Lugu 5
5
Jeju ɓar ngan njenendoje gə dɔngɔr
Mat 4.18-22; Mrk 1.16-20
1Ndɔ kara be, Jeju ar tura man bo gə ri-a na Jenejarɛd. Bula dəwje ɗe rɔ-ɛ mba ko tar lə Luba. 2Jeju o to joo gə to kar mbalaa. Mbawje d-uru nangə, ɗaa d-aw togo buraje lə-je. 3Jeju al to gə to kar Simo. N-dəji Simo kar gɛsə to le əw njɛ̰ gə kar mbala. Jeju isi mə to gə, ngaɓa tɔji ne bula dəwje.
4Logə n-pa tar tɔ̰y ɗaa, n-ula Simo na: Ɔsə to lə-i gə kəy man gə kən, ɓo ilaje bura lə-si man uwaje ne kənji. 5Simo ila-a kəne na: ꞌƁəə-mje, j-ɔsə man cil gə ja saar lal kuwa kənji. Ngaa, gə go tar gə ta-i gə ɗaa m-a kila bura ko. 6D-ila bura ɗaa d-uwa kənji gə kobəre. Bura lə-je kara aw mba cir nəm. 7D-ula ta-je d-ar njeba-ɛje lə-je gə d-isi mə to gə ɗangə gə mba kar ꞌɗe ꞌla gə je. Kənji ɗusu to gə joo ar to le aw mba njuyi man. 8Logə Simo o neje le be ɗaa, oso no Jeju gə, ngaɓa pa ar-ɛ na: ꞌMbɔbə mbɔr-m ang, Mbayɓe, mba m-to dəw gə njeneɗa gə kṵra̰y! 9Be ɓa, Simo gə dəwje tɔ̰y gə d-ar sə-a ꞌɓəəl mba kənji gə d-uwa-a ya̰. 10Ja̰ je gə Jagə gə ꞌto ngan lə Jebede, nje baa kulaje lə Simo kara ꞌɓəəl tɔ. Ɗaa Jeju pa ar Simo na: ꞌƁəəl ang, un kud-e ɓogəne saar gə kede əng le, ꞌi a to njendo̰ dəwje. 11Be ɓa, ꞌɗe gə toje le kar mbala, ꞌtusu neje tɔ̰y d-ḭya̰ ɗaa d-uwa go Jeju.
Jeju aji njebənji
Mat 8.1-4; Mrk 1.40-45
12Ndɔ kara be, Jeju ga̰ mə ɓe gə. Njebənji kara ɗe, dəbə ngo no-ɛ nangə no Jeju ɗaa pa na: Mbayɓe, to gə ɓo mə-i njigi nama ar rɔ-m arə ngadə. 13Jeju ula ji-a ɔr ne rɔ-ɛ, ɗaa pa na: M-njigi, rɔ-i arə ngadə. Gə lo-e gə əng ja, bənji gə rɔ-ɛ gə ɔdə ngəndəng. 14Jeju un ndu ar dəw le na: ꞌPa tar ne gə nee le ar dəw ang, ngaa ɔdə aw tɔji rɔ-i ar njekapolo, ɓo aw un nepolo gə Moyiji pa tar-ɛ le, mba kar to tar naji ar ꞌgərə to gə rɔ-i arə ngadə.
15Ye ɓa ɗa ar ri Jeju ɓar gə kede-kede. Bula dəwje ꞌmbo̰ naa mba ko tar lə-a ngaɓa gə mba kar n-ɔr rɔ to lə-je. 16Ngaa Jeju ɔdə gə kar-ɛ baa aw ndag lo gə, dəji Luba.
Jeju aji dəw gə dəbə rɔ-ɛ uy
Mat 9.1-8; Mrk 2.1-12
17Ndɔ kara be, Jeju aw tɔji ne dəwje. Parijiyɛ̰je gə njekɔr gəl toronduje d-isi mbɔr-ɛ gə. D-ḭ ngan ɓeje gə dɔ nangə gə Galile, gə dɔ nangə gə Jude, gə mə ɓebo gə Jerujalɛm. Singamongə lə Mbayɓe nay gə Jeju ar-ɛ aji ne dəwje. 18Ɗaa dəwje d-un dəw kara gə rɔ-ɛ uy wɔ gə tuwa, ꞌsangə ɗəw mba kaw kila-a no Jeju gə mə kəy gə ja kɔrɔgə. 19Ngaa d-asə kandə kəy ang mba dəwje ꞌbula ya̰. Be ɓa, d-al dɔ kəy taar, ꞌmbudu dɔ kəy, ngaɓa ꞌɗisi njerɔko̰ mə tuwa gə, d-ila no Jeju gə. 20Logə Jeju o takagə lə-je ɗaa, pa ar dəw nee le na: Tar neɗaje gə kṵra̰y lə-i ɔr dɔ-i gə. 21Njekɔr gəl toronduje je gə Parijiyɛ̰je ꞌyṵrṵ tar mə-je gə ngaɓa ꞌpa na: Dəw gə nee le to na ja ɓa, aw pa tar taji ne Luba nee wa? Na ɓa asə kɔr tar neɗaje gə kṵra̰y dɔ dəw gə wa? Se Luba ja gə kar-ɛ baa ang wa? 22Ngaa Jeju gərə kəji lə-je, ɗaa pa ar-je na: Mba ɗi ja ɓa kəji tar gə be to mə-si gə wa? 23Pa tar kar dəw na: Tar neɗaje gə kṵra̰y ɔr dɔ-i gə ɓa to ɓəəl ya̰ ose, ꞌye gə na: Ḭ taar, un tuwa lə-i, ɓo n-nja ɓa to ɓəəl ya̰ wa? 24Be ɓa, mba kar ꞌgərə-je to gə ꞌma gə Ngon lə dəw le m-aw gə singamongə dɔ nangə nee mba kɔr tar neɗaje gə kṵra̰y dɔ dəwje gə. Cibi, Jeju pa ar dəw gə rɔ-ɛ uy le na: M-un ndu-m m-ar-i, ḭ taar, un tuwa lə-i ɓo aw kəy lə-i. 25Ji naa gə nee ja, n-ḭ taar, n-un tuwa lə-a, n-ɔdə n-aw kəy lə-a, n-ɔsə ne gaji Luba. 26Dəwje tɔ̰y lo tar igi-je sɛl, ngaɓa d-ɔsə ne gaji Luba. ꞌƁəəl ya̰, ɗaa ꞌpa na: J-o ne gə to ɓədə ɓogəne!
Jeju ɓar Lebi. Tar tɔl mə ɓo
Mat 9.9-17; Mrk 2.13-22
27Go-e gə gugu ɗaa, Jeju ɔsə lo ce ngaɓa o njembo̰ lar gədə ɓe kara gə isi lo mbo̰ lar gədə ɓe gə, ri-a na Lebi. N-pa n-ar-ɛ na: Uwa go-m. 28Lebi tusu neje tɔ̰y ḭya̰, ɗaa ḭ taar aw sə-a.
29Cibi, Lebi gɔl nekusa gə bɔy mə kəy gə lə-a ar Jeju. Njembo̰ lar gədə ɓeje bula gə dəwje gə kɛm d-usa gə je ne naa gə kara baa. 30Parijiyɛ̰je je gə njekɔr gəl toronduje ꞌyəngə tar ngaɓa ꞌpa d-ar ngan njenendoje lə-a na: Mba ɗi ɓa usa-je ne gə ay-je ne gə njembo̰ lar gədə ɓeje gə njeneɗaje gə kṵra̰y naa gə wa? 31Be ɓa, Jeju ila-je kəne na: Dəwje gə rɔ-je to gə maj-ɛ le ꞌsangə dɔgətoro ang, ngaa njerɔtoje ɓa. 32M-ɗe mba ɓar dəwje gə gadə-gadə ang, ngaa m-ɗe mba ɓar dəwje gə njeneɗaje gə kṵra̰y kar ꞌturu kəji lə-je.
33Cibi, ꞌpa d-ar Jeju na: Ngan njenendoje lə Ja̰ gə nje kar Parijiyɛ̰je ꞌtɔl mə-je ɓo taar-taar ngaɓa ꞌdəji Luba, ngaa nje kar-ije d-usa ne gə d-ay ne tɔ. 34Ngaa Jeju pa ar-je na: Se ndɔ ɗa nay ta naa le, njekuraje lə njetajene gə sigi d-a tɔl mə-je ɓo logə njetajene ga̰ gə je baa ɓi wa? 35Ngaa dɔ ndɔje a kasə gə, d-a kɔr ngaw jeneje ji-je gə ɗɔdə le ngaɓa dɔ ndɔ-ɛ əng le d-a tɔl mə-je ɓo ɓi. 36Jeju pa gusutar gə ɗangə kara ar-je ja cibi na: Dəw unja ta kubu gə sigi ila ne kəm kubu gə ləw gə cil ang. Ɓo bənəng ang nama ta kubu gə sigi a ndɔr ꞌye gə ləw kar-ɛ a cil gə kede. 37Ngaɓa, dəw a kiya munduru kodo mə jo kodo gə ləw gə ang mba mii lə kodo le a tɔ jo, kar kodo le ula nangə kəngəng-kəngəng. Ɓo bənəng ang nama, kodo nəm, jo nəm tɔ le, d-a to neje gə tuji gə kɔrɔ ja. 38Ngaa ɓo munduru kodo nama may kiya mə jo kodo gə sigi gə ja tɔ ɓa d-a kuwa naa gə maj-ɛ. 39Cibi, logə dəw ay ꞌyoləm nama ꞌye gə sigi ləl-e gə maj-ɛ ang, mba n-pa na: ꞌYoləm may ya̰.
હાલમાં પસંદ કરેલ:
Lugu 5: lap
Highlight
શેર કરો
નકલ કરો
Want to have your highlights saved across all your devices? Sign up or sign in
© 2020, ATALTRAB. All rights reserved
