Yoana 13
13
Eituko ꞉Yeso looiteng'eni lenyena nkejek
1Kore ewuon eng'or ntasim e Pasaka, keteyielo Yeso ajo ketabawua saa enye payie eing'uaa ana kop nelo netii Papa lenye. Naa kore tankaraki nacham ꞉Yeso lolo lenyena tana kop, neitodol nchaman ana metua.
2Kore apa inia kata enyeita Yeso o looiteng'eni lenyena ndaa e teipa, keidipa Chitani atipika mparrunot Yudas layieni le Simon Isikariot, metilikoi Yeso meibung'i. 3Neyielo Yeso ajo keichoo ꞉Nkai ninye meitoria pooki toki, neyielo abaki ajo keing'uaa netii Nkai, netaa payie elo netii ninye. 4Neinyuototo ꞉Yeso aing'uaa inia daa, neitai nanka e oriong naichopito, nerrapu nanka najutoreki, neirrinaki nkiji. 5Neitoki abukoki nkare karai naitukoreki, neng'asu aituk looiteng'eni lenyena nkejek, nejut metoito tanaduo anka nairinakino nkiji. 6Nelotu netii Simon Petero, nejoki ꞉Petero, <<Laitoriani, aaku intuk iyie nkejek ainien?>> 7Newoliki ꞉Yeso ajoki, <<Miyielo iyie ana naasita taata, kake iyielou tesiedi kuna baa.>> 8Nejo Petero, <<Miintuk aikata nkejek ainien!>> Newoliki ꞉Yeso ajoki, <<Kore tanaa maituk nkejek inono, naaku miata iyie nchula o nanu.>> 9Newoliki ꞉Simon Petero ajoki, <<Laitoriani, mintuk nkejek ainien aapeny, kake intuko abaki nkaik o nkue ai!>> 10Nejoki ꞉Yeso, <<Kore ltung'ani oitukie naa keisupat katukul, nkejek ake eyiere neituk. Irara ntae supati, kake ketii lobo linchi lemeisupat.>> 11Kore amu keyielo apa Yeso ajo ng'ae olikoo ninye, inia payie etejo, <<Mara ninche pooki supati.>>
12 #
Luka 22:27
Kore payie eidip Yeso aituko nkejek enche neichop nanka enye e oriong, nerrinyo misa. Neipar ninche ajoki, <<Iyielolo inia naitaasa ntae? 13Ikimpotpot ntae nanu aajo <Laiteng'enani> o <Laitoriani>, naa kedede inia amu kara Laiteng'enani nara sii Laitoriani. 14Naaku tanaituko nanu oara Laitoriani o Laiteng'enani linchi nkejek inchi, keichiaakino sii nintukoko ntae nkejek. 15Aichoo nanu ntae nkitanyanyukoto niduayaya, payie iasias ake inia naitaasa ntae. 16#Mat 10:24; Luka 6:40; Yoa 15:20Kajoki ntae sipata nadede, meatae rrindik oara kitok alang lkitok lenye, nemeatae sii lkipaaret oara kitok alang ilo oipaayie ninye. 17Kore tanaa iteyieloutua kuna baa, naa imayianana tiniasias!
18 #
SNk 41:9
<<Mara ntae pooki eipirita ana najoito, kayielo nanu lolo lategelua. Kake keasai ana payie ebaya Lkigerot oojo, <Kore ilo likitang'ara ndaa tenebo, naa ninye oiwuatuwaute aaku lmang'antita lai> 19Katilika ntae ana ewuon eitu easai, paa kore etaase kenya nirukuruk aajo kara nanu ilo lara. 20#Mat 10:40; Mrk 9:37; Luka 9:48, 10:16Kajoki ntae sipata nadede, kore pooki ng'ae ong'amaa ilo lairruaya, naa nanu etang'amayie, naa kore ilo laang'amaa nanu naa ilo laairriwua etang'amayie.>>
Etilimua Yeso ewuon eng'or nkata ajo keibung'i
(Matayo 26:20–25; Marko 14:17–21; Luka 22:21–23)
21Kore payie eidip Yeso atejo nenia baa, nenyamalu ta ltau, nelimu sipata enye ejoki looiteng'eni lenyena, <<Kajoki ntae sipata nadede, kore lobo linchi naa kaalikoo maaibung'i.>> 22Neing'ura looiteng'eni lenyena, eing'aing'ai ejo ng'ae sa ejoito. 23Kore lobo lenche, ilo oiteng'eni oacham ꞉Yeso, naa kewuenita aibung'are Yeso. 24Neroj ꞉Simon Petero ninye, meipara ajo ng'ae eimakita. 25Neirichakino ilo oiteng'eni lgoo le Yeso neipar ajoki, <<Laitoriani, ng'ae dei ilo?>> 26Newoliki Yeso ajoki, <<Kaitodoki ana mukate ncharaa naa kore ilo lairruaki, ninye taa ilo laimakita.>> Kore payie eitodoki inia mukate ncharaa, nerrapu, neirruaaki Yudas, layieni le Simon Isikariot. 27Kore ake payie eng'amaa Yudas inia mukate nejing ꞉Chitani atua ninye, nejoki ꞉Yeso, <<Tesioki taasa inia niyieu nias!>> 28Meatae lobo too lolo otii inia misa oteyielo ajo, aanyo payie etiaka ꞉Yeso ninye nejia. 29Kore naa amu Yudas apa laing'urani lo lbene loo ropiyiani, nejo lbata loo looiteng'eni lenyena, kebaki naa ketiaka ꞉Yeso Yudas, meinyiang'u ntokitin naayieu tankaraki ntasim, tanaa sii meichoo laisinak nkuti ropiyiani. 30Kore ake payie eidip Yudas atang'amai inia mukate neipung nabokata. Naa keikuarie inia kata.
Nkitanapata ng'ejuk
31Kore payie elo Yudas, nejo Yeso, <<Taata taa eiliepieki Nkerai e Ltung'ani, naa keiliepieki Nkai te ninye. 32Naa kore amu keiliepieki Nkai te ninye, naaku keiliepie sii ꞉Nkai Nkerai e Ltung'ani to koon, naa keas inia nabokata. 33#Yoa 7:34Nkera ainien, ewuon ake atii tenebo o ntae nkini kata. Ikiyiaya kenya nanu, naa kore ana natiaka apa larikok loo Lyiaudi nchere, <Kore inie naloito, mindimdim aaotu>, ninye aitoki ajoki ntae. 34#Yoa 15:12,17; 1Yoa 3:23; 2Yoa 1:5Ana nkitanapata ng'ejuk naichoo ntae, entachamata. Kore ana natachama nanu ntae, entachamata sii ntae. 35Kore tinichamama, neyielou ltung'ana pooki inia kata aajo irara looiteng'eni lainien.>>
Etilimua Yeso ewuon eng'or nkata ajo kemiki ꞉Petero
(Matayo 26:31–35; Marko 14:27–31; Luka 22:31–34)
36Neipar ꞉Simon Petero Yeso ajoki, <<Laitoriani, kaji dei iloito?>>
Newoliki ajoki, <<Kore ng'oji naloito, mikindim airukurukore taata, kake kore tesiedi naa ikirukurukore.>>
37Neitoki Petero ajoki, <<Laitoriani, aanyo payie maairukurukore iyie taata? Katerretene payie aye tankaraki iyie!>>
38Newoliki ꞉Yeso ajoki, <<Itudung'o iyie payie iye tankaraki nanu? Kaajoki iyie sipata nadede, kore ewuon eitu eiru lkoko naa ikimiki nkatitin uni ajo mikiyielo.>>
હાલમાં પસંદ કરેલ:
Yoana 13: saq
Highlight
શેર કરો
નકલ કરો
Want to have your highlights saved across all your devices? Sign up or sign in
© 2021, Bible Translation and Literacy
