От Марка 12

Иисусым Уңипаӷа̄ткыхкаңи Афлъыңакистыңи Винограднигмын

1Та̄хкын Иисусым уңипаӷа̄тытхун алыҳқуқӣ. Пикӣ: «Та̄ўаңуқ ю̄к пӣтысӣӷақақ виноградымың, миңлъюсиқа̄лъю увитаңа пӣтысиӷаӷвини. Ля̄гуткакык виноградымун қагыҳқӯсик, ныкыфтыка̄лъю кылыңакивихкақ. Та̄хкын пӣтысиӷаӷвини навӷитка̄ виноградымың пӣтысиӷаҳтынун ныңитысқылъюни, ынка̄м лъңа натмун аӷуляқыхкақ. 2Сяӷнаяҳқа̄ҳсята ата̄сиқ қыпҳаҳтыни кывгақыхка̄ ныңини виноградыт ақфасқылъюки. 3Ка̄сян та̄кут афлъыңакистыт акуқаӷлюку қывутӣӷлюку аваңуна̄н агляҳтыстыка̄т. 4Кывгақлъя̄тақа̄ иляңа қыпҳаҳтыни. Та̄на на̄сқўакун кӣтиқулюку, кайңусяӷа̄тыстыка̄т. 5Кывгақӣля̄тақақ иляңаның қыпҳаҳтыми ынка̄м та̄на туқутка̄т. Иляңилъю қыпҳаҳтылӷутыни кывгақынӷаки лыган таўатын пӣқыхкаңит, иляңит қывутӣқӣт, иляңит туқуқуқӣт.

6Қынўат ата̄сиҳа̄ҳтуқ кывгақсяҳқа̄, иӷныӷа пиниқумта̄ӷа. Кывгақыхка̄ сюмыҳтаӷа̄маӷми хўатын: “Иӷнықа сӣвакылъықа̄т”. 7Иўырңа та̄кут афлъыңакистыт илятың пикӣт: “Ӯм пилӣсяҳқақа̄ уна пӣтысӣӷаӷвик. Туқутылътыху ынка̄м пӣтысӣӷаӷвик хўаңкута пилӣлъықаҳпут!” 8Ынка̄м акуқаӷлюку, туқулъюку югусӣ ыхтыка̄т пӣтысӣӷаӷвигмың».

9Иисусым а̄птыкӣ: «Сялъықаңʼңам пӣтысӣӷаӷвилык? Тагилюни навӷитивикыхкақсяқынъи та̄кут туқуқуӷлюки, ынка̄м пӣтысӣӷаӷвини алъянун навӷилъықа̄. 10Атиҳтӣгастыхӯ уна Акузитни Игақыхкани?

“Уйӷак мыңтыӷаңлъяҳтыт иҳсякыхка̄т пиялӷӣми мыгнуналъыҳпига̄фтуқ уйӷак.

11Та̄на Атанӷым апыӷӣқақа̄,

Алъя̄ҳлъюхўаӷьюгнапихтуқ!”»

12Иудеит иглыӷутистыңита тугуюпихтыкақсяқаңат, қаюҳлъяк лӣгикылӷӣт уңипаӷа̄тытхун Иисусым лъңит акузиткақыфтӣ. Иўырңа алиңыхкат юлӷутның ынка̄м унилъюку аӷуляқыхкат.

А̄пқуӷа̄лъық Налогның

13Та̄м киңуңаның Иудеит иглыӷутистыңита каяхтыкӣт иляңи Фарисеитлъю, малихся̄ҳтыңилъю Иродым анагнӣлъқавигӣсқылъюку Иисус. Каяхтыкӣт анагнӣлъқавигӣсқылъюку акузилъҳакун. 14Ка̄лъюку пика̄т: «Апыҳтуӷиста, лӣсимакамкын ата̄сӣӷмытутын. Ўа̄кигататын югыт сюмыҳтаӷалъҳит, талўа ўа̄кигататын югыт сяңуяӷңа̄та, иўырңа ипапиҳқылъютын апыҳтӯсяқақан Кияӷныӷым пиюкылъҳа югнун. Уңипа̄таҳтикут, Кияӷныӷым Лӣлиҳтӯся̄ни ылъқуӷутңа̄ лъивикилъыҳқаҳпут налогның Кесарымун? Лъивикилъта̄а налиӷмың пинӷитылъта?» 15Иўырңа Иисусым лӣсимакыхкаңи сыӷлытун пиңукаңат ынка̄м пикӣ: «Сяңама анагвигиӷнақуткыстыңъа? Манилитаҳтыңъа, ысҳақаӷлякун».

16Тӯньятни а̄птыкӣ: «Китум хинақагулъю, а̄тқагулъю уна?» Кӣмсиқа̄т: «Кесарым».

17Иисусым пикӣ: «Тӯнитыки Кесарымун тама̄кут Кесарым пиңи. Тӯнитыки Кияӷныӷмун тама̄кут Кияӷныӷым пиңи». Ынка̄м сяӷӣӷаягутка̄т Иисус.

А̄пқуӷа̄лъық Туқукат Уңуваҳтылъҳитның

18Та̄хкын иляңи Саддукеит, Иисусымун пикат. (Тама̄кут пӣқылӷӣт туқукат уңуваӷьяҳқа̄нӷинъилюки.) 19Пика̄т: «Апыҳтуӷиста, Моисейем Лӣлиҳтӯсяңлъяқақӣлъю хўатын: “Ю̄к нулӣлык авақутихпынани туқукан аңлыгутаңан тугуяҳқақа̄ аӷнақ авақутинъалюку аңлыгутни туқукақ”. 20Та̄ўаңуқ ма̄ӷраӷвинлык югыт аңлыгуткулъҳӣт. Нуйыклъиҳпигақ нулиҳтуӷлюни авақутихпынани туқукақ. 21Ынка̄м тӯңлиҳа̄н тугука̄ аӷнақ, иўырңа лъңалъю туқукақ авақутихпынани. Пиңайӣтаңан тугулюку аӷнақ, туқукақ авақутихпынани. 22Қамахлъютың туга̄қлъюку аӷнақ туқуляӷа̄ткат авақутихпынатың. Киңулиҳпига̄люни аӷнақ туқукақ. 23Қамахлъютың ма̄ӷраӷвинлык аңлыгуткулъҳӣт нулиҳқыхкақсяқаңат. Аӷныӷми таўани туқукат уңуваҳтӯтылъҳитни, налӣта аӷнақ нулиҳқылъықагу?»

24Иисусым кӣмсиқӣ: «Сюмыҳтаӷалъыси анахутңа̄т қаюҳлъяк лӣгикигалъкыси Акузитыт Игақыхкат, налъюкыхкысилъю Кияӷныӷым аҳтуӷьяҳқа̄нӷилъҳа. 25Туқукат уңуваҳтӯскумың туқулъыӷмың, қилягмылңуӷыстун яқулгыстун аюқсяҳқа̄гут, ныңуӷутусяҳқа̄нӷитут. 26Атиҳтӣгастыхӯ Кияӷныӷым апылъҳа туқукат уңувалъыҳқӣтның туқулъыӷмың? Моисейем ига̄ни апыӷңа̄қ кумаӷуӷңалӷӣми уқфилъыгаӷми. Таўани Кияӷныӷым пикақа̄ Моисей: “Хўаңа Кияӷнықа̄ңа Авраамым, Кияӷнықа̄ңа Исаакым, Кияӷнықа̄ңа Иаковым”. 27Та̄на хўатын писӣгуқ, Кияӷнық, Кияӷнықынӷита̄т туқукат, Кияӷнықа̄т уңувалӷӣт. Ынка̄м анахутыпихсима̄си!»

Аңылъыҳпигақ Лӣлиҳтӯсяқ

28Апыҳтуӷикаюк Лӣлиҳтӯсяның тагилюни нагаткӣ а̄ҳтӣра̄ӷулъҳӣт. Нагалъюку Иисусым кӣмсиӷиля̄тақулъҳа Саддукеинун, а̄птыка̄: «Натуңа̄ўа Лӣлиҳтӯсяқ мыгнуналъыҳпигақ?»

29Иисусым кӣмсиқа̄: «Мыгнуналъыхпигақ унаңӯқ: “Нагатык, Израилыӷмӣни! Атанық Кияӷныҳпут та̄наңинаҳа̄гуқ Атанық. 30Атанық Кияӷныӷын пиниқсяҳқақан тамаҳа̄кун илюхпыгун, тамаҳа̄кун уңувасиҳпыгун, тамаҳа̄кун умьюгаҳпыгун, қамахлъюкилъю икнақылъыҳпыгун”. 31Тӯңлиҳа̄ хўатытуқ: “Пиниқсяҳқақатын юлгутытын, пиниқылъыҳпытун лъпынун катам”. Алъя Лӣлиҳтӯсӣтуқ та̄кугытун мыгнунаҳтуткалӷӣмың».

32Апыҳтуӷикаюгым Лӣлиҳтӯсяның Иисус пика̄: «Апыҳтуӷиста, ылъқуӷаҳтан! Ипаңӯқ та̄на пилъҳын, Атанық та̄наңинаҳа̄гуқ Кияӷнық, алъя аваңитуқ кияӷныӷмың иўырңақун лъңа. 33Ынка̄м югым пиниқсяҳқақа̄ Кияӷнық тамаҳа̄кун илюми, тамаҳа̄кун умьюгагми, тамаҳа̄кунлъю икнақылъыӷми. Пиниқсяҳқақӣлъю юлгутни катам лъңаның пиниқылъыӷмитун. Та̄кук Лӣлиҳтӯсяк мыгнунаӷатаӷаҳтуқ паныҳлъюку тунусяқыхканың, налиӷмың аҳқуткыхканың».

34Иисусым лӣгиксямигу югым кӣмсӣтңа ылъқуӷутңалӷӣ, пика̄: «Қантаӷантутын Атаныҳпагулъҳаның Кияӷныӷым». Та̄м киңуңаның китум алңунак тытугьягутка̄ а̄пқуӷа̄ныӷмың Иисус.

А̄пқуӷа̄лъық Христосымың

35Храмыми, Иисусым апыҳтуӷиткылъюку а̄птыкӣ: «Сяңан апыҳтуӷикаюгыт Лӣлиҳтӯсяның пӣқатху Христос Давидымун Иӷнықнилюку? 36Аглыӷналӷӣм Таӷныӷам Давид хўатын пистыкақа̄:

“Атанӷым пӣ Атанқа:

Ақуми хўагун аӷынқигнымкун кынляңа аңуяхтын итыгаҳпык асиңанун лъӣҳтылъымнун”.

37Давидым лъңан катам атиқақа̄: “Атаныӷмың” ынка̄м натын Христос Иӷнықагу Давидым?» Юлӷутыт қуякусиқинаӷлюку нагатка̄т Иисус.

Иисусым Кылыңася̄ӷускаңи Апыҳтуӷикаюгыт Лӣлиҳтӯсяның

38Апыҳтӯткылъюки пикӣ: «Кылыңалюси апыҳтуӷикаюгның Лӣлиҳтӯсяның. А̄сюныҳтӯт аткуя̄ӷмың акуҳтуқамың, иглыҳсюныҳтӯтлъю акилъпыгаӷвигни югнун қуңуҳфикысқылъютың. 39Ақумьюныҳтӯт а̄ңўа̄ӷуҳтыкат ақумутӣтхун, синагоганилъю нықынӷаҳқылӷӣнилъю. 40Ысҳаӷля̄тақўа̄қӣт угиңиӷат мыңтыӷӣӷақлъюки. Та̄хкын пиниӷнилютың писқылъютың та̄клъюку юӷаӷақут. Тама̄кын апалъюқлъюку аӷью̄лъыңыҳлъягьяҳқа̄гут!»

Угиңиӷам Тунуся̄

41Храмыми, Иисусым ақумгаткылъюку туңаңакун манилӷутам, ысҳапакӣ юлӷутыт канаҳтӣӷа̄талӷӣт манимыхның. Аклъюңилңӯт юлӷутыт манилӷутмың канаҳқуқат. 42Та̄хкын аклъюмалӷӣ угиңиӷақ итыӷлюни канаҳтыкакык ма̄лӷук маниңӣҳа̄к, қырңа̄гмык монетаңуфтук. 43Иисусым малихся̄ҳтыни туқлъюӷлюки пикӣ: «Ипа уңипа̄тамси, ӯм аклъюмалӷӣм угиңиӷам тӯныхкакык қа̄йӷутиңӯк аклъюңилңӯт тӯныхкӣтның. 44Югыт канаҳтиңӯт аклъюңимыхның, иўырңа ӯм аӷнам канаҳта̄ қамахлъюку маниңӣҳани, аклъюкңуяқаңа лъңанун кияӷусиҳқа̄люку».

હાલમાં પસંદ કરેલ:

От Марка 12: ess2

Highlight

શેર કરો

નકલ કરો