Psom 7
7
Donn nou to lazistis
Enn lamantasion David ki li adres Bondie apropo Kous, enn Binzamit.
1SEGNER mo Bondie, mo vinn ver twa pou gagn to proteksion;
bann persekiter pe pourswiv mwa; sov mwa, delivre mwa.
2Sinon, kouma lion, zot pou desir-desir mwa,
trenn-trenn mwa, e personn pa pou vinn delivre mwa.
3SEGNER mo Bondie, si mo finn mal azir,
si mo lame finn komet enn krim;
4si mo finn trayir enn kamarad;
si mo finn fer ditor mo lennmi san rezon;
5alor, les mo lennmi pourswiv mwa e may mwa,
les li zet mwa ater, pil lor mwa,
e les mo kadav pouri dan lapousier.
6Lev twa, SEGNER, montre to koler!
Dres kont violans mo lennmi;
Revey twa, twa ki finn etabli drwatir.
7Rasanble bann pep otour twa
e depi lor to tronn lao diriz ek ziz zot.
8SEGNER, twa ki ziz lor tou dimounn,
ziz mwa dapre mo drwatir,
ziz mwa dapre mo lintegrite.
9O Bondie, twa ki lasours drwatir,
twa ki konn ziz nou panse ek nou santiman,
detrir lemal bann move dimounn
e fer bann dimounn ki drwat vinn pli for.
10Bondie mo boukliye protekter
e li sov seki obeir li.
11Bondie enn ziz ki fer zistis,
enn Bondie ki montre so koler kont lemal toulezour.
12Si move dimounn pa repantir
Bondie pou fit so lepe
e redi difil so lark;
13li finn arm so fles pou li vize,
li finn prepar so bann zarm mortel, bann fles anflame.
14Gete kouma move dimounn akous lemal;
zot met ba dezord
e fer lelvaz desepsion.
15Zot fouy enn trou, zot fer li bien fon;
zot tom pik tet dan trou ki zot finn fouye zotmem.
16Zot move lintansion vinn zot prop pwazon;
dan zot prop figir, zot zarm malsin eklate.
17Mo pou rann gras LESEGNER pou so drwatir.
Mo sant grander nom LESEGNER Pli Lao.
હાલમાં પસંદ કરેલ:
Psom 7: KMNT
Highlight
શેર કરો
નકલ કરો
Want to have your highlights saved across all your devices? Sign up or sign in
Nouvo Testaman Kreol Morisien Harmonisation NTPS KM © Bible Society of Mauritius, 2021.