Luka 20
20
Wuo wʼafalusi la wambo wa Yesu
(Mt 21.23-27; Mk 11.27-33)
1Mbilʼemo, akiʼndʼolakaka banto nda Tempelo, ko aolongoza bosako wʼolotsi, nkanga ya joso la bakoci bʼenkanda la bingambi baoyʼelʼende, 2baolokela, Otosangele, okela baoyiʼane nda lotomo ja na; ko okokaaki mpifo ene na? 3Aolaamba, Njifuola inyo joi limoko, ko lonsangele liko. 4Inelo eki Yoane eki lima loola nkina limʼelʼanto? 5Ko baotefelana nkʼiyo mongo wete, Nga tosanga, Lima loola, ende ifotuola, Ntaloimeza lae? 6Lolo nga tosanga, Limʼelʼanto, bantʼauma bifotonya bikenje, elʼiyo baosilʼimeza wae Yoane aki boteli. 7Nkako baolamba wae bafea limʼeki inelo eko oyaka. 8Ko Yesu aolasangela, Lʼemi mposangelʼinyo lotomo lokelʼemi baoyiʼane.
Esonganya ea lisala ja bekoli bia vina
(Mt 21.33-46; Mk 12.1-12)
9Ko aanga losangelʼanto esonganya ene; Bontʼomo onaki lisala ja bekoli bia vina, ko aosombya liko ele baesanyi, ko aocwa ndʼese ea lifaya ko aotemʼeko ejingi mongo. 10Aki ekeke endeji ielaka, aotoma bokwala ele baesanyi ba lisala wae bokayʼende liondo jʼamuka ba lisala; lolo baesanyi baolokunda njiji, ko baolouteya o mpampa. 11Aolutʼotoma bokwalʼomo; ko baolokundʼende, ko baolosotsa, nkako baolouteya o mpampa. 12Ko aotoma omo owʼasato. Iyo baolokotʼende mpota ko baoloboka ndʼanza. 13Nkako bomongo lisala ja bekoli bia vina aokela, Mpanga nkele na? Njifotoma bonʼokami olangema, nkina bifofikʼende. 14Lolonde aki baesanyi oenakʼende, baotefelana, One wete bosangoli; kela toome, mpanga lisango liyaleme likiso mongo. 15Ko baolooza lima lisala, nkako baolooma ci. Mpanga bomongo akele lʼiyo na? 16Ende ifoya ko ifomelenganya baesanyi bako, ko ifokitsa bantʼankina lisala liko. Akiʼyʼokaka, baokela, Ngoko o nye! 17Lolo aolalenda te, aokela, Joi line likoci lile ngamo,
Ekenje eki batongi otonaka,
Nkʼeko eoyalema ncina ea jango nda likono?
18Wengiʼonto oyokwa ndʼekenje eko ifotatenya, lolo ngʼeko eokwelʼonto, ende ifominywa.
Baomeka Yesu ndʼeloko ea mpuci ea Kaisala
(Mt 22.15-22; Mk 12.13-17)
19Bakoci bʼenkanda la nkanga ya joso basaki lokandʼende limpo, lolo baangaki banto. Elʼiyo baokotola wae atefelaki esongayʼene la ncina ekiyo. 20Ko baolosisimya, ko baotoma nongi, wete banto bafombaki wae bale ba ci, wae bongʼende jongo ndʼetefeelo ekae, kela bolekya ndʼakata la mpifo ea gouverneur. 21Ko baolouola, Bolaki, iso tea wete otefela ko olaka o ci, ko wʼofa la likali, lolo olaka mboka ea Nzakomba la nsosolo; 22eji lʼiso wae tofute Kaisala mpuci, nkina lifeji? 23Lolo aokotola jongo likiyo, ko aolakela, 24Lonjeneya denalio; ele lʼekoza lʼekotelo ea na? Iyo baolamba, Ea Kaisala. 25Ko ende aolasangela, Lokaya Kaisala toma ta Kaisala, ko lokaya Nzakomba toma ta Nzakomba. 26Ko ndʼaiso bʼanto ntabakuseya ongʼende jongo ndʼetefeelo ekae, lolo baoyala o wai, ekʼiyʼokamwaka la nkalo ekae.
Basadoke la eetswelo
(Mt 22.23-33; Mk 12.18-27)
27Basadoke bamo, wete iyʼanjangana ekunjwelo limʼiwa baoya elʼende, ko baolouola, 28baokela, Bolaki, Mose ao-tokotela wae nga botomolo owʼontʼomo aowa, aocika waji nkʼona, bokune okae ifokola waji oko, ko aotele botomolo bana. 29Baki eko baende nsambo bʼisʼemoko. Owa joso aokola waji, ko aowa, nko bona. 30Lʼowʼafe, 31ko lʼowʼasato baolokola, ko lʼiyʼauma nsambo ngoko, ko baowa, ntabacika bona. 32Ndʼafeka bʼakiyo bauma bomotʼoko aowa. 33Ndʼekunjwelo eʼawei, ende ifoyalema waji owa na? Ekiʼyʼauma boatakʼende waji.
34Yesu aolakelʼiyo, Bana bʼekekʼene baalana, ko balekyama nda liala, 35lolonde iyʼatangema beji lokita ndʼekekʼeko ko la ndʼekunjwelo limʼawei, bafoalana ko bafolekyama nda liala, 36elʼiyo bafowe, ko bafokuseya lowa, elʼiyo bale o fio la bikima ko bale bana ba Nzakomba, elʼiyo bana bʼekunjwelo. 37Lolo nda ncina ea bawei, wae bakunjwa, Mose mongo eneya ngoko nda nsango eki itamba, etangʼende Nkolo, Nzakomba ea Abalayama la Nzakomba ea Yisaka, ko la Nzakomba ea Yakoba. 38Lolo ende afa Nzakomba ea bawei, lolo ea bayoike; ele bauma baika nkʼelʼende. 39Bakoci bʼenkanda bamo baolokela, Bolaki, ngoko otefela lʼolotsi mongo. 40Limʼako iyo ntabakuseya louolʼende wuo bomo.
Yesu ale bonʼowa Dawidi ngamo?
(Mt 22.41-46; Mk 12.35-37)
41Lolonde ende aolakelʼiyo, Banto basanga wete Masiya ale bonʼowa Dawidi ngamo? 42Ele Dawidi mongo asanga ndʼonkanda wa Njemba,
Nkolo aotefeela Nkolo ekami,
Kitase nda lo lokami jʼelome
43Elaka nko njile baini bake ebonga eʼakakʼakawe. 44Dawidi mongo aolotanga Nkolo, na ale bonʼokae ngamo?
Yesu alotsa bakimi bakoci bʼenkanda
(Mt 23.1-36; Mk 12.38-40)
45Aki bantʼauma okozakʼende, aotefeela bakimiʼakae wete, 46Lofonga lolota bakoci bʼenkanda, nkʼiyʼalanga lolanda ndʼenkoto biʼotale, ko basima bisambelo nda bisombe bia ndomba, ko la mbata ya joso nda basunangonga la wiji wa joso nda bilambo; 47wete nkʼiyo bay ole tolombe ta bituka, ko baonde beondo biʼotale la jasi ja losimo. Iyo bifumbama lʼumbelo eleki ndekola.
હાલમાં પસંદ કરેલ:
Luka 20: LOL87
Highlight
શેર કરો
નકલ કરો
Want to have your highlights saved across all your devices? Sign up or sign in
La Bible en Lomongo © Societe Biblique de la R.D. Congo 1987
