Kejadian 11
11
1Menop taruda, tuai mutu ban-ban yuma kurami nesalada, sun upu tenpu pepra upu talerdarami. 2Upu tenpupu taleramidi, keteng yakan tara benamidi, ati dopra deipembaramidi, tenpu mutu, ila ban mutu er sida, Sinar mutu yai. Yai dingeda, ‘Banaida telepe,’ tenepidi, amutupu ati weik dopra kurami.
3Sun dakuramyane, amendada upepdarami. “Gume kaipo, nun yuma kikiman pel dopmeko. Gat tu dopropmepedi, urasin telep kupra telepropmepedi, uku pumbon deipmepepa, dapra gat weik konum kupyopda, batu telel utopu konum kuprepa, gat ati donkamepe,” pepra, upu taledanmaidi ukupi. Men di tali gel dopra, ati dela dorami dinin, ataruda gat tu telepra, uku di dapipa, batu telel ketenepinge cap, co pe mirin nge capdi, lyom gat ati domi.
4Ukupi dingeda, amenda pepi. “Nun kayapu, ukuda, ila nimi ati arum donkamepe. Amutu neitamaida, ila lyom weik ati dopmepepa, im neitamai welepra doamepyane, im dup welepkamre ja. Ukupra doptepya deiki di, yuk nesala yumadi nun tep, ‘Uo, anesalada ila mambule,’ pepra, nun tep ereipkamsengedi, ila neng kunkamepe. Ukupmepyopda, amenda taruda, yuk-yuk wilipra tuai mutu neitamai yuma, yuk-yukai men bokdankamepe. Acapu kikiman kunkamepe,” upepra upu talepdanmaidi, apel gonga kepra dopbanmai.
5Akati arum dopbanmaipane, amendada Allah er si Yahwehdi, ‘Nimi tuai nesaladi ila ati arum cap, im neitamai welepkamre lyom ati cap donmangada, dirbenkun’ tenen, kwerepudi, diryau. 6Diryau dingeda, Allah er si Yahwehdi upepu.
“Gume, tuai nesala yuma, tenpu yala nesala kungedi, tenpu upupu pepra, upu taledangedi, ila lyom ati cap, ila nimi ati arum cap, konum gonga kepra donmange. Ange tep, sun pe kange dipu, ‘Ukupkamepe, ukupkamepe’ tenepmenge keca yumada, ikin men kuptupa, ‘Kanam dipapu kupnung’ tenen, angeda bamure. 7Ukupnunga tep nengeda, tuai mutu dubanmeko. ‘Sun kikiman upu talepdapetepmengepa, betapra men gekepdankameng’ tenen, sun upu deiyo pio yuk-yuk kupra deipkupe. Ukupmepyopda, sun yuma pio men gekedankamenge.” Allahdi pepu.
8-9Utenepra pepka cadi, Allah er si Yahwehdi, tuai mutu ban-ban yuma kurami nesala tep nengeda, sun upu deiyo pio yuk-yuk kupra deipupa, sun yumadi men gekepdanmanto kupi. Ange kupka deiki di, upu betapra men gekerdaramidi, amutu tapra yuk-yukpu bokrap embaramidi, sun mutu yuk-yuk bena kurami. Allah er si Yahwehdi, amutu kurami nesala yuma, sun upu deiyo yuk-yuk kupra deipupa, upu yuk-yuk pepdaramipa, pio nimdanapu, men gekepdanmanto kupka tep, amutu sida Babel perami. Sun upu deiki, Babel deiyoda, nimdana tep penunge.
Sem dinin dadukdongopra, Abram tep nimi nungna upu
10Allahdi dokotepu ila mokon konum cepupa, keteng tamun butene ton cap kupupa, Nuh er mi Semda, keteng tamun 100 tahun wisipu. Sem keteng tamun 100 tahun kupu taruda, er mi Arpakhsad deipu. 11Arpakhsad deipudi, ataru dinin dukdongopra keteng tamun 500 tahun ton cap kuramudi, er nyapu cap, ner nyapu cap deiamu. 12Arpakhsad keteng tamun 35 tahun kupu taruda, er mi Sela deipu. 13Sela deipudi, ataru dinin dukdongopra, keteng tamun 403 tahun ton cap kuramudi, er nyapu cap, er ner nyapu cap deiamu. 14Sela keteng tamun 30 tahun kupu taruda, er mi Eber deipu.
15Eber deipudi, ataru dinin dukdongopra, keteng tamun 403 tahun ton cap kuramudi, er nyapu cap, ner nyapu cap deiamu. 16Eber keteng tamun 34 tahun kupu taruda, er mi Peleg deipu. 17Peleg deipudi, ataru dinin dukdongopra, keteng tamun 430 tahun ton cap kuramudi, er nyapu cap, ner nyapu cap deiamu.
18Peleg keteng tamun 30 tahun kupu taruda, er mi Reu deipu. 19Reu deipudi, ataru dinin dukdongopra, keteng tamun 209 tahun ton cap kuramudi, er nyapu cap, ner nyapu cap deiamu. 20Reu keteng tamun 32 tahun kupu taruda, er mi Serug deipu.
21Serug deipudi, ataru dinin dukdongopra, keteng tamun 207 tahun ton cap kuramudi, er nyapu cap, ner nyapu cap deiamu. 22Serug keteng tamun 30 tahun kupu taruda, er mi Nahor deipu. 23Nahor deipudi, ataru dinin dukdongopra, keteng tamun 200 tahun ton cap kuramudi, er nyapu cap, ner nyapu cap deiamu. 24Nahor keteng tamun 29 tahun kupu taruda, er mi Tera deipu.
25Tera deipudi, ataru dinin dukdongopra, keteng tamun 119 tahun ton cap kuramudi, er nyapu cap, ner nyapu cap deiamu. 26Tera keteng tamun denge weik 70 tahun konum kupu taruda, er deiamu nyapu sida Abram cap, Nahor cap, Haran cap deiamupa kurami.
Teradi deiamu nyapu tep pepu upu
27Apepkusen upuda, Nahordi deipu mi, er sida Tera tep pepkune. Teradi deiamu nyapu sida, Abram cap, Nahor cap, Haran cap kurami. Haran nepu dingeda, er mi deipudi, er si Lot pepu. 28Haran er nai bo sisa Tera tupa gam kuramu taruda, sun Kaldea yala nesala kurami mutu neitamai, amutu sida Ur mutu (tonda Ur-Kasdim penunge), Haran depu. Ur mutuda, ada Haran deipmemeu mutupu.
29Tera er yuk nyapu butene sida, Abram cap, Nahor cap, sun butene nengda ner konum doprei. Abram er ner sida Sarai kuramu. Nahor er ner sida Milka kuramu. Milka er nai bo sisa, er sida Haran. (Harandi Milka cap, Iska cap deipka cadi, Nahor er weit bodi deipu ner mi dopu). 30Abram dopu ner Saraida, you ner kuramnga cadi, er nyapu men deriramu.
31Uda, Teradi er mi Abram cap, er deipu mi Harandi deipu mi Lot cap, Abram er ner Sarai cap yuma dopra, ‘Kaldea yala nesala kunge mutu, Ur mutu tapra, Kanaan mutu benkamep’ tenen, bei. Bisi banmai dinin, Haran taleamu mutu, amutu si peda, Haran mutu yai dingeda, acapu ati dopra kunmai. 32Kunmaipane, dakuramipanen, sun nai bo Tera keteng tamun denge weik, 205 tahun konum wisi deipupa, Haran mutu neitamaipu depu.
હાલમાં પસંદ કરેલ:
Kejadian 11: KNTOT
Highlight
શેર કરો
નકલ કરો
Want to have your highlights saved across all your devices? Sign up or sign in
©2022 Wycliffe Bible Translators, Inc