ZĨRINƆ 9

Yesu bo à suna Solua

(Zĩr 22:6-16; 26:12-18)

1Gɔrɔ birea sɔ̃ Solu tɛn pɔ́ bo a yĩn, àtɛn yã pãsĩ o Dikiri ìbanɔ dɛdɛna yã musu. À gɛ̀ɛ sa'oriki kĩnaa, 2à gbɛ̀kaa à lá kɛ̃ Damasuku aduakɛkpɛdenɔnɛ à kpáawa, de tó à zɛ́ pì denɔ lè gwe, gɔ̃gbɛ̃nɔ kũ nɔgbɛ̃nɔ ń pínki, ani ń kũkũ à su kũńwo Yurusalɛmu. 3Kũ à dà zɛ́n, àtɛn gɛ́ à kà kãni kũ Damasukuo, akũ kãnto gupura bò ludambɛ à dàmala. 4À bò à lɛ̀tɛ, akũ à kòtoo mà à pìnɛ: Solu, Solu, bɔ́ mɛ́ à tò ntɛn wɛ́ tãmaa? 5Akũ à pì: Dímɛ n ũu, Dikiri? Akũ à wèa à pì: Makũmɛ Yesu kũ ntɛn wɛ́ tãa ũ. 6Ǹ futɛ ǹ gɛ̃ wɛ̃tɛ gũn, oni onnɛ yã kũ ĩni kɛ. 7Gbɛ̃ kũ òtɛn gɛ́ kãaonɔ gɔ̃̀ sã̀ii. Ò kòtoo pìi mà, ama odi gbɛ̃ke ero. 8Kũ Solu fùtɛ, à a wɛ́ wɛ̃̀, akũ adi gu ero. Akũ ò a kũ̀ a ɔa ò gɛ̀ɛ kãao Damasuku. 9À kɛ̀ gɔrɔ aakɔ̃ gu'enaa sari, adi pɔ́ blero adi í miro.

10Yesude ke kú Damasuku kũ òdi pinɛ Anania. Dikiri yã ònɛ wɛ́gupu'enaa gũn à pì: Anania. Akũ à wèa à pì: Makũn dí, Dikiri. 11Akũ Dikiri pìnɛ: Ǹ futɛ ǹ da zɛ́ kũ òdi pi Súsun ari Yudasi bɛ ɔnn ǹ Taasu gbɛ̃ kũ òdi pinɛ Solu gbɛka. Àtɛn adua kɛ gwe. 12Wɛ́gupu'enaa gũn à n e, n su n ɔ nàa de à gu e. 13Akũ Anania pìnɛ: Dikiri, ma mà ò gbɛ̃ pì yã ò dasi, lákũ à yã vãni kɛ̀ n gbɛ̃ kũ ò kú Yurusalɛmunɔnɛ nà. 14Sa'orikinɔ a gbà zɛ́ à gbɛ̃ kũ òtɛni n sísi lanɔ kũkũ. Abire yãin à sù. 15Akũ Dikiri pìnɛ: Ǹ gɛ́, zaakũ ma gbɛ̃ pìi sɛ̀ à gɛ́ ma tɔ́ bo buri pãndenɔnɛ kũ ń kínanɔ kũ Isarailanɔomɛ. 16Lákũ ani wɛ́tãmma le ma tɔ́ yãi nà mani mɔnɛ. 17Akũ Anania bò à gɛ̀ɛ à gɛ̃̀ ɔn pìn, à ɔ nà Solua à pì: Solu ma gbɛ̃, Dikiri Yesu kũ à bò à sùmma zɛ́n gɔrɔ kũ ntɛn su la, àkũ mɛ́ à ma zĩ de ǹ gu e Luda Nini summa yãi. 18Gwe gɔ̃̀nɔ pɔ́ bɔ̀tɛ a wɛ́n lán kpɔ̀tɛkɛɛ bà ò lɛ̀tɛ, akũ à gu è. Akũ à fùtɛ à da'itɛ kɛ̀. 19Kũ à pɔ́ blè, à gbãna kũ̀.

Solu waazikɛna zaa Damasuku

Solu gɔrɔ pla kɛ̀ kũ Damasuku Yesudenɔo, 20akũ à nà Yesu yã waazikɛnaaa gɔ̃̀nɔ Yudanɔ aduakɛkpɛnɔ gũn, à pì Yesu bi Luda Nɛ́mɛ. 21Yã pìi bò gbɛ̃ kũ ò mànɔ sarɛ ò pì: Gbɛ̃ bire mɛ́ adi gbɛ̃ pìi sìsirinɔ ásaru kɛ Yurusalɛmuroo? Àkũ mɛ́ adi su la à ń kũkũ à tá kũńwo sa'orikinɔ kĩnaaroo? 22Solu sɔ̃, a gbãna dìgɔ̃ kara, akũ a yã Yuda kũ ò kú Damasukunɔ fù à bìriańnɛ kũ Yesu bi Arumasihumɛ.

23Gɔrɔ pla gbɛra Yudanɔ lɛ́dokɔ̃nɔ kɛi ò a dɛ, 24akũ à ń lɛ́kpakũsũnaai pìi mà. Òtɛn wɛ̃tɛ bĩnilɛnɔ dãkpã fãnantɛ̃ kũ gwãanio de ò a dɛ yãi. 25Gwãanin Solu gbɛ̃nɔ a dà tãnkon ò a gbàrɛ kũ bàao bàai bona bĩni musu.

Solu waazikɛna zaa Yurusalɛmu

26Kũ à kà Yurusalɛmu, à wɛ̀tɛ à na Yesudenɔa, akũ ò vĩna kɛ̀nɛ ń pínki, odi a Yesudekɛna náani kɛro. 27Akũ Baanaba a sɛ̀ à gɛ̀ɛ kãao zĩ̀rinɔ kĩnaa, à gbã̀ńnɛ lákũ Solu Dikiri è zɛ́n nà kũ yã kũ Dikiri ònɛɛo kũ lákũ à Yesu yã ò gupuraa nà zaa Damasukuo. 28Akũ Solu gɛ̃̀ ń tɛ́ à kurè kũńwo Yurusalɛmu à yã ò gbɛ̃nɔnɛ kũ Dikiri tɔ́o gupuran. 29Kũ à yã ò Yuda Girikiyãmarinɔnɛ à lɛ́kpakɔ̃a kɛ̀ kũńwo, akũ òtɛn wɛtɛ ò a dɛ. 30Kũ a gbɛ̃nɔ dɔ̃̀, ò zɛ̀nɛ Sizaria, akũ à tà Taasu.

31Abire gbɛra sɔsi gbɛ̃ kũ ò kú Yudea kũ Galilio kũ Samaria bùsuuonɔn kun aafia pínki. Òtɛn gbãna kũ òtɛn gɛ́ arɛ vĩnakɛna Dikirinɛɛ gũn, òtɛn kara kũ Luda Nini ń nɛ̀sɛ kpàtɛńnɛ yãi.

Ainɛa werekɔ̃anaa

32Pita dì kure wɛ̃tɛ kũ wɛ̃tɛo pínki, akũ à gɛ̀ɛ Luda gbɛ̃ kũ ò kú Lidanɔ gwa. 33À gɔ̃gbɛ̃ kũ òdi pinɛ Ainɛa è gwe, à kɔ̃̀nɔ kù katɛna wɛ̃̀ sɔraakɔ̃. 34Akũ Pita pìnɛ: Ainɛa, Yesu Kirisi n werekɔ̃a. Ǹ futɛ ǹ n pɛ̀ koko. Akũ à fùtɛ gɔ̃̀nɔ. 35Lidadenɔ kũ Sarɔnudenɔ a è, akũ ò lìtɛ ò arɛ dɔ̀ Dikiria.

Tabita vuna gan

36Nɔgbɛ̃ Yesude ke kú Yɔpa a tɔ́n Tabita, kũ Giriki yão sɔ̃ Dɔkasi. Tɔ́ pìi pì zɔ̃. Yã mana kɛnaa pɛ̀kɛrɛa, akũsɔ̃ àdi takasidenɔ wɛ̃nda gwa. 37Gɔrɔ birean à gyã kɛ̀ à gà. Kũ ò a zú ò, ò a sɛ̀ ò wùtɛ kpɛ́ musu gũn. 38Yɔpa sɔ̃ à zã̀ kũ Lidaoro. Kũ Yesudenɔ mà Pita kú gwe, ò ń gbɛ̃nɔn planɔ zĩ̀a ò wɛ́ kɛ̀a ò pì: Ǹ mɔ́ ó kĩnaa likalika. 39Akũ Pita fùtɛ à gɛ̀ɛ kũńwo. Kũ à kà, ò dìdi kãao kpɛ́ pìi musu. Akũ gyaanɔnɔ nài ń pínki kũ ɔ́ɔdɔo, ò uta kũ pɔ́kasa kũ Tabita kɛ̀ gɔrɔ kũ à kpɛ́ kú kũńwonɔ mɔ̀nɛ. 40Pita pɛ̀ḿma à ń bɔ́tɛ bàai. À kùtɛ à adua kɛ̀, akũ à arɛ dɔ̀ gɛ̀ɛ pìia à pì: Tabita, ǹ futɛ. Kũ à wɛ́ wɛ̃̀, à Pita è, akũ à vùtɛ. 41Pita a kũ̀ a ɔa à a fùtɛ à a zɛ̀. Akũ à Luda gbɛ̃ pìnɔ sìsi kũ gyaanɔnɔ, akũ à a kpàḿma bɛ̃nɛ. 42Yã pìi dà Yɔpala pínki, akũ ò Dikiri náani kɛ̀ gwe dasi. 43Pita gɔrɔ pla kɛ̀ gwe Simɔ Ãna bɛa.

હાલમાં પસંદ કરેલ:

ZĨRINƆ 9: BB2005

Highlight

શેર કરો

નકલ કરો