Mateu 10

Tumbaji twaYesu likumi navavali (12)

(Mako 3:13-19; Luka 6:12-16)

1 Kaha asanyikile tumbaji twenyi likumi navavali (12) nakuvahana ngolo#10:1 MuchiHelase ngwavo, wata. hali vashipilitu vaunyengwe mangana vavalovolenga muli vatu, nakuka musongo himusongo nauveji hiuveji.

2 Majina avaze vaposetolo#10:2 Nge ngwavo, Avaze vatuma. likumi navavali (12) apwile awa: wakavanga Shimona, vavuluka ngwavo, Petulu, nandumbwenyi Andelei; Yakova mwanaZevete, nandumbwenyi Yowano;

3Fwilipu naMbala-Tolomeu; Tomase naMateu muka-kutelesa; Yakova mwanaAlefweu, naTateu;

4Shimona uze Kananayi#10:4 Nge ngwavo, Uze afwila chikuma kusokoka chalifuchi lyenyi., naYuta Isakalyote, uze ámuhanyine kumavoko avaka-kole.

Yesu mwatuma vaze likumi navavali (12)

(Mako 6:7-13; Luka 9:1-6)

5Yesu atumine vaze likumi navavali (12), kaha avalwezele ngwenyi, Kanda mukaya kuli vaka-mafuchiko, kaha nawa, kanda mukengila mulimbo#10:5 MuchiHelase ngwavo, mulimbo-lyakembwe. lyavaSamaliyako,

6oloze yenu kuli mikoko vakujimbala vakutanga yaIsalele kaha.

7 Kaha omu namuya vambulilenunga ngwenu, Wangana wamwilu uli hakamwihi.

8Kahindulenunga vaka-kuviza, kasangulenunga vafu, katomesenunga vaka-mbumba, kalovolenunga vandemone. Munatambula chawana, kaha hanenunga nawa chawana.

9 Kanda namumbata jimbongo jaulu, chipwe japalata, chipwe jaunengu mumbate muvikwama vyenuko,

10chipwe chola chakuya nacho, chipwe vikovelo vyavisuku vyamukachi vivali, chipwe mendelo, chipwe mukombo, mwomwo muka-kuzata atela kumulisa.

11Mweshomwo mulimbo namukengila, chipwe lyakembwe chipwe lyakuzeneka kembwe, kehwojolenu iya alimo atela mukatwameko, kaha katwamenuko lika palanga nomu namukafuma kuze.

12Hakwingila muzuvo, vamenekenu.

13Kaha nge vakuzuvo kana vanatela, kaha kuunda chenu chipwenga hali vakiko. Oloze nge kavatelako, kaha kuunda chenu chihiluke kuli enu vavene.

14Kaha weshowo mwakazeneka kumitambula, chipwe kwivwilila mazu enu, omu namulovoka muze muzuvo chipwe muze mulimbo, kalitotomonenu lukungu kuvilyachilo vyenu.

15Mwamuchano nangumilweza ngwami, Halikumbi lyakuvatula milonga, vihuli vyangalila yaSotome naNgomola navikakuminamo, kwesekesa navize vyalimbo lize.

Kuyanda chatumbaji kuli vaIsalele

(Mako 13:9-13; Luka 21:12-17)

16 Ivwililenu, Ami nguli nakumituma nge mumikoko mukachi katungunge. Shikaho pwenunga muvakuzangama nge manoka, muvakuunda nge tutela.

17 Oloze zangamenu navatu, mwomwo navakamihana kumavoko#10:17 Tala ha5:22. avaka-jizango javaYuleya, kaha navakamipula vikote mujisunangonga#10:17 Tala ha4:23. javo.

18 Kaha navakamitwala kuli vanguvulu nakuli vamyangana, mwomwo wayAmi, mangana chikapwe unjiho kuli vakiko nakuli vaka-mafuchi.

19Omu navakamihana kumavoko avaka-kusopesa, kanda namukalizakamina mwakuhanjikilako, chipwe vyakuhanjika. Mwomwo vyakuhanjika navakamihanavyo halwola luze.

20Mwomwo keshi yenu namukahanjikako, oloze Shipilitu yaSenu Ikiye mwakahanjika muli enu.

21 Kaha songo yamutu chipwe yaya yamutu mwakajihisa ndumbwenyi, ise mwakajihisa mwanenyi, kaha vana navakavafumbukila visemi javo nakuvajihisa.

22 Navakamihunga kuli vosena halijina lyami. Oloze ou mwakakakachila nakutwalililaho mukuunda palanga nakusongo, navakamuyovola.

23Omu navakamiyanjisa mulimbo-lyakembwe limwe, kachinyinenu mulikwavo. Mwomwo mwamuchano nangumilweza ngwami, hakwiza chaMwanamutu mwakawana kanda muhite mumembo-akembwe osena amuIsalele.

24 Kambaji kahambakana muka-kumunangulako, kaha ndungo kahambakana kaka yenyiko.

25Chatamo kambaji kupwa nge muka-kumunangula, kaha chatamo nawa ndungo kupwa nge kaka yenyi. Nge Mwenyazuvo vanamuvuluka ngwavo, Mbelezembule#10:25 Nge ngwavo, Mwangana wavandemone, ikiye Satana., kaha vakuzuvo yenyi nachikahambakanamo.

Ou twatela kwivwa woma

(Luka 12:2-9)

26Shikaho kanda mukavevwa womako, mwomwo kakweshi chakufwika navakazeneka kufwikununako, chipwe chakuswamana navakazeneka kutachikizako.

27Echi nangumilweza mumilima, kachihanjikenu musana weye, kaha echi navamiyevetela, kachivilikenu helu yajizuvo.

28Kanda namwivwa woma vaze navajiha mujimba oloze kavahasa kujiha mwonoko. Oloze ivwenu woma Ou nahase kunongesa namwono namujimba muNgehena#10:28 Nge ngwavo, muchijiva chakakahya. Tala Kuso 20:11-15..

29Kumana tujilili vavali kavavalanjisa nakalumbongo#10:29 MuchiHelase ngwavo, Asalione, kalumbongo kweseka nafweto yamuka-kuzata hakuzata chimbwa chalwola lumwe. kakandendeko numba? Oloze naumwe wavo wauchi mwaliholokela tuhu hamavu chakuzeneka Senu kuchitavisa.

30Oloze chipwe jikambu josena jakumitwe yenu vajilava lyehi.

31Shikaho kanda namwivwa womako, enu mwalema kuhambakana tujilili vavavulu.

32Shikaho weshowo mwalitavila hatoma ngwenyi apwa wami, nayAmi nawa nanguketavila uze mutu kumeso aTata átwama mwilu ngwami, Apwa wami.

33Oloze weshowo mwangukana kumeso avatu, nayAmi nawa nangukamukana kumeso aTata átwama mwilu.

Ukalu mwawana mutu hakukavangiza Mwata

(Luka 12:49-53; 14:26-27)

34Kanda mushinganyeka ngwenu, nguneza nakuneha kuunda hamavuko. Kangwejile nakuneha kuundako, oloze poko yamukwale.

35Mwomwo nguneza

Nakuneha kulifumbukila — muli mutu naise,

Muli mwana wapwevo nanaye,

Namuli pwevo lyamwana nanayewenu,

36Kaha ava vakuzuvo yamutu vakiko navakapwa vaka-kole jenyi.

37 Weshowo azanga ise chipwe naye kuhambakana Ami, kangutelako. Kaha weshowo azanga mwanenyi walunga chipwe wapwevo kuhambakana Ami, kangutelako.

38 Kaha weshowo mwazeneka kumbata kulusu yenyi nakungukavangizanga, kangutelako.

39Weshowo mwalilamina mwono wenyi mwaujimbalisa, kaha weshowo mwajimbalishila mwono wenyi hali Ami mwauwana.

Ovyo navakatambula hakumuzachila Mwata

(Mako 9:41)

40 Weshowo mwatambula enu, natambula Ami. Kaha weshowo mwatambula Ami, natambula Uze angutuma.

41Weshowo mwatambula kapolofweto hakupwa kapolofweto, mwakatambwilaho wana wakumusakwilila watela kapolofweto. Kaha weshowo mwatambula muka-kwoloka hakupwa uze navatambula muka-kwoloka, mwakatambwilaho wana wakumusakwilila wakutela muka-kwoloka.

42 Kaha weshowo mwahana umwe waava vavandende chipwe lupasa lwameya atuta anwenga, hakupwa kambaji kami, mwamuchano nangumilweza ngwami, keshi kukazeneka wana wakumusakwililako.

હાલમાં પસંદ કરેલ:

Mateu 10: LUE

Highlight

શેર કરો

નકલ કરો