Zouao 9
9
Zesopa nocco siri nama naha tossonaui nocco ssire inanarrari
1Zeso itezerre ccarizazapa maqquiderre nocco siri qqui inade. Narraripa nama naha tossonarrari. 2Nezape ia poua uatimadedeni uati inade: —Ia Maride nerrecotoui arrarrari maqquiderrepa nocco siri tossonarrari? Imehidenicca uimasiri manaconico? Pocca uimasiri manaconirana? −inade. 3Naraha Zeso iaza uati tade: —Pocca uimasiri manaconi rraraui. Imehidenicca uimasiri manaconi rraraui. Nama naha tossonarrari, naui zotodepa Deocca nauatouerrine tobicaui auato tauiuarrine. 4Nema nezape ssiuarra taqquezama oua cazosserraricca zossenirri izepe irrina, onarraro. Niza zomezape izepe irriniuarrine ssamo tani. Niza ozoqquezape pina zomerrarossa nanitoui. 5Narraroa arri namiuarri omadiqquezape arrirraro namiza madimanarraridenicca ssiuarrani orraccani –nade Zeso.
6Narraro uima uati taha rricazapa Zeso poua nassope namiza ppito ineza sica sica ineza maqquiderre nocco siri nocco sse inarraride. 7Nazapa Zeso nocco siri zosse inade: —Arricca siba ui tozanicca passo onini Siroeza tinocco ssaua tana −nade. (Siroe ettizape: Zosse taui, inarraro.) Nazapa toqquezipparrari, poua nocco ssaua naza pocca ozauarri toccanizapa nocco ssire taha toccanide. 8Nazapa poua uinoricca madirra, ouahadeni tezerre nocco tobicaui qqui toquenarrari. Pouadenipa zinirotoui uiuitta naui qqui qqui toquenaporra narrari poua tauimari uimahaha canarraride: —Arrarraripa danirritoui uiuitta narrari rraraco? −quenade. 9Naraha madirra ouahapa: —Narrariderra −quenade. Naraha madirra ouahapa: —Narrari rraraui. Pina narrarissa narrari −quenade. Naraha poua attipa: —Rrehe, ouape oua −nade.
10Nazapa pouaza uati toquenade: —Nerrecoma teza tinocco ssire tarraro? −quenade. 11Naraha pouadeniza uati tade: —Arra maqquiderre oni Zeso quenarrari ssicarini sica ineza onocco sse inarraropa. Nazapa ouaza: “Arricca passo Siroeza tinocco ssaua tana” naza oqquezippeza onocco ssaua onezape onocco ssire tarraropa −nade. 12Nazapa pouaza uati toquenade: —Naraha narrari maqquiderrepa nerrecouarrinarra? −quenade. Naraha: —Ssamo onani −nade.
Marinarra onini parizeoza rrehe quenarrarideni nocco ssire nimaniuiza uati uati toquenarrari
13-14Zesopa zodeodenicca rrassinarracca uadaza ssicarini sica ineza madirra nocco siri nocco ssire inanarrari. Narraro rrassinarracca uadaza nama narrarirrine madirradenipa nocco ssire nimaniui iaqquemanarraride, marinarra parizeoza rrehe quenarrarideniuarri. 15Nazapa narraridenina arra nocco ssire nimaniuiza uati toquenade: —Tia nerrecoma tonanaza tinocco ssire tarrarotte? −quenade. Nazapa: —Rrehe, ssicariniza onocco sse inarraro. Nezape passoza ssaua oneza onocco ssire tarraroderra −nade. 16Nazapa parizeodeni mota attidenipa: —A, narrari madirrapa Deo icazosse-rraraui. Rrassinarracca uadaza: “Ozepe irri-rrerana” narraraui −quenade. Naraha mota attidenipa: —Canauatori canaderra bica taui. Madirra uimasiri carrimanarraridenipa nama quena-rraraui −quenade. Nama quenazapa Zeso tauimarirrine poccadeni uima carobemanarraride.
17Nazapa nocco ssire nimaniuiza uati toquenapomade: —Tiape nerrecoma tani tinocco ssire tonanadezape? −quenade. Naraha nocco ssire nimaniui attipa: —Ouattipe Deo Atti cacomerabote, onarraro −nade.
18Naraha zodeodenicca taminedenipa Zesorrine nocco ssire nimaniuiza: —Parrissa rrarauitiderra! Nazama nocco tobicauiraha −quenade. Nazapa nocco ssire nimaniui imehi imenidenitoui uaua quenade. 19Uedarronazapa pouadeniza uati toquenade: —Arrarraripa ticcadeni erredenico? “Narraria nocco siri tossonaui” tiquenarrarottaqui? Naraha rridapanapa nocco ssire tarrarirana −quenade. 20Nazapa imehi imenidenipa uati toquenade: —Arrarraripa icca erredeni nocco siri tossonarraride nauatoto inani. 21Naraha nerrecoma naza nocco ssire tarrari? Ssamomo inani. Poua nocco ssire tonanade naco ssamomo inani. Pouazara uati tiquenarri, pouapa erredeni rraraui. Pouana nauato taui −quenade imehi imeni attideni.
22Arra imehi imenidenipa cappinemanarrarirrine: —Pouazara uati tiquenarri −quenarraride. Zodeodenicca taminedeni atti nauatoto taporra narrari. Arra madirra Zesoza: —Narraripa parrissa Cristo-Mesia −nazapa ettarrouitoui. —Icca Deo Atti mamariuarri qquezimapoma-rrarauiuarrine −quenaporra narrari. 23Narraria imehi imeni attidenipa: —Pouazara uati tiquenarri, pouapa erredeni rraraui −quenarrariparrade.
24Nazapa zodeodenicca taminedeni nocco ssire nimaniui pouaza uaua quenapomade. Ccarronazapa pouaza uati toquenade: —Deopa tetti mittaui. Parrissehera iaza uati tinarri. Iape nauatoqquiri inani: Narrari maqquiderrepa uimasiri rrinede −quenade. 25Naraha manaco uati tade: —Ouape ssamo onani. Uimasiri carriuitide, carri-rrarauitide. Arrirraro uimana nauato onani orrarini. Taidepe onocco siriraha rridapanepe qqui onani −nade.
26Naraha pouaza denima uati toquenapomade: —Tia nerrecoma tonanarrari? Nerrecozara tinocco tonanabicarrari? −quenade zodeodenicca taminedeni. 27Naraha uati tapomade: —Naza uati onaporaha ouatti timittemana-rrerarraro. Nerrecotoui uima uati uati onapomacca nanitoui tiquenarraro? Tiadeni naqui pocca tiquerrenaniuarrinerane? −nade.
28Nazapa zodeodenicca taminedeni uadieza nocco ssire nimaniui itamassomanaza uati toquenade: —Tiape narrari maqquiderrecca tirrana! Naraha iape Moizecca mamari tabaqqui iquerrenarronarraro. 29Iape Moizeza Deo uati taporraripa nauatoqquiri inani. Naraha narrari maqquiderrezapa nauatoqquiri inerrerani. Nerrecoma nauiccatta? −quenade zodeodenicca taminedeni.
30Naraha nocco ssire nimaniuipa uati tade: —A, ticcadeni uima rriza tani! Poua ccarronauiuarri ssamoqquiri tiqueneraha, pouapa onocco ssire tonanarrari. 31Nauatoqquiri inani: Arra madirra uimasiri carrirrari attipa Deo mitta-rraraui. Naraha madirra Deoza damera tarrari, Deo nacassa tauicca inanezana poua atti Deo mittaui. 32Maittaccazama zama nauatoponizama maqquiderre nocco siri tossonaui nocco ssire inanemanaui uima ihimittarrona nerrerarrarode. 33Rridacca narrari maqquiderre Deocca rrarazapa ssamo tanarra −nade nocco ssire nimaniui atti.
34Nazapa manaco uati toquenade: —Tiape uimasirima tissoneraha nerrecotoui iara ia mari ticanabaqquirraro? −quenazapa nocco ssire nimaniui moua iquenade: —Icca Deo Atti mamariuarri tiqquezimanipoma terrerarri! −quenade.
Zesoza parrissa quena-rrararraridenipa pina noccodeni sirissa quenarrari
35Zodeodeni poccadeni Deo Atti mamariza nocco ssire nimaniui qquezimanipoma-rrarauiuarrine moua iquenaui Zeso mittarraride. Nazapa poua tezerre bacco tocanirepomazapa pouaza uati tade: —Tiape Madirra Bediza parrissa taqui? −nade. 36Naraha nocco ssire nimaniui Zesoza uati tade: —Nerrecorrarina parra Madirra Bedi? nani pouaza parrissa onaniuarrine −nade. 37Naraha Zeso pouaza uati tade: —Neza oua qqui tinaua, ouape Madirra Bedi orrani. Ouaza uati uati tinarraro −nade.
38Nazapa nocco ssire nimaniui poua nocco ssire tonanade baccouarri poua pitoza uitta naza: —Rrehe oua Zozossede, tiaza parrissa onani −nade Zesoza uatizeza. 39Nazapa Zeso uati tade: —Ouape arrirraro zamaza occarronarraro madirra bazimacca uima cattemade. Naui noccodeni siripa noccodeni ssire onanabaqquiza qqui toquenauiuarrine. Naraha noccodeni bicaui qqui toquenarraridenipa noccodeni sirissa quenauiuarrine −nade Zeso. (Zeso atti nama narraripa pouaza parrissa quena-rrararraridenipa pina noccodeni sirissa quenarrari.)
40Naraha zodeodeni mota marinarra parizeoza rrehe quenarrari nauiza queriqquimanarrarideni Zeso atti mittemanarrari. Nazapa Zesoza uati toquenade: —Nanerre inocco sirirane? −quenade Zesoza. 41Naraha manaco Zeso pouadeniza uati tade: —Rridacca tinoccodeni sirizape ticcadeni uimasiri noueranitouiraha “Iape inocco bicani” tiquenezape ticcadeni uimasiri tiadeniza rriquerreraccani −nade Zeso.
હાલમાં પસંદ કરેલ:
Zouao 9: KBNT
Highlight
શેર કરો
નકલ કરો
Want to have your highlights saved across all your devices? Sign up or sign in
2020 Impresso na Graafica da Biblia
