Yoana 4
4
Yeso o nkitok ee Samaria
1-3Nening ꞉Lparisayo aajo kore Yeso naa keipatisicho, netumuto looiteng'eni kumo alang Yoana. Naa mara apa Yeso oipatisita, kake looiteng'eni lenyena. Kore payie eyielou Yeso ajo eteyieloutua ꞉Lparisayo, neing'uaa Yudea nerrinyo alo Galilaya. 4Naa meatae ajo meimaa apa ꞉ninye Samaria eloito.
5 #
Ng'as 33:19; Yoch 24:32 Kore payie ebaki Samaria nelo lkerenket oji Sikar, onyikita lchampa oichoo ꞉Yakobo layieni lenye oji Yosep. 6Ketii apa lare le Yakobo inie, naa kore tankaraki nainaura Yeso, newuon to nkutuk e ilo are. Kore inia kata, naa matejo saai tomon oare e nteipa.
7Nelotu ntomononi nabo ee Samaria aoku nkare, nejoki ꞉Yeso, <<Nchooki nkare namat.>> 8Ketiaka apa ꞉Yeso ninye nejia, amu kechomo duo looiteng'eni lenyena lkerenket aainyiang'u ndaa.
9 #
Esr 4:1–5; Neem 4:1,2 Kore amu mechulare apa ltung'ana loo Lyiaudi ltung'ana loo Samaria, newoliki ꞉inia tomononi ajoki, <<Aji inko payie kiomon nkare, iyielo ajo loo Lyiaudi ira, nara noo Samaria?>> 10Nejoki ꞉Yeso, <<Tanaa iyielo nkichooroto e Nkai, nintoki ayielo ajo ng'ae ele likijokita, <Nchooki nkare namat>, anata itoomono iyie ninye, naa ikincho iyie ꞉ninye nkare e nkichui.>> 11Nejoki ꞉inia tomononi, <<Lkitok, kore ele are naa kegut, nimiata loket liokunyie. Aji itumie inia are e nkichui? 12Aa, ira dei iyie kitok alang akuyia lang Yakobo oichoo iyioo ele are, netamata ninye koon o layiok lenyena o suom enyena?>> 13Newoliki ꞉Yeso ajoki, <<Kore pooki ng'ae omat ana are naa keitoki ꞉nkure atir, 14kake kore pooki ng'ae omat inia are naicho kenya, nemetiru ꞉nkure aikata. Neaku inia are kenya naicho ninye lchoro oijirrijirru taatua ninye, neicho nkichon ee ntarasi.>> 15Nejoki ꞉inia kitok, <<Lkitok, nchooki nanu inia are payie maaigil nkure atir, namaitoki alotu aoku nkare tene.>> 16Nejoki ꞉Yeso, <<Chomo mpotu lpayian lino, nichukunyie.>> 17Nejo, <<Maata nanu lpayian.>> Nejoki ꞉Yeso, <<Kedede taa inia nitejo miata lpayian, 18amu iata apa iyie lewa imiet, naa kore abaki liata taata mara lpayian lino. Kore naa nijoito, naa kedede.>> 19Nejoki, <<Lokitok, kadol taa ajo loiboni ira iyie. 20Kore apa loo papa lang naa kesai Nkai te ele donyuo, kake ijoitoto ntae Lyiaudi meatae nkae ng'oji nesayieki mara ake Yerusalem.>> 21Nejoki ꞉Yeso, <<Natomononi rukooki, kelotu kenya nkata nimisaisai Papa te ele donyuo tanaa sii te Yerusalem. 22Kore ntae Samaria, naa isaisai inia nimiyielolo kake kore iyioo, Lyiaudi naa ikisai inia nikiyielo, amu kore njeunoto naa iyioo eing'uaa. 23Kake kelotuta nkata, neidipa ayeu, naa kore ꞉lolo osai Nkai te ndedei, naa kesai Papa ta ltau o te ndedei amu lolo oasai ninye aiko nejia eing'oru ꞉Papa. 24Kore Nkai naa nkiyeng'et, naa kore lolo oaasai ninye, naa meatae ajo payie mesai ta ltau o te ndedei.>> 25Nejoki ꞉inia kitok, <<Kayielo ajo kelotu ilo Aitejeunoni oanyutae, oji aitoki Kristo naa kore tenelotu, keiteng'en iyioo mbaa pooki.>> 26Nejoki ꞉Yeso, <<Kore ilo lijoito, naa nanu, ninye taa ele likirorie.>>
27Kore te inia kata nebau looiteng'eni le Yeso, neing'asia payie etum ninye eirorie ntomononi. Kore eyia, meatae lobo otiaka, <<Nyo iyieu?>> tanaa <<Aanyo payie irorie ana tomononi?>>
28Kore inia kata neing'uaa ꞉inia kitok loket, nerrinyo alo lkerenket, nejoki ltung'ana, 29<<Wootu entodol ltung'ani laatilika mbaa pooki nataasa. Kebaki sa naa ninye ilo Kristo?>> 30Neipung'u ninche taatua lkerenket aapuo netii ninye.
31Kore echomo inia tomononi lkerenket, nelej ꞉looiteng'eni lenyena aajoki, <<Laiteng'enani, tama ndaa!>> 32Kake nejoki ꞉Yeso ninche, <<Kaata ndaa nanya nimiyielolo netiu.>> 33Nejokino looiteng'eni lenyena, <<Mara meatae ꞉ltung'ani oyaka ninye ndaa?>> 34Nejoki ꞉Yeso, <<Kore naaitiemu nanu naa payie aas nayieu ilo laaterewua, naidip siaai lenye. 35Aa mijiejo, <Ewuon eng'or lapatin oong'uan payie eng'asuni aadung lchampai.> Kake kajoki ntae, entaapu nkonyek inchi eng'ura lchampai! Keoto neiririkinete payie edung'i! 36Kore abaki taata, ketumuto loodung'uto lchampa laata, ebosuta lng'anayio le nkichon ee ntarasi, metaa kore ilo oun o ilo odung lchampa neng'ida tenebo. 37Neaku kedede apa ana natejoki, <Keun lobo, nedung likae.> 38Naa kairruayie ntae entudung neitu iunun, naa ketonyua apa lkulikae aas siaai ogol, niwaita lng'anayio le nkinyinyiret enche.>>
Eiruko Samaria kumo
39Kore lkumo laa Samaria le ilo kerenket naa keiruko Yeso tankaraki nadei limunoto natejo inia kitok, <<Kaatilika mbaa pooki nataasa apake.>> 40Kore payie epuonu lolo Samaria netii Yeso, neomon metowuana tenebo o ninche, nebik mperot are te inie. 41Neiruk aitoki lkulikae kumo, tankaraki lkilikuai lenye. 42Nejoki naa ꞉ninche inia kitok, <<Mekure kiruk tankaraki inia nitejo ake, amu kitining'okita ate, nikiteyielo aajo ee ninye taa Laitejeunoni le nkop.>>
Eichiunyie ꞉Yeso layieni la larikoni
43Kore tesiedi nenia perot are, neing'uaa ꞉Yeso inie, nelo Galilaya. 44#Mat 13:57; Mrk 6:4; Luka 4:24Naa ketejo apa ninye nchere, <<Meyanyiti loiboni to nkop enye.>> 45#Yoa 2:23Kore apa lolo tung'ana le Galilaya, naa ketoduaa nenia pooki naataasa ninye te Yerusalem ng'amata e ntasim e Pasaka, amu ketii apa ninche inie. Inia paa kore payie ebau Yeso Galilaya, neitoomon ꞉ninche ninye.
46 #
Yoa 2:1–11
Neitoki Yeso arrinyo Kana e Galilaya, inie apa neibelekenyie nkare metaa naichuo. Kore inia kata netii Kapernaum lkitok le sirikali omuai nkerai enye. 47Kore payie ening ajo keyewuo Yeso Galilaya eing'uaa Yudea, nelo netii, neomon metodoi alo aichiunyie layieni lenye, amu ketaa payie edung'o tau. 48Nejoki ꞉Yeso, <<Kore tanaa midoldol asat naaitodolu nkitoo naata o mbaa e nking'asia naa mirukuruk aikata.>> 49Nejo ilo kitok le sirikali, <<Lokitok, todou tenebo o nanu ewuon eitu eper nkerai ai.>> 50Nejoki ꞉Yeso, <<Chomo, amu keichu layieni lino.>> Neiruk ꞉ilo tung'ani ilo rerei otiaka ꞉Yeso, nelo. 51Kore eibung'uta nkoitiei adoyio alo nkang, nenang'are ꞉laisiaayiak lenyena eata lkilikuai ejo, keichiuwua layieni lenye.
52Neipar ninche nkata natang'asua ilo ayieni lenye asupatu, nejoki, <<Saa nabo e nkuarie ng'ole etung'ayie ninye ꞉nkirewua.>> 53Neparru papa lenye ajo inia saa ake etiaka ninye ꞉Yeso, <<Keichiu layieni lino.>> Neiruk ꞉ninye tenebo o nkang enye pooki. 54Naa ana asata e nking'asia e are naitodolu nkitoo e Yeso nataasa payie elotu Galilaya eing'uaa Yudea.
હાલમાં પસંદ કરેલ:
Yoana 4: saq
Highlight
શેર કરો
નકલ કરો
Want to have your highlights saved across all your devices? Sign up or sign in
© 2021, Bible Translation and Literacy
