Malu Menza 1
1
Yezu udi ulaya bapostolu Mueyelu wa Tshijila
1Teyofile musuibue,
Mu mukanda wanyi wa kumpala,#1.1 Tangila Luk 1.1-4; mukanda wa Lumu lua Disanka mufunda kudi Luke udi bu tshitupa tshia kumpala, mukanda wa Malu Menza bu tshitupa tshibidi tshia mukanda umuepele. mvua mulonde malu onsu avua Yezu muenze, kabidi mulongeshe, biangatshile ku mbangilu, 2too ne ku dituku divuabu bamuambule mu diulu. Bangabanga ne kubandamu, uvua mumanyishe bapostolu, bavuaye musungule ku bukole bua Mueyelu wa Tshijila,#1.2 bavuaye musungule ku bukole…: bakuabu badi bandamuna ne: bavuaye mumanyishe ku bukole bua…nansha ne: dituku divuabu bamuambule ku bukole bua Mueyelu wa Tshijila. bivuabu ne bua kuenza. 3Kunyima kua lufu luende, uvua mumuenekele bapostolu misangu ne misangu, bua kubajadikila ne: ndi ne muoyi. Uvua mudileje kudibu matuku makumi anayi, ubambila malu a pa Bukalenga bua Mvidi Mukulu. 4Dituku dikuabu, pavuaye usomba nabu ku mesa, kubakandikaye ne:
— Kanumuki mu Yerushalayime. Kadi nuindile dipa dimvua munumanyishe, divua Tatu mulaye.#1.4 pavuaye usomba nabu ku mesa: bakuabu badi bandamuna amu ne: pavuaye nabu. — Bua miaku ayi ya Yezu, tangila Luk 24.49. 5Yowanane uvua utua bantu mu mayi. Kadi matuku makese aa, nebanutue nuenu munda mua Mueyelu wa Tshijila.#1.5 Yowanane: ke Yowanane-Batiste. Tangila Mat 3.11; Mar 1.8; Luk 3.16; Yow 1.33.
Yezu udi ubanda mu diulu
6Bantu bavua bunguile pavua Yezu, kumukonkabu ne:
— Mfumu, newenzulule bukalenga bua Izrayele mpindiewu anyi?#1.6 Fuanyikija ne Am 9.11-12; Luk 19.11.
7Yezu kubandamuna ne:
— Tatu ke udi ujadika meba ne bikondu ku bumfumu buende. Nuenu kanuena ne bua kubimanya to.#1.7 Fuanyikija ne Mar 13.32. 8Kadi nenupete bukole, diba dianupuekela Mueyelu wa Tshijila. Nanku nenumone mua kujadika malu anyi mu Yerushalayime, mu ditunga dijima dia Yudeya ne dia Samariya, kabidi too ne ku ndekelu wa buloba.#1.8 Fuanyikija ne Mat 28.19; Mar 16.15; Luk 24.47-48.
9Yezu mumane kuamba nanku, kubandaye mu diulu, bobu batangile. Ke divuba kujika Yezu, kabayi bamumone kabidi to.#1.9 Fuanyikija ne Mar 16.19; Luk 24.50-51.
10Batshivua batangile muvua Yezu ubanda mu diulu, ke bantu babidi bavuala bilamba bitoke#1.10 Fuanyikija ne Luk 24.4. kubamuenekela diakamue, 11kubakonka ne:
— Bena Ngalileya, munudi bimane apa batangile mulu nanku mbishi? Yezu ewu, udibu bumushe kunudi, bambule mu diulu, neapingane kabidi, mushindu unudi bamumone ubandamu.
Matiyase udi upingana Yudase
12Ke bapostolu kumuka ku mukuna wa mitshi ya Olive, kupingana ku Yerushalayime. Mukuna awu uvua mushilangane ne Yerushalayime mutantshi wa kilometre amu bu umue.#1.12 Tangila Mar 11.1 ne diumvuija . 13Bamane kufika ku Yerushalayime, kubandabu mu tshibambalu tshia nzubu tshia kulu, muaba muabu basomba misangu mivule. Bobu abu ke Petro, Yowanane, Yakobe ne Andre, Filipe ne Tomase, Bartolmayi ne Matayi, Yakobe muana wa Alfayi, Simone muluidi wa ditunga, ne Yuda muana wa Yakobe.#1.13 Fuanyikija ne Mat 10.2-4; Mar 3.16-19; Luk 6.14-16. 14Bonsu bavua muoyi umue, bananukila mu ditendelela, pamue ne bakaji bakuabu, kabidi ne Mariya, mamuende wa Yezu, ne bana babu ne Yezu.
15Matuku makese apita, bena ditaba bamane kusangila bu lukama ne makumi abidi, ke Petro kujuka, kubambila ne:
16— Bana betu, miaku idibu bafunde mu Mikanda ya tshijila ivua ne bua kukumbana. Mueyelu wa Tshijila uvua mudianjile kumanyisha mukana mua Davide malu a Yudase,#1.16 Fuanyikija ne Mis 41.10. muludiki wa bantu bavua bakuate Yezu. 17Yudase uvua wa mu tshisumbu tshietu, ukuata netu mudimu wa mushindu umue.
18(Muntu awu uvua musumbe budimi ne makuta avuabu bamufute bua bualu bubi buvuaye muenze. Kuponaye mu budimi amu, mutu panshi. Mubidi wende kutayika, bia munda bionsu kuya panshi. 19Bena Yerushalayime bonsu kumvua bualu ebu. Ke kuinyikabu budimi abu mu muakulu wabu ne: “Akeldama,” mmomumue ne: “Budimi bua mashi.#1.19 Tun. 18-19: tangila Mat 27.3-8.”)
20Ke mudibu bafunde mu mukanda wa misambu ne:
“Nzubu wende ashale munda mutupu,
muntu kasombimu.”
mBafundemu kabidi ne:
“Muntu mukuabu apingane pa muaba wende.#1.20 Mis 69.26; 109.8.
21-22Nanku mbimpe muntu umue adisange netu bua kujadika ne: Mfumu Yezu mmubiike ku bafue. Muntu awu ikale umue wa ku bantu batuvua nabu diba dionsu, pavua Mfumu Yezu wendakana netu, bituadija katshia Yowanane wamutua mu mayi, too ne ku dituku divuabu bamumushe kutudi, baye nende mu diulu.#1.22 wamutua mu mayi: bakuabu badi bandamuna ne: watua bantu mu mayi. Tangila Mat 3.16; Mar 1.9; Luk 3.21. — Baye nende mu diulu: tangila 1.9 ne diumvuija .
23Nanku kufilabu mena abidi: Yozefe, uvuabu binyike ne: Barsabase, nansha ne: Muakane; kabidi ne Matiyase. 24Ke bonsu pamue kutendelela, bamba ne:
— Mfumu, wewe udi mumanye muoyi wa muntu yonsu. Nanku ku babidi aba utuleje uudi musungule. 25Apingane Yudase mu mudimu wa bupostolu. Bualu Yudase mmuushiye, muye ku wende muaba.
26Kutshinkabu bua kupeta muntu umue ku babidi aba. Kupetabu Matiyase. Kumusakidilabu ku bapostolu dikumi ne umue.
હાલમાં પસંદ કરેલ:
Malu Menza 1: TSH96
Highlight
શેર કરો
નકલ કરો
Want to have your highlights saved across all your devices? Sign up or sign in
Bible avec Livres Deutérocanoniques en Tshiluba © Société Biblique de la R. D. Congo, 1996
