Yoana 14
14
Kera Yeso nkoitiei o ndedei o nkichui
1<<Emincho ltauja linchi enyamalu, eruko Nkai nikirukuruk sii nanu. 2Kore nkaji e Papa, ketii lgilat kumo. Naa amaa tenemetiu duaake nejia, kaliki sa duaake ntae ajoki kalo inie aitibiraki ntae ng'oji? 3Naa kore paalo naidip aitibiraki ntae ng'oji, nachukunyie aitoki aya ntae natii, paa kore ng'oji natii nanu, naaku inie sii itii ntae. 4Kore inie naloito, naa iyielolo nkoitiei nalo.>>
5Nejoki ꞉Tomas ninye, <<Laitoriani, mikiyielo iyioo niloito iyie, naaku kaji kinko tinikiyielo nkoitiei?>> 6Nejoki ꞉Yeso, <<Kara nanu nkoitiei o ndedei o nkichui. Meatae hoo lobo olotu netii Papa mara nanu eimayie. 7Kore tanaa ikiteyieloto nanu, iyielou sii Papa lai. Kore ang'asu taata iyielolo ninye, nitoduaa sii ninye.>>
8Nejoki ꞉Pilipo, <<Laitoriani, ntoduaa iyioo Papa, naa keitiemu iyioo inia.>> 9Nejoki ꞉Yeso, <<Pilipo, kataa nanu tenebo o ntae nkata nabanyi, newuon ake mikiyielo? Kore pooki ng'ae laatodua nanu, naa Papa etodua. Aji naa inko payie ijo iyie, <Ntoduaa iyioo Papa>? 10Miiruk dei iyie ajo katii nanu atua Papa, netii Papa atua nanu? Kore rereii lajokita ntae, mairo makoon, kake Papa laatii atua oasita asat enyena. 11Erukooki nchere katii atua Papa, netii Papa atua nanu. Naa tinimikurukuruk te inia, erukooki naa tankaraki nenia asat. 12Kajoki ntae sipata nadede, kore ilo laairuk nanu naa keas sii ninye nenia asat naas nanu, neas abaki mbaa kutuaa naalang kuna, amu kaloito netii Papa. 13Naa kore pooki niomonunu ta nkarna ai naa kaitaas ntae, payie etum Papa nkisisa te Nkerai enye. 14Kore ntoki pooki nikiomonmon ta nkarna ai, naa kaas nanu.
Eitayia ꞉Yeso lekutuk la Ltau Sinyati
15<<Kore tanaa ikichamcham, nimbung'bung nkitanapat ainien, 16naa kaomon Papa meichoo ntae likae Aretoni, neicho metaa tenebo o ntae ntarasi. 17Kore ilo Aretoni naa Ltau oitodolu ndedei. Meidim nkop atang'amai ninye, amu medol nemeyielo. Kake iyielolo ntae ninye amu kewuon tenebo o ntae, nemany atua ntae. 18Maing'ua nanu ntae irara okichono, kake kalotu nitii. 19Kore te nkini kata, maaitoki ꞉nkop adol, kake kore ntae naa ikidoldol. Kore amu kaichu nanu, inchuchu sii ntae. 20Kore payie ebau inia parri, niyielouu aajo kati nanu atua Papa lai, nitii ntae atua nanu, natii sii nanu atua ntae. 21Kore loata nkitanapat ainien neibung, ninye laacham. Naa kore laacham, nechamu ꞉Papa lai, nachamu sii nanu ninye naibalakinyie koon.>>
22Nejoki ꞉Yudas, namara taa Yudas Isikariot, <<Laitoriani kaji eiko payie imbalakinyie iyioo koon, nimimbalakinyie nkop?>> 23Newoliki ꞉Yeso ajoki, <<Kore pooki ng'ae laacham nanu, naa keibung rerei lai, nechamu ꞉Papa lai ninye, nikipuonu neti, nikiwueni tenebo. 24Kore pooki ng'ae lamaacham nanu naa meibung rereii lainien. Amu kore ele rerei lining'itoto naa mara lai koon, kake keing'uaa Papa lai laairriwua.
25<<Katilika ntae kuna baa ewuon atii tenebo o ntae. 26Kore ilo Aretoni aa Ltau Sinyati, oreu ꞉Papa ta nkarna ai, naa keiteng'en ntae ntokitin pooki, neitoki sii aitaparru ntae mbaa pooki natilika apa ntae.
27<<Kaing'uaki naa ntae seriani, kaicho ntae seriani ai. Namaicho nanu ntae seriani ana neiko nkop teneicharu. Emincho ltauja linchi enyamalu, naa emiurieicho sii. 28Itining'o apa paajoki ntae, <Kaloito, naa kaitoki achukunyie alotu nitii.> Kore tanaa ikichamcham anata aa ing'idada tankaraki naloito neti Papa, amu keikitok ninye alang nanu. 29Katilika taata ntae ana ewuon eitu easai, payie teneasai nirukuruk. 30Merekure airorie ntae mbaa kumo, amu kelotuta ilo oitore ana kop. Meata ninye ngolon ta nanu, 31kake inia ake naaitanapa Papa aas, payie eyielou nkop ajo kacham nanu Papa. Enyuoto, matung'ai ene ng'oji.
હાલમાં પસંદ કરેલ:
Yoana 14: saq
Highlight
શેર કરો
નકલ કરો
Want to have your highlights saved across all your devices? Sign up or sign in
© 2021, Bible Translation and Literacy
