Psom 8
8
Laglwar Bondie e grander limanite
Enn Psom David, pou sef koral, avek lakonpagnman lor laarp Gat.
1SEGNER, twa ki nou Segner,
To nom li manifik partou lor later!
To plas to laglwar pli ot ki lesiel.
2Par labous bann zanfan ek ti-baba
to finn batir to lafors kont to bann lennmi,
pou ferm labous bann adverser e seki rod lit kont twa.
3Kan mo admir lesiel, travay ki to lame finn fer,
kan mo get avek admirasion lalinn ek zetwal ki to finn met anplas,
4ki valer imin ena pou ki li dan to panse?
Ki enn sinp kreatir imin ete, pou to pran li otan kont?
5Pourtan to finn fer li inpe mwins ki Bondie.
To finn kouronn li ar laglwar ek loner.
6To fer li gouvern lor travay to lame;
to finn fer li siperyer ki lezot kreatir:
7troupo bef ek mouton,
e mem bann zanimo sovaz,
8zwazo dan ler, pwason dan dilo,
tou seki ale vini dan losean.
9SEGNER, twa ki nou Segner,
to nom li bien gran partou lor later!
હાલમાં પસંદ કરેલ:
Psom 8: KMNT
Highlight
શેર કરો
નકલ કરો
Want to have your highlights saved across all your devices? Sign up or sign in
Nouvo Testaman Kreol Morisien Harmonisation NTPS KM © Bible Society of Mauritius, 2021.