Lugu 6
6
Jeju to mbay dɔ ndɔ kuwa kɔr. Dəw gə ji-a uy
Mat 12.1-14; Mrk 2.23-28; 3.1-6
1Ndɔ kara be, to ndɔ kuwa kɔr ɗaa, Jeju nday mə ndɔ gə. Ngan njenendoje lə-a ꞌcɛdə dɔ ko ngaɓa ꞌgur mə ji-je gə d-usa. 2Ngaa Parijiyɛ̰je gə kɛm ꞌpa na: Mba ɗi ɓa ꞌɗa ne gə to kəm ɗa ndɔ kuwa kɔr ang wa? 3Jeju ila-je kəne na: Ne gə mbay Dabidi ɗa le, ꞌtura-je tar-ɛ mə mbede gə ang wa? Logə ɓo ɔr-ɛ, ꞌne je gə dəwje lə-a, 4ɗəw gə n-andə ne mə kəy gə lə Luba, n-odo mbəje gə ꞌpolo ne Luba, n-usa ngaɓa n-ar dəwje lə-a kara d-usa tɔ. Mbə nee le, njekapoloje ja gə kar-je baa ɓa d-aw gə ɗəw mba kusa. 5Jeju pa ar-je ja cibi na: ꞌMa gə Ngon lə dəw m-to nje ko̰ dɔ ndɔ kuwa kɔr.
6Ndɔ kuwa kɔr gə ɗangə ɗaa, Jeju aw mə kəy nendo gə, tɔji ne dəwje. Dəw kara gə ji-a gə kɔl uy isi horo-je gə tɔ. 7Njekɔr gəl toronduje je gə Parijiyɛ̰je d-a Jeju jii mba ko se n-a kaji dəw nee le gə ndɔ kuwa kɔr wa, ɓa gə mba kinga ne ɗəw kila ne tar dɔ-ɛ gə. 8Ngaa Jeju gərə kəji lə-je. N-pa n-ar dəw gə ji-a uy le na: Ḭ taar, ɗe ar no dəwje gə nee. Logə dəw nee le ḭ taar, ɗaa ɗe ar horo-je gə dana. 9Be ɓa, Jeju pa ar-je na: M-dəji-si ne kara mba ko, ndɔ kuwa kɔr le ɗəw to kəm kar dəw ɗa ne gə may ose ɗa ne gə kṵra̰y wa? Gə kaji dəw ose kiya̰-a kar-ɛ tuji wa? 10N-təl n-a-je lɛdɛdɛ tɔ̰y ɗaa, n-pa n-ar dəw le na: ꞌNduji ji-i. N-nduji ji-a, ɗaa ji-a to gə maj-ɛ.
11Wungu ɗusu mə njekɔr gəl toronduje gə Parijiyɛ̰je. ꞌPa tar horo naa gə na ɗi ɓa n-a ɗaje gə Jeju nee wa?
Jeju mbərə njekulaje dɔg gə gir-je gə joo
Mat 10.1-15; Mrk 3.13-19; Kɗn 1.13
12Ndɔ kara be, Jeju aw dɔ ər gə mba dəji Luba, ngaɓa n-dəji Luba mə cil saar lo ar dɔ-ɛ gə. 13Logə lo ar ɗaa, n-mbərə ngan njenendoje lə-a. ꞌTɔrə-je dɔg gə gir-je gə joo, cibi n-unda ri dɔ-je na njeka̰ykulaje. 14Rije ɓa nee: Simo gə Jeju unda ri-a na Piyɛr, Andəre meko̰ lə Simo, Jagə je gə Ja̰, Pilibi je gə Batələmi, 15Matiye, gə Toma, Jagə gə ngon lə Aləpe je gə Simo gə to dəw gə tar ɓe lə-a o̰-ɛ, 16Jude gə ngon lə Jagə je gə Judas Isikariyɔdə, gə a kun dɔ Jeju le.
Jeju tɔji tar lə Luba dɔ ər gə
Mat 5.2-12
17Jeju ɗisi dɔ ər gə gə njekulaje lə-a ngaɓa ar nangə lo gə tadə pəji-pəji gə ngan njenendoje bula ga̰ kəne. Cibi, bula bo dəwje gə d-ḭ dɔ nangə gə Jude gə nje d-ḭ mə ɓe gə Jerujalɛm, ngaɓa dəwje gə əər tura, əər gə ɓe gə Tir gə Sido̰. 18Dəwje tɔ̰y nee le ꞌɗe mba ko tar lə Jeju ngaɓa ꞌɗe mba kar n-ɔr rɔko̰je lə-je. Jeju aji nje gə njilje gə kṵra̰y d-ula kəm-je ndoo. 19Bula dəwje sangə ɗəw mba kɔr rɔ Jeju gə ji-je mba singa ce rɔ-ɛ gə ɓa aji-je tɔ̰y.
20Jeju a ngan njenendoje lɛdɛdɛ, ɗaa pa na:
Nokarə to kar-sisəy njendooje, mba ɓeko̰ lə Luba to kar-si
21Nokarə to kar-sisəy gə ɓo ɔr-si ɓisine, mba Luba a kar mə-si a ti!
Nokarə to kar-sisəy gə ꞌnoje ɓisine, mba Luba a kar-si isije dan rɔləl gə!
22A toje njenokarəje, logə dəwje d-a njigi-si ang gə kɔrɔ, ngaɓa logə d-a tɔbə-si, d-a taji si cibi d-a tuji ri-si mba tar lə ꞌma gə Ngon lə dəw.
23Ɗaje rɔləl dɔ ndɔ-ɛ gə nee le ngaɓa talje ꞌmajagəra, mba nekuga dɔ ji lə-si a bo ya̰ mə dara gə; mba bɔ-sijee ɗa to gə bənəng ja kede gə pajambərəje lə Luba tɔ.
24Ngaa nekəmandoo to dɔ sisəy njenekingaje, mba ingaje nekul mə lə-si nam.
25Nekəmandoo to kar-sisəy gə mə-si ci ɓisine, mba ɓo a kɔr-si ɓi!
Nekəmandoo to kar-sisəy gə kogoje ɓisine, mba sisəy a kisije dan ndoo gə dan man no gə!
26Nekəmandoo to kar-sisəy, logə dəwje tɔ̰y d-a pa tar lə-si gə maj-ɛ, mba bɔ-jeje ꞌɗa bənəng ja tɔ gə pajambərəje gə gə mbɔr-ɛ!
Njigi njeba̰a̰je
Mat 5.38-48
27Ngaa sisəy gə ꞌtugaje mbi-si oje ne tar lə-m le, m-pa m-ar-si: ꞌNjigi-je njeba̰a̰je lə-si, ꞌɗa-je may gə nje gə njigi-si ang gə kɔrɔ. 28ꞌTɔrje ndu-si dɔ nje gə d-ugu ne ar-si, ꞌdəjije Luba mba nje gə d-ula kəm-si ndoo. 29To gə ɓo dəw unda kambɔr-i nama, ꞌturu ye gə kara ar-ɛ. To gə ɓo dəw un kubu kul lə-i nama, ɔg-ɛ kubu gə kar-i gə ang. 30Na-na ɓa dəji-i ne nama ar-ɛ, ngaɓa ɓo dəw un ne lə-i nama ꞌtəl dəji-e gugu ang. 31Ne gə sisəy njigi-je kar dəwje ɗa mba-si le, ꞌɗaje to gə bənəng mba-je tɔ. 32To gə ɓo nje gə njigi-si ɓa ꞌnjigije-je le se, ɗi ɓa a to ne gə d-a təl ne gə oyo kar-si wa? Ngaa, njeneɗaje gə kṵra̰y kara ꞌnjigi nje gə njigi-je tɔ. 33To gə ɓo sisəy ꞌɗaje ne gə may gə nje gə ɗa si ne gə may le se, ɗi ɓa a tɔji mənuji lə-sisəy wa? Ngaa, njeneɗaje gə kṵra̰y kara ɗa bənəng tɔ. 34Ngaa to gə ɓo nje gə unda mə-je mba təl kinga ne ji-je gə gugu ɓa ꞌtuna si ne le se, ɗi ɓa a tɔji mənuji lə-sisəy wa? Njeneɗaje gə kṵra̰y kara d-ar njeneɗaje gə kṵra̰y ja tɔ ɓa ꞌtuna-je ne mba təl kinga gugu to gə bənəng tɔ. 35Ngaa sisəy le, ꞌnjigije njeba̰a̰je lə-si, ꞌɗaje may ngaɓa ar-je ꞌtuna si ne lal kunda mə-si kəne. Nekuga dɔ ji lə-si a bo ya̰ ngaɓa a toje nganje lə Nje kisi sam dara gə, mba ꞌNe le n-ɗa məmay gə nje ɗa gasəraje nəm gə njeməndulje nəm tɔ. 36ꞌƊaje məmay gə dəwje to gə Bɔ-sijee to ne nje ɗa məmay be tɔ.
Gangə tar
Mat 7.1-5,15-20; 12.33-37
37ꞌGangəje tar dɔ dəwje gə ang, ɗaa Luba a gangə tar dɔ si ang tɔ; ilaje tar dɔ dəw gə ang, ɗaa Luba a kila tar dɔ-si gə ang; ɔrəje tar dɔ dəwje nama Luba a kɔr tar dɔ-si gə tɔ. 38Ar-je dəwje ne, ɗaa Luba a kar-si ne tɔ, a to ngo kɔj-e gə may gə yəə d-ar ɗusu ngaɓa kay nangə pɔ-pɔ ɓa d-a mbəl mə ɓɔl gə lə-si. Mba ngo gə ɔjije ne ne ja tɔ ɓa d-a kɔji ne ne kar-si.
39Ngaa, Jeju pa gusutar ja cibi ar ngan njenendoje lə-a na: Nje kəm tɔ asə kila kagə ji nje kəm tɔ mar-ɛ gə wa? Bənəng nama, d-a koso buwa gə joo kɛm ang wa?
40 Ngon njenendo nday njenetɔji ang baa; ngon njenendo gə ɗa-ɗa gə ꞌtɔj-ɛ ne gə maj-ɛ le, a to to gə njenetɔji be. 41Mba ɗi ɓa biya̰ mu gə to dɔ kəm ngon ko̰-i ɓa o ɗaa, kagə gə boy gə to kəm-i ꞌi gə ja o ang wa? 42To gə ban ɓa ꞌi pa ar ngon ko̰-i na: Ngon ko̰-m, ar-m m-un mu gə to kəm-i gə kən, ɗaa ꞌi o kagə gə to kəm-i gə nee ang wa? Njetar mula, un kagə gə to kəm-i gə ja kede nam ɓa, a ko lo arə ngadə mba kun ne mu gə to kəm ngon ko̰-i gə ɓi.
43Kagə gə may gə andə kand-e gə kṵra̰y godo, nəm kagə gə kṵra̰y gə andə kand-e gə may godo. 44Be ɓa, kagə gə ɗa-ɗa kara d-a gər-e ta kand-e. Dəw unja kandə tungu dɔ kagə kun gə ang, ngaɓa d-a kunja kandə madə dɔ kun pɔrɔ gə ang tɔ. 45Dəw gə may le, tar gə may ɓa ce t-ɛ gə, ngaa dəw gə kṵra̰y le, tar gə kṵra̰y ɓa ce t-ɛ gə, mba ye gə ɗusu mə dəw ja ɓa ce t-ɛ gə.
Ko tar ɗa ne kula
Mat 7.24-27
46Mba ɗi ɓa ꞌɓar-mje: Mbayɓe, Mbayɓe ngaa, ꞌɗaje ne gə m-pa m-ar-si ang wa? 47Dəw gə ɗa-ɗa ɓa ɗe rɔ-m gə, o tar ta-m gə ngaɓa ɗa ne kula nama m-a tɔji-si dəw gə n-taa sə-a naa. 48N-taa naa gə dəw gə unda kəy, uru buwa gadə kəy ar uru ya̰ ɓa um ər kəne nam ɓa unda kəy dɔ-ɛ gə. Logə man ta lo ɗaa kəy le to taar jagəra, mba kəy le d-unda gə maj-ɛ. 49Ngaa dəw gə o tar ɓa ɗa ne kula ang le to asə naa gə dəw gə unda kəy dɔ nangə gə baa, lal kɔsə gɔl-ɛ. Man ta lo ɗaa, kəy le unda nangə mburugu, ɗaa to dɔ nduba gə bo.
હાલમાં પસંદ કરેલ:
Lugu 6: lap
Highlight
શેર કરો
નકલ કરો
Want to have your highlights saved across all your devices? Sign up or sign in
© 2020, ATALTRAB. All rights reserved
