लूका 8

येशूके मदत करन बारी बैयर

1कुछ दिन पिच्छु येशू बजार-बजार और गाउँ-गाउँ होत परचार करत रहए, और परमेश्वरको राज्यको अच्छो समाचार परचार करत फिरन लागो, और बे बाह्र चेला येशूके सँगए-सँग रहएं। 2कुछ बैयर फिर बाके सँगमे रहएं, जो भुत और रोगसे अच्छी भइ रहएं। और बिन मैसे जेहि रहएं, मरियम मग्दलिनी, जौनसे येशू सात भुत निकारी रहए। 3और राजा हेरोदके भण्डारे खुजासकी बैयर योअन्ना, और सुसन्ना, और बहुत बैयर रहएं, जे अपनी सम्पतिसे येशू और बाके चेलनकी सेवा करत रहएं।

बीज बोन बारी कहानी

(मत्ती. 13:1-23; मर्क. 4:1-20)

4जब बहुत बणी भिड जम्मा भइ और बजार-बजारके आदमी येशूके ठिन आए, और येशू बिनके एक कहानी कही। 5“एक जनै बीज बोन बारो निक्रो, और बोतएबोत कुछ डगरके किनारे पणे, और बे आदमीनको टाँगसे चिबदिगए, और बादरके चिरैंचिरगुनी खाइगइं। 6औ बीज पत्थर बारी जमिनमे पणे, और बे जमेखिनक सुखिगए, काहेकी बो जमिन बिना आदकी रहए। 7कोइ बीज काँटोको बीचमे पणे, और बीजके सँग काँटो फिर बढतएगए, और बीजके बढनके नाए दइं। 8कित्तो बीज अच्छी जमिनमे पणे, और जमके बे सओ गुणा फरा फराइं।” इतकए कहात येशू जोडसे चिल्लाएके कही, “तुम जो सुनरहे हओ, जो तुम सुने हओ, बोके बारेमे ध्यानसे सोँचओ।”

बीज बोन बारी कहानीको अर्थ

9येशूको चेला जाको कहानीको अर्थ का होबैगो करके येशूसे पुछीं। 10तओ येशू कही, “तुमके त परमेश्वरको राज्यको भेद जाननके ज्ञान दओगओ हए, पर औरेनके, जौन परमेश्वरके बारेमे नाए जानत हएं उनसे मए सब बात कहानीमे बतात हओं, काहेकी मए जो करत हओं बोके,

बे देखन त देखत हएं, पर देख नाए पातहएं,

सुनन त सुनत हएं, पर बुझत नाए हएं।”

11जा कहानीको मतलब जा हए: “बीज परमेश्वरको बचन हए। 12अगर कोइ दुस्रे जनैके बचन सुनात हए कहेसे, बो किसानदारके बिज छिँटनो हानी हए। कोइ मनै बो डगर कता हएं, जोमे कोइ बिज गिरे होत हएं। जब बे बचन सुनत हएं, तओ शैतान आत हए और उनको मन मैसे सुनो भओ बचनके लैचलो जातहए। तभीमारे बे बिश्वास नाए करत हएं और बचे नाए जातहएं। 13पत्थर बारी जमिनमे पणन बारे बेही हएं, जौन परमेश्वरको बचन सुनके खुसीसे ग्रहण करत हएं। पर बिनकी जर नाए होत हए, और बे थोरी समयके ताहीं बे बिश्वास करत हएं, पर सतावटके समयमे बे अलोप हुइजात हएं। 14काँटोको बीचमे पणन बारे बेही हएं, जौन बचन सुनत हएं, पर पिच्छु जा जीबनको चिन्ता, धन, सुखमे पणके बढनाए पातहएं, और बे फरा नाए फरए पातहएं। 15पर अच्छी जमिनमे पणन बारे बेही हएं, जौन बचन सुनके अच्छो मन और भलो ह्रदयमे बाके बचाए रहतहएं, और धैर्यसाथ फरा फरातहएं।

दियाकी कहानी

16कोइ दिया पजारके बर्तनसे नाए तोपत हएं, और खटिया तरे नाए धरत हएं पर भितर आन बारेके उजियारो होबए कहिके आरोमे धरत हएं। 17मिर मतलब जा हए, कि परमेश्वर बे सब जनैके प्रकट करैगो, जौन अभौतक मनै नाए जानत हएं। अब बो सबए चीजके अग्गु लाबैगो, जौन अभौतक लुको हए। 18बहेमारे होसियार होबओ, कि तुम कैसे सुन्त हओ। काहेकी अगर कोइके मिर शिक्षा बुझनको चहाना हए, परमेश्वर उनके औ जद्धा ज्ञान देहए। काहेकी जौनक ठिन हए, बोके औ दओ जाबैगो। पर जौन मिर शिक्षाके बुझनके जद्धा चहाना नाए करत हए, परमेश्वर बोसे, बो ज्ञान फिर दुर लैजाबैगो, जो बोके ठिन थोरीयए हए।”

येशूके अइया और भइया

(मत्ती. 12:46-50; मर्क. 3:31-35)

19येशूक अइया और भइया बाके भेँटनके आए, पर भिडके मारे बक जौँणे आए नाएपाइं। 20कोइ बासे कही, “तुमर अइया और भइया भेँट करन ताहीं बाहिर ठाणे हएं।”

21और बा बिनसे कही, “मिर अइया और मिर भइया बेही हएं, जौन परमेश्वरको बचन सुनत हएं, और बोको पालन करत हएं।”

येशू आँधीके शान्‍त करी

(मत्ती. 8:23-27; मर्क. 4:35-41)

22एक दिन येशू अपन चेला सँग नैयाँमे चढो रहए, और येशू बिनसे कही, “हम गालील समुन्दरके बोपार जामएं।” और बे नैयाँमे चढके गए। 23नैयाँमे जातएजात येशू उँघाइगओ। तओ समुन्दरमे आँधी ब्यार चलन लागी और नैयाँ पानीसे भरनलगी, और बे आफतमे पणिगए।

24तओ बे येशूके जौँणे आएके अइसे कहात जगाइं, “गुरुज्यू-गुरुज्यू, हम डुबनलागे।” येशू उठके आँधी और पानीको लणुराके डाँटी, तओ आँधी चलन बन्द हुइगओ और समुन्दर शान्त हुइगओ। 25यीशु बिनसे कही, “तुमर बिश्वास कहाँ गओ?” बे डराइगए, तओ अचम्मो मानीं और एकठिन हुइके कहान लागे, “जा कौन हए? जा आँधी और पानीके आज्ञा देतहए, और बे येशूको आज्ञा मानत हएं।”

भुत लागो आदमी

(मत्ती. 8:28-34; मर्क. 5:1-20)

26येशू गेरासेनसके इलाकामे आइगओ, जौन गालील परदेशके बोपार रहए। 27जब येशू पहाडसे उतरो तओ येशू बजारको एक आदमीसे मिलो, जौनके भुत लागो रहए। बो बहुत दिनसे कपडा नाए लगाए रहए, और घरमे नाए रहिके बो मरघटमे बैठत रहए। 28भुत लागो आदमी येशूके देखी, और जोडसे बुलाइ और येशूके आदर देनके ताहीं घुपटा हुइके बडो जोणसे कही, “हे सर्वोच्चे परमेश्वरको लौंणा येशू, तुमसे मिर का काम? मए बिन्ती करत हओं, मोके मतसताबओ।” 29काहेकी येशू भुतके बो मनै मैसे निकरके जान आज्ञा दइ रहए। बोके बेढम चोटी भुत पकणी रहए। बो आदमी चौकीदारको रेखदेखमे धरोगओ रहए। बोको हात-टाँग साँकर और नेलसे बँधो रहए, पर बो मनै भुतको शक्तिसे सब बन्धन तोरदेत रहए। तओ भुत बोके जंगली इलाका घेन भगाएके लैजत रहए।

30येशू भुतसे पुछी, “तिर नाउँ का हए?” भुत कही, “मिर नाउँ फौज हए।” काहेकी बहुत भुत बोमे रहएं। 31“हमके गहिरो कुण्डामे मत् पठाबओ,” कहिके भुत येशूसे बिन्ती करीं।

32ढिँगैको डँगामे सोराको एक भारी बगाल चुगत रहए। तओ बे भुत सोराके भितर घुसनदेओ कहिके येशूसे बिन्ती करीं, और येशू मन्जूर भओ। 33तओ भुत बो आदमीसे निकरके बे सोराके भितर घुसिगए। और बो सोराको बगाल, डाँगासे समुन्दर घेन हुरत तरे गए और डुबके सब मरिगए।

34तओ जो भओ रहए बो देखके सोरा चुगान बारे भाजिगए। और जाएके बजार-बजार और गाउँ-गाउँमे जा बात बताए दइं। 35तओ जो भओ रहए, बो देखन ताहीं आदमी येशूके ठिन आए। और जौन आदमीसे भुत निकरो रहए। बो आदमीके, बोको अप्नो लत्ता लगाएके सफा मनको हुइके येशूके चरणमे बैठो पाइं, और बे अचम्मो मानिगए। 36हुवाँ देखन आन बारे, “भुत लगो भओ आदमी कैसे अच्छो हुइगओ” करके जा बात आदमीनके बताए दइं। 37गेरासेनस इलाकाके आसपासके गाउँके आदमी, “येशू बिनको गाउँसे चलोजाए” कहिके बिन्ती करीं, काहेकी बे गजब डराइगए रहएं। जहेमारे येशू नैयाँमे चढाके लौटिगओ।

38तओ जौन आदमीसे भुत निकरो रहए, बो येशूके सँग जान पामओं, कहिके येशूसे बिन्ती करन लगो। तओ येशू बोके अइसो कहिके बिदा दइ। 39“तए अपनो घर चलो जा, और परमेश्वर तिर ताहीं कित्नो महान काम करीहए, बो बात बता।” तओ बो गओ, और येशू बोके ताहीं कित्नो बडो काम करि रहए, कहिके जा बात बो सारा बजार-बजारमे परचार करन लगो।

याइरसकी लौंणीया और एक बैयरके जीबन दइ

(मत्ती. 9:18-26; मर्क. 5:21-43)

40येशू लौटके आत पेती भिड येशूके स्वागत करी, काहेकी बे सब येशूको आसरा देखत रहएं। 41याइरस नाउँको एक जनै यहूदी सभाघरको मुखिया सासक आएके येशूके आदर देनके ताहीं पाउँमे पणो, और मेरे घरमे आबओ करके येशूसे बिन्ती करी। 42काहेकी बाह्र बर्ष पुगी बोकी इकल्ली लौंणीया रहए, येशू बक बिन्ती सुनके, येशू बोकेसँग जाए रहो हए, करके आदमी देखीं। तओ चारौ घेनसे भारी भिडके आदमी येशूके ठेलमठेला करन लागे। 43बाह्र बर्षसे खुन बहान बारो रोगसे दुख पाइभइ एक बैयर, जौनके कोइ अच्छो नाए करपाइ रहएं। 44बो बैयर पिच्छुसे आएके येशूको कुर्ताको कुन्छ छुइ, और तुरन्त बो बैयरकी खुन बहान बन्द हुइगओ।

45येशू कही, “मोके कौन छुओ हए?” तओ सब इन्कार करीं, तओ पत्रुस और बिनके सँगमे होन बारे कहीं, “महान गुरु, भिड तुमके घेरके ढकेलीढकेला कर रहे हएं।” 46तओ येशू कही, “कोइ मोके छुइहए, काहेकी महान शक्ति मोसे निकरके जाएरहो हए करके मए पता पाएरहो हओं।”

47तओ अपना लुकी रहानके नाए हए करके बात पता पाएके, बो बैयर डरसे काँपत आइ और येशूके अग्गु घुँटो टेकके बैठिगइ और बो येशूके छुइ। तओ, कैसे बो छुइ खिनक अच्छी भइ बात, सब आदमीके अग्गु बताए दइ। 48येशू बो बैयरसे कही, “ए लौंणीया, तिर बिश्वाससे तए अच्छो भओ हए, शान्तिसे जा।”

49जब येशू मसकतए रहए, तब्ही यहूदी सभाघरको मुखिया सासक याइरसके घरसे एक आदमी आओ और कही, “तुमर लौंणीया मरिगइ हए। अब गुरुके कष्ट मतदेओ।”

50तओ येशू जा बात सुनके याइरससे कही, “मतडराबए, पर मोएमे बिश्वास इकल्लो कर, बो अच्छी हुइजाबैगी।” 51जब येशू हुवाँ पुगो तओ बा पत्रुस, याकूब, यूहन्ना और लौंणीयाको अइयादौवा बाहेक औ कोइके अपने सँग भितर नाए आन दइ। 52हुवाँ सब जनै रोत रहएं, और बिलकत रहएं। तओ येशू कही, “मतरोबओ, जा लौंणीया हबए मरी नाएहए, जा उँघाइगइ हए।”

53बो मरीगइ हए कहिके जानके, आदमी येशूको मजाक उणान लग्गए। 54पर येशू लौंणीयाको हात पकणके अइसे कहिके बुलाइ, “लौंणीया, उठ।” 55तओ बो लौंणीयाकी जेहान घुमके आइगओ, और लौंणीया तुरन्त उठीगइ। और येशू, लौंणीयाके कुछ खान देओ करके बक अइयादौवाके आज्ञा दइ। 56लौंणीयाके अइयादौवा अचम्मो मानीं। पर जो भओ रहए, बो कोइसे मत् कहियओ कहिके येशू बो लौंणीयाके अइयादौवाके कडा चेतावनी दइ।

હાલમાં પસંદ કરેલ:

लूका 8: THRNT

Highlight

શેર કરો

નકલ કરો