OO MEYO ACHIMOOWIN ST JOHN 3
3
PISKE̔TUSSINA̔HIKUN III.
1Ke̔ e̔taw napāo Phariseewuk o̔che, Nicodemus ā isseni̔kasoot, ā tipāyimat Jewa: 2Āwuko owa ke̔ pā natāo Jesusa nipatipisk, mena omisse itāo, Rabbi, ne kiskāye̔tānan ā kiskino̔humakāweyun Munetoo̔k ā o̔cheeyun: weya numma oweyuk kitta ke̔ totu̔k ohee mamuskache isse̔chekāwina ka totumun, patima Munetoowa wechehikootche. 3Jesus peekiskwāo mena omisse itāo, Tapwā, tapwā, k’ititin, Keespin āka napāo ne̔tawekitche mena, numoweya kitta ke̔ wapu̔tum Muneto oot otānowewin. 4Nicodemus omisse itāo, Tanse kā ke̔ isse ne̔tawekit napāo ispe kissāyinewitche? kitta na ke̔ kekeskak oo’ kaweya mena, ākose kitta ne̔tawekit? 5Jesus peekiskwāo omisse, Tapwā, tapwā, k’ ititin, Keespin āka napāo ne̔tawekehikootche nippe mena A̔cha̔kwa, numoweya kitta ke̔ pee̔tokwāo Muneto oot otānowewini̔k. 6Unima ka ne̔tawekemuku̔k meyasi̔k o̔che weyasewun; mena unima ka ne̔tawekemuku̔k A̔cha̔koo̔k o̔che a̔cha̔koowun. 7Ākaweya mamuskata ā ititan, Kitta ne̔tawekeyun mena. 8Yootin piko ittā ā itāye̔tumomuku̔k oo̔tin, mena ke pā̔tān ā pimwāwāstee̔k, maka numoweya ke ga ke̔ we̔tān tantā wā̔cheemuku̔k, mena tantā ā itoo̔tāmuku̔k: ākose moyam ā isse ayat ka̔keyow oweyuk A̔cha̔koo̔k ka o̔che ne̔tawekit. 9Nicodemus peekiskwāo mena omisse itāo, Tanse kā ke̔ isse e̔kee̔kee ohoo kākwia? 10Jesus peekiskwāo mena omisse itāo, Numma che ke kiskino̔humakāwekemawin Israeli̔k, ākose nummawawach ke kiskāye̔tān ohoo kākwia? 11Tapwā, tapwā, k’ ititin, Ne peekiskwatānan unima ka kiskāye̔tuma̔k, mena ne we̔tānan unima ka ke̔ wapu̔tuma̔k; ākose nummawawach ke we̔ otinānawaw ne we̔tumakāwinenan. 12Keespin ke ke̔ we̔tumatin uskeewe kākwia, ākose numoweya ke we̔ tapwā̔tān, tanse kā ke̔ isse tapwā̔tumun, keespin we̔tumatane ke̔che kesikoowe kākwia? 13Mena numoweya oweyuk ke̔ oo̔piskaw ke̔che kesikoo̔k isse, piko una ka ke̔ pā nasuskāt ke̔che kesikoo̔k o̔che, Napāo oo’ Koosisan ote ke̔che kesikoo̔k ka ayat.
14Mena tapiskooch Moses ka ke̔ isse oo̔pinat kināpikwa pukwutuskee̔k, ākose moyam mena kā isse oo̔pinee̔t napāo oo’ Koosisan: 15Piko una tapwā̔towatche numoweya oo ga nissewunatisse̔ty, maka oo ga aya̔ty kakekā pimatissewin.
16Weya Muneto ā ispee̔che saketa̔pun uske, ke̔ mākew oo pāuko‐Koosisana, piko una tapwā̔towayitche numoweya oo ga nissewunatisse̔ty, maka oo ga aya̔ty kakekā pimatissewin. 17Weya Muneto ke̔ pā isitissa̔wāo oo’ Koosisa uskee̔k numoweya kitta nissewunache̔tayit uske; maka uske weya o̔che kitta ke̔ pimatuneyik.
18Una ka tapwā̔towat numoweya nissewunatissew: maka una āka ka tapwā̔towat assi nissewunatissew, weya āka ā tapwā̔tumwat oo we̔yoowineyew oo pāuko‐Koosisana Muneto. 19Mena āwuko oma nissewunatissewin, wastāo a tukoosinomuku̔k uskee̔k, ākose eyinewuk yayow ke̔ sake̔tawuk wunetipiskissewin ispee̔ch wastāo, weya oot i̔totumoowinewawa āka ā kwiuskwuneyikee. 20Weya ka̔keyow oweyuk ka muche̔tit pukwatum wastāo, mena numoweya pā natum wastāo, kitta āka kiskāye̔tumoo̔t oot itotunoowina. 21Maka una ka totu̔k tapwāwin pā natum wastāo, oot i̔totumoowina kitta nookwuneyikee, weya ā itāye̔tumeyit Munetoowa ā i̔totu̔k.
22Ka̔ muyawepuyikee ohoo kākwia Jesus pā itoo̔tāo mena oo kiskino̔humowakuna uskee̔k Judea; mena ākota ke̔ wechāwāo, mena seekaha̔takāo.
23Mena John weesta ke̔ seekaha̔takāo Ænoni̔k kissewak Salim, chikāma mistahā nippe ākota ā ayayik: mena ke̔ pā itoo̔tāwuk, mena ke̔ seekaha̔towawuk. 24Weya John āka chāskwa kipa̔hootoowini̔k ā a̔yee̔t.
25Ākose kukwāche̔toowin e̔tukwun kā̔chewak atee̔t John oo kiskino̔humowakuna mena Jewuk ā ayimootu̔kik kechistchitoowin. 26Mena pā natāwuk Johna, mena omisse itāwuk, Rabbi, una ka ke̔ wechāwisk ukami̔k Jordani̔k, ka achimut, weya mena seekaha̔takāo, mena ka̔keyow eyinewa pā natik. 27John peekiskwāo mena itwāo, Napāo numoweya kākwi kitta ke̔ o̔tinum, patima ke̔che kesikoo̔k o̔che meeyee̔tche. 28Kā̔chewak keyawaw ke kiskāye̔tānawaw, ā ke̔ itwāyan, Numoweya neya Christ, maka neya una ka ke̔ nekan isitissa̔hoo̔t. 29Una ka ayawat iskwāwa ka wekee̔tooyit āwuko napāo ka wekee̔toot: maka oo’totāma napāo ka wekee̔toot ka nepoweyit mena ka pā̔takoot, muma̔takooseyewa naspitch chikāma ā pā̔towayit napāwa ka wekee̔tooyit: oma ne muma̔takoosewin tipepuyew. 30Owusimā weya kitta itāye̔takoosew, maka neya noo̔tow ne ga itāye̔takoosin. 31Una ispimi̔k ka o̔cheet owusimā itāye̔takoosew ispee̔ch ka̔keyow oweyuk: una uskee̔k ka o̔cheet uskeewe itatissew, mena uske ayimootum: una ke̔che kesikoo̔k ka o̔cheet owusimā itāye̔takoosew ispee̔ch ka̔keyow oweyuk. 32Mena ka ke̔ wapu̔tu̔k mena pā̔tu̔k, āwukwāyew weye̔tu̔k; mena numoweya oweyuk otinumwāo oo we̔tumakāwin. 33Una ka ke̔ otinu̔k oo we̔tumakāwineyew soo̔kustaw Munetoowa ā tapwāwineyit. 34Weya unehee Muneto ka ke̔ isitissa̔wat peekiskwāo oo peekiskwāwineyewa Munetoowa: weya Muneto numoweya piko upisees A̔cha̔kwa ā ke̔ meeyat. 35O̔tawemaw sakehāo Oo’koosisa, mena ke̔ meeyāo ka̔keyow kākwi oo’ chee̔cheeyee̔k. 36Una ka tapwā̔towat Wākoosisee̔k ayaw kakekā pimatissewin: mena una āka ka tapwā̔towat Wākoosisee̔k numoweya pimatissewin kitta wapu̔tum; maka oo kissewasewineyew Munetoowa ayaw.
હાલમાં પસંદ કરેલ:
OO MEYO ACHIMOOWIN ST JOHN 3: CSW
Highlight
શેર કરો
નકલ કરો
Want to have your highlights saved across all your devices? Sign up or sign in
First published by the British and Foreign Bible Society 1876-1877.
