От Марка 7
7
Сивулӣӷа̄т Апыҳтӯсӣт
1Фарисеитлъю, иляңилъю апыҳтуӷикаюгыт Лӣлиҳтӯсяның Иерусалимымың пикат, Иисусым увитаңанун қырңуӷуткат. 2Ысҳақӣт малихся̄ҳтыңан иляңи ӯҳтуҳпынатың ныӷылӷӣт. Ӯҳтулъҳилңӯт Фарисеит писқылъҳистун. 3(Фарисеитлъю, Иудеитлъю қамахлъютың ныӷьяҳқа̄нӷилңӯт ўыткуқун сивуклъютың ӯҳтуӷўа̄ӷлютың, қаюҳлъяк сивуныӷмың апыҳтӯсӣт атуқңукаңит. 4Талўа акилъпыгаӷвигмың тагиныӷмыхни ныӷигалңӯт ўытку сивуклъютын укмаңиҳсяӷўа̄ӷақылӷӣт. Иляңилъю сивуныӷмың апыҳтӯсялӷутаңит атуқңукаңит. Атуқфагилгамыхтики қаю̄ситың, сягнытың, сӣлют га̄ӷуситың сяңиҳқуӷўа̄ӷақыхкаңит.)
5Ынка̄м Фарисеитлъю, апыҳтуӷикаюгытлъю Лӣлиҳтӯсяның а̄птыка̄т Иисус: «Сяңамың малихся̄ҳтытын ӯҳтуҳпынатың ныӷақат? Сивунымта апыҳтӯсӣт атуқигатӣт». 6Иисусым кӣмсиқӣ: «Ылъқуҳлъюси Исаиям ӯкналиқуткумакаңиси пинӣюгныӷни лъпыси. Хўатын игақа̄гуқ: “Кияӷнық пӣқ:
‘Укут югыт акузитмыхтыхун қӯлваӷақа̄тңа,
нака̄н илюмыхтыхун.
7Тымңи манигуӷақа̄тңа,
қаюҳлъяк апыҳтӯсяқақӣт лӣлиҳтӯсяңлъяқатың катам хўаңа Лӣлиҳтӯсяқыпихлъыҳӣстун’”.
8Ынка̄м лъпыси Кияӷныӷым Лӣлиҳтӯсӣ пакиглюки қа̄ткақаси югыт апыҳтӯсӣт».
9Иисусым нагныӷуткӣ: «Пакигилъыпигӯси Кияӷныӷым Лӣлиҳтӯсӣтнун қа̄ткыпигыснаӷналюки лъпыси катам апыҳтӯсяси. 10Уна ысҳа успутақ таўатын пилъыҳпысинун: Моисейем а̄пқақӣ Кияӷныӷым Лӣлиҳтӯсӣ хўатын пилӷӣт: “Қӯлваӷлюку атанлъю, на̄нлъю”. Хўатынлъю пика̄гуқ: “Китум алңунак атанилъю, на̄нилъю сыӷлықӯқумикык туқутылъыңьяҳқа̄гуқ”. 11Иўырңа лъпыси алъяңӯт апыҳтуӷилъыси. Хўатын пӣқуси: “Югымңуқ атани налиӷмың на̄ни хўатын пияӷңа̄ӷмигу: ‘Каюсӣтусиҳқалгӯңа лъпынун иўырңа тӯна̄нӷитақа қаюҳлъяк Корваныңӯқ’”. (Корван хўатын писӣгуқ, сӣңынлъю Кияӷныӷмун акықусяқума̄қа.) 12Таўатын пилъыҳпысигун апыҳтуӷақаси югыт каюсӣнъыӷисяӷңа̄тки атаңитлъю, на̄ңитлъю писқылъюки. 13Ынка̄м пакигақаси Кияӷныӷым акузитаңи, апыҳтӯсяқыпигыснаӷналюки югнун лъпыси катам акузитыси. Тама̄кут тымңи успута̄гут, угля̄пихтут сяңўа̄т пӣқыхкыси».
Сыӷлыҳқусиқлъю, Сыӷлыҳқусӣнӷилңуқлъю
14Та̄хкын Иисусым юлӷутыт лъңанун тахсинқихлъюки пикӣ: «Қамахтыңъўа̄ӷлюси нагалъюси лӣгикитыху сямың пикатка. 15Ю̄к ныӷыхка̄н нукыхнаҳқигата̄, сыӷлытун сюмыҳтаӷалъҳан, сялъҳанлъю нукыхнаҳқақа̄. 16Сигутылгукуфси нагатусиҳқамың, нагатык!»
17Иисусым унилъюки юлӷутыт итыӷьян малихся̄ҳтыңита а̄птыка̄т уңипаӷа̄н сямың писӣтаңа. 18Иисусым пикӣ: «Лъпысилъю лӣгикинӷистык? Сяңўа̄ алңунак югым ныӷақыхкаңа нукыхнаҳқусиҳқа̄нӷитуқ лъңанун, 19қаюҳлъяк ныӷыхкӣ иҳсяқҳўанун пина̄нӷитут. Ақсяқҳўанун пӣқут ынка̄м югусӣның а̄нақут». (Таўатын пилъыӷмикун Иисусым а̄пҳўа̄ нықыт қамахлъютың ныӷьяҳқа̄нилюки.) 20Пикӣлъю: «Югым қамакын илюминың а̄ныстыка̄н нукыхнаҳқыстақа̄. 21Қа̄мкын югым илюңаның а̄нақут: сюмыҳтаӷалъылюгыт, ныңуҳтыхпынани китумың алңунак атуқилъық, тыглыгнӣқ, юхтақ, 22гылгаӷнӣқ, пакигнӣқ, алңунак сыӷлытун пилъық, пӯҳти, кайңусяӷа̄тылъық, ақина, юлгутмың иқлъыңиқутки, қука̄юхта ынка̄м тымңитхўа. 23Тама̄кут қамахлъютың сыӷлыӷыт югым илюңаның а̄ныхкат нукыхнаҳқикаюгӯт».
Аӷнам Ухпықилъҳа
24Та̄хкын Иисус аӷуляқыхкақ Тирым туңаңанун, ка̄лъюни мыңтыӷамун ӣтқақ. Китумун алңунак налъюкысюгуяқаңа ка̄тылъыни, иўырңа иляңита лӣсимакыхка̄т. 25-26Аӷнам язычнигым, алъхықам Финикиями, Сириямылңуӷми нагақуқа̄ Иисус ка̄симанилюку. Паниха̄ илюмикун туӷныӷалык. Ынка̄м аглярахкӣӷлюни Иисусымун сыгысқуҳлъюни мануңакун, манигӯткақ а̄ныстаҳтысқылъюку туӷныӷақ панигминың. 27Иўырңа Иисусым пика̄: «Таӷнуҳа̄т сивуклъютың ныӷысяҳқа̄гут, қаюҳлъяк анахутңа̄қ таӷнуҳа̄т нықңит тугулюки қикминун милю̄скумың». 28Аӷнам кӣмсиқа̄: «А̄а, Атанық, талўа қикмит қаюӷвикым асиңанилңӯт ныӷақут таӷнуҳа̄т ифкаҳқылъҳитның!» 29Ынка̄м Иисусым пика̄: «Нақамқун таўатын кӣмсиӷаҳпыңа агляҳа̄тын, туӷныӷақ а̄нума̄қ панихпының!» 30Аӷнақ ныминун агляӷьялӷӣми панига иңаӷмытыфтуқ қаваӷвигми, та̄ўа лъя̄ӷан туӷныӷақ а̄нумалӷӣ паниганың.
Иисусым На̄лъҳускаңа Ю̄к Нагақӯсигалңуқ Талўа Акузийӣлңуқ
31Та̄хкын Иисус аӷуляқыхкақ Тирымың. Сидонымын, Қуля Ныҳлъяхтыхунлъю а̄глюни На̄йвамун Галилеямун пикақ. 32Югыт иляңита, ю̄к нагақӯсигалңуқ талўа акузийӣлңуқ тагилъюку Иисусымун наңлъыхсӣтка̄т ся̄фтысқылъюку. 33Ынка̄м Иисусым аўӣтутка̄ юлӷутның. Сивуклъюку тыкҳыгни сигутыхкынун канаҳлъюкык, та̄хкын иқилъюкык қысиӷлюки ӣхыни, улюңа ся̄фтыка̄. 34Та̄хкын сивухлъюни қилягмун аныҳпакаӷлюни ю̄к пика̄: «Еффафа!» (Та̄на хўатын писӣлӷӣ: «Рыӷиҳтык!») 35Таўаниңинақ югым сигуткык рыӷиқак, улюңалъю пинӣҳтыкақ, ага акузиңина̄маӷми пикақ акузийӣлъиқыхпынани. 36Та̄хкын Иисусым иныҳтыңъўа̄қӣ китумун алңунак уңипақыфқа̄н писқылъюку, иўырңа иныҳта̄таӷьистың ўата уңипақыхка̄т. 37Нагақӯлъҳӣт тама̄кут ынңа̄талъ сяӷӣӷаюхлъякат, пикат: «Ӯм югым сялъҳа қамахлъюни пинипырыўа̄ӷӯқ! Талўа нагақӯсигалңӯт нагақӯсягутыстӣ, акузийӣлңӯтлъю акузиягутыстӣ!»
હાલમાં પસંદ કરેલ:
От Марка 7: ess2
Highlight
શેર કરો
નકલ કરો
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
