Yoana 3
3
Yeso o Nikodemo
1Kake keatae apa larikoni loo Lyiaudi oji Nikodemo, oara lobo loo Lparisayo. 2Nelo ninye nkuarie nabo netii Yeso nejoki, <<Laiteng'enani, ikiyielo aajo netii Nkai ing'uaa, niyewuo aiteng'enicho. Amu meatae ltung'ani oidim ataasa nkitodolunot e mbaa e nking'asia niasita tenemetii Nkai tenebo.>> 3Newoliki ꞉Yeso ajoki, <<Kaajoki sipata nadede, meatae hoo ltung'ani odol nkitoria e Nkai mara ketiiwuaki nkata e are#3:3 Kore ketiiwuaki nkata e are naa kejo Yoana ketiiwuaki te keper. Kore inia, naa keitodolu inoto naing'uaa Nkai..>> 4Neipar ꞉Nikodemo ajoki, <<Amaa, aji eikoni teneini ltung'ani etaarrarra? Keidimai sa payie eigil ajing nkocheke e ng'otonye metiini nkata e are?>> 5Newoliki ꞉Yeso ajoki, <<Kaajoki sipata nadede, meatae ltung'ani ojing nkitoria e Nkai teneitu eini ta nkare o ta Ltau Sinyati. 6Kore loiu ꞉ltung'ani naa le sesen, naa kore loiu ꞉Ltau Sinyati naa la Ltau. 7Ming'asia naa tankaraki naatiaka, meata hooyia payie meini ntae nkata e are. 8Kore siwuo naa kelo mbata pooki nayieu. Naa ining ltoilo lenye, kake miyielo neing'uaa o neloito. Naa nejia etiu pooki ng'ae oiu ꞉Ltau le Nkai.>> 9Neipar ꞉Nikodemo ajoki, <<Aji eiko ana teneasai?>> 10Newoliki ꞉Yeso ajoki, <<Ira iyie laiteng'enani oyanyiti te Isirael, nimiyielo kuna baa? 11Kaajoki sipata nadede, kore inia nikiyielo naa ninye kiro, nikilimu sipata e inia nikitoduaa, niming'amaa ntae. 12Amaa tanaa mikirukuruk nanu tanaliki ntae ntokitin naipirita ana kop, aji inkoko tinikirukuruk tanaliki ntae ntokitin e chumata? 13Nemeatae hoo lobo oiliepa alo chumata metaa keidim atilimu sipata ee mbaa e chumata, mara ake Nkerai e Ltung'ani, natodowua eing'uaa chumata. 14#Nki 21:9Naa kore ana nailiepie ꞉Musa lasurai le surutiai to lkees, meata ajo meiliepieki Nkerai e Ltung'ani, 15paa kore pooki ng'ae oiruk ninye netum nkichon ee ntarasi.>>#3:15 Ketii ltung'ana oojo kore rereii oiroro Yeso naa kebaki lkereri le 21.
16Amu nchi etiu nchaman natachama ꞉Nkai nkop, nchere keicherua Nkerai enye ake nabo inoti, paa kore pooki ng'ae oiruk ninye, nemeidaaya kake ketum nkichon ee ntarasi. 17Amu eitu eirriu ꞉Nkai Nkerai enye nkop meiguanare nkop, kake payie etum nkop atejeunyie ninye.
18Kore pooki ng'ae oiruk ninye nemedung'okini nkiguana torno, kake kore pooki ng'ae lemeiruk neidipaki aatudung'oki nkiguana torno, tankaraki neitu eiruk inia Kerai ake nabo inoti e Nkai. 19Naa tankaraki ana payie etudung'oka ꞉Nkai ltung'ana nkiguana torno: nchere eyewuo wong'an nkop, kake ketachama ltung'ana naimin neibai wong'an, tankaraki nara asat enche torrok. 20Amu kore pooki oasita ntorrok naa keiba wong'an, nemeipung'oki ninche wong'an, amu meyieu neibalunyieki asat enche torrok. 21Kake kore ilo laa kore asat enyena naa ne ndedei, nelotu netii wong'an, payie eibalunyie ꞉wong'an nchere kore nenia naataasa ꞉ninye naa taatua Nkai etaasa.
Yeso o Yoana Laipatisani
22Kore tesiedi, nelo Yeso o looiteng'eni lenyena nkang'itie naatii inia kop e Yudea, nebik teinie nkiti kata o ninche, eipatisicho. 23-24#Mat 14:3; Mrk 6:17; Luka 3:19,20Kore apa inia kata, naa ewuon eitu epiki Yoana jila, naa inia payie eipatisicho sii ninye to ng'oji neji Ainon nanyikita Salim, tankaraki ketii apa inie nkare kitok, nepuonuta ltung'ana netii ninye neipatisi.
25Kore mparri nabo neng'asu looiteng'eni le Yoana aichankarra o likae Yiaudii taa mbaa naipirita ntasimi e nkutuko enche. 26Nepuo netii Yoana nejoki, <<Laiteng'enani, kore lapa tung'ani otii tenebo o iyie to ildo kokun le Yordan, ilo apa litilimua sipata enye, naa keipatisicho ꞉ninye, nepuoito ltung'ana pooki netii!>> 27Newoliki ꞉Yoana ajoki, <<Meatae ntoki naaidim ltung'ani atang'amai teneitu eichori te chumata. 28#Yoa 1:20Iatata ntae maate sipata nchere katejo, <Mara Kristo, kake kaaterewuaki tekue ninye.> 29Kore loyemicho naa ꞉ilo orikito nkaibartani, kake kore lchapukerra naa keitache ainining'icho, neng'ida tenening ltoilo lo loyemicho. Naa nejia etiu ng'ida ai, naa ketoboreyia. 30Meatae ajo meaku ninye kitok alang nanu, naaku nanu kini te ninye.>>
Ilo oing'uaa keper oisul pooki
31Kore ilo oing'uaa keper naa ꞉ninye oisul pooki. Naa kore ꞉ilo oing'uaa nkop naa le nkop ninye, neiro mbaa e nkop. Kake kore ꞉ilo oing'uaa chumata naa keisul pooki. 32Kelimu ninye sipata e inia natoduaa o natining'o, kake meitoki natang'amayie lkilikuai lenye. 33Naa kore pooki ong'amaa inia limunoto, neiken ajo kesipa Nkai. 34Amu kore ilo oirriwua Nkai, neiro rerei le Nkai, neichoo ninye Ltau Sinyati te risoroto nemeiting. 35#Mat 11:27; Luka 10:22Naa kore Papa, kecham inia Nkerai enye. Netipika ntoki pooki taabori nkitoria enye. 36Kore pooki oiruk Nkerai e Nkai neata nkichon nemeiting. Naa kore pooki lemening inia Kerai nemeichamcham inia nkichon, kake kore ngoro e Nkai naa kewuenie ninye.
હાલમાં પસંદ કરેલ:
Yoana 3: saq
Highlight
શેર કરો
નકલ કરો
Want to have your highlights saved across all your devices? Sign up or sign in
© 2021, Bible Translation and Literacy
