Toango 17
17
Lina ja Abalama jolenzama nda Abalayama. Ntatena ea nsonge
1Aki Abalama okitaka mbula ntukʼibwa lʼibwa, Yawe aolenya ele Abalama, ko aolokela, “Emi nde Nzakomba ea mpamba euma. Kendaka nda joso likami, ko yalemʼonto ofa la likambo ja lofeli. 2Ko njifolemba bokolʼokami ndatsʼemi la we, ko njifokofuleza bana bauke mongo.” 3Ko Abalama aokwa mbosama, ko Nzakomba aolokela, 4“Bala, bokoloʼokami bolembama la we, ko wifoyalema ise ea etukuluku ea beoci. 5Ko lina like lifaotangema lenkina Abalama, lolo lina like lifotangema Abalayama, elʼemi njokila ise ea etukuluku ea beoci. 6Ko njifokofuleza bana bauke mongo, ko njifokela beoci biʼanto limʼele we, ko rois bifiela limʼele banaʼake. 7Ko njifolembʼokolo bokami ndatsʼemi la we, la banaʼake ndʼafeka bake nda biotswelo bikiyo biuma, wete bokolo wa seko, wae njaleme Nzakomba ekawe, ko lʼea banaʼake ndʼafeka bake. 8Ko njifokoka we lʼanaʼake ndʼafeka bake bokiliʼone boyala we bofaya, ko lʼokili wa Kanana bouma, boyale lisango ja seko; ko emi njifoyalema Nzakomba ekiyo.” 9Ko Nzakomba aokongʼotefela la Abalayama wae, “We, wifofonga bokolo bokami, we lʼanaʼake ndʼafeka bake nda biotswelo bikiyo biuma. 10Bone wae bokoloʼokami bolembʼemi la we lʼanaʼake ndʼafeka bake: wengi bona okinyo owa jende ifotenama nsonge. 11Inyo lifotenama nda wunyu wa nsonge, ko ete nelo eko ifoyalema lotaza ja bokolo bolembama ndatsʼemi lʼinyo. 12Nda biotswelo biuma, wengi bana bʼaende bakinyo, banyangʼokita bembile mwambi, bifotenama nsonge. Lʼende ootswa ndʼilombe ike, ko lʼende osombama lʼosoloʼoke limʼelʼofaya, mpeka la afa ndʼooci bokinyo. 13Ende ootswa ndʼilombe ike, ko ende osombama lʼosoloʼoke ifotenama nsonge. Ko lotaza ja bokolo bokami lifoyala nda wunyu bokinyo, wete bokolo wa bikeke la bikeke. 14Ko jende otatenama ifozama limʼelʼanto bakae, elʼende aolembola bokolo bokami.”
15Ko Nzakomba aokela Abalayama, “Salai waji oke, ofauta otanga lina likae Salai, lolonde lina likae lifoyalema Sala. 16Njifosakelʼende bokako wa swa; ko joi limo wete, njifokokaya bona owa jende lʼende. Njifosakela Sala bokako wa swa, ko ifoyalema nyango ea beoci biʼanto, ko rois ya banto bifoya limʼelʼende.” 17Nkako Abalayama aokwa mbosama, ko aoseka, aokela ndʼotema, “Kamba bona ifootswa ele bonto okita mbule bonkama nde? La Sala, okita mbula ntukʼibwa, ifootʼona nde?” 18Ko Abalayama aokela Nzakomba, “Bolotsi wae Yisamaele aike lʼoya nda joso like!” 19Nzakomba aokela, “Afa ngoko nye, lolo Sala, waji oke, ifokootela bona owa jende, ko wifilʼende lina Yisaka. Njifolembʼokoloʼokami lʼende, lʼanaʼakande ndʼafeka bakande, wae boko boyale bokolo wa bikeke biuma seko. 20Ko njokokoza ndʼeloko ea Yisamaele. Bala njifosakelʼende bokako wa swa, ko njifolofunzolʼana, ko njifolofuleza bana bauke, ifoota rois jom lʼife: ko njifokelʼende booci wʼonene. 21Lolo njifolembʼokolo bokami la Yisaka, oe Sala okootela lʼekekʼene nda mbula eoya.” 22Akiʼnde osizaka lotefela lʼende, Nzakomba aolulela limʼele Abalayama.
23Nkako Abalayama aokola Yisamaele bona okae, ko la bakwala bauma baotswaki ndʼilombe ikae, nkina bako basombamaki la baumba bakande, wae wengi jende limʼaende bʼilombe ya Abalayama, do aotena nsonge ikiyo, o nda mbilʼeko mongo, elengʼeki Nzakomba osangelakʼende. 24Abalayama aokita mbula ntukʼibwa lʼibwa akiʼnde otenamaka nsonge. 25Ko Yisamaele, bona okae owa jende, aokita mbula jom lʼisato akiʼnde otenamaka nsonge. 26Mbilʼeko mongo Abalayama la bonʼokae owa jende Yisamaele baotenama nsonge, 27iyo la baende bauma bʼilombe ikae, wae iyʼaotswaki ndʼilombe ikae, ko lʼiyʼasombamaki lʼaumba bakae limʼelʼafaya; baotenama nsonge iyo lʼende bolongo.
હાલમાં પસંદ કરેલ:
Toango 17: LOL87
Highlight
શેર કરો
નકલ કરો
Want to have your highlights saved across all your devices? Sign up or sign in
La Bible en Lomongo © Societe Biblique de la R.D. Congo 1987