रुप बदलो

(मत्ती. 17:1-8; मर्क. 9:2-8)

28जा बातको लगभग आठ दिन पिच्छु, पत्रुस, यूहन्ना और याकूबके येशू अपने सँग लैके परमेश्वरसे प्राथना करनके बे पहाड उपर गए। 29येशू परमेश्वरसे प्राथना करत पेती येशूको मुँहुँको रुप बदलिगओ, और येशूको कुर्ता बिजुली चमको जैसो उजियारो भओ। 30तओ येशूसे दुई आदमी बात चित करत रहएं, बे मोशा और एलिया रहएं। 31बे महिमा सहित दिखाने और बे येशूको मौतके बारेमे बात चित करत हएं। जा बातके येशू, यरूशलेम सहरमे जाएके पुरा करनके रहए। 32तओ पत्रुस और बोकेसँग होन बारे उँघाइगए रहएं। पर जब बे निधसे उठे तओ येशूको महिमा और बाके सँग ठाणे भए दुई आदमीके देखीं। 33तओ जब बे दुई आदमी येशूसे बिदा हुइके जानलगे तओ पत्रुस येशूसे कही, “महान गुरु, हमके हिनए बैठन अच्छो हए। हम हियाँ तीन परमेश्वरको आराधना करन बारो तम्भु बनामएं, एक तुमर ताहीं, एक मोशाके ताहीं और एक एलियाके ताहीं।” अपना बोलीभइ बात बोके पतए नाए रहए। 34पत्रुस जा बात बतकातए-बतकात एक बादर आएके बिनके उपर छैगओ, बो बादर बिनके घेरन लागो और बे डराइगए। 35तओ बादरसे अइसे कहिके एक अबाज आओ, “जा मिर लौंणा हए, जौनके मए छानो हओ। जाको बात सुनओ।” 36जब जा अबाज रुकिगओ तओ येशू हुवाँ इकल्लो रहए। बे चुपचाप रहे, और बे अपना देखी बात, बो दिन कोइसे नाए कहीं।

भुत लागो लौंणाको छुटकारा

(मत्ती. 17:14-18; मर्क. 9:14-27)

37दुस्रे दिन, जब येशू और बाके चेला पहाडसे उतरे, एक बणी भिड येशूके भेँटनके आइ। 38भिडसे एक आदमी चिल्लाएके कही, “महान गुरु, मए तुमसे बिन्ती करत हओं, मिर लौंणा उपर कृपा-दृष्टि करओ। काहेकी बो मिर एकए लौंणा हए। 39देखओ, एक भुत बोके पकणत हए, और बो इक्बरी किकियात हए, और भुत बोके अइँठबात हए और बोके मुँहुँसे फुफना निकारन लगत हए और लदबद बोके छोडत हए। 40बो भुतके निकार देओ करके मए तुमर चेलनसे बिन्ती करो, पर बे नाए निकारपाइं।”

41तओ येशू जबाफ दइ, “ए अबिश्वासी और हेकण आदमीउ, मए कहाँ तक तुमरसँग रएहओं, और कहाँ तक मए तुमके सहामऔं? बो लौंणाके मेरे ठिन लियाबओ।”

42पर बो आतएआत भुत बोके पटकदइ और अइँठन लागो। पर येशू बो भुत डाँटी, और बो बालकाके अच्छो करके बोको दौवाके सौँपदइ। 43परमेश्वरको महानता देखके बे सब अचम्मो पणे। येशूको करोभओ हर कामसे सबके अचम्मे पणे देखके, येशू अपन चेलनसे कही, 44“जा बात तुमर मनमे धरओ काहेकी मए, आदमीको लौंणा आदमीके हातमे पकडओ पणन बारो हओं।” 45पर बे जा बात बुझ नाए पाइं। काहेकी जा, बे नाए बुझएं कहिके उनसे लुकाएके धरोगओ रहए। बे जाके बारेमे बासे पुछनके डरात रहएं।

सबसे बडो कौन?

(मत्ती. 18:1-5; मर्क. 9:33-40)

46बहेबेरा बे मैसे बडो कौन हए, जाके बारेमे आपसमे छलफल करत रहएं। 47पर येशू बिनको मनको बिचार पता पाएके एक बालकाके लैके अपन ठिन बैठाइ। 48और बिनसे कही, “जौन मिर नाउँमे जा बालकाके ग्रहण करैगो, बो मोके ग्रहण करैगो, जौन मोके ग्रहण करैगो, बो मोके पठान बारोके ग्रहण करैगो। काहेकी तुमर मैसे जौन सबसे छोटो हए, बहे बडो हुइहए।”

जौन बिरोधमे नाएहए, बो हमर पक्षमे हए

49तओ यूहन्ना कही, “महान गुरु, एक आदमी तुमर नाउँमे भुत निकारत हम देखे, और हम बोसे मनाही करे। काहेकी बो हमरे सँग तुमर अनुसरण नाए करत हए।” 50तओ येशू बिनसे कही, “बिनके मनाही मत् करओ, काहेकी जौन मिर बिरुद्धमे नाए हए, बो मिर पक्षमे हए।”

यरूशलेम घेनको यात्रा

51येशूको स्वर्ग जान बारो दिन ढिँगै आइगओ रहए, तओ बा यरूशलेम सहर घेन जान बिचार करी। 52तओ बा खबर लान बारे आदमीके पहिले पठाइ। बे गए, और बाके ताहीं सबए चीज तयार करन सामरी सहरमे रहान बारेनको एक गाउँमे घुसे। 53पर यरूशलेम सहर घेन जान बाको दृढ़ बिचार पता पाएके बे बाके स्वागत नाए करीं। 54तओ जा देखके बाके चेला याकूब और यूहन्ना कहीं, “प्रभुज्यू, का तुम चाँहतहओ, कि स्वर्गसे आगी बर्सके जे भसम होमएं कहिके, हम आज्ञा करएं?” 55पर घुमके येशू बिनके झपाणी। और कही, “तुम नाए जानत हओ, कि तुम कैसे आत्माके हओ। 56काहेकी मए, आदमीको लौंणा आदमीनको प्राणके नास करनके ताहीं नाए आओ हओं, पर बचानके आओ हओं।” तओ येशू और बाके चेला औरो गाउँ घेन चलेगए।

येशूके पिच्छु लागके तिरन बारो मूल्य

(मत्ती. 8:19-22)

57येशू डगरसे जात रहए, तओ एक आदमी येशूसे कही, “हे प्रभु, तुम जहाँ जएहओ मए तुमर पिच्छु-पिच्छु जामंगो।”

58तओ येशू बोसे कही, “सेरनको रहान बारो भार, और बादरके चिरैंचिरगुनीके ताहीं घुरघुस्ला रहात हए। पर मए आदमीको लौंणाको त एकौ घर नाए हए, जहाँ मए सोए पामओं।” 59येशू फिर दुस्रोसे कही, “आ, और मिर चेला बननके ताहीं मिर पिच्छु लाग।” पर बो कहीं, “पहिले मोके घर जानके देओ। जब मिर दौवा मरैगो, तओ मए बोके दफ्नामंगो और आएके तुमर चेला बनंगो।”

60येशू बोसे कहीं, “जौन आदमी मरो आदमी कता हए, उनके अपन आदमीके मरनको आसरा देखनदेओ। पर तुम जाएके परमेश्वरको राज्यको अच्छो समाचार परचार करओ।” 61दुस्रो फिर कहीं, “प्रभु, मए तिर पिच्छु लागंगो, पर पहिले अपन घर बारेनसे मोके बिदा लेनदेओ।”

62तओ येशू बोसे कहीं, “जो कोहि मिर चेला बननके सुरु करैगो और अपनो पुरानो जीबन शैलीमे घुमके जाबैगो, बो परमेश्वरको राज्यमे सेवा करनको लायक नाए हुइहए। बो अइसो आदमी जैसो होबैगो, जौन खेत जोतनके सुरु करत हए, पर पिच्छु घुमके देखत हए।”

હાલમાં પસંદ કરેલ:

लूका 9: THRNT

Highlight

શેર કરો

નકલ કરો