Mataayo 10

Yesu ˆaghatoma abhatomu bhaache ikomi na bhabhere

(Maariko 3:13–19, 6:7–13; Ruuka 6:12–16, 9:1–6)

1Yesu akabhabherekera abhaanabheegha bhaache ikomi na bhabhere, akabhaha obhotoro bho kuhëëbha emisambu na kuhöri amabhabharu ghoose. 2Amariina gha bhatomu bhayo ikomi na bhabhere nigho ghano:

O mumbërë n‑Simiyooni uno akobherekeru Bheetero, na Andereya omonyi waache, na Yakobho mwërëëti o Sebhetaayo, na Yohana omonyi waache, 3na Bhiiribho, na Bhatoromaayo, na Tomaso, na Mataayo omutöbhi o righööti, na Yakobho mwërëëti o Arubhaayo, na Tatewo, 4na Simiyooni Omukananaayo#10:4 Omukananaayo. Naare na amariina abhere, rimu n‑de Kiyahuuti, Simiyooni Omusërötë, erende n‑de Kiyaraamu, Simiyooni Omukananaayo. Amariina ghayo ghoose ngaanyi ne egheteemoro kimu, omooto uno are arööniri eriihë re bhohuuru koru mo‑bhukangati bho Keruumi. Mööhi Maariko 3:18; Ruuka 6:15. na Yuuta Isikariyoote, uno amariri akamuhaana Yesu mo‑mabhökö gha bhabhisa.

5Yesu akabhatoma bhayo ikomi na bhabhere, akabharaghereri akabhugha, “Motaheta mo‑chaase che bhaato bha matöngö, wiiki motasöha mo‑moghya wowoose o Bhasamaariya. 6Amare moghi mo‑bhaato bha Isiraeri bhano bhabhoriri kinya changʼöndu. 7Wiiki, hano mooghuye iyo, mubhe moraraghani morabhugha, ‘Obhutëmi bho Mwishaaro ˆbhoghatingʼi.’ 8Muhöri abhabhabharu, moryoki abhaku, mwëri bhano bhaanyi na ambiti na kuhëëbha emisambu. Mbe, gho kubha Eryobha ndebhaheere bhoowa, na niinyu moruusi bhoowa. 9Motiimoki asahaabhu, hamu chambiiri, hamu chaachabha mo‑maghöchi ghaanyu. 10Motaacha kwimoki eriighöchi, hamu changibho ibhere, hamu ebhekwera, hamu ahimbo, gho kubha omuköri o meremo nakurëngʼaanera kuhaabhu bhino bhakwënda.

11“Omoghya wowoose hamu ekyaro ghyokyose kino moghusöha, mutabhare omooto uno isheriiri kobhaghënëhi. Mbe, mwikare awaache mbagha runo mokobhooka. 12Hano moghusöha mo‑ka yoyoose, mukëëri abhaato bhaache mobhughe, ‘Omurëmbë ubhe mo‑ka ino.’ 13Mbe, aribha bhaanyi‑mu abhaato bhano bharëngʼaaniire omurëmbë uyo, mobhasabhere kubha Eryobha rebhiitabheri. Amare aribha bhataanyi‑mu bhano bharëngʼaaniire, omurëmbë uyo obhagharukere inyu. 14Aribha omooto atabhaghënëhiri hamu ataakobhatëghëërëra, mbe, mwikongʼoote orotu runo roonyi mo‑maghoro ghaanyu#10:14 Mwikongʼoote orotu runo roonyi mo‑maghoro ghaanyu. Egheteemoro keeche n‑kubha, Eryobha ndebharooche kubha, ibho m‑bhaghonchu na ndekobhatenera ekiina. hano mokohoroka mo‑ka iyo, hamu mo‑moghya uyo. 15Mahëënë ˆnekabhabhoorera kubha orosiko ro ghoteneru ekiina, ndekobhatenera ekiina abhaato bha moghya uyo kwo bhororo ghokera abhaato bha se e Sotoma na Ghomora.#10:15 Mööhi Simoka 19:24–29.

Anyaako ino ekuucha

(Maariko 13:9–13; Ruuka 21:12–17)

16“Ibheere mutëghëërëra, ˆnekabhatoma kinya changʼöndu ghateghate e chasuuche. Mbe, mubhe na amangʼiini ghe nchöka, wiiki mubhe bhahörëëru ghe sarari. 17Mubhe miisho na abhaato, gho kubha mbakobhahira mo‑mabharacha, wiiki mbakobhatëma mo‑masinaghooghi ghaabho. 18Mbakobhahira ambërë e bhakangati na abhatëmi bha mo‑se ino gho ghiri yaane, kubha mubhe abhiibhateri bhaane ambërë yaabho na ambërë e bhaato bha matöngö. 19Hano bhakobhaghööta na kobhahira mo‑bhakangati, motaacha kubha na ahaho kubha neke moghosiikëra, hamu nibhu moghosiikëra. Eryobha eryene ndekobhaha ghano moghosiikëra kwo riibhagha riyo. 20Motanyaaka gho kubha taanyi inyu abheene moghosiikëra, amare n‑Akörö e Taata waanyu ino moose yaanyu niyo eghosiikëra.

21“Kwo riibhagha riyo, omohiiri nakomwigharurani omohiiri waache na komuhaana mo‑mabhökö gha bhabhisa, kubha itu. Wiiki, omwibhori nakomuhaana omoona waache mo‑mabhökö gha bhabhisa kubha itu. Abhaana nabho mbakobhiigharurani abhiibhori bhaabho na ghughëri bhiitu. 22Abhaato bhaaru mbakobharëgha inyu, gho kubha moghuntambana eni. Amare, wuure aghoghumereri mbagha antenero, uyo niwe aghotooribhu. 23Mbe, hano mookubha moraraghani, bharabhakörëra kobhe mo‑moghya umu, mungʼösërë mo‑moghya owonde. Mahëënë ˆnekabhabhoorera kubha, motaakomuntaani ghughënda mo‑meghya ghyose ghe Isiraeri, eni Omoona o Mooto netaamara niicha.

24“Omoonamwegha taakomokera omweghi waache. Wiiki, omusësë taanyi omokoro ghokera omutëmi waache. 25Omoonamwegha nakwëndëru abhe kinya omweghi waache no omusësë woose abhe kinya omutëmi waache. Aribha akomobherekera omokoro o nyumba kubha m‑Bherisebhuuri,#10:25 Bherisebhuuri n‑eriina erende re Erishambu, niryo omokoro o misambu ghyose. kana, taakobhabherekera abhaato bha mo‑nyumba yaache amariina amabhe ghokera ghayo?

Ëndërëra ghwitëngʼëra obhochongi bho Ryobha

(Ruuka 12:2–9)

26“Mbe, motabha morabhatiina abhaato bhayo. Egheghiro ghyokyose kino ghekundekiiru ngekohunyuru, na kino kebhisuru ngeghotooru haheero. 27Ghoghoose ghano ˆnekabhabhoorera mo‑kengʼuuri, moghasiikërë haheero. Wiiki, ghoghoose ghano mokooghu gho kebhisere ighoro e bhutëmi bho Mwishaaro, mogharaghani haheero. 28Motabhatiina bhano bhaghwita omobhere, amare bhataaghotora ghwita akörö. Mokwëndëru moretiine Eryobha eryene chiri rino reghotora ghosireekereri omobhere haghirohamu na akörö mo‑riiribha re mororo. 29Kana, ebhichëghë bhibhere bhetaaghoghoru kwo riighori isuuhu hangʼu? Koru hangʼu ghetaanyi‑ho eghichëghë mo‑bhiyo kino gheeghugho haase, aribha Taata waanyu atiisheriiri. 30Amare kwo ribhaara reenyu, Eryobha ndyeche omubharo o chanchweri choose che mitu gheenyu. 31Mbe, motabha moratiina gho kubha inyu moonyi no obhwëra ghokera ebhichëghë bhyaru. 32Mbe, omooto wowoose uno akonyishereri ambërë e bhaato, na neeni nekomwishereri ambërë e Taata waane uno anyi Mwishaaro. 33Amare, wowoose uno akonyanga ambërë e bhaato, na neeni nekomwanga ambërë e Taata waane uno anyi Mwishaaro.

Eriighori re kubha omughëndi o Yesu

(Ruuka 12:51–53, 14:26–27)

34“Motabha moriihëëbha kubha niichiri mo‑se ino gho ghiri e kurëëta omurëmbë. Tiyaanyi! Taanyi hangʼu. Amare, niichiri gho ghiri e kurëëta eriihë. 35Niichiri ghutaani omoona ni ishe, omuukë na nyina, omuku na nyinabhiyaara bhatabha bharoghwana. 36Wiiki, abhabhisa bha mooto mbaakubha abhaato bha mo‑ka yaache.#10:35–36 Mööhi Miika 7:6. 37Omooto wowoose uno amosiighiri ishe hamu nyina ghonkera eni, uyo taakundëngʼaanera. Wiiki, wowoose uno amosiighiri omoona waache, hamu omuukë waache, ghonkera eni, uyo woose taakundëngʼaanera. 38Omooto uno ataaghughëgha omusarabha waache na ghuntambana, taakundëngʼaanera. 39Omooto wowoose uno akwënda kobhuhöni obhuhöru bhooche, nakobhori obhuhöru bho miishe ghyose. Wiiki wowoose uno akobhobhori obhuhöru bhooche gho ghiri yaane, nakobhubhöna obhuhöru bho miishe ghyose.

Abhaato bhano bhakuhaabhu atuho

(Maariko 9:41)

40“Omooto wowoose uno akobhaghënëhi inyu, nangënëhiri na neeni. Wiiki, wowoose uno angënëhiri eni, namughënëhiri wuure antomiri eni. 41Wowoose uno akomughënëhi omurööti gho kubha m‑murööti, Eryobha ndekomuha atuho enga e murööti. Wiiki, wowoose uno akomughënëhi omooto omuhëënë ambërë e Ryobha gho kubha m‑muhëënë, mahëënë Eryobha ndekomoreha atuho yaache. 42Mahëënë ˆnekabhabhoorera kubha wowoose uno akomuha eghisënchö ke manche amamititu umu o bhano bhaanyi abhasuuhu gho kubha na abhaanabheegha bhaane, Eryobha ndekomoreha atuho yaache.”

હાલમાં પસંદ કરેલ:

Mataayo 10: ntk

Highlight

શેર કરો

નકલ કરો