Mar 11
11
1Ku baiririire Yerusalemu, baahika Beetifaagye na Beetaniya, haihi n'Orushozi rw'Emioliva, Yesu yaatuma babiri aha batendekwa be, 2yaabagira ati: Nimwirooko muze omu kyaro ekibari omumaisho. Ku muraakihikyemu muti, nimwija kureeba omwana gw'endogoya ogutakatembwahoga muntu, gutsibikire; mugutsibure, mugureete. 3Ku haraagire owaababuuza ati: Nimugutsiburira ki? Mumugire muti: Mukama naagwenda kandi naija kugukugarurira juba. 4Mpaho baagyenda, baashanga omwana gw'endogoya gutsibikire haihi n'eirembo aha muhanda rugyendwa; baagutsibura. 5Abantu abaabaire beemereire aho baababuuza bati: Nimukora ki okutsibura ogwo mwana gw'endogoya? 6Banu baabagambira ebi Yesu yaabatuma; nabo baabareka baagyenda. 7Batyo baareetera Yesu ogwo mwana gw'endogoya, baagutaho eminagiro yaabo; yaagushutamaho. 8Abantu baingi baayarira emyenda yaabo omu muhanda, abandi amataagi gayumbize agu baacwire omu misiri. 9Kandi boona abaabaire beebembeire, na boona abaabaire bari enyima, baateera akaari bati: Hosaana! Ogwo orikwija omu iziina rya Nyakubaho ahimbisibwe! 10Obugabe bwa tatenkuriitwe Daudi oburikwija, nabwo buheebwe omugisha! Hosaana, iwe ori ahaiguru owa Herebe!
11Atyo Yesu ahika omuri Yerusalemu, ataaha omuri Nyaruju ku aheza kwetegyereza ebyamwo byona, bushangwa bwaizire, ashohora aza Beetaniya hamwe n'eikumi na babiri.
Yesu okukyeena omutiini
(Mat. 21:18-19)
12Eizooba ryakuratsireho, ku baabaire nibaruga Beetaniya, yaagira enjara. 13Ku yaareebeire hangahari omutiini gwine amababi, yaaza kureeba yaaba guriho ebijuma. Kwonka ku yaaguhikire, yaashanga gutaine kindi kureka amababi gonka, ahabw'okuba bukaba butari bunaku obu emitiini eyaniramu. 14Atyo agugira ati: Nihakabure owaarya aha bijuma byawe obundi! N'abatendekwa be baamuhurira naagugira atyo.
Yesu okubinga abarikutundira omuri Nyaruju
(Mat. 21:12-17; Luk. 19:45-48; Yoh. 2:13-22)
15Ku baahikire Yerusalemu, Yesu yaataaha omuri Nyaruju, yaatandika kubingamu abaabaire nibatundiramu n'abarikuguriramu; yaajumika emeeza z'abaabaire nibahingisa empiiha, n'ebitebe by'abarikuguza enkombe; 16kandi tiyaikiriza muntu weena kuraba omuri Nyaruju aine eki ayekoreire. 17Atyo abeegyesa naabagira ati: Beitu shi tikirahandiikirwe ngu: Enju yangye eryayetwa ey'okushabirwamu ab'amahanga goona? Mbwenu imwe, ka mugihindwire eryaya ry'abambuzi!
18Ekyo ku kyagwire abahongyerezi abakuru n'abahangu b'eiteeka omu kutu, baateeraho kusherura oburyo bw'okumukwata; kwonka baamutiina, ahabw'okuba abantu bakaba nibatangaarira ebi arikwegyesa.
19Omwabazyo ku gwakiikire, Yesu n'abatendekwa be baaruga omu rurembo.
Ebi yaayegyeise aha kwoma kw'omutiini
(Mat. 21:20-22)
20Omu kasheeshe ku baabaire nibahingura, baareeba omutiini guri gwomeire kimwe n'emizi. 21Petero yaijuka, yaagira Yesu ati: Mwegyesa, reeba omutiini ogu okyeenire, gwomire! 22Yesu yaagarukamu ati: Mugume mwesigye Ruhanga. 23Buzimazima nimbagambira nti: Omuntu weena ku yaakugambira orushozi oru ati: Tsinduka, oyenagye omu nyanja, ataine kubangaanisa mu mutima gwe, kwonka naikiriza ku eki yaagamba kirikwija kubakwo, kiryamukorerwa. 24N'ahabw'ekyo nimbagambira nti: Kyona eki murishaba nimweshengyereza, mwikirize ngu muryakitunga, haza kwo muryakiheebwa. 25Kandi ku muriba mwemereire nimushaba, mwaba mwine eki murikufa n'omuntu weena, mumusaasire; Shoimwe ow'omu iguru abone naimwe kubasaasira ebibi byanyu. [ 26Kwonka mu muraabe mutasaasiire, Shoimwe ow'omu iguru naimwe taribasaasira bibi byanyu.]
Abayudaaya okubuuza Yesu ahi yaihire obushoboorozi
(Mat. 21:23-27; Luk. 20:1-8)
27Ku baagarukire Yerusalemu, Yesu yaagyendagyenda omuri Nyaruju; abahongyerezi abakuru n'abahangu b'eiteeka n'abakuru omu ihanga baija ahu ari, 28baamugira bati: Ni bushoboorozi ki oburikukukoresa ebi? Nari n'oha owaakuhaire obwo bushoboorozi obu orikukoresa? 29Yesu yaabagarukamu ati: Naanye ka mbabuuze ekibuuzo kimwe; ku murangarukyemu, naanye niinyija kubagambira ahi naihire obushoboorozi oburikunkoresa ebyo. 30Mbwenu okubatiza kwa Yohaana kukaruga ahari Ruhanga nari omu bantu? Nimungarukyemu. 31Batyo bakihakanaho bonka bati: Ku turaagire tuti: Kukaruga ahari Ruhanga, naija kutugira ati: Kandi shi, mukangira ki kumwikiriza? 32Mbwenu shi tugire ngu, kukaruga omu bantu? Baatiina abantu, ahabw'okuba boona bakaba nibaikiriza ku buzimazima Yohaana yaabaire ari omurangi. 33Nabo nikwo kugarukamu Yesu bati: Titurikumanya. Yesu nawe nikwo kubagira ati: Naanye tindikwija kubagambira obushoboorozi oburikunkoresa ebyo.
Enfumu y'abaatsigiirwe omusiri gw'emizaabibu
(Mat. 21:33-46; Luk. 20:9-19)
હાલમાં પસંદ કરેલ:
Mar 11: RKK2008
Highlight
શેર કરો
નકલ કરો
Want to have your highlights saved across all your devices? Sign up or sign in
The Bible with Apocrypha in Runyankore-Rukiga, new revised joint translation © The Bible Society of Uganda, 2008.
