Zouao 10
10
Eueue cacauadecca uima
1Nazapa Zeso uati tapomade: —Parrissehera tiadeniza uati onarraro: Madirrapa arra eueue tazaricca totoqquezimaza toqquezima-rraraza totoqquezima noueraniuarrina rroppa tozimarraripa bobotide. 2Naraha arra madirra eueue tazaricca totoqquezima toqquezimarraripa eueue cacauade parra. 3Eueue cacauade eueue tazariuarri bacco tazapa pocca zozosse noccobirri icataborriza tani. Eueuepa cacauade atti mittemana taui. Pocca eueue onideniza uaua nazapa iaqquenabaqqui taui. 4Naza pouarrine eueue rrauinineza cacauadepa taide torra taui. Eueuepa pouadeni cacauade atti nauatoqquiri nazapa poua natti rraui torra taui. 5Naraha madirra ouaha nattipa rraui torrera taui. Atti rriza taza, pouadeni cacauade attissa narrarazapa domo tocca taui −nade Zeso.
6Zeso eueue tauimari uati tarraripa pocca madirra tauimari uati, poua tauimari uati taraha nauiza madirra domo uarrari mittemanaraha pouadeniza ssamo tarraro.
Zesopa eueue cacauade bicaui
7Nazapa Zeso madirra mittemanauiuarrine uati tapomade: —Parrissehera tiadeniza uati onana: Ouape eueue tazariuarricca totoqquezima orrani. Narraro totoqquezimazape eueue rrarraui torrezima narrari. 8Oua occarrona-rreraqquezape bobotidedenina rrauirronaporrari. Naraha eueuepa bobotidedeniza uaribodeni didiqquiri narrari −nade Zeso.
9—Ouape pina totoqquezima orrani. Madirra ouaza rrarrauizima narraripa tossiuauehe carrimanauitoui. Pouadenipa pina occa eueuessa quenarrari. Zomepa eueue pouadeni tazariza rrarraui torrezimani naza cacauadepa nauiza ehecauabaqqui narrari. Ssiuarrapa cacauade eheqquenabaqqui narrari, mina bicani rripemanauiuarrine. Ouape occa madirra ouacauabaqquiuissa tarrari −nade Zeso.
10—Arra bobotidepa botiuiuarrine, toponi nanazoqqueuiuarrine, toponi tonauaidirauiuarrinera ccarrona taui. Naraha ouape toponi tonassiuauadera occarronarraro, madirra bodideniza madie bicanicca carrimanauissa tauiuarrine. 11Ouape eueue cacauade bicabote. Eueue cacauade bicabote pocca eueueza tossiuauehe da ina tani. Pocca eueue tocassiuauerauiuarrinepa pouana poua ccaccora taui. 12Naraha madirra ouahapa manaconitouira eueue ecauabaqquiza zomarri ccarronaui qqui tazapa eueue inebobaqqui… rroppa taui carri taui. Pouapa eueue rrinede rrararrari. Nazapa eueue inebobaqquizapa zomarri eueueza ssonarizapa motapa torraribaqqui taui. 13Arra eueue cacauade manaconitouira tarabaia narraripa eueueza uati uana tarrararrarirrine inebobaqqui taui −nade.
14-15—Naraha ouape eueue cacauade bicabote orrani. Nema onarrarope madirra ouaza toquerrenarraripa ouacauabaqquirrari. Occa Abipa ouaza nocco rrizera taui. Oua naqui occa Abi Pouaza onocco rrizera tani. Narrarossa narraro ouape occa eueueza onocco rrizera tarraro. Manaco occa eueue ouaza noccodeni rrizeraqquiri narrari. Nazama ouape occa eueue tocassiuauerauiuarrinepa ouana oua ouaccoraniuarrine. 16Eueue ouahadeni naco uapi taha ocarrini. Arra tazaricca rraraui. Narrarideni naco ouaccani-baqquiuiuarrine. Pouadenipa ouattiza iboraqquiri naui. Nazapa cacauade orrariazana queriqquiuiuarrine. Nazapa orrariqquimanauitoui −nade Zeso. (Poua atti nama narraripa madirra zodeo querrena-rrararrarideni naco pouaza toquerrenauiuarrine.)
Zeso poua zoqqueuicca uima
17—Oua ouaccoreza ozoqqueraha occa camittehe ouaza torrapomanitoui. Narraro uima onananiuarrine ibora onezape occa Abipa ouaza uati uana tarrari −nade. 18—Arri ozoqquerraro naqui madirra ouaharrine rrerani. Ouana oua ouaccoreza oua inanazoqque-mananitoui. Occa camittehe ouaccoraniuarrine oparrireni. Occa camitteheza bacco onanipomaniuarrine naqui oparrireni. Arrirraro zossenirripe occa Abirrine −nade Zeso.
Uima inapamemanarraro
19Nazapa zodeodeni narraro uima mittemanazapa Zeso tauimarirrine torraribaqquimanarrari. 20Nazapa mota bazima uimahaha canade: —Nerrecotoui pocca uima imittaniuarrine? Tocorime-Taminecca zozosse tocorime siri carrirrari. Poua bodi tossamorrariua −quenade. 21Naraha madirra motapa: —Madirra tocorime siri carrizapa atti nama narraraui. Tocorime siripa madirra nocco siri nocco ssire inana taco? −quenade.
Zodeodenipa Zesoza uattarroqquiri narrari
22Zazarrade bacco tezape Zesopa oza panani Zerozareza madirrari. Nauiza madizapa zodeodenicca dada toqquima Deocca tocarranipomarrarocca errete bacco tade. 23Nazapa Zeso Deoza dada toqquimacca boroni inidi tetepini carrini onini Portico de Saromaoza ccarizarrari. 24Nauizana zodeodenipa Zeso icauauarranimanaza uati icanaqquimanarraride: —Nerrecoma teza ticca uima nauatoqquiri inaniuarrine? Tiape Cristo-Mesia tirrezape iaza tia tecomeranissa tarri, inarraro −quenade.
25Naraha Zeso uati tade: —Neza uati uati ohonanaua. Naraha tiadenipe rrehe tiquenerrerani. Arri ohonauato narrarope occa Abicca deni torreheza ohonauato narraro. Arri occa nauatonirri qqui tiquenezape narrarorrinea arri occa uima nauatoqquiri tiquenarraroparri. 26Naraha tiadenipe parrissa tiquenerrerani. Occa eueue tiquerrena-rrerarraro. 27Occa eueuepa ouatti nauatoqquiri naui. Manaco oua naqui pouadeniza onocco rrizera tani. Pouadenipa ouaza rrauirizarrari. 28Ouape pouadeniza camittehe rriquerreranicca da onarizarraro. Pouadenipa parra zoqquemanari-rrarauitoui. Pouadenipa ouacauabaqquiuissa tarrari. Ozepeccapa idinibaqquimana-rrarauitoui. 29Arra ouaza toquerrenarraridenipa occa Abina ouaza inanarizarrari. Occa Abina deni torrarrari. Naraha bazima motadenipa arramani toquerrenaui. Abi poua zepeza toquerrenazapa idinibaqquimana-rrarauitoui. 30Oua occa Abi tezerrepe pina irrariqquirrarossa narraro −nade Zeso.
31Nazapa zodeodeni siba nacca-cca quenapomade Zeso iquenaqqui-manauiuarrine. 32Naraha Zesopa pouadeniza uati tade: —Occa Abicca dacorehema madirraza uima bicanira onanarizarraro qqui tiquenarraroua. Naraha nerrecoma narraro occa nauatonirri acconi oua tiquenaqquimananiuarrine? −nade Zeso.
33Naraha zodeodeni uati toquenade: —Ticca nauatonirri bicani acconipe tiaza iboquerrerani. Naraha Deoza tettipe oppina tarrarorrinena “Tia iquenaqquina” inarraro. Tiape madirra tirreraha “Deo orrani” taterre neza −quenade zodeodeni.
34Naraha Zeso pouadeniza uati tapomade: —Maittaccazama Deopa madirra uima cacattemade toquerrenarrarideniza uati tarrari. Poua Atti pouadeniza: “Tiadenipe deodeni tiquerrenarraro, ohonanade” naui nade Deo Poua Atti dozo naniccaza. 35Arri Deo Atti dozo naniccaza nauatoqquiri inani. Narraroza: “Maizehe” inaniuarrine oppina tani. Deopa pocca zossenirri carrimanarrarideniza uati tarrari. Pouadeniza: “Tiadenipe deodeni” naui nade Deo. 36Naraha Deopa oua tocatterrizaza arrirraro namiza oua zosse naronarrari. “Ouape Deo Bedi orrani” onarraroraha nerrecotoui ouaza: “Tettipe oppina tani Deoza” tiquenarraro? 37Occa nauatoue pina occa Abirrinessa nerrerezape ouaza parrissa tiquenerrerarri. 38Naraha occa nauatoue pina occa Abirrinessa nezape narrarozana parrissa tiquenarri. Ouattiza parrissa tiquenerrereraha niza tibodideni uatonissa tezape occa uima auato tanitoui. Abipa ouaza, ouape Abiza, iape pina irrariqquirrarossa inarraro −nade Zeso.
39Nazapa Zeso dama iquenapomauitouiraha toqquenaza zori tarraride.
Zeso toccanirrari ueni Zorodaouarri
40Nazapa Zeso ueni Zorodao rrippeuarri toccanipomarrari. Nauiza Zouao madirra passo dopaniza niqui niqui ihizanabaqquipo nauiza iborraride. 41Nauiza madizapa madirra uapi taha Zeso qquide rraui torrarrari. Nauizana Zouao Batista tauimari bodideni uatome-manaza uimahaha canarraride: —Rrehe, parrissa. Zouaopa canauatori cana-rrararaha pocca uatinarrape Zeso tauimari uati tapouissa naderra −quenade.
42Nazapa nauiza Zeso pouaza madirra uapi taha parrissa quenarraride.
હાલમાં પસંદ કરેલ:
Zouao 10: KBNT
Highlight
શેર કરો
નકલ કરો
Want to have your highlights saved across all your devices? Sign up or sign in
2020 Impresso na Graafica da Biblia
