Toango 18
18
Boondo wa Abalayama ndʼeloko ea Sodomo
1Ko Yawe aolenyʼelʼende nda beele bia Mamele, nkʼakitasʼende nda wiso wʼilombe ya bito, ndʼekeke ea wane. 2Aosangya baiso bakande, ko aolenda, ko bala baende basato baolemala nda joso likande. Akiʼndʼaenaka, aolikumwa lima wiso wʼilombe ya bito, wae akumane lʼiyo, ko aokusama ndʼamoci, 3ko aokela “Nkolo ekami, nga njotana losimo ndʼaiso bake, tolekanake bosali oke nye. 4Kela bakoyele isisi yʼasi, ko losolʼakakʼakinyo, ko lome jomo fele ndʼase bʼotamba. 5Mpanga njele isisi ya toma ta ndala, kela lokemya baonge bakinyo, ko ndʼafeka lambokende, ekʼinyʼokitaka ele bosali okinyo.” Ko iyo baokela, “Kelaka ngoki wʼosangaka.”
6Ko Abalayama aocwʼele Sala ndʼilombe ya bito la lomolomo, aokela, “Kola baeza basato ba farine limpo, nyilʼeko ko yokelʼekate.” 7Nkako Abalayama aolikumwa ndʼotonga wa nyama, ko aokola bona owa ngombo owa boju lʼolotsi, ko aokayʼosali, ko ende aolambʼeko nkaola. 8Nkako Abalayama aokola banteka lʼaele, ko la ngombo ekiʼndʼaelezaka, ko aolalekeza toma toko; ko alʼiyo ndala, ende aolemala ntutama ndʼase bʼotamba. 9Iyo baolouola, “Sala waji oke ale nko?” Ko aolamba, “Bala, ale ndʼilombe ya bito.” 10Ko aokela, “Njifokutela we andiela ekeke, ko Sala waji oke ifoota bona owa jende.” Ko Sala aoloka joi liko ndʼafeka ba wiso wʼilombe ya bito. 11Abalayama la Sala baokita bingambi, baokita mbula iuke, ko Sala aolambya jena nsonge elenge endenʼamato. 12Ko Sala aoseka tola ndʼotema, aokela, “Emʼokita ekota, ko nkolo ekami ale engambi ngoko, mpanga njenʼesengo?” 13Ko Yawe aokela Abalayama, “Sala ayoseke lae, ko akela, ‘Kambʼemi njifoota bona nsosolo, emʼokita ekota ngoe?’ 14La joi limo lileki bolo wae Yawe afokeleya liko? Ndʼekeke endezamaki njifokutela we, ko Sala ifoota bona owa jende.” 15Lolo Sala aolangana, aokela “Emi nciseka nye.” Lolo ende aokela, “O nye, lolo osekaki, o nsaseka.”
16Bantʼako baolemala wae bakende limʼeko, ko baolelela Sodomo; ko Abalayama aocwʼoacindeza. 17Nkako Yawe aokela, “La ndisele Abalayama joi liʼemʼokela nde? 18La ncina wete Abalayama ifoyalema booci wʼonene la wa mpamba mongo nsosolo, ko banto ba bise biuma biʼokili bifosakema bokako wa swa o lʼende. 19Emi njosonʼende la ncina wete alake banʼakae la banto bʼilombe ikae ndʼafeka bakae, wae balongane nda mboka ea Yawe la nkakela ea baoyi ba momo la ba njelama: ko la ngoso Yawe akokeza Abalayama bilaka bikiʼndʼocikelakʼende.” 20Nkako Yawe aokela, “Eki lilelo ja Sodomo la Amola okakaka, ko bobe bokiyo bolekola, 21emi njifokitelʼeko wae njene nkina baokela o ngoki lilelo okitaka elʼemi; ko ngʼafa ngoko njifea.” 22Ko baokengwana limʼeko, ko baokenda wiji wa Sodomo: lolo Abalayama aokongemala nda joso ja Yawe. 23Nkako Abalayama aolotutamela, ko aolokela, “Kamba wifomelenganya ba liongi la bantʼobe bolongo? 24Nkina banto ba liongi bale ndʼonanga ntukʼitano, la wifomelenganya bonangʼoko, ko ofaikyʼonanga ndʼeloko ea ba liongi ntukʼitano bale nkʼeko? 25Joi lifosongi la we wae okela ngoko, wete oome ba liongi la bantʼobe bolongo. La ngoko ba liongi basangana nda nsisoza lʼantʼobe! Joi liko lifoonge la we mo! La Juge ea bakambo bʼokili bouma afaokela nde joi lindeji?” 26Ko Yawe aokela, “Ayaka ntane nda Sodomo banto ba liongi ntuku itano, njifoikya bonanga bouma ndʼeloko ekiyo.” 27Abalayama aokela, “Emi bontʼole wucu lʼetoko kika, mmekʼotefela la Nkolo; 28nkina bakutswa banto batano nda ntuku iko itano ya banto ba liongi, la wifomelenganya bonanga bouma lʼekutswelo eʼanto nkʼatano?” Aolamba, “Mpaomelenganya bonangʼoko nga ntanʼeko banto ba liongi ntuku inei lʼatano.” 29Lenkina aolotefeela wete, “Nkinʼotanʼeko banto ntukʼinei mo!” Ko aokela, “Mpaofitʼonanga ndʼewelʼea banto ntukʼinei.” 30Ko aokela, “Mbonda wae Nkolo afaoka nkele nga nkongotefela. Nkina banto ntuku isato batanema eko mo!” Aolamba, “Ayaka ntanʼeko ntuku isato, mpaofitʼonanga.” 31Ko aokela, “Bala, nkongotefela la Nkolo. Nkina ntukʼife batanema eko mo!” Ende aokela, “Mpaofita bonanga ndʼewelʼea ntuku iko ife.” 32Nkako aokela, “O Nkolo, tondemwake mpanga ntefele lenkina nkʼete feelo ene emokokika. Nkina ba liongi batanema jom mo!” Aaolamba, “Mpaofitʼonanga ndʼewelʼea ba liongi jom.” 33Ko aki Yawe osizaka losoola la Abalayama aokenda, ko Abalayama aoluta ndʼolaʼokae.
હાલમાં પસંદ કરેલ:
Toango 18: LOL87
Highlight
શેર કરો
નકલ કરો
Want to have your highlights saved across all your devices? Sign up or sign in
La Bible en Lomongo © Societe Biblique de la R.D. Congo 1987