От Марка 13
13
Лӣсимакусиҳқат Нунам Кынлыкаҳқа̄нун
1Иисус а̄нумалюку Храмымың, ата̄сим малихся̄ҳтыңан пика̄: «Апыҳтуӷиста, ӣи! Ысҳақаҳқиқун ма̄кут пиниӷнаҳлъягыт мыңтыӷат уйӷагрукута̄ҳлъягның улима̄ӷыт».
2Иисусым пика̄: «Ысҳаҳсикӣ мыңтыӷаҳлъягыт ма̄кут? Талўа ата̄сиқ уйӷак нымининъа̄нӷитуқ; қамахлъютың улъыҳқуӷьяҳқа̄гут».
3Елеоным найӷаҳани, Иисус лъңинаҳаӷми ақумгамалюку Храмымун аюқлъюни Петырым, Иаковым, Иоанным ынка̄м Андрейем такука̄т. 4А̄птыка̄т: «Уңипа̄тикут, қакун тама̄кут пияҳқа̄ўат? Сяңулъықа лӣсимакусиҳқаҳпут тама̄кут апыӷӣлъыҳқӣтнун?»
5Иисусым пикӣ: «Кылыңатык, китумун алңунак пӯҳтыстыхпынаси. 6Угля̄пихлъыӷӣ тагияҳқа̄гуқ атуқлъюку а̄тқа, хўатын пӣқлъютың: “Лъңаңӯңа!” Ынка̄м угля̄пихлъыӷӣ пӯҳқуӷьяҳқақа̄т. 7Нагақуқуфсики пилъюўат, акусқаҳта̄ткылъҳытлъю пилъюўат, алиңыхпынаси. Тама̄на пияҳқа̄гуқ, сялин иқухнақңунӷитуқ. 8Нунам рамкыңи пилъюўутулъықут, нунамлъю атаныҳпагулъҳи сюӷуга̄лъықут, нунатлъю нани алңунак туйыпыҳтаӷақлъютың пияҳқа̄гут, нықаңисяхлъягақлъюнилъю пияҳқа̄гуқ. Қамахлъютың тама̄кут аӷнам иӷниюкысталъҳатун аюқут.
9Иўырңа лъпыси кылыңалюси. Тугулюси агӷистынун агля̄лъықӣси. Синагогани кахсягмихлъықӣси. Хўаңа апалъюқлъюңа ныкывылъықуси сивуңитни иглыӷутистытлъю, умӣлгытлъю уңипаҳтыңулюси Пинилӷӣның Уңипаның. 10Пинилӷӣт Уңипат уңипақсяҳқа̄гут тамаңанун рамкынун сивуңани иқухтылъҳым. 11Тугулюси агля̄скаңиси нанқихтивигмун сюмыҳтаӷақыстаҳпынаси акузиткаҳқамың. Пилъыҳқақ ка̄тақыхкан акузӣқна̄ҳтуси писқылъыҳпысистун, қаюҳлъяк лъпысиңуна̄нӷитут акузилӷӣт, Аглыӷналӷӣк Таӷныӷак лъпысигун акузӣқна̄ҳтук. 12Югыт аңлыгутытың туқутыслъықӣт, югыт авақутатың таўатыҳпигақ пислъықӣт. Таӷнуҳа̄тлъю аңаюқатың кипулъхина̄ӷлюки туқутыслъықӣт. 13Хўаңа апалъюқлъюңа қамахлъюни югым угумӣлъықӣси. Иўырңа кина алңунак нуқынъыҳтуқақ кынлымун югулилъыңьяҳқа̄гуқ».
Иисусым А̄пқаңа Сыӷлылӣлъыҳқаҳлъяк
14(Йықай атиҳтулӷӣм лӣгиклъигу уна ӯкналиқылъық!) «Ысҳақуфсигу аглыӷнӣӷутиста па̄ҳқӣтыстилӷӣ, ныкаҳқақынӷилъкымини ныкывылӷӣ, тама̄кут Иудеямылңӯт анагнӣҳа̄т на̄йӷанун. 15Ю̄к мыңтыӷам қа̄йңанилңуқ қамавык кылъқысяҳқамың ақфатыфқа̄ми пилӷа̄қ. 16Югым пӣтысиӷаӷвигмылңӯм қа̄слъигни ақфафқа̄микык пилӷа̄қ. 17Сыӷлыӷўа̄ӷунақңӯт тама̄кут қумилгытлъю, мамаҳтилӷӣтлъю тама̄ни аӷныӷни! 18Юӷаҳтык Кияӷныӷмун уксюми таўатын пифқа̄н писқылъюку! 19Қаюҳлъяк тама̄ни аӷныӷни сыӷлылӣқ сыӷлыӷатаӷа̄яҳқа̄гуқ сыӷлылӣӷақылъыӷның има Кияӷныӷым улимаюхўа̄лъҳаның нуна хўавымун кынляңа. Алъямыңлъю таўатылңуқ сыӷлылӣқ пина̄нӷитуқ. 20Атанӷым такылъимаңисяқаки тама̄кут аӷныӷыт, кина алңунак уңуванаянӷитуқ. Иўырңа апалъюқлъюки накмикыхкани аӷныӷыт такылъикақӣ.
21Та̄хкын китум алңунак пикаңиси: “Ысҳаҳтыху, Христос хўа̄!” налиӷмың: “Ысҳаҳтыху, тазигна ысҳа!” ухпықыхпына̄н. 22Христосысиӷўа̄ӷытлъю ӯкналиқистысиӷўа̄ӷытлъю алъхыҳтӯсяҳқа̄гут. Алъя̄ҳлъюхўаҳтиҳлъяга̄таӷьяҳқа̄гутлъю, сяӷӣӷанаҳқыҳлъяга̄таӷьяҳқа̄гутлъю пӯҳқуӷналюки югыт, талўа Кияӷныӷым накмикыхкӣ пӯҳсяқлъыгукумыхтыки пилъықӣт. 23Ынка̄м кылыңалюси! Сямың тамаҳа̄ның уңипа̄тыкыстаӷамси тама̄кут пистыхпынаки».
Тагилъыҳқа̄ Иӷныӷан Югым
24«“Киңуңаның та̄м сыӷлылӣлъыҳлъягым сиқинық мамлыхлъықуқ,
танқиқ ниӷугунъаниҳлъықуқ,
25иӷалықыта̄ӷыт ифкақӯлъықут қилягамың,
аҳтуӷьяҳқа̄нӷилъҳыт қилягамылңӯт иглыӷалъҳит алңунаҳқыслъықут”.
26Та̄хкын югыт ысҳаҳлъықа̄т Иӷныӷа Югым тагилӷӣ қиляўа̄ҳтыхун аҳтуӷьяҳқа̄нӷилъылиҳлъяглюнилъю, ниӷуҳқылъылиҳлъяглюнилъю.
27Та̄хкын яқулгыт каяхлъықӣ қырңуҳтысқылъюки накмикыхкани югыт нунатаҳа̄ның тамаҳа̄ның».
Смоквам Уқфига Лӣтфиксяҳқақ
28«Лӣтфикитыху смоквам уқфига. Авайӣ унӣлъӣӷаӷлютың қуқуңӣ пӣтыкыстақата сюңаӷьюкытун лӣсимакылъықаҳси кӣгьяҳтулъық. 29Смоквам уқфиганың лӣтылъыҳпысистун ысҳақуфсики тама̄кут қилягамылңӯт апылъымтун пилӷӣт, лӣсимакылъықаҳси Иӷныӷан Югым ка̄сяҳтуңысталъҳа, а̄қун амигмун лъӣӷума̄қ. 30Ипа уңипа̄тамси, ма̄тын уңувалӷӣт туқуна̄нӷитут сивуңани қамахлъютың тама̄кут пилъыҳқӣта. 31Қилягалъю нуналъю авӣӷусяҳқа̄гук, иўырңа хўаңа акузитынка авӣӷусяхқа̄нӷитут».
Кылыңаклъюку Тагилъыҳқа̄
32«Иўырңа китум алңунак налъюка̄ нани аӷныӷмилъю, афлъюмилъю тагияҳқа̄таңа. Талўа яқулгыт қилягмылңӯт налъюка̄т, Иӷныӷымлъю налъюка̄, Атаңинаҳа̄м лӣсимака̄. 33Кылыңатык, ўа̄кнаниҳпынаси қаюҳлъяк налъюкаҳси қакун тагилъыҳқа̄. 34Юхтун аюқсяҳқа̄гуқ натмун пилӷӣтун. Аӷуляқылъҳилъюни қыпҳаҳтыни афлъыңакистыңлъяҳлъықӣ мыңтыӷаминун, уңипа̄лъықӣлъю сяяҳқӣтның. Амигнӣҳтыминунлъю кылыңакысқыхка̄ утыӷнилъыҳқани. 35Ынка̄м лъпыси кылыңатык, қаюҳлъяк налъюкаҳси қакун мыңтыӷалык утыӷниӷьяҳқа̄таңа. Ўалъю̄млъю тагӣқлъи иӷивгаӷми, унугым қука̄ни, аҳтаӷақыстами, налиӷмың уна̄ңулюку. 36Ынка̄ңам кылыңатык лю̄рақ ка̄тқаҳтыкуми қава̄люси аңунаюкаңиси. 37А̄пқыхка уна лъпысинун, тамаҳаҳлъяганун пиңўа̄қа: Кылыңалюси!»
હાલમાં પસંદ કરેલ:
От Марка 13: ess2
Highlight
શેર કરો
નકલ કરો
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
