Yoana 11
11
Lkiye le Lasaro
1 #
Luka 10:38,39 Ketii apa ltung'ani oji nkarna enye Lasaro otomoyia, oamanya lkerenket obo kini oji Betania, inie nemanya sii Maria o nkanache enye Marta. 2#Yoa 12:3Kore apa Maria naa nkanache e ilo tung'ani oji Lasaro omuai. Naa ninye napa naelie Laitoriani lata narropili, nejut nkejek enyena taa lpapit lenyena. 3Neirruaaki ꞉nenia anachera Yeso lkilikuai aajoki, <<Laitoriani, kemuai sotua lino.>> 4Kore payie ening ꞉Yeso nejo, <<Kore ana moyian naa mara naya ninye, kake ketaase ana paa kore te inia moyian neisisi Nkai, nelioi nkitoo e Nkerai e Nkai.>> 5Kore apa Yeso naa kecham Marta o nkanache enye o Lasaro, 6naa kore payie ening ajo kemuai Lasaro, nebik teinie apa netii nkulie perot are.
7Kore payie eim nenia perot, nejoki looiteng'eni lenyena, <<Matirrinyoto aapuo Yudea.>> 8Nejoki ꞉looiteng'eni lenyena, <<Laiteng'enani, eji det dei ake kitejo Lyiaudi entar tua kinang too soito te inie, naaku inie intoki alo?>> 9Newoliki ꞉Yeso ajoki, <<Amaa, mara saai tomon oare natii mparkiji? Kore ltung'ani olo te mparkiji nemerrorro, tankaraki nadolita wong'an e ana kop. 10Kake kore pooki ng'ae olo te nkuarie naa kerrorro amu metii wong'an atua ninye.>> 11Kore payie eidip atejo inia, neitoki ajoki, <<Eilure sotua lang Lasaro, kake kalo ainyoyie ninye.>> 12Nejoki ꞉looiteng'eni lenyena, <<Laitoriani, tanaa keilura naa kesupatu.>> 13Kore ntoki naimakita Yeso naa lkiye le Lasaro, kake nejo looiteng'eni lenyena keimakita ajo keilure ake too njuo. 14Neipidaki ꞉Yeso aliki ajo, <<Ketua Lasaro. 15Naa kore tankaraki ntae, kang'ida amu matii apa inie tenebo o ninye payie itumtum aairuko. Kake maapetin inie netii.>> 16Nejoki ꞉Tomas, ilo oji Lmaoi, lboitieii loo looiteng'eni lenyena, <<Maapetin payie kiye tenebo o ninye!>>
Kera Yeso mpiunoto o nkichui
17Kore payie ebaki Yeso inie, neirrachu eata Lasaro mperot ong'uan taatua nkurarei. 18Kore apa Betania naa matejo kilomitani okuni ake etaaniki Yerusalem. 19Neotuo Lyiaudi kumo ooing'uaa inia bata aadol Marta o Maria, payie etum aaturumaki kop tankaraki lalache lenche. 20Kore payie ening Marta ajo kelotuta Yeso neipung alo anang'are, kake newuon Maria ta nkaji. 21Nejoki ꞉Marta Yeso, <<Laitoriani, tanaa iti apake ene, anata eitu eye lalache lai! 22Kake kore abaki taata kayielo ajo ikincho Nkai pooki niomonu.>> 23Nejoki ꞉Yeso ninye, <<Kepiu aitoki lalache lino.>> 24Newoliki ajoki, <<Kayielo dei ajo kepiu ta nkata naitipiuni ltung'ana ta mparri e nkiting'oto.>> 25Neitoki Yeso ajoki, <<Kara nanu mpiunoto o nkichui. Kore lolo lairuk nanu, abaki teneye, naa keichu, 26naa kore pooki ng'ae oichu, naairuk nanu nemeye aikata. Iruk iyie ana?>> 27Newoliki ajoki, <<Ee Laitoriani, kairuk ajo ira iyie ilo Aitejeunoni oji Kristo, Nkerai e Nkai, ilo olotu apa nkop.>>
28Kore payie eidip Marta atejo ana, nelo aipot nkanache enye Maria, nerojaki ajoki, <<Ketii Laiteng'enani ene naa ikimpotito iyie!>> 29Kore payie ening Maria inia, neinyuototo asioki, nelo netii Yeso. 30Kore inia kata, ewuon eitu elotu Yeso ajing'u laduo kerenket le Betania, kake etii ake naduo ng'oji netanang'are Marta. 31Kore payie edol laaduo tung'ana ooboitiere Maria ta nkaji aaitogol, aajo keipung'uto Maria asiooyo, neirukurukore ninye. Amu kejo apa ninche nkurarei eloito, aichir teinie. 32Kore payie ebaki Maria netii Yeso nedol ninye nerriakino nkejek enyena, nejoki, <<Laitoriani, tanaa itii apake ene anata eitu eye lalache lai!>> 33Kore payie edol ꞉Yeso Maria eichirita, nedol sii aitoki ajo keichirita ltung'ana le Yudea ooboitiere, neiseyie inia bae ltau lenye oleng, nenyamalu. 34Neipar Yeso ninche ajoki, <<Aji inteperie ninye?>> Newoliki aajoki, <<Laitoriani, wou todua!>> 35Neichir Yeso. 36Nejo laaduo Yiaudi ootuo aaitogol ninche, <<Eng'ura netiu nchaman nacham ninye!>> 37Kore lbata lenche nejo, <<Amaa ilo otobolo nkonyek e ilo tung'ani modooni, mara keidim aibooi Lasaro apa payie meye?>>
38Neiseyie aitoki inia bae ltau le Yeso oleng, nelo abaki nkurarei. Naa kore inia kurarei naa nkapune neikenoki nkutuk to soit. 39Nejo Yeso, <<Ewuang'ie soit!>> Kore Marta, nkanache ilo tung'ani otua, nejoki, <<Laitoriani, keisamisa taata amu mparri e ong'uan ana eper teinie!>> 40Nejoki ꞉Yeso, <<Mara kaatilika ajoki tanaa iruk naa idol nkitoo e Nkai?>> 41Neiwuang'ie ninche ilo soit. Neapu ꞉Yeso nkonyek aimariri chumata, nejo, <<Papa, kaicho nache tankaraki nikitining'o. 42Kayielo ajo ikining chiaake nkatitin pooki, kake atejo ana tankaraki kulo tung'ana ooitachoo tene, payie etum aairuko aajo ikirriwua iyie nanu.>> 43Kore payie eidip atejo inia, nebuak to ltoilo sapuk ejo, <<Lasaro, mpung'u!>> 44Kore ilo tung'ani otua nepuku eirina nkaik o nkejek too lkiiyat laa nankan, neirina sii aitoki nkomom enye ta nkae anka. Nejoki ꞉Yeso ninche, <<Entalaku, ninchocho mechomo.>>
Eteyiayieki Yeso aar metua
(Matayo 26:1–5; Marko 14:1,2; Luka 22:1,2)
45Kore lkumo laa laaduo tung'ana le Yudea ootuo aaisabaki Maria nedol nenia naataasa Yeso, neiruk ninye. 46Kake kore lbata lenche nepuo aaliki Lparisayo naataasa Yeso. 47Neicho laitainok kutuaa la lasar o Lparisayo, neipotu nkiguana e lkiama loo lpayiani nejo, <<Kaa taa kias? Keasita ele tung'ani mbaa kumo e nking'asia naaitodolu nkitoo enye! 48Kore tanaa ikincho ninye mechomo kue aiko nchi, neiruk ninye ꞉ltung'ana pooki, naa kepuonu ltung'ana le nkop ee Rroman near Ng'oji sinyati o ltung'ana lang!>> 49Kore lobo lenche oji nkarna Kayapas, laa ninye laitainoni kitok la lasar te ilo ari, nejo, <<Meitoki hooyia ining'ung'u ntae! 50Aa minkenken ntae aajo naikach teneye ltung'ani obo anang locho alang tenemuta locho pooki?>> 51Eitu ejo ninye ana bae makoon, kake kore nara ninye laitainoni kitok la lasar te ilo ari, neibonu ajo keye Yeso anang locho pooki. 52Namara ilo ocho apeny, kake payie eitoki ayau aitaa nabo nkera e Nkai naatasachari.
53Kore ang'asu inia parri, nechamaa larikok loo Lyiaudi aayiaya nkoitiei naarie Yeso metua. 54Naaku merekure eidim Yeso achomo taatua larikok loo Lyiaudi edolitae. Kake neing'uaa inie, nelo nkop nanyikita lkees nebaki lkerenket oji Epiraim, nebik teinie tenebo o looiteng'eni lenyena.
55Netinyikua inia kata ntasim e Pasaka, naaku kore ewuon eng'or nkata, nepuo ltung'ana kumo Yerusalem aaitorropil ate payie eaku keichiaakino inia tasim. 56Neyiaya Yeso, naa kore etii ninche nkaji e Nkai, neipara maate ejo, <<Kaa pasa ijoijo ntae? Melotu ꞉ninye ntasim?>> 57Kore laitainok la lasar o Lparisayo neitanapicho nchere teneatae ltung'ani oyielo netii Yeso, neliki ninche payie etum aaibung'a.
હાલમાં પસંદ કરેલ:
Yoana 11: saq
Highlight
શેર કરો
નકલ કરો
Want to have your highlights saved across all your devices? Sign up or sign in
© 2021, Bible Translation and Literacy
