От Марка 11

1-2Туңя̄ӷьялӷӣмың Иерусалимымун, ка̄ткат Виффагиямунлъю, Вифаниямунлъю, Елеоным найӷаҳани. Та̄хкын Иисусым каяхтыкакык ма̄лӷук малихся̄ҳтыгни нымун писқылъюкык. Пикакык: «Ка̄таӷыснақуфтык ысҳаҳлъықаҳтык осёлаӷақ пытугңалӷӣ китум алңунак иглыӷуткумаңилъкаңа. Итымулъюку тагинъакыси. 3Китум алңунак а̄птыкаңистык хўатын: “Сянақыстыху?” уңипа̄нъакыси: “Атанӷым атуқсюга̄. Та̄қаӷыснақумигу выӷутысна̄ӷа̄”».

4Ынка̄м нымун ка̄лъютык тумынилъюку ысҳақа̄к осёлаӷақ пытугңалӷӣ мыңтыӷам амиган туңаңакун. Итымсималюку 5югыт ныкывӷата̄ӷулъҳӣт таўани а̄птыкахкыт: «Сяңан итымутыстыгныгу осёлаӷақ?»

6Кӣмсиқӣк Иисусым апыҳтулъҳатун ынка̄м югыт ныпӣӷуткахкыт. 7Иисусымун ка̄тулъюку осёлаӷақ, қа̄слъӣт аткуя̄тын тыӷикусям қа̄йңакун лъиятки, Иисус ӯхлъюни иглыҳтыкақ. 8Тама̄кут юлӷутыт иглыӷулъҳӣт тумытхун ся̄ҳқуқӣт қа̄слъӣт аткуя̄тың, иляңит аваямың қуқуңалыгмың икутақлъютың тумыт ся̄ҳқуӷвикыхкӣт. 9Иисусым сивуңанилңӯтлъю, киңуңанилңӯтлъю акилӷӯткат:

«Усюқнаҳалык Кияӷнық!

Кияӷныӷым қуяслъигу тагилӷӣ а̄тҳакун Атанӷым!

10Кияӷныӷым қуяслъигу тагилӷӣ атаныҳпагулъҳа сивунымта Давидым!

Усюқнаҳалык Кияӷнық қулиҳпигаӷмылңуқ қилягми!»

11Иисус ка̄лъюни Иерусалимымун, агляқақ Храмымун. Таўани сяңўа̄ қамахлъюку ювӷӣқа̄. Хўаникуңулӷӣ, кылъқылъюки қуля ма̄лӷук сӣпнықлъюку малихся̄ҳтыни агляқақ Вифаниямун.

Иисусым Ныӷвиксяҳқа̄наниҳтыстыкаңа Смоквам Уқфига

12Уна̄миңани, Вифаниямың утыӷнӣткылъюку Иисус игатақақ. 13Уяваның ысҳақа̄ смоквам уқфига қуқуңаҳтуқақ, ынка̄м ысҳаӷьяҳтуқа̄ смоквалгунаюкан. Ка̄сяқминигу қуқуңара̄ӷина̄фтуқ, қаюҳлъяк сялин смокват пӣсюгнӣлңӯт. 14Иисусым уқфик пика̄: «Алъямыңлъю китум алңунак смокватуӷвикна̄нӷита̄тын!» Малихся̄ҳтыңита нагатка̄т.

Иисус Храмымун Пилӷӣ

15Ка̄сямың Иерусалимымун, Иисус, Храмымун пикақ. Таўани а̄нысқуқӣ тукфиҳтулӷӣтлъю, акилъпыгалӷӣтлъю. Манимың навыҳқуҳтыт қаюӷвигит улъыҳқуқӣ, ақумутӣтлъю қаўа̄гмың акилъпыгаҳтыт. 16Наңақаҳсяҳқа̄наниҳтыстыкӣлъю килъю алңунак сямың тугумӣлгыт Храмым мануӷа̄кун. 17Та̄хкын апыҳтуқӣ югыт:

«Кияӷнық пика̄гуқ Акузитни Игақыхкани:

“Мыңтыӷақа, юӷаӷвигуяҳқа̄гуқ тамаҳа̄нун юганун нунам”.

Иўырңа лъпыси ӣӷаӷвигуҳтаҳси ўаяӷнӣҳтынун!»

18Первосвященнигытлъю, апыҳтуӷикаюгытлъю Лӣлиҳтӯсяның нагақуӷлюку таўатын пилъҳа, акузимҳуткыхка̄т натын туқутылъыҳқамың, нақам аликума̄н. Аликыхка̄т, қаюҳлъяк қамахлъютың юлӷутыҳлъягыт сяӷӣӷаягутңукаңит апыӷӣлъҳи.

19Иӷивгаӷьягу Иисусылъю малихся̄ҳтыкулъҳӣт аӷуляқыхкат Иерусалимымың.

Иисусым Апыҳтӯсяқыхкаңи Ухпықилъық, Юӷалъық, Сыӷывутилъық

20Уна̄ңулюку иглыӷуткылъюку ысҳақа̄т смоквам уқфига палиӷўа̄ӷумалӷӣ акуҳаӷминун кынляңа. 21Петырым ысҳаӷлюку нықа̄тка̄ Иисусым пилъҳа. Ынка̄м пика̄: «Апыҳтуӷиста, ӣи, смоквам уқфига иныҳтыңъўа̄қан палиӷўа̄ӷума̄қ».

22Иисусым пикӣ: «Ухпықитыху Кияӷнық. 23Ипа уңипа̄тамси, китум алңунак малӷуклъилъңунани илюмикун, ухпықыхкумикилъю акузитни пияҳқа̄таңи, уна на̄йӷақ хўатын пикумигу: “Кылъӣнун а̄тҳи”, та̄ўа апыӷӣӷьяҳқа̄гуқ лъңанун. 24Ынка̄м уңипа̄тамси: сяңўа̄ алңунак аклъюкыхкаҳси юӷа̄ткыхкуфсигу ухпықлъюку алъхыҳсяҳқақаҳси, та̄ўа алъхыҳлъықаҳси. 25Ныкывныҳпысини юӷаӷналюси, сыӷывутақитыки сыӷлытун пистыси, ынка̄м Атахпыси қилягмылңӯм сыӷывулъықӣ сыӷлыҳқылъыси». 26Иўырңа сыӷывутинӷилъкуфси, талўа Атахпыси қилягмылңӯм сыӷывунъа̄нӷитӣ сыӷлыҳқылъыси.

А̄птыкаңат Иисус Пилъыҳқа̄ның

27Иисусылъю малихся̄ҳтыкулъҳӣт ка̄нъықихтыкат Иерусалимымун. Иисус иглыҳсималюку Храмым мануӷа̄ни, первосвященнигытлъю, апыҳтуӷикаюгытлъю Лӣлиҳтӯсяның, Старейшинытлъю такулюку 28а̄птыка̄т: «Ся̄м пилъыҳқа̄кун а̄нысқуҳсики акилъпыгаҳтыт? Китум қылылъҳакун таўатын пиңузин?»

29Иисусым кӣмсиқӣ: «Уңипа̄лъықамси китум қылылӷакун таўатын пика̄тка кӣмсиқуфсиңа. 30Иоанным крестиӷилъҳа Кияӷныӷмың пиңўа̄, налиӷмың югның? Уңипа̄тыңъа».

31Лъмыхның акузимҳуткат: «Кияӷныӷмың пикникумтыху, пилъықӣлъю: “Сяңанңам ухпықынӷистыху Иоанн?” 32Югның пикникумтыху югыт аңуйӣлъықӣлъю». (Алиңыхкат югның, қаюҳлъяк югыт қамахлъютың ухпықңукаңат Иоанн ӯкналиқистыңутаңа.) 33Ынка̄м Иисус кӣмсиқа̄т: «Налъюкаҳпут». Иисусым пикӣ: «Хўаңалъю уңипа̄нъа̄нӷитамси китум қылылъҳакун таўатын пика̄тка».

હાલમાં પસંદ કરેલ:

От Марка 11: ess2

Highlight

શેર કરો

નકલ કરો