Lug 21

Ituti Ŋwiye ìwi iku-àyi

(Mag 12:41-44)

1Anyumə̀ ne Yeso ya yaʼi inga mbàn Ŋwiye, wì ya nɔ̀ atog bàd icheg ne bəd ne beri ighi yaya zìyè ìwɔb ituti Ŋwiye inga aghi ne mbe zìyè ituti Ŋwiye. 2Wì ya bə̀ bàd iku-àyi mɔ̀ʼɔ ne chəyi àze məd, ne wì ya bə̀ zì mə̀fraŋ ta̰ məbe. 3Yeso ya si gha, “Mə gha tesiʼ inən gha, iku-àyi gho̰ ne chèyi àze məd wè zì ituti Ŋwiye chè wə̀d ijìm. 4Bəd mbo̰ məjìm nàʼ ituti Ŋwiye inga ighi nɔʼ nɔʼ ne mbi beri. Àsi àyi gho̰ ne chəyi àze məd, wè nàʼ ighi ijìm ne wì kə beri ni nèg ìwi nyɔd.”

Ineni ni chwi nyùmə̀ ne isəg biri nwḭ̀yḛ̀

(Mat 24:1-2; Mag 13:1-2)

5Mə̀mə̀nənùg Yeso mɔ̀ʼɔ yaya chɔ̀tɔ̀ icheg ne mbi ya kɔri mbàn Ŋwiye ane ateg chɔm chɔm bə̀ chɔ̀tɔ̀ ighi chɔm chɔm ne mbi yaya nàʼà ane ighi Ŋwiye. 6Yeso ya gha àzi gha, “Icheg ne mbə bàrà nəb ìzo̰ anìŋ, nyùmə̀ mɔ̀ʼɔ biri ghum yeʼe ne chəyi iteg mɔ̀ʼɔ imɔʼ biri təm igun ìywin imbə̀ʼ icheg ne mbi biri buʼ nəb ìzo̰ ijìm aseg.”

Mə̀mə̀nənùg Yeso biri zə̰ ngəʼ mbi bə̀ chɔʼ ìmbɔb ibɔʼì ighòg

(Mat 24:3-14; Mag 13:3-13)

7Mə̀mə̀nənùg ya biri abə Yeso gha, “Àchwitìnùg, inug mbo̰ kə ghum dù aneg? Aneni ne biri chwi gha nyùmə̀ fə se kòʼò ne inug mbo̰ biri dù àkə ghum yaʼ aghə?”

8Wì ya ywìtì gha, “Mbə̀ niŋə nyùmə̀ gha imbə̀ʼ mbi nɔ̀ʼ chè tàmbi awən. Mə ya ghà ane imbə̀ʼ icheg ne bəd nɔʼ nɔʼ biri yeʼe ane ìmə ikum. Wə̀d imɔʼ imɔʼ abɔ̀ʼ inɔb biri se yḛ̀ nè gha, à ya zìye ne Ŋwiye zɔ̀ʼi, bə̀ nè gha, nyùmə̀ we fə tinde. Imbə̀ʼ mbə̰ beni awən abɔ̀ʼ inɔb. 9Mbə̰ mə̀ zug gha ibid we fḛ, kə̀ bəd inga aben mbe chɔ̀bɔ tì itog aben, imbə̀ʼ mbə̰ bɔ awən. Inug mbo̰ biri bè yeʼe bə̀ chè. Si ya gha, chəyi ìnwḭ isəg kiri yeʼe.”

10Yeso ya ywìrì ghà inɔb gha, “Iben biri zɔ̀ŋ mbin, məfɔn bə̀ zɔ̀ŋ mbin. 11Isiŋi iseg biri ghùd kwàʼ ane ika. Nyùmə̀ njèg ka ka fɔrɔ ighɔn tibɔ̀ŋ biri niŋ iba iseg mɔ̀ʼɔ. Inug ne bəd ya bɔ tì ineni kyen kyen biri dù ikaŋ. 12Si ya gha, bɔŋ inug mbo̰ ijìm se dùwə̀, mbi biri gwìtì awən bə̀ chə awən. Mbi biri bə sìmì awən ghò inga məchamì Ŋwiye, bə̀ zì awən inga nəb ndəŋ . Mbi biri bə niŋ awən ghò abə məfɔn tì abə bəd ne sàʼa aben. Inug mbo̰ ijìm ya məyi imbə̀ʼ ìmə ikum. 13Inug mbo̰ biri nàʼ apan chɔm inən ni chètì ikən chɔm inɔb. 14Imbə̀ʼ mbə̰ nwìʼè awən nyɔd ni kɔ̀ndi anug ne mbə̀ biri ghà ni tàŋì ìwən nyɔd. 15Imbə̀ʼ mbə̰ nwìʼè awən nyɔd ane imbə̀ʼ icheg ne mə̀ biri nàʼ iwe fɔrɔ ìngam inən ne chəyi tì ìwən wə̀d ìpàb mɔ̀ʼɔ chè awən. 16Ìmbən mə̀mbaʼ tì ìmbən məfi tì ìmbən mə̀sə̀ʼ fɔrɔ ìmbən ifud biri fḛ awən. Itog bəd ne sàʼa aben biri zweti bəd mɔ̀ʼɔ abɔ̀ʼ inən. 17Wə̀d ijìm biri bà̰ awən məyi imbə̀ʼ amə. 18Si ya gha, chəyi nyɔ̀ŋì mɔ̀ʼɔ ka imɔʼ inən atog biri nim. 19Mbə̰ mə̀ nyìʼ inug mbo̰, mbə biri jəg ìtḛ̀.”

Ngəʼ kyen biri nyi igun Jèrusalèm

(Mat 24:15-21; Mag 13:14-19)

20Yeso ya chè imbìghè ghà inɔb gha, “Mbə̰ mə̀ bàd mə̀sogyì kara Jèrusalèm ghab chuʼ, mbə̀ kyeri gha nyùmə̀ we ne mbi biri buʼə Jèrusalèm fə tinde. 21Ane, bəd mbe ne yaʼi a Jùdeyà mbe noro ghò ikaŋ tiwum. Mbe ne yaʼi inga ikye aben mbe duyə. Mbe ne yaʼi iban iban, imbə̀ʼ mbi nyi awɔb inga aben. 22Inug mbo̰ biri dù kwàʼ icheg ne mbi yaʼi inga Àŋwàʼrì imbə̀ʼ icheg ne, inga nyùmə̀ we Ŋwiye biri gaŋ, zì ngəʼ igun bəd inug tibɔ̀ŋ. 23Anyumə̀ we, ze biri taŋ bə ako abə mə̀yi ne yaʼi tì ibum fɔrɔ abə mə̀yi ne nyɔ̀ŋɔ bɔn. Ngəʼ ni che ibo biri yaʼ igun isəg. Ŋwiye biri gaŋ abə mə̀Ju. 24Mbi biri zweti mə̀Ju mɔ̀ʼɔ ane məbeg ibid, bə̀ gwìtì ìmbi mɔ̀ʼɔ ane məfeg ghò inga iben ndəŋ. Bəd ne kayi mə̀Ju biri se tùmbə̀ Jèrusalèm anene nyùmə̀ we ne Ŋwiye ya nɔŋi gha bəd ne kayi mə̀Ju saʼ isəg ghum mèg.”

Nyùmə̀ ne Ŋwan Wə̀d biri ywiri yeʼe

(Mat 24:29-31; Mag 13:24-27)

25Yeso ya bə̀ ywìrì gha, “Ineni biri dù igun nyùmə̀ tì igun iməg fɔrɔ igun titəm iməg. Àsi igun isəg, iben biri yaʼ inga ngəʼ. Anug biri chè bəd imbə̀ʼ icheg ne igyi tìbà biri ya joʼò chè kɔ̀ʼɔ chè swìʼe. 26Ighi mbe ikaŋ biri ghùd, bəd biri bɔ, gùg, nə̀ŋə̀ imbə̀ʼ inug ne chè igun isəg. 27Anyumə̀ we, mbi biri bàd Ŋwan Wə̀d inga pàʼ ne we yèʼe tì ika fɔrɔ ighumni kyen. 28Inug mbo̰ mə̀ ko ni dù, mbə̀ nyimbi fìŋ se ghɔ̀mɔ̀, kyeri gha nyùmə̀ ne Ŋwiye biri pumne bəd fə tinde.”

Anug ni nani ane azed fig

(Mat 24:32-35; Mag 13:28-31)

29Yeso ya ghàm ìngam məgri inɔb gha, “Mbə̀ nḛ azed fig tì ized ndəŋ. 30Mbə̰ mə̀ zən ze se chə̀ʼrə̀, mbə kyeri àzən aghi gha ichi fə tinde. 31À ya bə̀ ane ne mbə̰ mə̀ zug inug mbo̰ mbe se dùwə̀, mbə bə̀ kyèri gha anug ìfɔ̀n Ŋwiye fə tinde.

32Mə gha tesiʼ inən gha, chəyi ikəri bəd gho̰ biri chè ne chəyi inug mbo̰ ijìm du. 33Ikaŋ àbɔ̀ŋɔ tì isəg gho̰ biri chè ijìm, si ya gha, chəyi ìmə ìngam biri nɔ̀ʼ chè ako.

34Mbə̀ we awən, imbə̀ʼ ìtən fìŋ nɔ̀ʼ yaʼ ane anug ni jəg chè ndò, tì ane anug ni no be fɔrɔ anug ni ghə̀ʼrì ighi igun isəg, nji aneg ze biri yeʼe igun inən icheg ne atam ze gwìye nyam. 35Aneg ze biri yeʼe igun wə̀d ijìm ne yaʼi igun isəg. 36Mbə̀ ya we awən, chàʼrà Ŋwiye gha Ŋwiye ghiyə awən mbə kyeri inɔnjì ni nòrò abə inug mbe ne biri ghum dù. Ŋwiye bə ghì gha mbə koʼo ni təm imbìghè abə Ŋwan Wə̀d.”

37Yeso yaya chwìte inug inga mbàn Ŋwiye ineg ijìm. Tikwikwiri tijìm, wì yaya ghò nèghe ikaŋ iwum mə̀Olìf. 38Àsi tisusu tijìm, bəd məjìm yaya fète inga mbàn Ŋwiye ni zug anug ne məd yaya chwìte.

હાલમાં પસંદ કરેલ:

Lug 21: MBTP

Highlight

શેર કરો

નકલ કરો