ZĨRINƆ 8

1Solu kú gbɛ̃ kũ ò Sitivĩ dɛ̀nɔ kpɛ.

Solu wɛ́tãmma mɔna Yesudenɔnɛ

Zĩ birean ò nà wɛ́tãna sɔsi gbɛ̃ kũ ò kú Yurusalɛmunɔa manamana. Zĩ̀rinɔ baasi ò fã̀kɔ̃a ń pínki Yudea kũ Samaria bùsunɔ gũn. 2Ludayãmari kenɔ Sitivĩ vĩ̀ ò a gɛ̀ ɔ́ɔ dɔ̀ kũ wiki gbãnao. 3Akũ Solu kokari kɛ̀ kũ sɔsi gbɛ̃nɔ kakatɛnaao. Àdigɔ̃ gɛ̃ ɔn kũ ɔnnwo àgɔ̃ gɔ̃gbɛ̃nɔ kũ nɔgbɛ̃nɔ kũkũ àgɔ̃ ń gátɛ à gɛ́ à ń ká kpɛ́siran.

Baarunnakpana Samaria bùsun

4Gbɛ̃ kũ ò fã̀kɔ̃anɔ gɛ̀ɛ ò Yesu baaruu kpà gu sĩnda pínkin. 5Filipi gɛ̀ɛ Samaria bùsu wɛ̃tɛ ken, akũ à Arumasihu waazi kɛ̀ńnɛ. 6Kũ gbɛ̃nɔ Filipi yã mà, akũsɔ̃ ò daboyã kũ à kɛ̀nɔ è, ò laakarii dɔ̀ yã kũ àtɛn oa kũ nɛ̀sɛ mɛ̀n doo. 7Zaakũ gbɛ̃ kũ ń tãnanɔ gòḿma kũ wiki gbãnaonɔn dasi, akũsɔ̃ kɔ̃̀nɔdenɔ kũ ɛrɛnɔ wèrekɔ̃a dasi. 8Akũ ò pɔnna kɛ̀ manamana wɛ̃tɛ pìi gũn.

9Gɔ̃gbɛ̃ ke kú gwe zaa zĩ òdi pinɛ Simɔ. Àdigɔ̃ daboyã kɛ à bò Samariadenɔ sarɛ, akũ à a zĩda dìtɛ gbɛ̃ bɛ̀ɛrɛde ũ. 10Nɛ́ fíti gbɛ̃ zɔ̃kɔ̃ pínki dì laakari dɔ a yãa ò pi: Gbɛ̃ pì bi gbɛ̃ kũ òdi pinɛ Luda gbãna zɔ̃kɔ̃demɛ. 11Daboyã kũ àdigɔ̃ kɛ ń tɛ́ zaa gìkɛna ń kũ gbãna. 12Ama kũ ò kpata kũ à bò Luda kĩnaa baaru kũ Filipi kpàńnɛ kũ Yesu Kirisi tɔ́oo mà, ò sì, akũ ò da'itɛ kɛ̀ gɔ̃gbɛ̃nɔ kũ nɔgbɛ̃nɔ ń pínki. 13Bee Simɔ yã pìi sì à da'itɛ kɛ̀, akũ à nà Filipia. Kũ à daboyã kũ gbãna yã zɔ̃kɔ̃ kũ Filipi tɛn kɛnɔ è, yã pìnɔ bò a sarɛ.

14Kũ zĩ̀rinɔ mà zaa Yurusalɛmu Samariadenɔ Luda yã sì, ò Pita kũ Yuhanao zĩ̀ḿma. 15Kũ ò kà gwe, ò adua kɛ̀ńnɛ de ò Luda Nini le yãi. 16Ò ń da'itɛ kɛ̀ yã kũ Dikiri Yesu tɔ́o, ama Luda Nini dí didi ń gbɛ̃kearo. 17Kũ ò ɔ nàḿma, akũ ò Luda Nini lè sà. 18Kũ Simɔ è ò Luda Nini è kũ zĩ̀rinɔ ɔnammanaao, akũ à sùńnɛ kũ ɔgɔo 19à pì: À ma gba gbãna pì se, de gbɛ̃ kũ ma ɔ nàa ni Luda Nini le. 20Akũ Pita pìnɛ: N ɔgɔ kakatɛ kũnwo, zaakũ ntɛn da ĩni Luda gba lú kũ ɔgɔomɛ. 21N ɔ kú zĩ pìi gũnlo, n baka kú a gũnlo, zaakũ n nɛ̀sɛ mana Ludanɛro. 22Ǹ kpɛ li n yã vãni pìinɛ ǹ adua kɛ Dikiria, ke ani sùru kɛ kũnwo kũ n laasun bire takao gwɛɛ? 23Zaakũ ma è kũ sɛwɛ zĩni kú n gũn, durunna bàa kànnɛ. 24Akũ Simɔ pì: À adua kɛmɛnɛ Dikiria de yã kũ a ò ke sún ma lero yãi.

25Kũ Pita kũ Yuhanao Dikiri sèedaa kɛ̀ ò a yã dàńnɛ, akũ ò ɛ̀ra òtɛn tá Yurusalɛmu, òtɛn baaru nna kpá Samaria lakutunɔ gũn dasidasi.

Filipi kũ Etiopia gbãnade keo

26Dikiri malaika yã ò Filipinɛ à pì: Ǹ futɛ ǹ gɛ́ gɛ̀nɔmidɔki kpa. Ǹ zɛ́ kũ à bò Yurusalɛmu à gɛ̀ɛ Gaza sɛ́, zɛ́ kũ à bɔ̀tɛ gbárannan. 27Akũ à dà zɛ́n. Etiopia gbɛ̃ke tɛ́ zɛ́ pìn. Etiopia bùsu saraunia kũ òdi pinɛ Kandase bɛgwariimɛ, a aruzɛkɛ dãkpãrinɔ gbɛ̃ zɔ̃kɔ̃ɔmɛ. À sù à donyĩ kɛ̀ Yurusalɛmu, 28akũ à ɛ̀ra àtɛn tá à vutɛna a sɔ̃go gũn, àtɛn annabi Isaya takada kyó kɛ. 29Akũ Luda Nini pì Filipinɛ: Ǹ gɛ́ ǹ na sɔ̃go direi. 30Akũ Filipi bàa lɛ̀ à gɛ̀ɛ. À mà àtɛn annabi Isaya takada kyó kɛ, akũ à a là à pì: Ń kyó kũ ntɛn kɛ bɔkɔtɛ dɔ̃ yá? 31À wèa à pì: Tó gbɛ̃ke dí a bɔkɔtɛmɛnɛro, mani fɔ̃ mà a dɔ̀rɔ dɔ̃ yá? Akũ à Filipi sìsi à gɛ̃̀ à vùtɛ a sarɛ. 32Yã kũ àtɛni a kyó kɛ pìin dí:

Lán sã kũ òtɛn gɛ́ a kùtu kpá bà,

lán sãnɛ bɔ̀rɔ kũ òtɛni a kã kɛ̃ bà,

à yĩtɛ kpɛ̃n adi lɛ́ wɛ̃kɔ̃aro.

33Ò wé'i dàa,

odi yãkpatɛ kɛ kãao a zɛ́aro.

Dí mɛ́ ani fɔ̃ à a gɔrɔ bire yã oo?

Zaakũ ò a wɛ̃̀ndii bò andunia gũn.

34Akũ gɔ̃gbɛ̃ pìi pì Filipinɛ: Ǹ omɛnɛ, dí musun annabi yã bire òo? A zĩdan yá ke gbɛ̃ pãndemɛ? 35Naana Luda yã pìia Filipi Yesu baaru nna kpànɛ. 36Kũ òtɛn gɛ́ arɛ, ò kà í ke kĩnaa, akũ gɔ̃gbɛ̃ pìi pì: Ǹ í gwa la. Bɔ́ mɛ́ ani kpámɛnɛ mà da'itɛ kɛɛ? 37Akũ Filipi pìnɛ: Tó n yã pìi sì kũ nɛ̀sɛ mɛ̀n doo, ĩni fɔ̃. À wèa à pì: Ma sì kũ Yesu Kirisi bi Luda Nɛ́mɛ. 38Akũ à pì ò gó zɛ. Akũ ń pla ń pínki ò kìpa ò gɛ̃̀ ín. Akũ à a da'itɛ kɛ̀. 39Kũ ò bikũ̀ bara, akũ Dikiri Nini Filipi kpàgui, gɔ̃gbɛ̃ pì dí a e doro, akũ pɔnna gũn à dà zɛ́la. 40Filipi a zĩda è zɛ Azotu, akũ à gɛ̀ɛ à Yesu baaru nna kpà wɛ̃tɛ kũ wɛ̃tɛo ari à gɛ̀ɛ à kào Sizaria.

હાલમાં પસંદ કરેલ:

ZĨRINƆ 8: BB2005

Highlight

શેર કરો

નકલ કરો