Yoana 12
12
Eela ꞉Maria Yeso ta lata narropili te Betania
1Kore eng'or mperot ile payie ebaki ntasim e Pasaka, nebaki Yeso Betania, inie nemanya Lasaro, ilo tung'ani apa oitipiwua ꞉Yeso too lootuata. 2Neitibiraki ꞉ninche Yeso ndaa e teipa teinie. Kore Marta, neichooyo ndaa netii sii Lasaro aa lobo loo lolo oowueni te misa tenebo o Yeso. 3#Luka 7:37,38Nerrapu Maria lkidong obore lata narok narropili naji nardo, nagol nkinyiang'a oleng, neelie nkejek e Yeso, nejut taa lpapit lenyena le nkue. Neiput ꞉rropili e inia lata nkaji pooki. 4Kake kore Yudas Isikariot, lara lobo loo looiteng'eni le Yeso, ilo laa ninye kenya olo alikoo Yeso nejo, 5<<Aanyo payie eitu emiri ana lata, aitam ropiyiani naawuana laata e lari obo, neichori nenia ropiyiani laisinak?>> 6Ketejo ninye ana mara tankaraki nayieuwuoki laisinak, kake tankaraki nara lapuroni. Ninye echi onap lbene loo ropiyiani, nepurroo ake chiaake ntoki napiki ilo bene. 7Kake newoliki ꞉Yeso ajoki, <<Tung'ai ninye, payie eisudoo inia natelekunye metaa ne mparri e nukaroto ai. 8#Nkit 15:11Icheche ake aata laisinak tenebo o ntae kake mikicheche aata nanu.>>
Netaasa laitainok kutuaa la lasar tankaraki naitipiwua ꞉Yeso Lasaro
9Neyielou ltung'ana kumo loo Lyiaudi aajo ketii Yeso Betania, nepuo inie namara ake tankaraki Yeso, kake payie edol Lasaro, ilo tung'ani oitipiwua ꞉Yeso too lootuata. 10Nechamaa laitainok kutuaa la lasar aar Lasaro metua, 11amu tankaraki ninye payie epuoito ꞉ltung'ana kumo loo Lyiaudi neti Yeso, neiruk ninye.
Eisisa ꞉ltung'ana Yeso ejing'ita Yerusalem
(Matayo 21:1–11; Marko 11:1–11; Luka 19:28–40)
12Kore ta mparri naijipu inia payie ening ilo turrur kitok oyewuo inia tasim, aajo kelotuta Yeso Yerusalem, 13#SNk 118:25,26negilu ninche mbene e ltunkai, neipung aanang'are ninye, ebuakita aajo, <<Hosana! Emayiana ilo olotu ta nkarna e Laitoriani, Lkinkii le Isirael!>> 14Kore payie etum ꞉Yeso lkurrarru le sikiria nedir awuenie nkeper, ana naigeroki aajo,
15 #
Sak 9:9
<<Miurechio, ntito e Sion!#12:15 Kore ntito e Sion naa keipirita ltung'ana le Yerusalem.
Ng'ura, lele Lkinkii lino olotu,
ewuenie nkeper e lkuraru le sikiria.>>
16Eitu apa ening'u Looiteng'eni lenyena inia bae tekue, kake kore kenya payie eichopokini Yeso nkitoo sapuk, neparru aajo keigero kuna baa naipirita ninye neparru sii inia naitaasaki.
17Kore apa lturrur otii tenebo o Yeso payie eipot Lasaro to nkurarei neitipiu too lootuata, nepuo kue elikoo sipata e inia nataase. 18Inia payie eotuo ltung'ana kumo aanang'are Yeso, amu ketining'o inia bae e nking'asia naitodolu nkitoo enye. 19Nejokino Lparisayo, <<Meitoki taa katukul itumutoto! Eng'ura ja, etodotunyie ake nkop pooki airukurukore!>>
Neichiakino netiuu laisiaayiani le Yeso
20Kore apa lbata loo lolo tung'ana oochomo Yerusalem aasai Nkai ta nkata e ntasim, naa Lgirriki. 21Nepuo ninche netii Pilipo, ilo oing'uaa lkerenket le Betesaida otii Galilaya, nejoki, <<Lokitok, ikiyieu payie kidol Yeso.>>
22Nelo Pilipo aliki Andirea, nepuo pukura oare aaliki Yeso. 23Newoliki Yeso ninche ajoki, <<Etabawua taata nkata nailiepieki Nkerai e Ltung'ani. 24Kajoki ntae sipata nadede, kore teneitu edoki lantararai le nkano nkop neye, nebik ake era lantararai obo, kake kore tanaa keye neiu lantarara kumo. 25#Mat 10:39, 16:25; Mrk 8:35; Luka 9:24, 17:33Kore ilo oacham nkichon enye tana kop neiminie nkichui enye, kake kore ilo lemeiken nkichon enye aitaa toki tana kop, neisudoyie nkichui enye ntarasi. 26Kore ꞉pooki ng'ae laaisiaai nanu, nchoo sii elo kue airukurukore nanu, payie eaku kore natii nanu netii sii laisiaayiani lai. Kore ꞉pooki ng'ae laaisiaai nanu, naa keicho ꞉Nkai nkanyit.
Eruko wong'an ewuon etii tenebo o ntae
27<<Kenyamal taata ltau lai, naa kajua sa? Kajo sa, <Papa, ntejewuaki tana kata?> Majo amu, kore apa payie ayewuo, naa payie atum aimai ele sina. 28Papa, intodolu nkitoo e nkarna ino!>> Nelotu ltoilo oing'uaa chumata ejo, <<Kaidipa aitodolu, naa kaigil ake aitoki.>> 29Kore lturrur oitache teinie, nening ilo toilo, nejo lbata lenche, <<Keikurrukurro>>, kore lkulie nejo, <<Lmalaika oirorie ninye!>> 30Nejoki ꞉Yeso ninche, <<Mara tankaraki nanu payie etining'ie ilo toilo, kake tankaraki ntae. 31Kore taata, keiguanareki ana kop, naa taata emirari ilo oitore ana kop aaipung'ie aulo. 32Kake kore payie aailiepieki nanu tana kop#12:32 Kore aailiepieki nanu tana kop neipirita ncheto e Yeso to lmusalaba o payie eiliep alo chumata, nemeipirita nkisisa ana nadol ltung'ana kumo. , nayiataki koon ltung'ana pooki.>> 33Ketejo ninye ana aitodolu mpukunoto e lkiye oye. 34#SNk 110:4; Isa 9:7; Ese 37:25; Dan 7:14Nejoki ꞉ilo turrur, <<Ikitining'o eisomakini iyioo tee Nkitanapat e Nkai aajo, kebik ilo Aitejeunoni oanyutae ntarasi. Naaku, aji eiko payie ijo iyie keiliepieki Nkerai e Ltung'ani tana kop? Ng'ae dei inia Kerai e Ltung'ani?>> 35Newoliki ꞉Yeso ajoki, <<Ewuon etii wong'an tenebo o ntae te nkini kata. Naaku enchom iatata inia wong'an, payie meirachu ake ntae naimin. Amu kore ilo olo taatua naimin nemeyielo neloito. 36Kore ewuon iatata wong'an, eruko wong'an, payie iakuku nkera e wong'an.>> Kore payie eidip Yeso airoro neing'uaa inie, nelo aisudorie ninche.
Eitu eiruk ꞉ltung'ana kumo Yeso
37Kore abaki etaasa Yeso mbaa kumo e nking'asia naaitodolu nkitoo enye edolita ꞉ninche, neany ake eyia eiruk ninye. 38#Isa 53:1Ketaase ana payie ebaya lapa rerei lo loiboni le Nkai oji Isaya peejo,
<<Laitoriani, ng'ae oiruko lkilikuai lang,
naa ng'ae eibalakinyie ꞉Laitoriani nkaina enye nagol?>>
39Naaku tankaraki ana payie meidim aairuko, amu ketejo Isaya aitoki ta nkae ng'oji,
40 #
Isa 6:10
<<Keitomodoo ꞉Nkai nkonyek enche
neitogolo ltauja lenche,
payie meaku, kedol too nkonyek enche,
nening'u taa ltauja lenche,
neibelekenya,
naitejeu nanu ninche.>>
41Ketejo apa Isaya kuna baa tankaraki ketodua nowua nkitoo e Yeso, nelimu mbaa naipirita ninye.
42Kore siake etiu nejia, keiruko abaki ꞉larikok kumo loo Lyiaudi Yeso, kake eitu elimu aaibalie nkurukoto enche tankaraki naurie aajo kemiraa ninche ꞉Lparisayo aaipung'ie te Sinagogi. 43Amu kore apa ninche, kecham rrepeta ee ltung'ana aaitalang ne Nkai.
Kedung'oki ꞉Nkai ltung'ana nkiguana te rerei le Yeso
44Nebuak Yeso ajo, <<Kore pooki ng'ae laairuk nanu, naa mara ake nanu eiruko, kake keiruko abaki ilo laairriwua. 45Kore ilo laadol nanu, naa etoduaa ilo laairriwua. 46Kayewuo nanu aaku wong'an e nkop, paa kore pooki ng'ae laairuk nanu nemeitoki awuon taatua naimin. 47Naa kore tenening ltung'ani rereii lainien nemeibung, naa madung'oki nanu ninye nkiguana, amu eitu alotu adung'oki nkop nkiguana, kake kayewuo payie aitejeu. 48Kore ilo laany nanu namaang'amaa, naa keata lodung'oki ninye nkiguana, ilo rerei lairoro odung'oki ninye nkiguana ta mparri e nkiting'oto! 49Amu eitu airo rereii lainien makoon, kake Papa laairriwua naa ninye laaitanapa inia najo o nairo. 50Naa kayielo ajo kore naaitanapa Papa naa payie ayeu nkichon nemeiting. Naaku kore pooki najo, najo ake ana naatiaka Papa tejo.>>
હાલમાં પસંદ કરેલ:
Yoana 12: saq
Highlight
શેર કરો
નકલ કરો
Want to have your highlights saved across all your devices? Sign up or sign in
© 2021, Bible Translation and Literacy
