Mateu 11
11
Yowano muka-kujimika vatu mwatuma tumbaji twenyi kuli Yesu
(Luka 7:18-35)
1 Omu Yesu akumishile kulweza tumbaji twenyi likumi navavali (12) mwakuzachila, afumine kuze, ayile nakunangula nakwambulula mazu mumembo-akembwe amuNgalileya.
2Jino omu Yowano muze mukamenga evwile milimo yaKulishitu, atumine tumbaji twenyi
3vakamuhulise ngwavo, Ove yove Uze vashika kwiza tahi, nyi tutalilile weka?
4Yesu avakumbulwile ngwenyi, Yenu mukalweze Yowano evi muli nakwivwa nevi muli nakumona —
5ngwenu, Tupuputa vali nakumona, vaka-kumbilikita vali nakutambuka kanawa, vaka-mbumba vali nakuvatomesa, tujika-matwitwi vali nakwivwa, vafu vali nakuvasangula, vaka-kuhutwa vali nakuvambulila mujimbu wamwaza.
6Kaha atokwa ou mwazeneka kumona chakumufutwisa muli Ami.
7Kaha omu tumbaji twaYowano vapwile nakuya, Yesu aputukile kuhanjika kumazavu aze hakuvuluka Yowano, ngwenyi, Mwayile nakutala ika mupambo? Lihongo ványikishilenga kupeho tahi?
8Nyi jino mwayilemo nakutala ika? Mutu wakuvwala uvwalo wamwaza#11:8 MuchiHelase, uvwalo wauvwovu, wakuvwala kuli vamyangana. tahi? Talenu, vaze vavwala uvwalo wamwaza vali mumazuvo avamyangana.
9Nyi kumana mwayilemo nakutala ika? Kapolofweto tahi? Eyo, nangumilweza ngwami, ou ahambakana kapolofweto.
10Ikiye ou vavuluka haze vasoneka ngwavo,
Tala, Ami nangutuma muluwa wami kulutwe lwove
Ou mwátetekelako nakulongesa jila yove.
11Mwamuchano nangumilweza ngwami, muli vakusemuka kuli mapwevo kamwasolokele umwe áhambakana muka-kujimika vatu Yowanoko. Oloze uze ákuminamo chikuma muwangana wamwilu amuhambakana.
12 Kufuma hamakumbi amuka-kujimika vatu Yowano palanga nakulikumbi lyalelo, wangana wamwilu veji kuwenyekanga, kaha vaka-kuwenyeka veji kuuhukwojolanga nangolo.
13Mwomwo vapolofweto vosena naJishimbi, vyapolofwetele#11:13 Vapolofweto namazu akuJishimbi vyapwile nakulumbununa vyakumuchima waKalunga vize navikasoloka. palanga nomu asolokele Yowano.
14Kaha nge munambe kuchitavila, ou ikiye Elija uze vambile ngwavo mwakeza.
15 Ou ali namatwitwi, evwilile.
16Kaha chisemunwino echi nanguchifwanyisa naka? Chinafwane nge vanyike vanatwame muvilanjilo, nakulisanyika navakwavo
17nakwamba ngwavo,
Twamimbilanga tupyololo, kaha kamwakinangako,
Twamimbilanga lungungu, kaha kamwalishonangako.
18Mwomwo omu ejile Yowano, kalileko, kanwineko, kaha hinavamba ngwavo, Ali nandemone.
19Mwanamutu omu neza, ali nakulya, ali nakunwa, kaha hinavamba ngwavo, Talenu Muka-kufwa hakulya, Chitakwa, Sepa lyavaka-kutelesa navaka-shili! Olozenyi,
Mangana vanawasambishila havilinga vyawo#11:19 Mangana aze mwahana Kalunga ngamba yenyi hakumuzachila, nawasoloka muvilinga vyamwaza, kaha navimusambisa..
Luvinda hamembo anakane kufwelela
(Luka 10:13-16)
20Jino aputukile kuhana milonga aze membo-akembwe, muze alingilile vilinga vyangolo mwomwo kavakunyukile hashili nakwalumuka mumichimako.
21Ngwenyi, Luvinda lwove ove Kolajine! Luvinda lwove ove Mbetesaita! Mwomwo vilinga vyangolo vize vanalingi muli enu, nge vavilingilile muTule namuShitone, kachi vakunyukile lyehi hashili nakwalumuka mumuchima nakuvwala vikelei nakutwama muuto.
22Oloze nangumilweza ngwami, Halikumbi lyakuvatula milonga, vihuli vyaTule naShitone navikakuminamo, kwesekesa nevi vyayenu.
23Nyi ove Kapelenau, navakakuzezwila mwilu tahi? Chiku! Navakakushikumwisa mbwe namuHetese#11:23 Kwaya vafu.. Mwomwo vilinga vyangolo vize valingilile muli ove, nge vavilingilile muSotome kachi lize limbo kulili nakulikumbi lyalelo.
24Oloze nangumilweza ngwami, Halikumbi lyakuvatula milonga, vihuli vyangalila yaSotome navikakuminamo, kwesekesa nevi vyayove.
Twayenu kuli Ami munoke
(Luka 10:21-22)
25Halwola luze Yesu ambile ngwenyi, Ove Tata, Mwenya-lilu namavu, ngunakwalisa, hakuvaswekavyo vihande evi vaka-mangana navaka-kunangakana, nakuvasolwelavyo vana vavandende#11:25 Chipwe vakemba..
26Mukiko Tata, wachimwene kuwaha.
27 Vyosena vanangusuwilavyo kuli Tata, kaha naumwe wauchi atachikiza Ami Mwanenyi, shina Tata kaha. Kaha nawa, naumwe wauchi atachikiza Tata, shina Ami Mwanenyi kaha, naweshowo mwasaka Ami Mwanenyi kumusolwelayo.
28 Twayenu kuli Ami enu muvosena munazeye hakukilikita nakulemuwa, kaha Ami nanguminokesa.
29Litwikenu toka#11:29 Njoko yavangombe. yami, linangulenu kuli Ami, mwomwo ngwapwa ngumuvwovu mumuchima, nguwakulinyisa, kaha namuwana kunoka kumyono yenu.
30Mwomwo toka yami yayashi kumbata, kaha chiteli chami chachilelu.
હાલમાં પસંદ કરેલ:
Mateu 11: LUE
Highlight
શેર કરો
નકલ કરો
Want to have your highlights saved across all your devices? Sign up or sign in
Bible Society of Zambia
