От Марка 6
6
Иисус Тугуклъинӷилъкаңат Назаретыми
1Та̄хкын Иисус аӷуляқыхкақ Капернаумымың, агляқақ ныминун Назаретымун, малихся̄ҳтыңиталъю малихтыка̄т. 2Субботаңуҳсягу синагогами апыҳтуӷикақ. Юлӷутыт нагалъюку сяӷӣӷаягутка̄т. А̄пқуӷа̄ӷуткат лъңитның: «Накын лӣтаки? Китум пыҳқинӷуҳтыстагу? Сяӷӣӷаюгнаҳлъягӯт алъя̄ҳлъюхўаҳтилъҳи! 3Натын таўатын пӣ? Ка̄пынтаңунӷита̄, Мариям иӷныӷа? Иаковлъю, Иосийенлъю, Иудалъю, Симонынлъю аңлыгуткынӷитакӣ? Наягилъюлъи ма̄нта̄т?» Ынка̄м тугуклъӣмаңилъкаңат. 4Иисусым пикӣ: «Китум алңунак ӯкналиқиста сӣвакақа̄, иўырңақун нуналгутаңиталъю, налъықлъӣталъю, ныңлъюгутаңиталъю пиңигата̄т». 5Ынка̄м тама̄ни алъя̄ҳлъюхўаҳтипагниңиткақ, иўырңақун қафсинкӯраҳа̄т ся̄флъюки на̄лъҳуткӣ. 6Ынка̄м Иисус сяӷӣӷаюхлъякақ, қаюҳлъяк ухпықынӷилъкаңат.
Иисусым Уңипақияҳтӣсқыхкаңи Қуля Ма̄лӷук Сӣпнықлъюку Малихся̄ҳтыни
Та̄хкын Иисус Назаретым увитаңанилңуӷнун нынун пӣқлъюни апыҳтуқӣ югыт. 7Тахсиӷлюки қуля ма̄лӷук сӣпнықлъюку малихся̄ҳтыни, каяхнақникӣ малӷукаҳтӣта уңипақисқылъюкилъю, на̄лъҳуқӣсқылъюкилъю. Аӷуляқфагилҳата аҳтуӷьяҳқа̄нӷилъылиқуқӣ югның а̄нысқӣсқылъюки туӷныӷа̄т. 8Лӣлиҳтуқӣлъю: «Иглыӷалъыҳпысини сямың алңунак кылъқыхпынаси иўырңақун аявӣӷмың. Нықыкшаңлъяңунаси, ақыфтаӷа̄ңунаси, маниңунаси пилӷа̄си. 9Иўырңа камыглюси, симӣткаҳқамың ха̄тмың кылъқыхпынаси». 10Хўатынлъю пикӣ: «Нани алңунак тукуҳпыси упуӷаскаңиси таўанлъыҳа̄си кынляңа аӷуляқылъыҳпысинун. 11Нынун ка̄скуфси упуӷатиңигалңуӷнун, налиӷмың нагасюгигалңуӷнун, унинъакыси та̄на нуна итыгаси пагуляңӣмӣта. Таўатын пикуфси кылыңася̄ҳлъықаси Кияӷныӷым аӷью̄лъыҳқа̄ның!» 12Ынка̄м малихся̄ҳтыт аӷуляқлъютың уңипақикат югнун авутыҳқылъюки сыӷлыҳқынъанӣсқылъюки. 13Туӷныӷалӷутыт а̄нысқуқӣт югның, мысӣҳқақлъюкилъю қинуюлӷутыт на̄лъҳуқуқӣт.
Туқутылъҳа Иоанным Крестителым
14Умӣлгым Иродым нагақуқа̄ қамахлъюку Иисусым таўатын пилъҳа, қаюҳлъяк тамаҳа̄ни а̄пқаңит Иисусым алъя̄ҳлъюхўаҳтилъҳи. Иляңи югыт пикат: «Иоанныңӯқ Креститель, уңува̄ма̄қ ынка̄м ысҳа аҳтуӷьяҳқа̄нӷилъылык алъя̄ҳлъюхўаҳтилъыӷмун». 15Иўырңа иляңит югыт пикат: «Илияңӯқ». Иляңит пикат: «Ӯкналиқистыңӯқ, ныӷиӷлюку ӯкналиқистыстун аюқуқ».
16Иродым нагақуӷлюку пикақ: «Иоанныңӯқ Креститель, на̄сқўиҳтыстыкақа иўырңа уңува̄ма̄қ!» 17,18Қавңанҳақ Иродым каягуткақыхкаңа Иоанн тугулюку, асиҳқыслъюку анусимиңлъяҳтыстыка̄. Таўатын пистыка̄, қаюҳлъяк Иоанным пӣӷа̄тақа̄ Ирод хўатын: «Лӣлиҳтӯсямнъи анахусима̄тын тугулъыҳпыгун аңлыгутыхпык Филиппым нулиҳа Иродиада». 19Ынка̄м Иродиадам угумиягутыҳлъякақыхкаңа Иоанн рыпалъ туқутысюпихтыкақсяқаңа. Иўырңа пипагниңитка̄ қаюҳлъяк Иродым таўатын пистыпагниңитка̄. 20Иродым аликыхкақыхкаңа Иоанн лӣсимакутминың ю̄к пинилӷӣ, Кияӷныӷмун қа̄ткутңаҳлъялӷӣ. Ынка̄м кылыңакыстыңъўа̄қа̄ сянаюкатху. Иродым нагасюгақыхкаңа Иоанн қайўа сыӷлыӷьюгақыӷңа̄ӷми наганъыӷминигу.
21Та̄хкын Иродиада қынўатлъю пилъыҳқаңыхкақ. Иродым алъхыӷвини аӷнық ка̄сян нықынӷаҳқыстималӷӣ кавымым умӣлўа̄ӷитнун, пилъюўаҳтыт умӣлўа̄ӷитнун, иглыӷутистыңитнунлъю Галилеяӷмӣт. 22Та̄хкын панига Иродиадам итыӷлюни ныӷӯлъҳӣнун тукалыгақақ. Иродылъю ақылъқақулъҳӣт ынңа̄талъ ыфқуқыхка̄т. Ынка̄м умӣлгым пика̄ аӷнаӷақ: «Сямың алңунак туңсиӷвикыхкувңа тӯнылъықамкын». 23Акықыхка̄лъю хўатын: «Ипапыста̄қ тӯнылъықамкын сямың алңунак туңсиқувык, талўа умӣлгутималъыӷма аклъюңиңан авылъҳа!»
24Та̄хкын аӷнаӷақ а̄нлюни на̄ни а̄псяҳтуқа̄: «Сямың туңсиӷнақсиңа?» На̄ңан пика̄: «Иоанным Крестителым на̄сқўа туңсиҳу». 25Аӷнаӷақ аглӣӷўаҳлъюни умӣлыгмун туңсиӷвикыхка̄: «Хўа̄ ма̄тын, Иоанным Крестителым на̄сқўа пиюгақа қаю̄таӷра̄хкун лъилюку!» 26Умӣлык ынңа̄талъ қивӷуҳлъякақ иўырңа сялюку иӷлыклъигу, қаюҳлъяк акықңўа̄қақыхкаңа ақылъқалӷутни нагатыстыклъюки. 27Ынка̄м таўаниңинақ умӣлгым каяхтыка̄ кылыңакиста тагитысқыслъюку Иоанным на̄сқўа. Кылыңакиста а̄нлюни анусимиңлъяӷвигмун агляқақ Иоанным на̄сқўа кыпналюку. 28На̄сқуқ қаю̄таӷра̄хкун лъилюку агля̄лъюку аӷнаӷаӷмун тӯныхка̄. Ынка̄м аӷнаӷа̄м на̄минун тӯныхка̄. 29Иоанным малихся̄ҳтыңита нагақуӷлюку, югусӣ ақфалюку лъӣфқа̄т.
Иисусым Ныӷыстилъҳа 5,000ның Сӣпңалӷӣның Югның
30Апостолыт утыӷниҳтӯлъютың Иисусымун а̄пқӣт апыҳтуӷилъытың, на̄лъҳуқулъыҳтың, туӷныӷаӷныңлъю а̄нысқулъыҳтың югның. 31Юхлъягулӷӣ тагимаӷмыңлъю, аӷуляқумаӷмыңлъю пилӷӣт рыпалъ Иисусылъю малихся̄ҳтыкулъҳӣт ныӷыпагниңӣткат. Ынка̄м малихся̄ҳтыни пикӣ: «Натмун аӷуляқылъта па̄ҳқилъҳанун, лъпысиқун мыӷна̄лӣҳтысқылъюси». 32Ынка̄м аңьякун па̄ҳқилъҳанун аӷуляқыхкат лъңинаҳа̄ҳналютың, 33иўырңа юлӷутым ысҳақӣт аӷуляқылӷӣт. Лӣсимаклъюки навык пинақутаңит, кытанқуснақ на̄йвам ысныңакун малихтыкӣт. Нынун налъяңӣнъыӷата лыган югыт малихтақыхкаңит. Ка̄ткат такукамыхнун иңьяӷаҳлъюки Иисусылъю. 34Иисусым аңьямың ӯхлъюни қӯтмун юлӷутыт ысҳаӷлюки наңлъыгьягуткӣ, қаюҳлъяк пынъӣӷыстун пынъӣӷнӣҳтыңилңуӷыстун аюқылӷӣт. Ынка̄м алъя̄ҳӣнаӷмың апыҳтуҳта̄кӣ.
35-36Хўаникупихсягу малихся̄ҳтыңита такулюку Иисус пика̄т: «Ма̄на па̄ҳқитуқ, хўаникуҳлъяга̄лъю. Югыт агляҳтӯтысқики пӣтысиӷаҳтынунлъю, ныңӣҳаӷнунлъю. Лъмыхның нықыңьяҳтуӷлит нықгьяҳқамың». 37Иўырңа Иисусым пикӣ: «Лъпыси ныӷьяҳқалитыки». А̄птыка̄т: «Тукфиӷияҳтуҳтысюхсикӯт 200 динарийем акиңаның нықыкшаңлъямың ныӷысқылъюки?»
38Иисусым а̄птыкӣ: «Натын угляҳқака̄н нықыкшаңлъялгустык? Ынта иваӷӣҳтык». На̄лъкусямың уңипа̄тка̄т: «Та̄ўа талъимат нықыкшагыт, ма̄лӷуклъю иқалъюгык».
39Та̄хкын Иисусым малихся̄ҳтыминун қафсинкаҳтӣта ақумыстысқыхкӣ выга̄ҳқун. 40Ынка̄м ақумӯткат ю̄к талъиматңўа̄қлъютың ю̄к ма̄лӷук қуля сӣпнықлъюкуңўа̄қлъютың. 41Иисусым тугулюки талъимат нықыкшагыт, ма̄лӷуклъю иқалъюгык, қӯлмун сивухлъюни игамсиқаюгвикыхка̄ Кияӷнық. Та̄хкын нықыкшагыт ӣхминың а̄вгуӷлюки малихся̄ҳтыминун тунқуқӣ уйыхтысқылъюки. Иқалъюгыклъю ӣгминың а̄вгуӷлюкык тунқуҳтыстыкӣ. 42Қамахтыңъўа̄ӷлюни ныӷӯткақ кыпсю̄лъюни. 43Та̄хкын малихся̄ҳтыт тугуляқӣт қуля ма̄лӷук сӣпнықлъюку корзинат ыслъықңалӷӣт кагимлыӷуҳтыканың нықыкшаңлъямың, иқалъюгныңлъю. 44Югыт ныӷӯткат 5,000ңуфтут, кысюткыхпынаки аӷнатлъю, таӷнуҳа̄тлъю.
Иисус Мыҳқун Пиюлӷӣ
45Лыган та̄кут Иисусым малихся̄ҳтыни қылъқӣ аңьякун иглыҳтыкыстӣсқылъюки Вифсаидамун, на̄йвам иңлюңанилңуӷмун. Та̄хкын лъңан юлӷутыт агляҳтӯтыстыкӣ ныңитнун. 46Агляҳтӯтысямики юӷаӷьяҳтуқақ қымимун. 47Унугми та̄кўани аңьят на̄йвамылъюки Иисус лъңинаҳа̄кақ қӯтми. 48Ысҳақӣ малихся̄ҳтыни айгуӷнақуткылӷӣт я̄вуқумың, қаюҳлъяк ануқлъӣскаңи. Акулыхкыни пиңаюткылъя̄гыми аӷвинлыккылъя̄ми уна̄ңулюку, такукӣ мыӷым қа̄йңакун пиюгмың. Наӷуҳнақақӣлъю 49ысҳақа̄т мыҳқун пиюлӷӣ. Сюмыӷмыхни таӷныӷа̄нилюку араҳлъякат. 50Қамахлъютың алиңрӯӷуткат. Таўаниңинақ Иисусым пикӣ: «Илютуҳтык! Хўаңаңӯңа, алиңыхпынаси». 51Лыган аңьямун ӯхтуқ ылъма̄рахлъюгуҳтыкақ. Малихся̄ҳтыт сяӷӣӷаюхлъякат, 52қаюҳлъяк паниның лӣгикигалъкаңат Иисус кинаңутаңа, қайўа ысҳапагңа̄ӷмыхтыху нықыкшагыт нулястыкаңи. Таўатытка̄лӷӣт қаюҳлъяк сялин умьюгӣт рыӷӣгалңӯт.
Иисус На̄лъҳуқулӷӣ Геннисаретыми
53Та̄хкын нагнықат на̄йвам иңлюңанун ынка̄м Геннисаретыкун тамляглютың аңьяҳтың пытука̄т. 54Лыган аңьяҳтың унита̄т югыт лӣсюқңина̄ма̄н Иисус пика̄т. 55Ынка̄м кылъкаҳта̄шахкӣқат Иисус ка̄симанилюку. Иисус навык пияӷңа̄н қинуюгыт агля̄тақыхкаңит алъиӷӣтхун лъңанун. 56Иисус ка̄нъыӷмини ныҳлъягнунлъю, нынунлъю, ыслъямылңуӷнун акилъпыгаӷвигнун агляӷақылӷӣ. Ынка̄м югыт тагитақыхкаңит қинуюгыт акилъпыгаӷвигнун Иисусымун на̄лъҳутысқылъюки. Иисусымун манигӯтуткӣт қинуюгнун ўаран ся̄фтысқылъюку кынӣ, ынка̄м қамахлъютың ся̄фтилӷӣт на̄лъҳуткат.
હાલમાં પસંદ કરેલ:
От Марка 6: ess2
Highlight
શેર કરો
નકલ કરો
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
